Read Sangir YEREMIA 48 Bible Online

YEREMIA 48 - Sangir bible

YEREMIA 48

¹ Seng ini e niwerang MAWU Kụ Limembong Kawasa, Ruatang Israel mạanung Moab, ”Kạěngkěhang tumanạ u Nebo, soane kụ naopehẹ̌ e! Kiryataim nipul᷊aho, ringangu těndạ e kụ matoghasẹ̌ e nịgaghoghahẹ̌ hakịu tumanạ e něngkamea;

²nasuẹ e i lẹ̌lesạ u Moab. Sědụ e seng němul᷊aho Hesybon dingangu paị sene i sire e seng něhingidu mẹ̌deạu mapakaupung kal᷊awọu kawanuang Moab. Kal᷊awọu tingihẹ̌ su soang Madmen sarung i pakarěmmasẹ̌, batụu soa ene e sarung aloěngu manga sordado.

³Daringihẹ̌ko! Tumanạ u Horonaim měmpạmansagẹ̌, ’Kawawinasa! Kaghagholọ!’

⁴Moab seng naupu! Kiaratagu manga rariọ darodọ e kinaringihẹ̌ sarang Zoar.

⁵Daringihẹ̌ko tingihu kakiạ su ral᷊eng sumaka sarang Luhit, dingangu tingihu ral᷊umpasiang su ral᷊eng duměsung sarang Horonaim.

⁶Angkuěng i sire, ’Lighạ e! Ambangeko niawanu! Tal᷊angko kere kalide maghaěng su wanua l᷊inggi!’

⁷Moab! I kau e mạngumbala karal᷊ingkidu e ringangu kakakalạu. Kai arawe orasẹ̌ ini e i kau hala sarung i kawatạ. I Kamos, mahang duatanu e, dingangu manga imang, dingangu manga mapapangkate sarung i hengkẹ sarang pinamembangeng.

⁸Patikụ soa e sarung magholang, kụ tawẹ u sarang sěngkatau kụ sarung mal᷊iwirẹ̌. Bal᷊ane ringangu wimbaenge patikụ e sarung masue. Iạ e, MAWU kụ seng něhengetang.

⁹Suangko watu tatiala waugu tau Moab, u tawẹ kararěngụ e lai wanua ene sarung i pakagholọ marasai. Kal᷊awọu soane e sarung maopehẹ̌ dingangu tawẹ u sarang sěngkatau e sarung mẹ̌tanạ paịse.”

¹⁰Kai piạ bontoge su taumata kụ tawe mẹ̌kakoạ munara wọu anung MAWU ringangu kạguwạu naung. Kai piạ bontoge su taumata kụ měnawụ pẹdane kụ měmate.

¹¹MAWU e něhengetang, ”Nạung deng kạngerẹ Moab e mẹ̌bẹ̌biahẹ̌ mal᷊enehẹ̌. Den tawẹ banạu i sie nihengkẹ sarang pinamembangeng. I sie mẹ̌sul᷊ungu akẹ u anggorẹ̌ kụ niwala pinakal᷊ěnạ dingangu tawe niwěmbing su tampạu anggorẹ̌ bal᷊ine. Anggorẹ̌ e wědang mawěngi ringangu matemang.

¹²Kaiso, sarung marěnta tempone Iạ měngoro tadeạu Moab i wěmbing kere anggorẹ̌, kụ apan tampạe apakakoạ tawẹ lohone ringangu wẹ̌kaěng.

¹³Moab sarung kumewạ naunge si Kamos, kụ mahang duatan sire e mẹ̌sul᷊ungu tau Israel něngkanawo naunge su Betel nạung lẹumbalaěng i sire e.

¹⁴Kereapa wue kụ manga esẹ u Moab kawe wahani mẹ̌bera u, ’I kami e kawe tahapẹ̌sekẹ, sordado mal᷊ahasa kụ seng niwanikateng su ral᷊ungu pẹ̌seketang?’

¹⁵Moab dingangu manga soane seng nipakagholọ, dingangu apang manga rariọ mangangudạ e kapapiange seng nịpapate. Iạ e seng něhengetang. Iạ e kai ratu, MAWU Kụ Limembong Kawasa.

¹⁶Hombang masaria waugu Moab seng su těngoʼn tukadẹ̌, kụ sen tạ kararěnane lai i sie magholọ.

¹⁷Ei kamene apang něgara kụ i pělẹ̌lampungu Moab, kụ masingkạ u hal᷊ẹ̌ u katatelenge, pělutuko waugi sie! Pẹ̌berako, ’U Moab sen tawẹ lai kawasane, kasěllahe ringangu katoghase seng natạdise!’

¹⁸Ei tumanạ u Dibon, lintụko wọu tampạ u lẹ̌adateng; kụ kaiangko su ěntana kụ su wowong awul᷊ẹ̌. Batụu měnggagholang banuang kamene Moab e seng narěnta, kụ sarung měnggolang kěbị těndạ u.

¹⁹I kamene apang mạtanạ su Aroër, darisị e su wiwihu ral᷊eng kụ pakatitike! Pakiwal᷊oko si sire apang timal᷊angu wadang i sire, kụ nakapěllọ, ’Kụ kai apạ e nariadi tangú?’

²⁰I sire sarung sumimbang, ’U Moab e seng nanawo, kụ naral᷊akisẹ̌, kụ ual᷊ingu ene lungkaneko i sie. Bohangko su kanandụ u Sal᷊ụ u Arnon, u Moab kai seng nagholang.’ ”

²¹”Hukumang sen nipakanawo su manga soa su wanua matenene mararangẹ: su wowong Holon, Yahas, Mefaat,

²²Dibon, Nebo, Bet-Diblataim,

²³Kiryataim, Bet-Gamul, Bet-Meon,

²⁴Keriot dingangu Bozra. Kal᷊awọu soang Moab, marau ringangu marani, seng nihukung.

²⁵Katoghasu Moab, seng kinapědi, ringangu kawasane nipakagholọ. Iạ e MAWU seng něhengetang.”

²⁶MAWU e něhengetang, ”Koạko Moab sarang makoạ tahawukaneng, ual᷊ingu i sie mẹ̌ngobotu watangenge si Siạ. I sie sarung mẹ̌těngkal᷊unggi su ral᷊ungu mutane, ringangu tẹ̌tahul᷊ẹ̌geěngu taumata.

²⁷Kạngerẹ tau Israel bal᷊inewe nạung seng tẹ̌tahul᷊ẹ̌geěngu Moab, dingangu i pẹ̌pahumbisara tạbidạ-bidạu i sire seng kinatangkạ mapia ringangu manga tahatako?

²⁸I kamene pamanuang Moab, těntangke kal᷊awọu soang kamene, ringangu kěngkatanạ e su manga wukidu watu kere manụ paluma mẹ̌kẹ̌koạ sal᷊ehe su l᷊engehu těndihange.

²⁹I kamene mambeng maobotẹ̌ tawẹ sihinge. Iạ e seng nakaringihẹ̌ nạung apạ e maobotẹ̌, naunge marangẹ, makịtikạ, dingangu makịkaimang i kamene.

³⁰Iạ e MAWU, masingkạ u kal᷊aobotu. Bisaranu e tawẹ lohone samatang, dingangu kakanoạu e tawẹ mangal᷊ene.

³¹Ual᷊ingu ene Iạ e sarung kumiạ pakaihạ-ihạ baugi kamene kěbị dingangu waugu apan taumata su Kir-Heres, niupunangu soang kamene.

³²Iạ e sarung něngalembong kumiạ u tumanạ u Sibma sul᷊ungu tumanạ u Yaezer. Soang Sibma mẹ̌sul᷊ungu sasuang anggorẹ̌ kụ manga lelange nẹ̌darakị sarang sěmběkan Laudẹ̌ Nate karaung Yaezer. Kaiso orasẹ̌ ini wua-buang musungu měhangu dingangu wuang anggorẹ̌ e seng nipakaupu.

³³Gion dal᷊uasẹ̌ e seng napurạ bọu wanuang Moab kụ matawa e. Iạ e napakapontodu laelehu akẹ u anggorẹ̌ e wọu papěhaseng u anggorẹ̌ e; selain tawẹ apa taumata kụ mẹ̌kẹ̌koạ anggorẹ̌ e ringangu měmpẹ̌gẹ̌gion dal᷊uasẹ̌ e.

³⁴Tau Hesybon dingangu Eleale mạhungkiạ dingangu kakiạ e kẹ̌karingihẹ̌ sarang Yahas, dingangu kẹ̌karingihẹ̌ lai kahian sire wọu Zoar sarang Horonaim dingangu Eglat-Selisia. I sire nahungkiạ ual᷊ingu akẹ su lelangu Sal᷊ụ u Nimrim mal᷊aing seng nal᷊ěsa.

³⁵Iạ e sarung mapakariadin tau Moab měngědo měnutung sasěmba su manga tampạ pěnaněmbaěng i sire dingangu měngědo měngonggọu sasěmba su manga mahang duatan sire. Iạ e MAWU kụ seng nẹ̌bera.

³⁶Kal᷊awọu kakakalạ u Kir-Heres dingangu patikụ Moab seng naparung. Iạ e masusa naungku makasilo kakakoạ i sire ene; Iạ e mẹ̌sul᷊ungu taumata kụ měnẹ̌niụ lagun dal᷊umpasiang su suling.

³⁷I sire kěbị e seng něngul᷊ụ utạ i sire su těmbọ dingangu wianggụ, nělesẹ takiahẹ̌, dingangu nẹ̌pakẹ u kahiwune karong tatialang mělẹ̌lutu.

³⁸Su wowong kěbị buwungang u wal᷊e ringangu manga tanalapang kětạeng kẹ̌karingihẹ̌ sasangị. U Moab sen Takụ niwěka kere wěnsadẹ̌ kụ tawe nẹ̌tatal᷊ahino su naung.

³⁹Moab seng nagholang marasai! Bal᷊inẹ gampang meang Moab! I sie simangị ual᷊ingu lẹ̌hinakaneng dingangu nakoạ dal᷊ẹ̌geěngu manga wansa mạngělikụ e. Iạ e kai MAWU kụ seng něhengetang.”

⁴⁰MAWU e něhengetang, ”Al᷊ingkai manụ kasiahe něnahedẹ̌ kụ papanide kạbawingkahẹ̌, kerene bansa sěmbaụ e sarung duměnta kụ měnahedẹ̌ Moab.

⁴¹Manga soa ringangu manga těndạ e sarung pul᷊ahong dingangu sordadone sarung měngkatakụ kere wawine kụ měhěnding.

⁴²Moab sarung magholang, dingangu seng tawe lai makoạ kere sěmbaụ bansa, ual᷊ingu i sire seng nẹ̌těngkaobotẹ̌ su tengo-Ku.

⁴³I sire nẹ̌těngong pěngangaho kawasa ringangu katatingkaị, lohange ringangu sedẹ.

⁴⁴Apan taumata kụ tumal᷊ang u wadang bọu pẹ̌tatingkaị ene e sarung mawunsal᷊ẹ̌ su lohange, dingangu i saing kụ masěbang bọu lohange ene e, sarung i kasamẹ su ral᷊ungu sedẹ. Kěbị ene e sarung mariadi su tempone kụ sen Takụ nipoěng baugu i pěnggoghahẹ̌ Moab.

⁴⁵Tumatal᷊ang kụ tawe makakoạ manga apa ene e tamai nẹ̌deạ pẹ̌kakěllungang su Hesybon, kaiso soa ene e kawe kạkatutunge dingangu istanan Datu i Sihon mal᷊aing nikaěngu putung. Putunge seng namuki wanua pẹ̌saraěng dingangu wawul᷊urangu Moab, banua en taumata kụ puluang mẹ̌sekẹ.

⁴⁶Kạěngkěhang Moab! Tumanạ e kụ měnẹ̌němba mahang duata i Kamos seng nipakawihua, ringangu manga anạ i sire e nihengkẹ kere tinaweng.

⁴⁷Kaiso su samurine Iạ e sarung měngul᷊ị kapia kakakoạ u wanuang Moab. Iạ e kai MAWU, kụ seng něhengetang!” Seng ene e sarung koatengu MAWU e waugu Moab.