Read Sangir YEREMIA 4 Bible Online

YEREMIA 4 - Sangir bible

YEREMIA 4

¹MAWU e něhengetang, ”Tau Israel, kereu i kamene mapulu mẹ̌bal᷊ị, pěmpẹ̌bal᷊ị e su anu-Ku. Hipeko kal᷊imona kal᷊awọu mahang duata Takụ i kẹ̌kawěnsing e, ringangu pẹ̌těngkasatiako si Siạ e.

²Kereu i kamene mẹ̌salu su ral᷊ungu areng-Ku e, dingangu mẹ̌biahẹ̌ matul᷊idẹ̌, adilẹ̌, dingangu matěngadẹ̌ e, ute kal᷊awọu wansa e kai mẹ̌dorong si Siạ e, tadeạu Takụ al᷊amateng i sire e ringangu i sire sarung mẹ̌dalo si Siạ.”

³ MAWU e nẹ̌bera su kal᷊awọu tumanạu Yehuda ringangu Yerusalem, ”Hal᷊ẹ̌ko ěntananu wědang ta nilẹ̌hal᷊ẹ̌ e; kumbahang měnawuhu wine su tampạ nituwoěngu sasuang piạ hanggange.

⁴Umbelẹko pẹ̌darianding kamene ringangu Iạ e MAWUnu, dingangu watangengu e koạ kětạeng baugu Iạ, e i kamene tumanạu Yehuda ringangu Yerusalem. Kamagengu tala, ute ral᷊angehẹ̌-Ku e kai mạsongkahẹ̌ dingangu rul᷊ibutu kere putung kụ tawe kasasẹ̌buang i sai-sai. Kěbị ene sarung mawuạ su watangengu e, ual᷊ingu kal᷊awọu kakanoạu raral᷊akị e.”

⁵Pẹ̌tiụkon slompretẹ̌ e su kěbị banua! Pěmohangko pakal᷊ahẹ dingangu pakaihạ. Dolohẹ̌ko tumanạu Yehuda e ringangu Yerusalem e, sarang manga soa piạ tatěndạ e.

⁶Těbọko raral᷊engang sarang Sion, bukidu MAWU e, pakasahawụko měmpěnguntang, abe katanạ marěmasẹ̌ e. MAWU e kai maparěntang kasasigěsạ dingangu kaghagholọ masaria e wọu sěmběkan sawěnahẹ̌.

⁷Mẹ̌sul᷊ungu singa simẹ̌bang bọu pẹ̌kakěmbuniange kerene lai seng pinẹ̌buakengu manga měngangěnsue wansa kụ diměnta mapakawinasang Yehuda e. Mangạ e soang Yehuda e sarung makoạ niopehu tampạ kụ sarung tawe pẹ̌tumanakeng u taumata e.

⁸Ual᷊ingu ene, sangị e ringangu pěmpẹ̌kěndungke, pěmpěluhẹeng karong tatialạem pěndal᷊utu e. Batụu ral᷊angehu MAWU e kai mẹ̌dẹ̌daraẹ tawẹ lai limẹ̌ohọ bọu Yehuda e.

⁹MAWU e něhengetang, ”Su ěllo ene, mararatu e ringangu mapapangkatẹ̌ e sarung měngkapěndụ, manga imang e měmpẹ̌gẹ̌guhẹ̌, dingangu manga nabi e měmpẹ̌hěkosẹ̌.”

¹⁰Bọu e iạ nẹ̌bera, ”MAWU Kụ Limembong Karangetange, i Kau e seng něngakal᷊ẹ̌ tau Yehuda ringangu tumanạ u Yerusalem! I Kau e mẹ̌bera u sarung piạ pẹ̌darame, kaiso orasẹ̌ ini e niawang kami e kinapal᷊ěndihangu peda e.”

¹¹Tempone sarung sumongo e, tau Yehuda ringangu tumanạ u Yerusalem e, kai makahombang habarẹ̌ u, anging matětị bọu kěhu l᷊inggi e, kai kạtiụ e mẹ̌tẹ̌timona si sire e. Anging ene e wal᷊inewe anging biasa, kụ kětạeng mapạtěllạ u wal᷊ěka e,

¹²kaiso kawe anging matoghasẹ̌ kụ sarung duměnta ual᷊ingu parentang MAWU e hala waugu mapakanawong hukumang su taumata-Ne.

¹³Kakělla, sekẹ e suměpụ kere winawa. Manga karetan sekẹ e mẹ̌sul᷊ungu anging suwu-suwu, kụ manga kawal᷊one limembong kasahawụ e wọu manụ kasiahe. Oh, masilakạ i kitẹ! Mawinasa i kitẹ!

¹⁴Yerusalem, děmẹko karal᷊akị bọu naungu e, tadeạu i kau e iapakasal᷊amatẹ̌. Kai kạděngụ e karal᷊akị su ral᷊ungu naungu ene kạdaresọ?

¹⁵Bọu soan Dan, dingangu lai wọu wawul᷊urang i Efraim e, kai ruměnta manga rarolohang e měmpẹ̌bawa habarẹ̌ dal᷊akị e.

¹⁶I sire měgěllịu ingate su kal᷊awọu wansa, dingangu mapạkasingkạ su tumanạ u Yerusalem, u sekẹ e[2] seng kạděntane wọu soa marau. I sire sarung měmpěmansagu pẹ̌sasekẹ su kal᷊awọu soan Yehuda e,

¹⁷dingangu měmpěliwung Yerusalem e kerẹe taumata měndariagạ manga waelẹ̌ e. Kěbị ene nariadi e, kai ual᷊ingu tau Yehuda e kai němpěnggohaeng su MAWU. MAWU e seng nẹ̌bisara.

¹⁸Yehuda, seng i kau e hala naparěntang sawěda e su watangengu. Hundugu pẹ̌bawiahu ringangu kakanoạ u e nakakariading kěbị kasasigěsạ nakasusụ naungu e.

¹⁹Kai apạ e matědụ dal᷊ungu naungku, seng tamakararagẹ̌ iạ e su kasasigěsạ. Iạ e seng tamakaumal᷊ẹ̌ mẹ̌těngkaremasu watangeng, pẹ̌pusoku e tụtaghiawahẹ̌ su ral᷊ungu sěbạ, batụu takụ i karingihẹ̌ tingihu slompretẹ̌, dingangu bal᷊ěmbengu wansagu pẹ̌seketang.

²⁰Darěntan sawěda e mẹ̌tẹ̌tatal᷊ětuhẹ̌ mẹ̌gěnggolọ kěbị soa e. Pẹ̌darasengangku e sěngkělěndịu nịgagholang, manga lakụ e nịpẹ̌gaghehẹ.

²¹Angerẹ bue sarung takụ kasahidiang taumata kụ lulịbutuʼm pẹ̌sasekẹ e? Sarang angerẹ hinon takụ i karingihẹ̌ tingihu slompretẹ̌ kụ gụgaghahẹ tangu?

²²MAWU e něhengetang, ”Apạe kal᷊ongong taumata-Ku e, i sire e tawe nakakiral᷊a si Siạ. I sire e mẹ̌sul᷊ungu manga rariọ tul᷊ine makakětị e, kụ tawẹ ěnnane sarang kạdodọ; pelesa su karal᷊akị, tamakapěnanarimạ u apang mapia e.”

²³Mataku e i panda sarang banua e, kakěllaěng tawẹ lohone ringangu narol᷊ohẹ̌, iạ e rimal᷊ingara sarang langị, tawẹ apa kụ deng suměnnang.

²⁴Kẹ̌kasiloku e wul᷊ude ringangu manga wukide kụ mararangẹ e kụ kai mạhunggěguhẹ̌ marasai e.

²⁵Su siloku e tawẹ taumatane, manga manụ u winalangeng e seng nasue nahuntěllạ.

²⁶Ěntana mahuntawa e, nakoạ kěhu l᷊inggi, manga soa e naghagholang nẹ̌papangěndụ, ual᷊ingu ral᷊angehu MAWU Ruata e su taumata-Ne. (

²⁷MAWU e něhengetang u, dunia e kai sarung makoạ kěhu l᷊inggi, kai i Sie e tawe mapakaupungene marihutu.)

²⁸Dunia e sarung lumahunsusa, langị e maělịu kararěndung. MAWU e seng něhengetang dingangu tawe měmal᷊ui karaki-Ne. I Sie seng něngal᷊ạ hanggose kụ tawe kạdiongeng sumohọ sarang sěngkal᷊empang.

²⁹Kinaringihẹ̌ giul᷊u wuntuangu piạ kawal᷊one ringangu měmamitị, nakakatal᷊angu apan taumata sụsaenga. Apang kěhu e sẹ̌suěkang i sire, manga wukidẹ̌ batu e lẹ̌awikang i sire. Kal᷊awọu soa e nipěhione, tawẹ apa kụ deng mapulu mẹ̌tanạ sene kapia.

³⁰Ei Yerusalem, i kau seng tiněntang, kụ tawe hinong makakoạ apa! Baugu apa měluheng pakeang mahamụ kụ mělěgahẹ̌ batangeng dingangu wul᷊aeng ore lai sal᷊aka, ringangu měmuhang dal᷊endạ su kěngkondạu mata? Tawẹ gunane i kau mělěnggihẹ̌ badangu, batụu apạeweng kụkěndagi kau e seng mạdiring kau e, katewe měmal᷊ị mẹ̌nawụ singongonu.

³¹Iạ e makạdingihẹ̌ tingihu sal᷊indoro, kere sěngkatau wawine kụ měmantelẹ̌ e; kere sěngkatau mahuala wuhụ e měhěndingu anạ humotong; kerene kakiạ u Yerusalem kụ masěsẹ sasindakenge. Limane lẹ̌ul᷊uhang kụ i sie rụdal᷊umpasiangu, ”Kạěngkěhang iạ e — iạ e pateěng u rumarokạ!”