Read Sangir YEREMIA 47 Bible Online

YEREMIA 47 - Sangir bible

YEREMIA 47

¹ Kal᷊imonan datuʼm Misirẹ̌ něnekẹ Gasa, MAWU e nẹ̌bisara si siạ mạanuẹng banuang Pilistin.

²MAWU e něhengetang, ”Kakělla, akẹ e nelehẹ̌ bọu sěmběkan sawěnahẹ̌ dingangu nẹ̌boang kere sal᷊ụ kạpělẹ̌bane něngelọ banua ringangu manga ral᷊ohone, kal᷊awọu soa ringangkeweng apan tumanạ e. Taumata e sarung mẹ̌kẹ̌kiạ u makịtul᷊ung dingangu kal᷊awọu kawanua e rụdal᷊umpasiang.

³I sire sarung makaringihẹ̌ tarěntung u kawal᷊o, tingihu tatarangkal᷊u kareta, ringangu tingihu rodane tụtahěte. Taumata maghurang e sarung mělome, dingangu sen tawe mẹ̌tiněnang anạ e.

⁴Seng nịdating tempone tau Pilistin e i pakawinasa kěbị, hakịu Tirus dingangu Sidon semben tawe makaěbạ tatongka. Iạ e MAWU, sarung mapakawinasang kěbị tau Pilistin kụ nal᷊embe wọu Kreta.

⁵Tau Gasa e nihombangengu susa naung masaria; tau Askelon němpěmou. Sarang tempo sude tau Pilistin kụ nal᷊ěmbe e měngkai turusẹ̌ lụl᷊ahunsusa?

⁶I kamene e mẹ̌mansagẹ̌ u, ’Sarang tempo sude i kau e měngalo, ei pedang MAWU? Pẹ̌sul᷊ẹ e su homanu kụ katanạ e sene pakarěmmasẹ̌!’

⁷Kaiso Wotonge i sie e mal᷊enehẹ̌, kereu Iạ e seng nangoro takadeạ u pěnekẹ Askelon dingangu tumanạu wiwihu apeng?”