Read Sangir YEREMIA 7 Bible Online

YEREMIA 7 - Sangir bible

YEREMIA 7

¹MAWU e něndolohu iạ niapakakoạ sarang Bal᷊e-Ne dingangu nipararisị su těbaʼm pasěllangeng kụ lẹ̌liuang u tau Yehuda mạengu ruměnta měmpẹ̌kal᷊iomaneng. I Sie něngoro si siạ apělẹ̌habaru tatanata-Ne ini si sire, ”Pěmal᷊uiko lulu ringangu kakakoạu pẹ̌bawiahu e, tangu Iạ, MAWU Kụ Limembong Kawasa e Ruatang Israel sarung mapakawalang kamene mẹ̌tanạ sini.

⁴Kumbahangbe mangimang su apan tahakontiang kụ mẹ̌berau, ’I kitẹ e mapia wue, u ini e kai Wal᷊eʼm MAWU. Ini e mambeng Bal᷊eng MAWU!’

⁵Bal᷊uiko pẹ̌bawiahu e ringangu lulunu. Pakal᷊aadilẹ̌ko sěmbaụ su wal᷊ine e.

⁶Kumbahang delaing manědạ taumata raghị, anạ kasisi ěndusẹ̌, dingangu manga wawine wal᷊u. Kumbahang měmate taumata kụ tạ sal᷊ane su wanua ini. Kumbahang měněmba manga ruata wal᷊ine, u hal᷊ẹ̌ kerene kai makawinasa si kamene.

⁷Kereu i kamene měmal᷊ui kakakoạu pẹ̌bawiahi kamene ringangu lulung kamene ral᷊akisẹ̌ e ringangu měngědo mẹ̌koạ kěbị ene, Iạ e sarung mapakawalang kamene tatapẹ̌ matanạ su wanua ini kụ seng Takụ nionggọ kere ěntana pusakạ baugu manga i upung i kamene.

⁸Katewe, mamben tawẹ gunane i kamene mangimang su wawera konti.

⁹I kamene mẹ̌tako, měmate, mawuang, měngonggọu sahidi konti, mẹ̌gěllịu sasěmba su Baal, dingangu měněmba manga mahang duata kụ tawe i kakiral᷊ang kamene.

¹⁰Sarạeng kěbị ene e kinoạ i kamene e, i kamene e riměnta nẹ̌těngong Iạ sini su Wal᷊e-Ku e hala, ringangu nẹ̌bera u, ’I kami e mal᷊enehẹ̌ bue!’ Bọu ene i kamene něněpasu kakanoạ i kamene matingkaị ene.

¹¹ Apa i kamene e mẹ̌ngěnna u Wal᷊e-Ku ini e sal᷊ehu tahapẹ̌hampasẹ̌? Kal᷊awọu kakanoạu e sen Takụ kinasilo.

¹² Dakọ e sarang Silo,[3] soa ene nạung kal᷊imona e Takụ nipile nakoạ tampạ u pẹ̌kakal᷊iomanengang si Siạ. Kakěllako apan seng Takụ nikoạ baugu tampạ ene ual᷊ingu rosan tau Israel.

¹³Manilaing Iạ e hanesẹ̌ mẹ̌bẹ̌bisarang kamene e, i kamene madiri rumaringihẹ̌. I kamene mẹ̌kẹ̌koạ kal᷊awọu rosa ene, ringangu tawe sumasimbahẹ̌ kereu Iạ e kumui.

¹⁴Kụ, Bal᷊e-Ku e nạung i lẹ̌lesạ i kamene ringangu tampạ kụ nạung Takụ nionggọ su manga i upung i kamene e ringangu si kamene ini e sarung Takụ koateng kere nạung su Silo kal᷊imona.

¹⁵I kamene sarung Takụ i tokol᷊ẹ̌ bọu těngo-Ku kerẹewe manga anạu sěngkataunu tau Israelẹ̌ e seng Takụ nitokol᷊ẹ̌.”

¹⁶MAWU e něhengetang, ”Yeremia, kumbahangbe mẹ̌kal᷊iomaneng i sire ini. Kumbahang mẹ̌dorong tul᷊ung arau mẹ̌kal᷊iomaneng baugi sire; kumbahangbe měnahěsẹ si Siạ, u Iạ e madiri rumaringihẹ̌ kakindoạ ene.

¹⁷I kau e seng nakasilo hala apang kụ nikoạ i sire e su manga soang Yehuda ringangu manga ral᷊eng su Yerusalem!

¹⁸ Manga anạ e němpěnampungu kalung putung, manga esẹ němpěndikọ putung, dingangu manga wawine e němpěngaugẹ̌ tapoěng kakoạ kukisẹ̌ baugu ampuang kụ isẹ̌sěbạ i sire e Ratun Sorga wawine. Kụ baugu mapakatědụ u naung-Ku e i sire mal᷊aing němpaněmbang akẹ u anggorẹ̌ e su manga ruata wal᷊ine.

¹⁹Katewe, mamben těngadẹ̌, bal᷊inewe Iạ tẹ̌tědukang i sire, kaiso kawe i sire hala e hakịu i sire něngkamea.

²⁰Iạ e MAWU, Kụ Limembong Karangetange, sarung mapakawuạ u ral᷊angehẹ̌-Ku e tawẹ sihinge su wal᷊eng pẹ̌kakal᷊iomanengang ini e, waugu taumata ringangu binatang, kerene lai waugu manga kakaluang, gěsing ěntana e. Dal᷊angehẹ̌-Ku e sarung mẹ̌daraẹ kere putung kụ tawe kasasěbuang.”

²¹MAWU e něhengetang, ”Ei umatẹ̌-Ku, i kamene e masingkạ u sasěmba kụ tẹ̌tutungang i kamene su wowong pananěmbaěnge harusẹ̌be tutung pakahěpusẹ̌, dingangu sasěmba wal᷊ine e wotonge kanengang i kamene. Arawe Iạ e MAWU, něhengetang, měngkate ětọeng kamene kěbị!

²²Piạ e Iạ nạung naněbangu manga i upung i kamene e wọu Misirẹ̌ e, Iạ e tawe něngonggọu atorange si sire su hal᷊ẹ̌ u sasěmba tẹ̌tutungang arau lai manga sasěmba wal᷊ine.

²³Iạ kětạeng mẹ̌parenta si sire tadeạu rumaringihẹ̌ si Siạ, kụ Iạ e makoạ Duatan sire, ringangu i sire e makoạ umatẹ̌-Ku. Iạ e měngoro si sire tadeạu pẹ̌biahẹ̌be tuhụ manga tita-Ku tadeạu i sire e makariangkamang.

²⁴Arawe i sire e mạdiri rumaringihẹ̌ dingangu madiri měnaung ene e. I sire katewe mundangu tumuhụ kapulun sire hala e kụ makakětị e o kawe lai ral᷊akisẹ̌ e. I sire e wal᷊inewe nakoạ mapia kaiso kawe něngalembong karal᷊akise.

²⁵Dokeʼm bọu sasěbangu manga i upung i kamene wọu Misirẹ̌ e sarang ěllo ini, Iạ e hanesẹ̌ mẹ̌děndolohu manga ěllang-Ku, manga nabi sarang anung kamene.

²⁶Kaiso tawẹ apa kụ deng dumaringihẹ̌ arau měnẹ̌naung ene. I kamene katewe maal᷊ạ limembong mẹ̌tẹ̌tungkětịu těmbọ dingangu limembong karal᷊akise wọu manga i upung i kamene.”

²⁷Bọu e MAWU něhengetang, ”Ual᷊ingu ene, ei Yeremia, manilaing i kau e měhabaru kěbị ene su manga umatẹ̌-Ku, i sire tawe měnanahimata waweranu e. Manilaing i kau e mẹ̌kui si sire, kai i sire tawe sumimbahẹ̌.

²⁸Kụ pẹ̌berạ e si sire u i sire kai wansa sěmbaụ kụ mạdiri rumaringihẹ̌ si Siạ, MAWU, Ruatan sire. I sire mạdiri měngěndung bọu hukumang kụ seng kinapěndangeng i sire e. Kasasatian sire e kai seng napaghohẹ̌, kụ seng tawe i pahumbisara kapia.”

²⁹MAWU e něhengetang, ”E i kamene tumanạ u Yerusalem, pěmpělutụ e! Potọ e utạ i kamene e kụ děmẹ! Pẹ̌kantarịkong kakantarị u kakakěndung su manga wongkone su wawul᷊urange, u Iạ e MAWU, kai limangehẹ̌ dingangu seng měnokol᷊i kamene kěbị.

³⁰Tau Yehuda e seng nẹ̌koạ karal᷊akisẹ̌. Manga mahang duatan sire Takụ i kẹ̌kawěnsing ene e seng nipěllọ i sire e su Wal᷊e-Ku, hakịu nakal᷊amuhụ.

³¹ I sire napararisị u pěnaněmbaěng sěmbaụ arenge Tofet su Wal᷊ang Hinom, baugu pẹ̌gěllikangu manga anạ i sire i kẹ̌koạ sasěmba tinutung. Sěmbal᷊iau Iạ e tawẹ laoro-Ku si sire pẹ̌kẹ̌koạ hal᷊ẹ̌ ene, ringangu hal᷊ẹ̌ kerene e měngkai tawẹ apa su tiněnna-Ku e.

³²Ual᷊ingu ene, sarung duměnta tempone tampạ ene sen tawe lai i sěbạ Tofet, arau Wal᷊ang Hinom, kaiso kai i sěbạ Wal᷊am Pẹ̌bawunoěng. Ěntana ene sarung makoạ ěntana pěndal᷊ẹ̌bingang ual᷊ingu tawẹ apa tampạ bal᷊ine.

³³Manga maieti sire e sarung makoạ kinạu manga manụ u winalangeng dingangu binatang dul᷊u, kụ tawẹ měndal᷊iwuahe.

³⁴ Soa ini e sarung makoạ ěntana tạ kěhune. Tingihu ral᷊uasẹ̌ dingangu tingihu sal᷊iwangu kawinge, su kal᷊awọu soang Yehuda ringangu su manga raral᷊engangu Yerusalem e sarung Takụ i ědo.