Read Sangir YEREMIA 49 Bible Online

YEREMIA 49 - Sangir bible

YEREMIA 49

¹ Seng ini e niwerang MAWU mạanung Amon, ”Unụ e ěntanang ghal᷊ipohong Gad nipul᷊aho ringangu pinẹ̌tanakengu apan taumata kụ měnẹ̌němba mahan duataʼm Milkom? Apa sen tawẹ apa lai tau Israel kụ makapẹ̌tahutěndạ u wanua ene?

²Kaiso sarung marěnta tempone Iạ e mapakariadin tumanạ u Raba, niupunangu soa su wanuang Amon ene e, makạdingihẹ̌ kal᷊awọu wansagu pẹ̌seketang. Soa ene sarung makoạ opehe ringangu manga soa rarodọ mạngělikụ e seng nasue natutung. Bọu e Israel sarung měngal᷊ạ kapia ěntanane bọu kal᷊awọu taumata kụ nạung němpěmul᷊aho kal᷊imona e.

³Ei tau Hesybon, sangị e watụ u soang Ai e seng nagholọ! Ei manga wawinen soang Raba, pěmpẹ̌lungkangke! Pěluhengkong kahiwunu karong tialang mělẹ̌lutu. Pěmpẹ̌tal᷊angke tamai ramahi i tẹ̌tal᷊ạbingọ e. I Milkom mahang duatanu e sarung hengketang sarang pěndarěmekange ringangu manga imang, dingangu manga mapapangkatu pěměrentane!

⁴Ei kamene apan tạ satiane! Unụ e i kamene měngkai lụlesạ u manga wimbaeng i kamene kụ mahuntawa e? Kawe unụ e i kamene mạngumbala su kakakalạ i kamene? Kereapa wue i kamene makawera u tawẹ u sarang sěngkatau kụ bahani měngalo si kamene?

⁵I kamene sarung kahumagengu katatingkaị kụ Takụ aparěnta walạewe měnsang bọu těngone sude. I kamene sarung tumal᷊ang, sěngkatau-sěngkatau e mẹ̌tawakal᷊i mapakasal᷊amatu watangenge hala, ringangu tawẹ apa kụ sarung měnampung i kamene kapia.

⁶Kaiso su samurine, kakakoạ u kawanuang Amon sarung Takụ i pakaul᷊e. Iạ e kai MAWU kụ seng něhengetang.”

⁷ Seng ini e piněhengetang u MAWU Kụ Limembong Kawasa mạanung Edom, ”Kai sen tawẹ kapelesane tiněnnan tau Edom tangu? Kiwuạu apang měnanal᷊ěntihọ e sen tawe něngonggọu sasasa kapia si sire? Seng nasue napuạ kapelesan sire tangu?

⁸Ei tumanạ u Dedan, pẹ̌bal᷊ị e kụ tal᷊angke! Rakọ e pẹ̌kěmbuni. Iạ e sarung mapakaghoghahu pal᷊ahěntong Esau, watụ u sen tempone Iạ měhukung i sire.

⁹Kereu i sire e měnipo wuang anggorẹ̌ e, mang piạ u sěntiniạ i pakatědụ e, ringangu kereu tahatako e marěnta su tempong hěbi, i sie sarung měngal᷊ạ apang i lẹ̌ěnninge.

¹⁰Arawe Iạ[28] měnapu pakawurěsi tataghuanengu hěntong Esau ringangu měluka rahasian tampạ u pẹ̌kakěmbuniang i sire; i sire e sen tawe makapěmuniʼm batangeng i sire kapia. Tau Edom dingangu manga anạu sěngkataun sire e ringangu manga lampung i sire e, kěbị e seng nipakawinasa, kụ tawẹ u sarang sěngkatau relaing nal᷊iwirẹ̌ e.

¹¹Ei Edom! Těntangke manga anạ i kamene kasisi e si Siạ, hědo Iạ měhiking si sire. Balạe kere apaʼm bal᷊ung kamene e apěnodẹ u pěngangimange si Siạ.

¹²Taumata kụ tawe hinong i hukung e, mal᷊aing kahinoěngu hukumang, kụ unụ e wue i kamene e tala wue? Nal᷊ahẹ u i kamene e harusẹ̌ i hukung!

¹³Iạ e mẹ̌salu su ral᷊ungu areng-Ku hala, u soang Bozra e sarung makoạ tampạ makạtatakụ kụ i těntangu taumata. Taumata e sarung mahul᷊ěgeng ene kụ mẹ̌pakẹ u arenge makoạ kere laane. Kal᷊awọu kampong mạngělikụ e sarung makoạ opehe sarang marěngụ-děngụ. Iạ e MAWU kụ seng něhengetang.”

¹⁴Iạ i Yeremia, nẹ̌bera, ”Ei Edom, iạ seng něnarimạ u habarẹ̌ sěmbaụ bọu anun MAWU. I Sie seng naparěntan darolohang sarang kal᷊awọu wansa e mẹ̌deạ u pěngoro si sire apěnampungu sordado e ringangu apẹ̌dẹ̌dariahi waugu sumekẹ si kau.

¹⁵MAWU e sarung mapělomeng kau ringangu hinakaneng u taumata.

¹⁶I kau e kinaakal᷊engu kal᷊aobotu. Tawẹ u matakụ i kau kere su tiněnnanu. I kau e mẹ̌tanạ su wěllạu manga watu, marau su pusigu wul᷊ude. Kaiso maning be wal᷊enu e koatengu su tampạ marangẹ-dangẹ, karangẹen tampạu sal᷊ehu kasiahe, MAWU e sarung mělintụ i kau e wọu ene. MAWU e seng něhengetangu kěbị ene.”

¹⁷MAWU e něhengetang, ”Hombang masaria kụ nahumagẹ̌ su Edom, sarung kereng kawěhạ e hakịu apan taumata kụ masahe sene e sarung huměkosẹ̌ dingangu matakụ.

¹⁸ Kerẹewe lai Sodom dingangu Gomora e nipakaupu ringangu manga kampong su manga rěduhe, kerene lai Edom. Tawẹ u sarang sěngkatau relaing mẹ̌tanạ paị sene. Iạ e, kai MAWU kụ seng něhengetang.

¹⁹Mẹ̌sul᷊ungu singa siměpụ bọu kěhu mal᷊oang maraning Sal᷊ụ u Yordan kụ makoạ sarang bimbaenge, tampạ u domba mạhungkaěng děmpugẹ̌, kerene Iạ e sarung duměnta kụ mapakatal᷊angu tau Edom bọu wanuan sire pěsěngkělěndịu. Bọu ene Iạ sarung měmile sěngkatau pangahạ e waugu mẹ̌parenta wansa ene. I sai tangu wotonge i kasul᷊ung dingang-Ku? I sai tangu wahani mẹ̌koạ pěrkara e ringang-Ku? Piạ tangú těmbonange kụ makarokạ si Siạ?

²⁰Ual᷊ingu ene, raringihẹ̌ko apang kụ seng Takụ niol᷊ang baugu tau Edom, dingangu apang kụ sarung Takụ koateng baugu tumanạ u soang Téman. Manga anạ i sire lai sarung tokol᷊ang pakapul᷊ẹ, dingangu kěbị taumata e sarung su katatakutang.

²¹Kereu Edom manawo, sarung i karingihẹ̌ gahẹ marasai hakị u kasěllahu dunia e ghumanuẹ̌; bansagu apan tumanạ e sarung i karingihẹ̌ sarang Laudu Lěntuwu.

²²Kere manụ kasiahe měnahedẹ̌ dingangu papanide kạbawingkahẹ̌, kerene sědụ e sarung duměnta ringangu měnahedẹ̌ Bozra. Su ěllo ene sordadong Edom sarung su katatakutang mẹ̌sul᷊ungu tau wawine měhěnding.”

²³ Seng ini e piněhengetangu MAWU mạanung Damsyik. ”Tumanạ u soang Hamat dingangu Arpad ghụgěnggang dingangu rẹ̌děnděnganeng ual᷊ingu makạdingihẹ̌ habarẹ̌ dal᷊akisẹ̌. Naung i sire e taghiawahẹ̌ dingangu pinẹ̌bimbonge kere ghalumbangu l᷊audẹ̌.

²⁴Tumanạ u Damsyik němpělome, kụ nahuntal᷊ang kahian takụ. I sire něngkasakị dingangu lụhědụ kere manga wawine měhěnding.

²⁵Soa timeleng dingangu marame ene orasẹ̌ ini e lụhio tawẹ apa tumatanạ e.

²⁶Su ěllo ene apang mangangudạ e sarung mawihua su manga ral᷊engu soane, ringangu kal᷊awọu sordadone i pakakěngkol᷊ẹ̌.

²⁷Kal᷊awọu meselu Damsyik Takụ tutungang, dingangu manga istanan Datu i Benhadad Takụ hěngisang. Iạ e kai MAWU kụ seng něhengetang.”

²⁸Seng ini e piněhengetangu MAWU mạanung ghal᷊ipohong Kedar dingangu manga wanua su kawasang Hazor, kụ seng nipul᷊ahong Nebukadnesar datuʼm Babel, ”Ei Nebukadnesar, seketẹ e ghal᷊ipohong Kedar dingangu winasạ e kal᷊awọu taumata su sěmběkan daki e!

²⁹Pul᷊ahọ e domba lẹ̌hikinang e, onta, ringangu manga tentaʼn sire ringangu kal᷊awọu ral᷊ohone, kụ pẹ̌bansage waugi sire e, ’Pěndal᷊ingu e seng nẹ̌tondaisẹ̌ si kamene!’

³⁰Ei kamene tau Hazor! Iạ e kai MAWU něhengetang: Pakarol᷊ạko tal᷊ang pěnguntang, dingangu pẹ̌kěmbuni. I Nebukadnesar datuʼm Babel seng nẹ̌karaki mẹ̌deạ u měngalo si kamene. I sie nẹ̌bera,

³¹’Hotede tol᷊ọ e! Mahịe i kitẹ měnekẹ apan taumata kụ makạpěndang mal᷊enehẹ̌ dingangu tawẹ konsange apa. Soan sire e tawẹ dal᷊indunge watụ u tawẹ tukadu pasěllangenge ringangu tawẹ papal᷊ene.’ ”

³²MAWU e něhengetang kapia si Nebukadnesar, ”Pul᷊ahọ e manga onta ringangu kal᷊awọu binatang i sire! Taumata kụ apang utạ e nipotọ pinakanimbụ e sarung Takụ i pẹ̌kal᷊iaesẹ̌ tamai ramahi. Iạ e sarung mapakarěntang hombang masaria si sire wọu apan tampạ.

³³Hazor sarung lawoehang sarang marěngụ-děngụ kụ makoạ pẹ̌kakěmbuniangu asung kěhu. Tawẹ u sarang sěngkatau e relaing mẹ̌tanạ sene. Iạ e kai MAWU kụ seng něhengetang.”

³⁴Tawe nararěnnạ sarang i Zedekia nakoạ datu su Yehuda, MAWU Kụ Limembong Kawasa e nẹ̌bisara si siạ mạanuʼm banuang Elam.

³⁵MAWU e něhengetang, ”Iạ e sarung měmate kal᷊awọu tahapitị kụ nakakatoghasẹ̌ Elam nangělembo e.

³⁶Iạ e sarung mapatiụ u anging sarang Elam bọu kěbị pungu anging, dingangu mapẹ̌kaesu tumanạ e sarang apan tampạ hakịu tawẹ banua sarang sěmbaụ kụ tawe karěntaěngu apan tumatal᷊ang bọu Elam ene e.

³⁷Iạ e sarung mapakariadin tau Elam matakụ u rokạ i sire kụ mapulu měmate si sire. Iạ e limangehẹ̌ tạ sihinge si sire kụ sarung mapakakěngkol᷊i sire. Takụ dingotangu sordado apěnekẹ si sire sarang i sire pakasue-sue.

³⁸Manga ratu ringangu mapapangkatʼi sire e sarung Takụ kakěngkol᷊ang, dingangu su wanuan sire e sarung Takụ pěndarisikangu kararatuang-Ku.

³⁹Kaiso su ěllo samuri e, kakakoạ u Elam sarung Takụ pakaul᷊e. Iạ e kai MAWU kụ seng něhengetang.”