Read Sangir YEREMIA 44 Bible Online

YEREMIA 44 - Sangir bible

YEREMIA 44

¹MAWU e nẹ̌bisara si siạ mạanung kal᷊awọu tau Israel kụ mạtanạ su Misirẹ̌, su soang Migdol, Tahpanhes, Memfis, dingangu su wanua su sěmběkan timuhẹ̌.

²Seng ini e tatanataʼm MAWU Kụ Limembong Kawasa, Ruatang Israel, si sire, ”I kamene hala e seng nakasahidi hombang kụ Takụ pinakaěnsạ su Yerusalem dingangu kěbị soa wal᷊ine su Yehuda. Sarang orasẹ̌ ini e manga soa ene wědang naghaghoghahẹ̌ tawẹ u tumatanạ e.

³Hal᷊ẹ̌ nariadi ual᷊ingu tumanạ e nẹ̌dosa, hakịu nakakariading Iạ limangehẹ̌. I sire němpaněmbang gaghěllị dingangu němpẹ̌kal᷊iomaneng su manga mahang duata kụ bědang tawe sasěmbaěng i sire hala, arau kahiang kamene arau i upung i kamene.

⁴Iạ e sidutu mẹ̌děndolohu manga ěllang-Ku e manga nabi, kụ mẹ̌sẹ̌sěding i sire mẹ̌kẹ̌koạ karal᷊akisẹ̌ Takụ ikẹ̌kawěnsing ene.

⁵Kai i kamene e mạdiri rumaringihẹ̌ dingangu tawe měnanaung ene. I kamene e tawe mapulu měngědo mẹ̌koạ dal᷊akisẹ̌, kụ měnarakangu sasěmba su manga mahang duata.

⁶Kai ual᷊ingu ene hakịu Iạ e mapasongkangu pědu ringangu ral᷊angehẹ̌-Ku baugu manga soang Yehuda ringangu manga ral᷊eng su Yerusalem. Kěbị e Takụ nitutung hakịu nal᷊embe kate manga ěnạ e dingangu nal᷊inggi kerẹewe i kẹ̌kasilo ini e.

⁷Kụ ini Iạ e, MAWU Kụ Limembong Kawasa, Ruatang Israel, nakiwal᷊o unụ e i kamene mẹ̌kẹ̌koạ hal᷊ẹ̌ makạkarěntan silakạ masaria ene su watangengu. I kamene mapulu tangu mapakawinasang kěbị taumata — esẹ, bawine, manga rariọ, dingangu pěgol᷊u manga rariọ — e hakịu tawẹ u sarang sěngkatau wọu wansanu e mal᷊ěmbe?

⁸Unụ e i kamene e mẹ̌kẹ̌koạ be hal᷊ẹ̌ kụ makạkal᷊angehẹ̌ si Siạ e tangu? I kamene riměnta ringangu natanạ su Misirẹ̌, kụ deng kere wanua raghị si kamene e, wọu ene i kamene e měnẹ̌němba mahang duata ringangu měnẹ̌narakangu sasěmba su manga mahang duataʼm banua ene! Kai i kamene mapulu mapakagholọ u watangeng i kamene tadeạu i kamene hinakaneng u patikụ bansa su dunia ringangu arengu e i pakẹ kere laane?

⁹Kai seng niwul᷊e i kamene kal᷊awọu kararal᷊akisẹ̌ kụ nikoạ su ěntanang Yehuda ringangu su manga ral᷊eng su soang Yerusalem kahiang manga i upung i kamene, kahiang manga ratung Yehuda ringangu manga kawing i sire, ore lai i kamene ringangu manga kawing i kamene tangu?

¹⁰Kaiso sarang sěhěllo ini e i kamene e tawe mẹ̌těngkasanạ u watangeng i kamene e. I kamene e tawe měngadatẹ̌ si Siạ dingangu tawe mẹ̌biahẹ̌ tuhụ tita kụ Takụ nionggọ si kamene ringangu su manga i upung i kamene.

¹¹Ual᷊ingu ene, Iạ MAWU Kụ Limembong Kawasa, Ruatang Israel sarung dumokạ si kamene ringangu mapakagholangu kasěllahu Yehuda.

¹²Dingangu kamagengu wọu tau Yehuda kụ nal᷊embe piạ u těbe puluang sarang Misirẹ̌ kụ matanạ paị sene, i sire e sarung mawinasa kěbị. I sire kěbị, gaghuwạ darodọ, sarung mate su Misirẹ̌ su pẹ̌seketang arau ual᷊ingu karal᷊unusẹ̌. Taumata e sarung makapěndang matakụ makasilo si sire ringangu sarung měhinakang si sire. Areng i sire e sarung i pakẹ makoạ laane.

¹³Kerẹewe Iạ e něhukung u Yerusalem, kerene lai i sire sarung Takụ hukunang i sire apaʼm měmpẹ̌tẹ̌tanạ su Misirẹ̌. I sire e sarung mate su pẹ̌seketang, ual᷊ingu karal᷊unusẹ̌ arau sahindạ.

¹⁴Bọu tau Yehuda kụ nal᷊ěmbe, apang kụ sem bọu nakoạ sarang Misirẹ̌ mẹ̌deạu mẹ̌tanạ paịse, kụ tawẹ u sarang sěngkatau e mal᷊iwirẹ̌ arau mẹ̌biahẹ̌. Tawẹ u sarang sěngkatau wọʼi sire e sarung mẹ̌sul᷊e sarang Yehuda, maningbe hal᷊ẹ̌ ene e tumanịu i lẹ̌ěnning i sire e. Mamben těnggadẹ̌, tawẹ apa kụ deng makapẹ̌bal᷊ị sul᷊iung kětạeng tumatal᷊ang pirang katau.”

¹⁵Mase mal᷊awọ kahěngang taumata němpẹ̌děnta su anuku, kụ kai kěbị manga esẹ apang kụ masingkạ u kawinge něnarakangu sasěmba su manga mahang duata, dingangu kěbị manga wawine kụ kạpahundarisị e sene, narekeng lai tau Israel kụ mạtanạ su Patros, su sěmběkan timuhẹ̌ bọu Misirẹ̌. I sire e nẹ̌bera si siạ,

¹⁶”I kami e mạdiri rumaringihẹ̌ apang kụ niweranu e si kami e su arengu MAWU.

¹⁷Patikụ apang kụ seng nirianding kami e, sarung koateng i kami e lai. I kami e sarung tatapẹ̌ měnarakangu sasěmba su Ratun Sorga wawine, dingangu měměmbingu anggorẹ̌ e kere sasěmba si sie kerẹewe wiasane kẹ̌koateng su manga soang Yehuda, dingangu su manga ral᷊eng su Yerusalem kahiang manga i upung i kami, kahiang manga ratu, ringangu manga mapapangkatẹ̌ těmbonangu kawanuang kami ringangkeweng kami e hala. Su tempo ene i kami e mạnaghuang kaěng mal᷊awọ, i kami e masorogạ, dingangu tawẹ konsange apa.

¹⁸Kaiso nanětạ bọu i kami e nangědo něnarakangu sasěmba su Ratun Sorga wawine, dingangu semben tawe lai něněbohu anggorẹ̌ kere sasěmba si sie, i kami e kinakawusangu kěbị e; taumatang kami e něngkapate su pẹ̌seketang dingangu ual᷊ingu karal᷊unusẹ̌.”

¹⁹Bọu ene manga wawine ene e němpẹ̌bera u, ”Manga kawingi kami e mal᷊uasẹ̌ mạengu i kami e mẹ̌koạ borotẹ̌ awẹu Ratun Sorga wawine ringangu měnutung sasěmba ore lai měnarakangu sasěmba anggorẹ̌ baugu mahang duatang kami ene.”

²⁰Baugu kěbị manga esẹ dingangu wawine kụ simimbang kerene, iạ e mẹ̌bera,

²¹”Apa i kamene mạngěnna u MAWU e wěga wue arau seng niwul᷊eng manga sasěmba kụ nisěmba su manga soang Yehuda ringangu su manga ral᷊eng su Yerusalem kahiang mang i upung i kamene, kahiang manga ratu ringangu mapapangkatʼi kamene e, ore lai kawanuaʼm banua ini, ringangu kahiang kamene hala e tangu?

²²MAWU e tawe makararagẹ̌ lai makasilo si kamene mẹ̌gěllịu sasěmba su manga ruata wal᷊ine. Kakanoạ i kamene e ral᷊akisẹ̌ dingangu mal᷊amuhụ. I kamene e seng nẹ̌dosa su MAWU ringangu tawẹ satiane su kěbị manga tita-Ne. Ual᷊ingu ene orasẹ̌ ini e lai wanuanu e seng nagholang hakịu seng tawe kinapẹ̌tampakeng kapia, dingangu arenge nipakẹ kere laane. Taumata nakasilo e nakapěndang natakụ.”

²³

²⁴Bọu e iạ něhabarẹ̌ su taumata ene kěbị, něngalembọ e su manga wawine, u MAWU Kụ Limembong Kawasa e něhengetang kirini su apan tau Yehuda kụ apaʼm mạtanạ su Misirẹ̌, ”I kamene ringangu manga kawing i kamene e seng nẹ̌salu su Ratun Sorga wawine u i kamene sarung měnutung sasěmba dingangu měněmbang akẹ u anggorẹ̌ si sie. Riandinu ene e seng nipakasěhụ i kamene e. Kụ kerenẹ e! Koạ e kěbị apang nirianding kamene ene!

²⁵

²⁶Arawe orasẹ̌ ini e raringihẹ̌ko apang kụ Takụ i pěhengetang si kamene, ei tau Israel su Misirẹ̌: Iạ e kai MAWU, nẹ̌salu ringangu areng-Ku mawantugẹ̌ e u i kamene seng tawe lai Takụ i pakawala mẹ̌pakẹ u areng-Ku waugu mẹ̌koạ sěmbaụ diandi. I kamene tawe wotonge mẹ̌bera u, ’Iạ e mẹ̌salu su arengu Ruata kụ biahẹ̌!’

²⁷Iạ e mẹ̌deạ dal᷊engu i kamene e masilakạ dingangu tawẹ karal᷊unsemahe, sarang i kamene mate kěbị, baẹ su pẹ̌seketang, arau ual᷊ingu sahindạ.

²⁸Kětạeng pirang katau samatang masal᷊amatẹ̌ dingangu masul᷊e kapia sarang Yehuda wọu Misirẹ̌. Tangu kěbị taumatang Yehuda kụ apang su Misirẹ̌ e sarung makasilo kai apa waweran sire arau kai hengetang-Ku e nipakal᷊ahẹ.

²⁹Iạ sarung maparěntang hombang si kamene su tampạ ini waugu mapakal᷊ahẹ si kamene u hukumang kụ Takụ ilẹ̌ol᷊ang baugi kamene e, mamben těngadẹ̌ sarung mariadi.

³⁰ I Hofra ratung Misirẹ̌ e sarung Takụ i sarakang su manga sědụ apang mapulu měmpěmate si sie, mẹ̌sul᷊ungkeweng Iạ e měnarakang i Zedekia ratung Yehuda si Nebukadnesar ratuʼm Babel, sědụ e kụ němate si sie ene.”