Read Sangir YEREMIA 6 Bible Online

YEREMIA 6 - Sangir bible

YEREMIA 6

¹Dakọ e pěmpẹ̌biahẹ̌ su tatal᷊angeng, ei taumatang Benyamin! Těntangke Yerusalem! Apahětekon slompretẹ̌ e su Tekoa, ringangu parěllịko putung tatialane su Bet-Kerem! Hombang dingangu kasasigěsạ masaria e němal᷊ěndihẹ̌ si sire e wọu sěmběkan sawěnahẹ̌.

²Soang Sion e mambeng maholẹ, kaiso MAWU e sarung mapakagholọ u ene;

³manga měngangawasa e sarung mẹ̌daseng paị sene ringangkewen mẹ̌sasekẹ e. Mạngělikụ soa ene e i sire sarung měmasẹ̌ manga tendan sire e, sěngkatau-sěngkatau e su tampạ i kẹ̌kapulune.

⁴I sire sarung mẹ̌bera, ”Hotede, pẹ̌dariahị e měnekẹ Yerusalem! Mahịe aloěng i kitẹ e ěllo mal᷊ětu ini!” Kaiso wọu ene i sire sarung lai mẹ̌bera, ”Uh, kai nal᷊ongge! Ěllo e kai seng manětạ marěndung, kụ kěngkau e kai seng kakạnandụ e.

⁵Kụ mapiawe i kitẹ e měngalo su tempong hěbi e, ringangu měnggolang tatěndạ soa ene.”

⁶MAWU Kụ Limembong Makawasa e, seng nẹ̌parenta apang měngangawasa e, tadeạu apẹ̌nuwang manga kakaluang dingangu mapararisị u manga wongkone pẹ̌tahutěndakeng baugu měliwung Yerusalem. MAWU e něhengetang, ”Soa ini e sarung Takụ hukunang ual᷊ingu kai seng mal᷊awọ pěnanědạ nikoạ su ral᷊unge.

⁷Kerẹewe simbul᷊u akẹ mạpasěpụ u akene mapia, kerene lai soa ene tatapẹ̌ mapạsěpụ u karal᷊akisẹ̌ e. Kětạeng habaru kal᷊ahěgisẹ̌ e ringangu pěngangaho e samatang Takụ i kẹ̌karingihẹ̌ bọu soa ene, lesẹ dingangu sakị e kẹ̌kasilo-Ku e suapan tampạ.

⁸Ei tumanạ u Yerusalem, koạko sasal᷊ěntihọ si kamene kal᷊awọu sigěsạ e! Kumbahangbe sarang Iạ e měněntang i kamene ringangu Takụ bal᷊uiang soang kamene e makoạ banua l᷊inggi kụ tawe kapẹ̌tanakengu taumata e.”

⁹MAWU Kụ Limembong Kawasa e něhengetang si siạ, ”Israelẹ̌ e sarung lungguhang pakal᷊ěndasẹ̌ kere waelu anggorẹ̌ kụ buane seng nitipo kěbị e. Ual᷊ingu ene tangu, těntal᷊ang deng piạ tempone ute, ambangeko apạeweng lěmbene.”

¹⁰Iạ e simimbahẹ̌, ”MAWU, kai si sai iạ e hinoʼm mẹ̌bisara, dingangu i sai hinon takụ sal᷊ěntihokang? I sire e kai makakětị těmbọ i sire e ringangu tawẹ kanaung i sire e. I sire e kai měmpạhul᷊ěge ringangu mạběnsingu tatanata-Nu e kụ takụ tẹ̌paseng si sire.

¹¹Dal᷊angehʼU e si sire mal᷊aing sụsongkang su watangengku, MAWU! Apạ e matědụ pẹ̌tingkědangeng.” Bọu e MAWU e něhengetang, ”Běsẹ e pẹ̌dunu e su manga rariọ su manga ral᷊eng gaghuwạ dingangu su apang mangangudạ kụ měmpẹ̌tẹ̌tampung e. Manga esẹ dingangu wawine sarung samekang, dingangu taumata kụ umure seng mararaluhẹ̌ e tawe lai mal᷊iu.

¹² Bal᷊en sire e sarung gěllikang su taumata wal᷊ine, kerene lai manga wawaelang dingangu manga kawing i sire e. Tumanạu wanua ini e sarung Takụ i hukung.

¹³I sire kěbị gaghuwạ darodọ, mẹ̌dẹ̌deạ kal᷊auntu su ral᷊eng tạ katul᷊ide. U nabi ringangu imang e mal᷊aing mạngakal᷊ẹ̌ taumata.

¹⁴ Manga l᷊esẹ u taumata-Ku e katihọ i sire e kai lesẹ darodọ. ’Kai tawe mẹ̌kapura,’ angkuěng i sire, ’kěbị e mapia ringangu tawẹ konsange apa.’ Sumbal᷊iau mamben tala wue.

¹⁵I sire e kai hinong mamea, ual᷊ingu seng němpẹ̌koạ kěbị apan dal᷊aị ene. Kaiso i sire e seng nẹ̌těngkasuwenehu ghati ringangu wěgaweʼm mamea. Ual᷊ingu ene i sire e sarung manawo kere taumata wal᷊ine; kụ nasuẹ e wěken sire kereu Iạ e měhukung i sire e. Iạ e kai MAWU kụ seng něhengetang.”

¹⁶ MAWU e něhengetang su manga umatʼE, ”Darisịko su manga pěmamikuangu ral᷊eng, kụ tatingangko pakapia! Kiwal᷊oiko apan dal᷊eng nạung kạngerẹ e, kụ měnsang sudẹ e kapiange, wọu tal᷊oaran sire. Tol᷊ẹ e ral᷊eng ene, tadeạu i kamene e mẹ̌biahẹ̌be mal᷊enehẹ̌.” Kaiso i sire nẹ̌bera, ”Tala, i kami tawe mapulu měbatụ dal᷊eng ene!”

¹⁷Bọu e MAWU e, měngkate apa masau mẹ̌bera měhengkẹ u manga lukadẹ̌ mẹ̌deạu apạul᷊ị si sire tadeạu i sire e makaringihẹ̌ be tingihu tatialan slompretẹ̌. Kaiso taumata e němpẹ̌bera, ”I kami e mạdiri rumaringihẹ̌.”

¹⁸Ual᷊ingu ene MAWU e, něhengetang, ”Daringihẹ̌ko ei manga wansa! I kamene harusẹ̌ masingkạ u apa sarung mariadi su manga umatẹ̌-Ku e.

¹⁹Pěmpěnaungko, ei wanua! Taumata-Ku e tawe rumaẹ těntiro-Ku ringangu tawe rumaringihẹ̌ si Siạ. Nakoạ kere něnggạu karakin sire e Iạ e napahombangu sawěda e si sire.

²⁰Apa we gunane kamania kụ bawaěng i sire e si Siạ bọu Syeba, arau manga rampa wọu wanua marau? Tawẹ dal᷊uase Iạ měnarimạ sasěmban sire. Iạ tawe mapulun sasěmba manga binatang tẹ̌tongkateng i sire.

²¹Iạ e mapakariading manga taumata ini e masangkong kụ manawo. I Amang dingangu anạ, hapị dingangu manga lampung kěbị e sarung měngkawinasa.”

²²MAWU e něhengetang, ”Bansa sěmbaụ kụ matoghasẹ̌ e kapẹ̌kakanoạe wọu wanua marau wọu sěmběkan sawěnahẹ̌. I sire riměnta mẹ̌deạu mẹ̌sekẹ.

²³Aghidi sire e papitị dingangu wěngko; i sire e kai marangěngisẹ̌ ringangu wěgawe mangampung. Mẹ̌sul᷊ungu tingihu laudẹ̌ mẹ̌bẹ̌bawěladẹ̌ e tangu kerene tingihu tarěntungu kawal᷊o ghẹ̌geserang mẹ̌deạu tamai pěnekẹ Yerusalem.”

²⁴Nakaringihẹ̌ habarẹ̌ ene, tumanạu Yerusalem tawe nakakoạ manga apa. I sire e nisahẹ̌sekangu pěndangu katatakụ, dingangu mẹ̌tatahangu tědụ kere sěngkatau wawine měmantelẹ̌ e.

²⁵I sire tawe wahani lumintụ sarang dal᷊eng arau sarang manga ansedẹ̌ e, batụu suapan tampạ sekẹ piạ aghide sụsěpụ mělingu.

²⁶MAWU e něhengetang su taumata-Ne, ”Pěmpěluhengkong karong dingangu pẹ̌těngkal᷊unggiko su awul᷊ẹ̌. Pěmpělutụe ringangu pěmpahunsangị e kere taumata sụsangị u papateng anạe mang sěmbaụ, u měmaminasa e sarung měngalo si kamene sěngkělěndịe.”

²⁷Bọu e MAWU něhengetang si Yeremia, ”Banikateko taumata-Ku e, kerẹwe i kau měmanikạ uada. Sẹ̌suieko lulun sire e!

²⁸I sire kěbị e tahapěngghohaeng kụ těmbọ i sire makakětị, kere kakětịu wul᷊aeng kal᷊aukangu tambaga ringangu uase. I sire e lulun sire e mawawuhụ kụ mạhundal᷊eng balạewe sarang apa mẹ̌deạu mẹ̌bawa habarẹ̌ kụ měndal᷊akị taumata wal᷊ine.

²⁹Pěnanunoěnge sen tumanịu matětị-tětị, kaiso taing uada e selain tawe mapulu matuno kụ mailang. Tawẹ gunane taumata-Ku e hanesẹ̌ měngkate wẹ̌banikateng mẹ̌deạu i pakasahị e u taumatane raral᷊akisẹ̌ e tawe i pakaghea.

³⁰I sire sarung i sěbạ sal᷊aka rěmmẹ, u Iạ e kai MAWU, kụ seng něnděmmẹ i sire.”