Read Sangir YEREMIA 39 Bible Online

YEREMIA 39 - Sangir bible

YEREMIA 39

¹Su wul᷊ang kapul᷊one taung kasione su parentan Zedekia ratung Yehuda, i Nebukadnesar datum Babel dingangu kal᷊awọu wuntuangu mẹ̌sasekẹ diměnta ringangu něngalo Yerusalem.

²Su tanggalẹ̌ sio wul᷊ang kaěpạ e taung kapul᷊oěsane su parentan Datu i Zedekia, meselu soa e nitěnehu sědụ,

³dingangu Yerusalem nipul᷊aho.[23] Tangu kal᷊awọu mapapangkatu ratum Babel diměnta kụ tamai kimaiang su Tukadu Pasěllangeng Tal᷊oara. Su tal᷊oaran sire e piạ i Nergal-Sarezer, i Samgar Nebo, i Sarsekim, těmbonangu walagu ral᷊ohong istana, i Nergal-Sarezer Rabmag dingangu manga pěrwira lai wal᷊ine.[24]

⁴Piạ e Ratu i Zedekia ringangu kal᷊awọu sordadone nakasilo kěbị karariadi ene, i sire e mẹ̌tẹ̌tawakal᷊i tumal᷊angu watangeng mẹ̌timona Wal᷊ang Yordan hěbi ene lai. I sire něngal᷊ạ dal᷊eng limiung winal᷊aengu istana, bọu ene siměbang bọu tukadu pasěllangeng kụ něhěmpụ meselẹ̌ darua su tampạ ene.

⁵Arawe sordadom Babel měnẹ̌nahusu si sire ringangu něnamẹ si Zedekia su wal᷊ang Yerikho. Bọu ene i sie niwawa sarang anun Datu i Nebukadnesar su soang Ribla su wanuang Hamat, kụ bọu ene nipěngěnsakengu hukumang papate.

⁶Su soa ene lai manga anạ e nipate su těngom matane, dingangu kal᷊awọu mapapangkatu wanuang Yehuda mal᷊aing pateěng.

⁷Nal᷊iung ene i Zedekia niloẹ matane, wọu ene niwěntung dingangu niwawa sarang Babel.

⁸Těntal᷊ang ene tau Babel něnutung bal᷊en datu, ringangu manga wal᷊eng kawanua, ore lai napakagholangu meselu Yerusalem.

⁹Pengensueěnge kawanua kụ bědang ene su soa, dingangu apan taumata kụ seng timal᷊ang sarang sěmběkan tau Babel, nihengkẹ sarang Babel kahiang Nebuzaradan, těmbonangu wuntuangu Babel.

¹⁰Sěmbahageang bọu kawanua kụ limembong kakasiange kụ tawẹ arětạ e, nitěntange su Yehuda, ringangu nionggotangu waelu anggorẹ̌ dingangu rahami.

¹¹Datu i Nebukadnesar seng něngoro si Nebuzaradan, těmbonangu wuntuange, naněbangu titane ini:

¹²”Dakọ e pẹ̌deạ si Yeremia, dingangu riagateko i sie pakapia. Abe kapurai i sie; koạko apan dẹ̌dorongange.”

¹³Tangu i Nebuzaradan dingangi rẹ̌dua pěrwirane marangẹ e, i Nebusyazban dingangi Nergal-Sarezer ore lai kal᷊awọu pěrwirang Babel lai wal᷊ine,

¹⁴sěngkapẹ̌ngal᷊ạ si siạ bọu rělahu istana. Bọu ene iạ e nisarakang si Gedalya anạ i Ahikam dingangu pulung i Safan, kụ harusẹ̌ měnonda si siạ pakapul᷊ẹ dingangu sal᷊amatẹ̌. Tangu natanạ e iạ su tal᷊oarang kawanua.

¹⁵Su tempong iạ bědang nitahungkụ su rělahu istana, MAWU e něngoro si siạ

¹⁶apẹ̌bẹ̌bera si Ebed-Melekh tau Sudan ene u MAWU Kụ Limembong Kawasa, Ruatang Israel, nẹ̌bera kirini, ”Kerẹewe sen Takụ niwera kal᷊imona, Iạ e sarung mapakarěntang hombang baugu soa ini, dingangu wal᷊inewe kal᷊ahumpia. I kau e sarung makasilo hal᷊ẹ̌ ene nariadi.

¹⁷Arawe Iạ, MAWU sarung měngěllung si kau. I kau tawe sarung i sarakang su taumata apang ikẹ̌katakụ u.

¹⁸I kau e tawe pateěng, batụu Iạ e sarung mapakasal᷊amati kau. Niawanu e sarung masal᷊amatẹ̌ ual᷊ingu i kau e mạngumbala si Siạ. Iạ e, MAWU, kụ seng nẹ̌bisara.”