Read Sangir YEREMIA 8 Bible Online

YEREMIA 8 - Sangir bible

YEREMIA 8

¹Su tempo ene manga ruhing mararatu e ringangu mapapangkatu těmbonangu kawanua su Yehuda, dingangu ruhing manga imang, nabi, ringangu tumanạu Yerusalem bal᷊ine e sarung isěbang bọu lěbing i sire e,

²bal᷊inewe waugu komol᷊ang arau lẹ̌bingang kapia, kaiso kawe i wala su ěntana kere onasẹ̌. Duhing kal᷊awọu taumata ene sarung mẹ̌sal᷊iawuhẹ̌ su těngoʼm matangěllo, wul᷊ang dingangu manga wituing kụ i lẹ̌lesạ i sire, lẹ̌lahimpuluang, tẹ̌tangkianeng, sẹ̌sěmbaěng, dingangu pẹ̌dẹ̌dorongang těgu.

³Tangu apan taumata kụ bědang biahẹ̌ e bọu wansa kụ dal᷊akisẹ̌ ini e, kụ seng Takụ iapẹ̌dal᷊ahae walạewe měnsang suapa kụ mạěndokengbe mapulu mate sul᷊ungu mẹ̌biahẹ̌. Iạ, kai MAWU Kụ Limembong Kawasa, seng nẹ̌bisara.”

⁴MAWU e něndolohu iạ apẹ̌bẹ̌bera kere ini su umatʼE, ”Kereu taumata e manawo, i sie mamben saụ mẹ̌pětị, dingangu kereu taumata e mapal᷊idẹ̌ su ral᷊eng, tantu i sie sarungbe mẹ̌bal᷊ị.

⁵Kaiso kawe unụ e i kamene umatẹ̌-Ku e, měngkai sěntiniạ lụl᷊ewang dingangu měněntangu Iạ? I kamene e mang mạngumbelẹ masěgadẹ̌ su mahang duatang kamene, kụ tawe mapulu mẹ̌bal᷊ị sarang anu-Ku!

⁶Iạ e seng dimaringihẹ̌ mapia-pia, kai i kamene e tawe mahumbisara kere hinone. Tawẹ u sarang sěngkatau wọi kamene měmpẹ̌sasěsilu kakanoạ i kamene ral᷊akisẹ̌ e. Tawẹ apa kụ deng mẹ̌bera u, ’Kai apa sal᷊aku tangu?’ I kamene kěbị e tụtol᷊e ral᷊eng i kamene hala e mẹ̌sul᷊ungu kawal᷊o měmpangalo su ral᷊ungu pẹ̌seketang.

⁷Manụ bahoa e mal᷊aing masingkạ u tempone mẹ̌bal᷊ị; paluma, sal᷊umpito, ringangu sanggelohẹ̌ e mal᷊aing masingkạu tempone měngal᷊ing tampạ. Arawe i kamene umatẹ̌-Ku e běgaweng manga tita nạung seng Takụ nionggọ si kamene.

⁸Bahani kahěngang i kamene e mẹ̌bera u i kamene e kai pelesa, ringangu masingkạ u manga tita-Ku! Kěnang kakělla kereapa manga tita-Ku e niwal᷊ui kahiang apang mapapandeng agama kụ tawẹ katul᷊ide!

⁹Apang mapapande su tal᷊oarang kamene e sarung i pakamea. I sire e sarung kailangengu pelesang sire e ringangu měngkahěbọ. I sire e mạdiri měnarimạ u sasasa-Ku; orasẹ̌ ini e kai pelesae apa wědang piạ si sire tangu?

¹⁰ Ual᷊ingu ene Iạ e sarung mengonggọu waeli sire e su apan taghuangu ěntana wal᷊ine e, dingangu kawing i sire e su taumata wal᷊ine. I sire kěbị, gaghuwạ darodọ, mẹ̌deạ kal᷊auntu su ral᷊eng tạ katul᷊ide. Sarang manga nabi ringangu manga imang mal᷊aing měmpangakal᷊ẹ̌ taumata.

¹¹ Lesẹ u manga umatẹ̌-Ku e katihọ i sire e kai tumbạeng lesẹ darodọ. ’Ah, tawe mẹ̌kapura,’ angkuěng i sire, ’kěbị e mapia ringangu mal᷊enehẹ̌ bue.’ Sumbal᷊iau sua, mamben tala.

¹²Ei manga umatẹ̌-Ku, tumuhụ hinone i kamene kawe mamea ual᷊ingu seng nẹ̌koạ kěbị apan dal᷊akisẹ̌ ene e! Kaiso i kamene e mambeng masasuwenehẹ̌ gating kamene e ringangu wěgawe měngkamea. Ual᷊ingu ene i kamene e sarang měngkanawo kere taumata wal᷊ine e kụ seng nanawo e, kụ nahěpuse wẹ̌kene mạengu Iạ e něhukung i kamene e.

¹³Iạ e mang lụěnningu měnampungu umatẹ̌-Ku kere taumata kụ měnampungu ghẹ̌sing ěntanane. Arawe umatẹ̌-Ku e kere kalung anggorẹ̌ dingangu kalung ara, kụ tawe nẹ̌bua, sarang manga raukalune mal᷊aing něngkalolang. Kai ual᷊ingu ene hakịu Iạ e seng napakawalan tau raghị duměnta kụ měngawasa wanuan sire e. Iạ e kai MAWU kụ seng něhengetang.”

¹⁴”Kawe unụ e i kitẹ e tawe nẹ̌koạ manga apa?” angkuěngu manga umatu Mawu Ruata. ”Bọete i kitẹ e sěngkapahuntal᷊ang sarang manga soa piạ bal᷊oarị e, baẹbe i kitẹ e mate paị sene. MAWU Ruatang kitẹ e seng němutusu i kitẹ e harusẹ̌ mawinasa. I Sie seng něngonggọu lailu si kitẹ e pakịinung batụu i kitẹ e kai seng nẹ̌dosa su těngonʼE.

¹⁵Mamben tawẹ gunane i kitẹ e mělẹ̌harapẹ̌ pẹ̌darame, ringangu tempom pěngangul᷊e wọu sakị, u piạ e kětạeweng kal᷊ahasa.

¹⁶Dumarokạ e kai seng ene su soang Dan; sasiking kawal᷊on sire e seng kẹ̌karingihẹ̌ dingangu sěngkawanuaěng e seng něngkatakụ. Dumarokạ e riměnta waugu měnggaghoghahẹ̌ kěbị tampạ i kitẹ, soạewe laing kitẹ e, ringangu kal᷊awọu tumanạ e.”

¹⁷”Naungeko!” angkuěngu MAWU. ”Orasẹ̌ ini e Iạ něndingọ u manga těmpu su tal᷊oarang kamene e mẹ̌deạ u pěněmbo si kamene, těmpu mawisa, kụ tawe kahinoěngu lahopa.”

¹⁸Naungku e nasělo ringangu kiměndung sasangịku e tawe kaundangeng.

¹⁹Daringihẹ̌ko! Su kěbị soa e, nụneong sasindukungu kakiạu wansaku e makịbal᷊o, ”Kai sen tawẹ MAWU relain su Sion? Kai suapa ratu e orasẹ̌ ini?” Angkuěngu MAWU e, ratun sire, ”Unụ e i kamene e mẹ̌sẹ̌suba manga mahang duata kụ mamben tawẹ gunane? Kawe unụ e i kamene nanědụ naung-Ku e kụ němpaněmba manga awẹu ruata?”

²⁰Umatu Israelẹ̌ e měmpạmohang u ”Musungu měměnsạ dingangu musungu měhangu e orasẹ̌ ini e seng napal᷊usẹ̌, katewe i kitẹ e reng bẹ̌dang tawẹ lai mạsal᷊amatẹ̌.”

²¹Naungku e nal᷊ahěmpung ual᷊ingu wansaku e masakị matědụ; iạ e mělutu ringangu nirěnděnganeng.

²²Apạ e wue sarung makakariadim bansaku sarang orasẹ̌ ini e wědang tawe lai nạpia? Měnsang su kạguwạ u Gilead[4] kai tawẹ apa dokterẹ̌ arau undang?