Read Sangir YEREMIA 40 Bible Online

YEREMIA 40 - Sangir bible

YEREMIA 40

¹MAWU e nẹ̌bisara si siạ sarětạeng i Nebuzaradan, těmbonangu wuntuang ene, něliwiru iạ su Rama. Iạ e seng niwawa paịsene kạbawěntung dingangu kěbị taumata wal᷊ine wọu Yerusalem dingangu Yehuda kụ seng nihengkẹ kere tinaweng sarang Babel.

²Tẹ̌mbonangu wuntuang ene e nẹ̌kui si siạ hala ringangu nẹ̌bera, ”MAWU Ruatanu e seng němatakụ mẹ̌deạu mapakaghalangu wanua ini.

³Orasẹ̌ ini hal᷊ẹ̌ ene seng nikoạʼE, ual᷊ingu wansanu e seng nẹ̌dosa ringangu tawe rumararingihẹ̌ si Sie.

⁴Takụ lukaěng běntung ini e wọu l᷊imanu kụ takụ pělokang i kau. Kamagengu i kau e mapulu, i kau e wotonge tumol᷊e sarang Babel, dingangu iạ e sarung mẹ̌hiking si kau. Kai kamagengu i kau e mạdiri, tawe mẹ̌kapura. Su kạguwạu wanua ini e i kau e wotonge mẹ̌daral᷊eng baewe sarang apa tuhụ kapulunu.”

⁵Těntal᷊ang tawe rimẹ̌dal᷊eng, i Nebuzaradan nẹ̌bera, ”Kamagengu mapulu, i kau e wotonge mẹ̌sul᷊e sarang anung Gedalya anạ i Ahikam dingangu pulung i Safan, kụ seng nihengkẹ u ratum Babel nakoạ guběrnurẹ̌ u manga soang Yehuda. I kau wotonge matanạ dingange su tal᷊oarang kawanua, arau měnsang makoạ sarang apa tumol᷊e kapulunu.” Bọu e i sie něngonggọu sinasạ kaěng dingangu poroseěng si siạ, dingangu napakawalang iạ e tamai.

⁶Iạ e nakoạ sarang anung Gedalya su Mizpa, ringangu natanạ dingange su tal᷊oarang kawanua kụ nitěntang su wanuang Yehuda.

⁷ Datum Babel seng něhengkẹ i Gedalya nakoạ guběrnurẹ̌ su Yehuda baugu mẹ̌parenta su kěbị taumata apam bědang mạtanạ su Yehuda, kụ kai taumata apang kasusaěnge. Sěmbahageang bọu apang pěrwira dingangu prajuritẹ̌ bọu Yehuda apang tawe nẹ̌samal᷊ẹ su tau Babel, nakaringihẹ̌ hal᷊ẹ̌ u pělahengkẹ si Gedalya ene.

⁸Tangu i Ismael anạ i Netanya, i Yohanan anạ i Kareah, i Seraya anạ i Tanhumet, dingangu manga anạ i Efai wọu Netofa, ringangu i Yezanya wọu Maakha rimal᷊eng dingangu apan taumatan sire sarang Gedalya su Mizpa.

⁹I Gedalya nẹ̌bera si sire, ”I kamene tawahal᷊uasu matakụ kụ mẹ̌samal᷊ẹ su tau Babel. Balạekere kạtatanạ e su wanuang kitẹ ini, dingangu kariadị e ěllangu ratum Babel. Iạ e tawahal᷊uasu ghuměnggang u i kamene e sarung masal᷊amatẹ̌.

¹⁰Katanạ e suapan soa kụ ikẹ̌kapulung kamene, ringangu měngkate pěnampung dingangu pěndesọ anggorẹ̌, bua-bua ringangu lanan zaitun. Iạ sẹ̌saku e sarung matanạ su Mizpa ringangu tumimbang kawanua e kereu tau Babel e ruměnta ramahi.”

¹¹Těntal᷊ang ene kěbị taumatang Israel kụ ene su wanuang Moab, Amon dingangu Edom, dingangu wanuạ ewe lai wal᷊ine, nakaringihẹ̌ u ratum Babel seng napakawalang sěmbahageang bọu tau Israel kụ mạtanạ su Yehuda, dingangu lai i sie seng něhengkẹ i Gedalya nakoạ guběrnurẹ̌.

¹²Ual᷊ingu ene i sire naněntang u apan tampạ kụ suapang i sire e seng pinẹ̌tal᷊ei, wọu ene nẹ̌sul᷊e kapia sarang Yehuda. I sire riměnta sarang anung Gedalya su Mizpa, ringangu něnampung u anggorẹ̌ dingangu manga bua-bua mal᷊awọ-l᷊awọ.

¹³Samuring ene, i Yohanan dingangu manga pěrwira kụ tawe nẹ̌samal᷊ẹ su sekẹ, diměnta su anung Gedalya su Mizpa,

¹⁴kụ nẹ̌bera, ”Masingkạ i kau e u i Baalis datung Amon seng něngoro si Ismael piněmate si kau?” Arawe i Gedalya e tawe mangimang su waweran sire.

¹⁵Mase ringangu marěmasẹ̌ nẹ̌berạ e i Yohanan si Gedalya, ”Mapiawe iạ tamai měmate si Ismael; tawẹ u sarang sěngkatau kụ masingkạ u i sai nẹ̌koạ ene. Unụ e i sie harusẹ̌ i wala pěmate si kau? Ene e sarung makakariading kěbị tau Yehuda kụ seng nẹ̌tampung sini ringangu, nẹ̌tal᷊ei kạpia, ringangu hal᷊ẹ̌ ene sarung makagholọ kal᷊awọu kawanua kụ bědang nal᷊embe su Yehuda.”

¹⁶Arawe i Gedalya e simimbang, ”Kumbahang! Kụ nipaul᷊ịu e mạanung Ismaelẹ̌ ene tawẹ katěngade!”