Read Sangir YEREMIA 52 Bible Online

YEREMIA 52 - Sangir bible

YEREMIA 52

¹I Zedekia e umure ruam pul᷊o ěsa su taunge piạ i sie nakoạ datu su Yehuda. I sie nẹ̌parenta su Yerusalem mapul᷊o ěsa su taunge karěngụ e. I ninange arenge i Hamutal, anạ i Yeremia wọu soang Libna.

²Mẹ̌sul᷊ungu Ratu i Yoyakim, Datu i Zedekia e mal᷊ain nẹ̌dosa su MAWU.

³MAWU e limangehẹ̌ tawẹ sihinge su pamanuang Yerusalem dingangu tau Yehuda hakịu i Sie něnokol᷊i sire ringangu tawe naněntanudẹ̌ si sire kapia. I Zedekia e něnggohaeng su těngon Nebukadnesar datuʼm Babel,

⁴ ual᷊ingu ene i Nebukadnesar dingangu patikụ buntuangu sekẹ e riměnta něnekẹ Yerusalem su tanggalẹ̌ mapul᷊o wul᷊ang kapul᷊one su taung kasione su parentan Zedekia. I sire napararisị u tampạu pẹ̌tampungang i sire e su l᷊ikudu soa e, němangung meselu pěngaloěng

⁵dingangu turusẹ̌ němpěliwung soa ene sarang taung kapul᷊oěsane su parentan Zedekia.

⁶Su tanggalẹ̌ sio wul᷊ang kaěpạ e su taung ene e lai, piạ e hombangu karal᷊unusẹ̌ seng kerene katědụ e hakịu kawanua e seng tawẹ apa kaěng i sire marihutu,

⁷ meselu soa e nitěnehu rokạ. Hěbi ene, manimbe tau Babel kạpěngalone soa e, kěbị sordadong Yehuda e timal᷊angu wadang nẹ̌timona Wal᷊ang Yordan. I sire e rimal᷊eng limiu winal᷊aengu istana, wọu e siměbang bọu tukadu pasěllangeng kụ piněhěmpukangu meselẹ̌ darua su tampạ ene.

⁸Arawe sordadoʼm Babel něnahusu Ratu i Zedekia, ringangu něnamẹ si sie su wimbaengu Yerikho. Patikụ taumatane nahuntal᷊ang naněntang i sie.

⁹Bọu ene Ratu i Zedekia e niwawa su anun Datu i Nebukadnesar su soang Ribla su wanuang Hamat, bọu e niěnsakengu hukumang papate.

¹⁰Su soa ene lai manga anạ e nipate su těngong matane, ringangu patikụ mapapangkatu pěměrentang Yehuda e mal᷊aing nipate.

¹¹ Bọu ene i Zedekia e niloẹ matane, bọu e niwěntung kụ niwawa sarang Babel. Paị sene i sie nitaho su ral᷊ungu tahungkụ, dingangu tawẹ simẹ̌sěbang bọu ene sarang tempong i sie e nate.

¹²Su tanggalẹ̌ mapul᷊o wul᷊ang kal᷊imane su taung kapul᷊o sione su parentan Nebukadnesar datuʼm Babel, diměntạ e sarang Yerusalem sěngkatau arenge i Nebuzaradan. I sie e kai měnanasa ringangu těmbonangu lukadu watangeng i Nebukadnesar.

¹³ I Nebuzaradan něnutung Bal᷊eʼm MAWU, istanan datu, ringangu wal᷊eng kěbị apan těmbonange su Yerusalem.

¹⁴Wọu e kěbị taumatane napakatěnehu apang meselu soa ene.

¹⁵Bọu ene kawanua apang bědang ene su soa e, kụ i sire apang měllahal᷊ẹ̌ matatahuěnna e kụ nal᷊ěmbe e, apang kasiang, apan seng nahuntal᷊ang sarang sěmběkan tau Babel, kěbị e nihengkẹ sarang Babel kahiang Nebuzaradan.

¹⁶Arawe sěmbahageang bọu kawanua kụ kakasiangenge ringangu tawẹ arětạ e, nitěntange su Yehuda, kụ nirolohe piněhal᷊ẹ̌ baelu anggorẹ̌ dingangu manga rahami.

¹⁷ Manga rihi tambaga kal᷊aukangu timběha ringangu manga kareta su Wal᷊eʼm MAWU ringangu wěnsadẹ̌ tambaga kal᷊aukangu timběha e nịlahěmpungu tau Babelẹ̌, bọu e patikụ e nihuwo sarang banuan sire e.

¹⁸I sire lai něhengkẹ apal᷊iwụ ini: manga sasoẹ, tampạu awuʼm pananěmbaěng, manga padamara, manga l᷊ainumang tatampung dahaʼm binatang pinotọ baugu sasěmba, manga l᷊ainumang baugu pěnutungang buwụ, dingangu kěbị apal᷊iwụ tambaga kal᷊aukangu timběha wal᷊ine e kụ pẹ̌paketang baugu pẹ̌kakal᷊iomaneng.

¹⁹Apal᷊iwụ bul᷊aeng dingangu sal᷊aka e, nasowal᷊ai manga mangko rarodọ dingangu tampạu tětuhẹ̌, manga l᷊ainumang tampạu rahang binatang kụ nipotọ baugu sasěmba, tampạ u awu, dal᷊aedẹ̌ sol᷊o, manga l᷊ainumang baugu wuwụ, dingangu manga l᷊ainumang pěměmbingang sasěmba akẹ u anggorẹ̌, kěbị e nial᷊ạ i Nebuzaradan hala.

²⁰Apal᷊iwụ tambaga kal᷊aukangu timběha nikoạu Ratu i Salomo waugu Wal᷊eʼm MAWU e, kụ kai rihine rarua, manga kareta, běnsadẹ̌, sapi mapul᷊o dua su waụ e i pěnongka wěnsadẹ̌ ene, kěbị e mawěhạ-běhạ, hakịu tawe mẹ̌timbang.

²¹Dihi witụ darua ene mẹ̌sul᷊ung: sěmbaụ-sěmbaụ e rangẹ e ual᷊u meterẹ̌, tiange lima meterẹ̌ tělluʼm pul᷊o su sentine, ringangu tal᷊oarane tawẹ lohone. Suwenehu uadane, pitum pul᷊o l᷊ima su milimetere. Su wowong apan dihine e piạ tatěmbọu rihi karangẹ e dua meterẹ̌, duam pul᷊o su sentine. Mạngělikụ manga tatěmbọu rihi ene, piạ laanange nilẹ̌gahengu wuan dělima, kěbị mal᷊aing tambaga kal᷊aukangu timběha e lai.

²³Buan dělima su anange, su apan tatěmbọu rihi e pẹ̌tahạ mahasụ, katewe kětạeng siom pul᷊o ěnnung i kẹ̌kasilo wọu wawa.

²⁴Su l᷊iung ene e, i Nebuzaradan něnamẹ Imang Mawantugẹ̌ i Seraya, i Zepanya, tumatimbange, diagạ u tukadu Wal᷊eʼm MAWU e těllung katau,

²⁵měnanasa watangengu ratu e kụ bědang ene su soa e pitung katau, mol᷊ensekẹ, timbangu mol᷊ensekẹ kụ měngẹ̌ngurusẹ̌ hal᷊ẹ̌u pamohekang u sordado, ringangu těmbonange ghaghaghuwạ i sire ěnnungu pul᷊o su kataune.

²⁶I sire kěbị ene e niwawane suanun Datu i Nebukadnesar, su soang Ribla,

²⁷su wanuang Hamat. Paị sene i sire tẹ̌tingkaitang, bọu ene pateěng. Kerene tau Yehuda e lẹ̌hengketang bọu wanuan sire e, sarang pěmamembangeng;

²⁸kěbị e ěpạ u hiwu ěnnungu hasụ su kataune. I Nebukadnesar něhengkẹ si sire mẹ̌tẹ̌tatuhụ kere wawa ini: su kapitu taungu pẹ̌paparentane e těllu hiwu ruam pul᷊o těllu su kataune, su kapul᷊o ual᷊u su taungu pẹ̌paparentane ual᷊u hasụ těllum pul᷊o dua su kataune wọu Yerusalem, dingangu pitu hasụ ěpạ u pul᷊o l᷊ima su kataune nihengkẹ i Nebuzaradan su taung karuam pul᷊o těllune su parentan Nebukadnesar.

³¹Su tanggalẹ̌ duam pul᷊o l᷊ima su wul᷊ang kapul᷊o duane su taung katěllum pul᷊o pitune samurin Yoyakhin nihengkẹ sarang pinamembangeng, i Ewil-Merodakh nakoạ datu su Babel. Su taung ene lai i sie něnodẹ u kakěndage si Yoyakhin, dingangu něměllọ i sie wọu tahungkụ,

³²mase nikoạ e pinakapia. I Yoyakhin nionggotangu kal᷊aianenge limembong karangẹ e wọu manga ratu wal᷊ine, kụ mal᷊aing niwembang sarang Babel.

³³I sie pinakawala něngaweng pakeangu tahungkụ e ringangu waugu sarang karěngụu pẹ̌bawiahe i sie wotonge kumaẹ̌ng su istana, ringangu apang kal᷊aěllo e lẹ̌onggotangu roitẹ̌ baugu pandungangu pẹ̌bawiahe.