Read Sangir YEREMIA 50 Bible Online

YEREMIA 50 - Sangir bible

YEREMIA 50

¹ Seng ini e tatanatang MAWU e si siạ mạanung soaʼm Babel dingangu tumanạ e,

²”Sangẹko tatialane ringangu pěhabarẹ̌ko su apaʼm bansa u Babelẹ̌ e sen nanawo! Abe rěmasẹ̌ hal᷊ẹ̌ ene! I Merodakh mahang duatane e seng nipakawinasa ringangu manga tul᷊adane maigal᷊ẹ̌ e nawawěka tamai ramahi, ore lai kal᷊awọu awẹ e apạ e lẹ̌hinakaneng tạ sihinge.

³Bansa sěmbaụ bọu sěmběkan sawěnahẹ̌ e sarung duměnta měngalo Babel dingangu mapakariadiʼm banua ene wanua l᷊inggi. Taumata ringangu manga binatang e sarung tumal᷊ang, dingangu sen tawẹ u lai mapulu mẹ̌tanạ paịse.”

⁴MAWU e něhengetang, ”Su tempo ene tau Israel dingangu Yehuda e sarung duměnta sěngkarěnta kạkiạ e, mědẹ̌deạ si Siạ, Duatan sire.

⁵I sire sarung makiwal᷊on dal᷊eng sarang Sion, bọu ene rumal᷊eng mẹ̌timona ene. I sire sarung mẹ̌taingu pẹ̌dariandi sarang marěngụ dingang-Ku, kụ sarung těbe mạngumpaedẹ̌ ene.

⁶Umatẹ̌-Ku e tạbidạu domba kụ seng niwala pinakapal᷊idẹ̌ su wawul᷊urange kahiang manga měndal᷊ukade. I sire němpẹ̌palilị bọu wul᷊ude sarang bul᷊ude wal᷊ine dingangu selaing běga měnsang suapa wal᷊en sire.

⁷I sire e nialoěng dingangu nipakasunsarang kěbị apang nipẹ̌sombang i sire. Kal᷊awọu sědụu umatẹ̌-Ku e nẹ̌bera, ’Apang kụ nikoạ i kitẹ e, tawe nẹ̌sal᷊a, batụu i sire ene e seng nẹ̌dosa su MAWU. I upung i sire e nangimang su MAWU, kụ sembeng hinone i sire e mal᷊aing těbe satia si Sie.’

⁸ Ei umatu Israel, tal᷊angke wọu Babel! Seng i kamene e humotong harusẹ̌ tamai, tadeạu wal᷊ine e makatol᷊e.

⁹Iạ e sarung mapasěbangu kal᷊awọu wansa kụ matatoghasẹ̌ e wọu sěmběkan sawěnahẹ̌ tadeạu i sire e měnekẹ Babel. I sire e sarung měhundugẹ̌ barisang baugu mẹ̌sekẹ dumokạ Babel kụ měmatạ i sie. I sire e kai apan tahapitị mapapia kụ papitị e tawe mẹ̌sasal᷊a.

¹⁰Babel sarung hampaseng, dingangu mělahampase sarung měngal᷊ạ kěbị sạbarang tuhụ kapulun naung i sire e. Iạ e kai MAWU kụ seng něhengetang.”

¹¹MAWU e něhengetang, ”Ei tau Babel, i kamene něhampasẹ̌ umatẹ̌-Ku. I kamene e němpahul᷊insọ u ral᷊uasẹ̌ al᷊ingkai kawal᷊o mẹ̌pẹ̌parạdinding, dingangu kere sapi kạkaěnge rěmpugẹ̌.

¹²Arawe i kamene e sarung makoạ bansa kụ něngalembon tawẹ mangal᷊ene su tal᷊oarang kal᷊awọu wansa. Soanu hala ghẹ̌guwạ ene e sarung hinakaneng dingangu tahumeang. Banuanu e sarung makoạ banua l᷊inggi tawẹ sasuange ringangu mamara.

¹³Ual᷊ingu Iạ e nẹ̌pědu, tangu Babelẹ̌ e sarung makoạ opehe ringangu tawẹ tumatanạ e. Kěbị apang lụlawesẹ̌ sene e sarung huměkosẹ̌ dingangu mạbintogẹ̌.

¹⁴Ei i kamene apan tahapitị! Hundugẹ̌ko barisangu e waugu i pěliwung dingangu i pěngalo Babel. Tarangko kěbị horom papitị u pẹ̌timona Babel, ual᷊ingu i sie seng nẹ̌dosa si Siạ.

¹⁵Pěmpẹ̌bansagẹ̌kon bansagu pẹ̌seketang mạngělikụ soa e! Kụ ini e Babelẹ̌ e seng něngaku lome. Manga mesele seng nitope ringangu niopehẹ̌. Iạ e kai kapẹ̌kẹ̌koạ e wawal᷊ise su Babel. Ual᷊ingu ene pẹ̌koạ e si sire kere i sire miěbạ u taumata wal᷊ine.

¹⁶Abe wala taumata e mahěnsinuang arau měměnsạ su wanua ene. Kal᷊awọu taumata raghị kụ mạtanạ sene sarung měngkapul᷊ẹ sarang banuane, ual᷊ingu i sire e matakụ u sordado kụ měmpěngalo e.”

¹⁷MAWU e něhengetang, ”Tau Israel e mẹ̌sul᷊ungu ghapaěngu domba kụ sẹ̌sahusuang dingangu i pẹ̌kẹ̌kal᷊iaesu singa. Kahumoto-motongang e i sire nialoěngu ratung Asyur, bọu ene i Nebukadnesar datuʼm Babel němpěngangiki manga ruhin sire.

¹⁸Ual᷊ingu ene, Iạ e MAWU Kụ Limembong Kawasa, Ruatang Israel, sarung měhukungu Ratu i Nebukadnesar dingangu wanuane mẹ̌sul᷊ungu Iạ něhukungu ratung Asyur.

¹⁹Iạ e sarung měmal᷊ị u tau Israel sarang banuan sire. I sire sarung kumaěng bọu ghěsing ěntanang Bul᷊udu Karmel dingangu wanuang Basan. I sire sarung mal᷊aedu ghěsing ěntanang banuang Efraim dingangu Gilead.

²⁰Su tempo ene Israel dingangu Yehuda e sarung mawurěsi wọu rosa, ual᷊ingu Iạ e sarung měngampung kal᷊awọu taumata kụ Takụ i pakasal᷊amatẹ̌. Iạ e kai MAWU kụ seng něhengetang.”

²¹MAWU e něhengetang baugu wansa sěmbaụ kụ bọu sěmběkan sawěnahẹ̌,[29] ”Seketẹ e tumanạu Merataim dingangu Pekod. Patẹ e ringangu winanasạ e i sire. Tuhuke wue parenta-Ku e. Iạ e kai MAWU kụ seng něhengetang.”

²²Tingihu pẹ̌seketange ghụgal᷊ědụ su wanua, kụ nariadị e kaghagholang masaria.

²³Kasěllahu dunia e niwěbahẹ̌ kahiaʼm Babel sarang nal᷊ahěmpung, arawe orasẹ̌ ini e wawěbahẹ̌ ene hala e seng napědi! Kal᷊awọu wansa e himěkosẹ̌ nakaringihẹ̌ apang kụ seng nariadi ringangu wanua ene.

²⁴MAWU e něhengetang, ”Babel, i kau e rimokạ si Siạ, ual᷊ingu ene i kau e nahěbagẹ̌ su ral᷊ungu sedẹ kụ Takụ nitaing baugi kamene, kaiso i kau e tawe nakahěngang ene.

²⁵Gudangu aghidẹ̌-Ku e seng Takụ nitope, kụ dingangu wawal᷊uang Takụ sěbangeng aghidẹ̌ ene, ual᷊ingu Iạ e kai MAWU Kụ Limembong Karangetange ringangu Limembong Kawasa e harusẹ̌ mẹ̌koạ munara sěmbaụ su Babel.

²⁶Seketẹ e Babel bọu kěbị pungu anging, kụ těnehe kal᷊awọu gudangu gandunge! Ěndụ e kal᷊awọu apal᷊iwụ pul᷊aho kerẹewe i kamene měngěndụu gandunge! Bihuạ e wanua ene! Kụ kumbahangbe piạ u mal᷊ěmbe!

²⁷Patẹ e kěbị sordadone! Pakapělegẹ̌ i sire! Kạěngkěhang tau Babel! Seng tempone i sire i hukung!” (

²⁸Taumata apang kụ timal᷊ang sarang Yerusalem bọu Babel nẹ̌běkeng kereapa MAWU Ruatang kitẹ e němal᷊isẹ̌ kakanoạ u tau Babelẹ̌ e waugu Wal᷊eʼm MAWU.)

²⁹ MAWU e něhengetang, ”Dolohẹ̌ko apang měmamitị e apěngalo Babel. Pakasue sěbang apan taumata tahapitị mapia e. Tal᷊iwungeko soa ene kụ abe wala sarang sěngkatau e makal᷊ěsọ. Bal᷊iseko kěbị kakanoạ e ringangu pẹ̌koạe si sie tuhụewe kakanoạ e, batụu kakanoạ e seng tawe nẹ̌tatahino su těngo-Ku, Kụ Limembong Kasusiange, Ruatang Israel.

³⁰Su ěllo ene apang mangangudạ e sarung mawihua su manga ral᷊engu soane, ringangu kal᷊awọu sordadone nipakawinasa. Iạ e kai MAWU kụ seng něhengetang.

³¹Babel, i kau e tumanịu marangẹ naungu! Ual᷊ingu ene Iạ e MAWU Kụ Limembong Karangetange, Ruata Limembong Makawasa, rumokạ si kau. Seng tempone i kau e Takụ ihukung.

³²Kawanuanu kụ naunge marangẹ e sarung masangkong dingangu manawo. Tawẹ u sarang sěngkatau kụ mẹ̌tul᷊ung i kau mẹ̌deạu mẹ̌pětị. Kal᷊awọu soanu e sarung Takụ tutungang, dingangu kal᷊awọu apang su rěduhe sarung i pakaupu.”

³³MAWU Kụ Limembong Kawasa e nẹ̌bera, ”Tau Israel dingangu tau Yehuda e makạpěndang mawěhạ. Kěbị apang měnẹ̌naweng si sire e rẹ̌diagateng i sire e pakasěga-sěgadẹ̌ dingangu mạdiri měměllọ i sire.

³⁴Arawe Iạ e měnanal᷊amatʼi sire ene e matoghasẹ̌, areng-Ku e MAWU Kụ Limembong Kawasa. Iạ sẹ̌saku e sarung měngal᷊uang pěrkaran sire ringangu mẹ̌bawa pẹ̌darame su dunia. Arawe waugu tau Babel sarung Takụ aparěnta pẹ̌tatanggarạ dingangu katatakụ.”

³⁵MAWU e něhengetang, ”Kawinasạ e Babelẹ̌ dingangu kawanua, ringangu mapapangkatu pěměrenta ore lai ghal᷊ipohong mapapanden sire e!

³⁶Kawinasạ e manga nabiʼm Babelẹ̌ e! I sire e kakontiang dingangu longong. Kawinasạ e sordadoʼm Babel kụ mahasa e! Apạ e natakụ-takụ i sire e!

³⁷Nịbawihuako kawal᷊o ringangu manga karetan sekẹ i sire e! Kawinasạ e manga prajuriti sire sẹ̌sewaěng e! Apạ e kal᷊omene i sire! Walạe kaghagholọ e kakakalạu Babelẹ̌ e! Pul᷊ahọe kal᷊awọu arětạ i sire!

³⁸Apakamarako kal᷊awọu sal᷊ụ dingangu rahamin sire e, u Babelẹ̌ e kai napenẹ u awẹ kụ makạtatakụ, makạpěpẹ̌pulu manga měnanal᷊ene.

³⁹ Ual᷊ingu ene Babelẹ̌ e sarung makoạ tampạ u manga rohkẹ̌ dal᷊akisẹ̌[30] dingangu manga manụ onta. Baugu sarang karěngụ e tawẹ apa taumata kụ delaing mapulu mẹ̌tanạ paị sene.

⁴⁰ Kerẹewe Iạ e seng napakawinasang Sodom dingangu Gomora e ringangu manga kampong su manga rěduhe, kerene lai Iạ e sarung mapakawinasang Babel. Tawẹ u sarang sěngkatau relaing mẹ̌tanạ paị sene. Iạ e kai MAWU kụ seng něhengetang.

⁴¹Bansa sěmbaụ kụ matoghasẹ̌ e kapẹ̌kẹ̌kakanoạ e wọu wanua marau su sěmběkan sawěnahẹ̌. I sire riměnta ringangu manga ratu l᷊awọ baugu mẹ̌sekẹ.

⁴²I sire e piạ aghide papitị dingangu wěngko; i sire e mahěngị dingangu wěgawe mẹ̌gěllị u ampung. Kere tingihu laudẹ̌ ghụgaheghe kerene tingihu ral᷊empangu kawal᷊o i sire e apạtal᷊ang mẹ̌deạ u tamai pěnekẹ Babel.

⁴³Nakaringihẹ̌ habarẹ̌ ene, datuʼm Babel tawe nakakoạ manga apa. I sie nịllahepesu pěndangu takụ, kụ masunsara kere tau wawine měhěnding.

⁴⁴Mẹ̌sul᷊ungu singa siměpụ bọu kěhu mal᷊oang maranin Sal᷊ụ u Yordan kụ simongo sarang tampạ u domba kụkaěng děmpugẹ̌, kerene Iạ e, MAWU, kụ sarung duměnta ringangu makakatal᷊angu tau Babelẹ̌ e wọu soan sire sěngkělěndịu. Bọu e Iạ hědo měmile sěngkatau těmbonange waugu pẹ̌parenta wansa ene. I sai tangu i pẹ̌sul᷊ungu Iạ e? I sai tangu wahani mẹ̌koạ pěrkara ringang-Ku e tangu? Piạ tangu těmbonange kụ makakarokạ si Siạ?

⁴⁵Ual᷊ingu ene raringihẹ̌ko apang kụ Takụ i lẹ̌ol᷊ang baugu soang Babel, dingangu apang kụ hinon Takụ koateng baugu tumanạ e. Manga anạ i sire e mal᷊ain sarung tokol᷊ang pakapul᷊ẹ, dingangu kěbị taumata e sarung měngkatakụ.

⁴⁶Kereu Babelẹ̌ e manawo, sarung i karingihẹ̌ gahẹ tạ sihinge hakịu kạguwạ u dunia e nẹ̌golang; bansagu apan tumanạ e sarung i karingihu manga wansa wal᷊ine.”