Read Sangir YEREMIA 42 Bible Online

YEREMIA 42 - Sangir bible

YEREMIA 42

¹Samuring ene e, kěbị taumata, ghaghuwạ, darodọ, dingangu manga pěrwira, nasowa lai i Yohanan anạ i Kareah dingangi Azarya anạ i Hosaya riměnta

²su anuku kụ nẹ̌bera, ”Tuang, kerẹewe i Tuang nakasilo hala, i kami e nạung kal᷊imona e mal᷊awọ, ini e seng kate nal᷊ěmbe mahal᷊i. I kami e mělẹ̌harapẹ̌ u i Tuang deng mapulu mẹ̌kal᷊iomaneng i kami e su MAWU Ruata kụ sẹ̌sěmbaěng i Tuang. Kal᷊iomanenge wue i kami e apan nal᷊ěmbe sini,

³tadeạu MAWU Ruata e mapakal᷊ahẹ si kami walạewe sarang apa i kami e ringangu apa hinong koateng i kami.”

⁴Iạ e sumimbang, ”Mapiawe kerene. Iạ e měnarimạ dorongu ene. Iạ e sarung mẹ̌kal᷊iomaneng su MAWU Ruatang kitẹ, dingangu waewe apa sasimbangʼE, sarung takụ i habarẹ̌ kěbị, manilaing sarang sěmbaụ e tawe takụ buniang si kamene.”

⁵I sire nẹ̌bera si siạ, ”I kami e mẹ̌dorong si Tuang pẹ̌kal᷊iomaneng su MAWU Ruatang kitẹ, u i kami e mapulu rumaringihẹ̌ si Sie, tadeạu kakakoạ i kami e makoạ mapia. Kụ mapia arau ral᷊akị tatanataʼm MAWU e, man tuhukang i kami. Balạete MAWU makoạ sahidi su katěngade ringangu satia si kami, kereu i kami e tawe tumuhụ patikụ tita kụ nionggọ u MAWU si kami e kahian Tuang.”

⁷Mapul᷊o ěllo tuhụ e MAWU e nẹ̌bisara si siạ.

⁸Tangu iạ e nẹ̌kui si Yohanan dingangu manga pěrwirane ringangu kěbị taumata wal᷊ine kụ sěngkakarěnta ringang i sie.

⁹Iạ e nẹ̌bera si sire, ”I kamene něngoro si siạ piněhabaru rorong i kamene su MAWU, Ruatang Israel. Kụ MAWU e něhengetang,

¹⁰’Kamagengu i kamene mapulu tatapẹ̌ mạtanạ su wanua ini, Iạ sarung měhengkẹ i kamene, wal᷊inewe mapakanawo; Iạ e sarung mapakatindagi kamene, bal᷊inewe mapakal᷊eing kamene. Iạ e masusa naungku marasai ual᷊ingu seng naparěntan silakạ si kamene.

¹¹Kumbahang delaing matakụ su ratum Babel ene. Iạ e ene su tal᷊oarang kamene waugu mẹ̌tul᷊ung dingangu měměllọ i kamene wọu kawasane.

¹²Ual᷊ingu Iạ e piạ tatal᷊ěntụ-Ku si kamene, Iạ e sarung mapakariading datum Babel tadeạu kuměndagi kamene ringangu mapakawalang kamene mapul᷊ẹ. Iạ e kai MAWU kụ seng nẹ̌bisara.’ ”

¹³Arawe i kamene kụ bědang mạtanạ su Yehuda e kumbahangbe lumewang su MAWU Ruatang kamene ringangu kumbahang mẹ̌bera u, ”I kami e mạdiri mẹ̌tanạ su wanua ini. I kami e mapulu makoạ sarang Misirẹ̌ kụ matanạ su wanua ini. Paị sene i kami e sen tawe lai makahombang pẹ̌sasekẹ, sen tawe lai makaringihẹ̌ tingihu slompretẹ̌ kụ mẹ̌kẹ̌kui mẹ̌sekẹ, dingangu semben tawe lai makahombang karal᷊unusẹ̌.” Kereu i kamene mapulu-pulu makoạ sarang Misirẹ̌ kụ mẹ̌tanạ paịse, kụ kai ini e tatanatang MAWU Limembong Kawasa, Ruatang Israel, baugi kamene:

¹⁶”Pẹ̌sasekẹ dingangu karal᷊unusẹ̌ kụ i kẹ̌katakụ i kamene e sarung měnahusu si kamene sarang Misirẹ̌, dingangu i kamene sarung mate su wanua ene.

¹⁷Kěbị taumata e kụ apang mẹ̌tẹ̌tungkětịu makoạ sarang Misirẹ̌ dingangu matanạ paị sene, sarung mate su ral᷊ungu pẹ̌seketang, arau mate ual᷊ingu karal᷊unusẹ̌ arau sahindạ. Tawẹ u sarang sěngkatau kụ mal᷊iwirẹ̌ bọu hombang kụ Takụ sarung i aparěnta si sire, kěbị e sarung mate.

¹⁸Kerẹewe Iạ, MAWU Ruatang Israel napatompẹ u ral᷊angehẹ̌ dingangu wuntal᷊ẹ̌-Ku su tumanạ u Yerusalem, kerene lai sarung Takụ ipakatompẹ u wuntal᷊ẹ̌-Ku si kamene apang nakoạ sarang Misirẹ̌. Taumata e sarung měngkawintogẹ̌ makasilo si kamene, i kamene sarung hinakaneng, dingangu areng i kamene e sarung paketang kere laane. I kamene sarung tawe makasilo kapia ěntanang kamene.”

¹⁹Bọu e iạ nẹ̌bera kapia, ”MAWU e seng nẹ̌parenta tadeạu i kamene apang bědang nal᷊ěmbe su Yehuda e tawe makoạ sarang Misirẹ̌. Ual᷊ingu ene iạ e měhabarẹ̌ si kamene ini u,

²⁰i kamene seng nẹ̌koạ sěmbaụ pẹ̌sasal᷊a ghẹ̌guwạ. I kami e mẹ̌dorong tadeạu iạ mẹ̌kal᷊iomaneng su MAWU Ruatang kitẹ baugi kamene, dingangu i kamene e nẹ̌diandi waugu měndal᷊engu kěbị apang nipěhengetangu MAWU.

²¹Ini e iạ seng něhabaru tatanatang MAWU, Ruatang kitẹ si kamene, kai i kamene e mạdiri tumuhụ tatanata ene.

²²Ual᷊ingu ene, pẹ̌tahěndungko: su wanua kụ i kẹ̌kapulung kamene rěntaěng mẹ̌deạu měnatapẹ̌ sene, i kamene e sarung mate su ral᷊ungu pẹ̌seketang, arau ual᷊ingu karal᷊unusẹ̌ arau sahindạ.”