Read Sangir YEREMIA 5 Bible Online

YEREMIA 5 - Sangir bible

YEREMIA 5

¹Ei tumanạu Yerusalem, batukeko apan dal᷊eng su soanu e! Deakeko suapan tampạ, dingangu sahidiẹeʼm batangeng hala. Parikẹ̌saiko su manga rělahu soa e měnsang piạ manga sěngkatau taumata kụ matul᷊idẹ̌ e kụ mẹ̌tẹ̌tawakal᷊i mẹ̌těngkasatia su Mawu Ruata. Kamageng piạ ute, MAWU e sarung měgěllịu ampung su Yerusalem.

²I kamene e mẹ̌bera u i kamene maněmba MAWU, sumbal᷊iau i kamene e tawẹ timonane kerene.

³Katatahutěngadu tẹ̌tuntukangu MAWU e, ute kai kasasatia. MAWU e nělimadẹ̌ si kamene, kaiso i kamene e tawẹ sěmpị e. I Sie e měndal᷊umadẹ̌ si kamene e, kai i kamene e tawe mapulu těntiroěng. Těmbọ i kamene e mambeng makakětị, dingangu tawe mapulu mẹ̌tobatẹ̌ bọu kal᷊awọu rosang kamene e.

⁴Iạ e mẹ̌tẹ̌tiněnna, ”Ah, i sire e tumbạeng kawanua kụ běgambeng manga apa. Kakanoạ i sire e longong, ual᷊ingu wěga měnsang apa ilẹ̌ěnning, dingangu tẹ̌tuntukangu MAWU e wọi sire.

⁵Mapiawe iạ makoạ sarang anung manga těmbonange, kụ mẹ̌bisaran sire e. Nal᷊ahẹ u i sire e masingkạbeng apa i lẹ̌ěnning dingangu tẹ̌tuntukangu MAWU Ruata e wọi sire.” Kaiso, i sire kěbị e mal᷊aing mạdiri parentaěngu MAWU e; i sire e mạdiri tumuhụ si Sie e.

⁶Kai ual᷊ingu ene i sire e sarung pateěngu singa wọu kěhu, ringangu wawulungangu ral᷊ugẹ̌ bọu manga kěhu l᷊inggi. Masang kambal᷊ọ e kai mẹ̌sẹ̌sal᷊iawuhẹ̌ mẹ̌dẹ̌deạ kinange su rěduhu manga soan sire e, ringangu apan taumata kụ suměbange sarung těmboěnge. Kěbị ene nariadi e ual᷊ingu i sire seng nahěmpal᷊iun dosane, ringangu měngkate apa masau tumal᷊ikudẹ̌ Mawu Ruata.

⁷MAWU e něhengetang, ”Unụ e Iạ harusẹ̌ mangampung dosang manga umatẹ̌-Ku e? I sire seng naněntangu Iạ dingangu něněmba wal᷊ine Ruata. Iạ e napakaěng i sire e sarang něngkal᷊aedẹ̌, kaiso i sire e kawe nawuang, dingangu hanesẹ̌ mẹ̌tẹ̌tiwo manga wawine tahapẹ̌sundal᷊e e.

⁸I sire mẹ̌sul᷊ungu kawal᷊o esẹ matatawa ringangu masasahigẹ̌; sěngkatau-sěngkatau e lụěnningu kawingu hapị e.

⁹Bal᷊inewe hinone Iạ e měhukungu wansa kụ kerene ringangu měmal᷊isẹ̌ apan seng kinoạ i sire?

¹⁰Iạ e sarung měndolohu rumarokạ apěnggoghahẹ̌ bawaelangu anggori sire e, kaiso wal᷊inewe mẹ̌deạu mapakawinasa e. Iạ e sarung měndolohu rumarokạ e apěngumpung manga lelangu anggori sire e, watụ u manga lelange ene e wal᷊inewe tataghuaneng-Ku e.

¹¹Tau Israel dingangu Yehuda e mamben těngadẹ̌ seng nẹ̌tul᷊ang Iạ. Iạ e kai MAWU, kụ seng něhengetang.”

¹²Taumatang MAWU e kai nẹ̌beraʼn tạ katěngade mạanụeng MAWU e. I sire nẹ̌bera u, ”Ah, i Sie tawe mẹ̌koạ apa-apa. I kitẹ e tawe sarung kahinoěngu sawěda ringangu tawe lai sarung kaěbakengu sekẹ arau karal᷊unusẹ̌.

¹³Manga nabi ene e rekengke samatang anging, batụu tatanatang MAWU e tawẹ apa si sire.”

¹⁴Bọu e MAWU Kụ Limembong Kawasa e nẹ̌bera si siạ, ”Yeremia, ual᷊ingu i sire kawe nahumbisara kerene, ute i sire kai sarung kahinoěngu hombang masaria kụ angkuěng i sire e tawe hinoʼm mariadi. Iạ e kai mapakariading manga wawera-Ku e kere putung su ral᷊ungu mohongu. Bansa ini e kai sarung kere kalung putung, dingangu putung e sarung měnutung si sire sarạeweng masue.”

¹⁵Ei tau Israel, MAWU e kai seng mapakarěntang kawanua wọu soa marau mẹ̌deạu apěnekẹ si kamene. Kawanua ene kai seng těbe ene dokeng kal᷊imona-mona tamai, kụ su hal᷊ẹ̌ u wisaran sire e tawe kahěnganeng i kamene e. I sire e mambeng matoghasẹ̌ kahěngang,

¹⁶dingangu apan tahapitị i sire e wawahani; kụ tawẹ pěndangu tatal᷊ěntụ i sire měmpěmate e.

¹⁷I sire sarung mangěnsue ghẹ̌sing ěntana ringangu kaěng i kamene e ringangu měmpěmate manga anạ i kamene. Sapi piara ringangu dombang kamene e sarung potokang i sire e, dingangu manga waelu anggorẹ̌ sarang lai manga kalung ara e ěnsueng i sire. Manga soa piạ tatěndạe nạung i wẹ̌bewẹ i kamene e sarung gagholangeng i sire e.

¹⁸MAWU e něhengetang, ”Manilaing kerene, su tempo ene e taumata-Ku e mal᷊ain tawe Takụ ěnsueng.

¹⁹Kaiso kamagengu i sire e makiwal᷊o kawe unụ e Iạ nẹ̌koạ kěbị ene su těngon sire, pẹ̌berako ei Yeremia, u kerẹewe i sire naněntangu Iạ e su wanuan sire hala e, mẹ̌deạu mahamawu su manga mahang duataʼm bansa wal᷊ine, kerene lai i sire sarung makoạ ěllangu tau raghị su wanua wal᷊ine.”

²⁰MAWU e něndolohu iạ apělẹ̌habaru tatanata-Ne su pal᷊ahěnton Yakub, kụ mạtanạ su Yehuda,

²¹ ”Daringihẹ̌ko, ei kamene taumata wodo ringangu longong! I kamene piạ mata, kaiso tawe makasilo, piạ tul᷊i kaiso tawe makaringihẹ̌.

²² Iạ e MAWU, kawe unụ e i kamene tawe matakụ u Iạ? I kamene kai hinong guměguhẹ̌ su těngo-Ku! Kawe Iạ e nẹ̌koạ apeng nipěnara laudẹ̌ kụ tawe kal᷊iuang sarang karěngụ e. Laudẹ̌ e mẹ̌bẹ̌bawěladẹ̌ dingangu mẹ̌gẹ̌galumbang, makạpẹ̌tẹ̌tondaisẹ̌, kaiso tawe makaral᷊iu pẹ̌saraěnge ene.

²³Kaiso těmbọ i kamene e mambeng makakětị, dingangu puluang dumokạ; i kamene seng limewang dingangu něněntangu Iạ.

²⁴Man tawẹ tahěndung i kamene e kụ deng měmpěngadatẹ̌ si Siạ, sumbal᷊iau kawe Iạ e něndingọ u tahiti, baewe su panẹ̌takenge, arau lai su pěngěnsuengu musungu tahiti. Iạ e mal᷊aing měngonggọu musungu pěmaměnsạ si kamene apan taung.

²⁵Kaiso kawe manga rosang kamene ene e makạsahaghe kěbị apang mapia e hakịu i kamene e tawe makatemang.

²⁶Ei manga taumata-Ku e, su tal᷊oarang kamene e piạ taumata raral᷊akisẹ̌. Mẹ̌sul᷊ungu taumata mělẹ̌hapa sedẹ kụ nitainge i pěnamẹ manụ u winalangeng, kerene i sire e nẹ̌taingu sedẹ i pěnamẹ taumata e.

²⁷Mẹ̌sul᷊ungu tahaanụ u manụ u winalangeng kụ měloho těndạ e ringangu manụ u winalangeng, kerene lai i sire e měloho wal᷊en sire e ringangu manga apal᷊iwụ něnggạu akal᷊ẹ̌. Kerene i sire e nakoạ měngangawasa ringangu něngkakalạ

²⁸ore lai něngkatawa ringangu něngkal᷊unsemahẹ̌. Karal᷊akisi sire e tawẹ kětakenge. I sire e tawẹ kạadile su urusangu manga anạ kasisi ěndusẹ̌, dingangu tawe tumatatawang hakẹ̌ u apan taumata kụ sěsẹ̌dakeng.

²⁹Arawe, Iạ e MAWU, sarung měhukung i sire e ual᷊ingu kěbị ene; Iạ e sarung měmal᷊isẹ̌ apang kakanoạu kawanua ini e.

³⁰Apạ e maral᷊ěntihẹ̌ dingangu makạtatakụ kụ seng nariadi su wanua ini:

³¹manga nabi němpẹ̌konti, manga imang e němpẹ̌tangkiang tuhụ kapulun sire hala e ringang i kamene taumata-Ku e puluang su hal᷊ẹ̌ kerene. Kaiso apa wue sarung koateng i kamene e, su ěllo samuri e?”