Read Sangir YEREMIA 9 Bible Online

YEREMIA 9 - Sangir bible

YEREMIA 9

¹Apạ e mapia kereu těmbọku e mẹ̌sul᷊ungu sumu kụ napenẹ u akẹ, dingangu mataku e kere sal᷊ěsugẹ̌ kụ turusẹ̌ lụelehẹ̌! Kụ makạkiạ si siạ ěllo hěbi e, sụsangịeʼm bansaku e nipaten dokạ e.

²Kereu piạ i pẹ̌sombangku e su kěhu l᷊inggi tampạu pěngangirol᷊oěngu rumaral᷊eng! Tangu iạ e sarung měněntangu wansaku e kụ tumal᷊ang tamaị kerene mẹ̌deạu mẹ̌těngkarau wọi sire e. I sire kěbị e kai tahakontiang, komol᷊angu taumata kụ tawẹ satiane,

³ringangu mang sadia měmpẹ̌konti. Su kasěllahu wanua e, katul᷊idẹ̌ e tawe nẹ̌kawasa, sarangkewe lai tạ katul᷊idẹ̌ e nẹ̌tondaisẹ̌. MAWU e něhengetang, ”Umatẹ̌-Ku e mẹ̌kẹ̌koạ karal᷊akisẹ̌ e ringangu tawẹ ědone, i sire e tawe mangakung Iạ e kawe Ruatan sire.”

⁴Su hapị e i sire lai maingatẹ̌ dingangu waugu anạu sěngkatau sěmpụ tinai e mal᷊ain tawe kapangimangeng. Batụu, kerẹewe lai i Yakub, kerene lai i sire, sěngkatau-sěngkatau e mạngakal᷊ẹ̌ anạ u sěngkataune. Apan taumata e rụdal᷊eng tuhụ kapulu e měmpẹ̌kẹ̌kakekeng lahodatẹ̌ dingangu konti e.

⁵Kěbị e mang mẹ̌pẹ̌papangakal᷊ẹ̌, tawẹ u wisarane kụ kahěngange. Mohong i sire e seng nawiasang mẹ̌konti, i sire e tawe makaumal᷊ẹ̌ maněntangu rosan sire e. Tingkaị sarang tingkaị e, akal᷊ẹ̌ sarang akal᷊ẹ̌ e měngkate sěntiniạ kẹ̌koateng i sire e, i sire e mambeng měmpanuhudu MAWU e.

⁷Ual᷊ingu ene MAWU Kụ Limembong Kawasa e něhengetang, ”Mẹ̌sul᷊ungu uada e, umatẹ̌-Ku e sarung Takụ banikateng tadeạu i sire e mawurěsi. Sahunengke lai apang i kakoạ-Ku e waugu manga umatẹ̌-Ku e kụ seng bọu němpẹ̌koạ dal᷊akisẹ̌ e?

⁸Bisaran sire e apạ e makạsilakạ, botonge makapate kere papitị mawisa. Manga wisaran sire e mambeng konti. Karěngangu wisaran sire e makạbirahi. Katewe tumuhụ hinone i sire e kai mẹ̌tẹ̌taingu sedẹ.

⁹Tumanịe wue waugu kawanua kere ini e tawe Takụ pěhinoěngu hukumang kụ i pẹ̌tarang? Takụ be wal᷊isang kakanoạ i sire; Iạ e kai MAWU kụ seng něhengetang!”

¹⁰Iạ i Yeremia, mẹ̌bera, ”Iạ e kumiạ dingangu mělutu ual᷊ingu wimbaengu rěmpugẹ̌ su wanua l᷊inggi ringangu su manga wul᷊ude kụ seng nasue něngkahěgu kụ sen tawẹ sasaheěngu taumata. Tingihu manga binatang e selain tawe i kararingihẹ̌, manga manụ u winalangeng e ringangu manga binatang bal᷊ine e seng nahuntal᷊ang dingangu napaghohẹ̌.”

¹¹MAWU e něhengetang, ”Yerusalem sarung Takụ i pakaopehẹ̌ makoạ tampạ u pẹ̌kakěmbuniangu asung kěhu. Manga soang Yehuda e sarung měmpěhio tampạ kụ tawẹ lai pẹ̌tanakeng.”

¹²Iạ e nakiwal᷊o, ”MAWU, unụ e wanua ini e niwala nipakahusụ dingangu nipakahěgu kere wanua l᷊inggi hakịu tawẹ apa kụ deng sumaheng ene? Deng piạ u limemboʼm pande kụ makaěnna kěbị ini e tangu? Kai waugi sai tangu Takụ pinẹ̌gěllikangu tatualagẹ̌ tadeạu i sie e měnurusẹ̌ u ene su taumata wal᷊ine e?”

¹³MAWU e simimbang, ”Ene e nariadi ual᷊ingu umatẹ̌-Ku e selain tawe měnanaung kal᷊awọu těntiro kụ Takụ i ghẹ̌gěllị si sire. I sire e tawe rumararingihẹ̌ si Siạ, dingangu tawe mapulu tumuhụ tita-Ku.

¹⁴Mang makakětị těmbọ i sire e ringangu měmpẹ̌tẹ̌tahamawu manga mahang duatan sire i Baal kerẹewe tẹ̌těntiroěngu manga i upung i sire e.

¹⁵Ual᷊ingu ene, raringihẹ̌ko apang koatengu MAWUNG kamene; kụ Iạ e, MAWU Ruata Limembong Kawasa, Mawun tau Israelẹ̌ e sarung koateng: u taumata-Ku e sarung Takụ gěllirangu sasuang mapaị mẹ̌deạu kanengang dingangu lailu mẹ̌deạu inungang.

¹⁶I sire sarung Takụ i sarakang su tal᷊oarang manga wansa kụ tawe i kakiral᷊an sire e arau kahiang manga i upung i sire. Iạ e sarung turusẹ̌ měndingọu sordado kụ i pěnggolaha si sire, sarang Iạ e mapakawinasan sire e marihutu.”

¹⁷MAWU, Kụ Limembong Kawasa e něhengetang su manga umatʼE, ”Pěmpěnaungko apang kụ seng mạdiadi su wanua ini, dingangu pakarol᷊ạko kui e apang lụlahunsusa e. Aparěntako i sire e, kụ pẹ̌kantarịu kakantarịu ral᷊utu.”

¹⁸Tau Yehuda e nẹ̌bera, ”Oroko i sire e pakal᷊ighạ měmpẹ̌kantarị u kakantarịu ral᷊utu waugi kitẹ kěbị, tadeạu tatědọu akẹ u mata e makaholo manga pipị i kitẹ e.”

¹⁹Su Sion i karingihẹ̌ tingihu sasangị, ”I kitẹ e mawinasa ringangu apạe nipakamea. Banuang kitẹ e harusẹ̌ těntangeng i kitẹ, manga wal᷊eng kitẹ e měngkaghoghahẹ̌.”

²⁰Iạ e mẹ̌bera, ”Daringiheko kal᷊awọu hengetangu MAWU, ei manga wawine patikụ e! Baugu manga sangiang i kamene e těntiroingkong kakantarị u makạkěndung e, baugu manga hapị i kamene e kakantarị u susa naung.

²¹Papate e seng nakasuẹ̌ bọu janela, kụ seng nẹ̌tahatěpasu ral᷊ungu istana e; i sie timěmbo manga rariọ su ral᷊eng ore lai mangangudạ e su ěntana mal᷊oahẹ̌ (tanalapang).

²²Manga maietẹ̌ e nẹ̌sawuhẹ̌ suapan tampạ kere onasẹ̌ su wowong ěntana; kere gandung kụ seng nipotọ bọu e nitěntang dingangu tawe lai nikomol᷊ẹ̌. Seng ene e tatanatang MAWU, kụ harusẹ̌ takụ i habarẹ̌.”

²³MAWU e něhengetang, ”Taumata masasingkạ e tawe wotonge lumesạ u kapapelesane, taumata matoghasẹ̌ e ual᷊ingu katoghase, ringangu taumata kalạ e ual᷊ingu kakakalạ e.

²⁴ I saing mapulu lumesạ u mangạ e apa, harusẹ̌be lesạ u i sie e makạkiral᷊a ringangu makahěngang si Siạ; u i sie masingkạ u Iạ e kụkěndagẹ̌ baugu sarang marěngụ-děngụ dingangu Iạ e mapakạteing tita-Ku ore lai kạadilẹ̌ e su dunia. Kěbị ene e makạl᷊uasẹ̌ naung-Ku e. Iạ e MAWU, kụ seng nẹ̌berang ene e.”

²⁵MAWU e něhengetang, ”Sarung marěnta tempone Iạ e měhukungu tau Misirẹ̌, Yehuda, Edom, Amon, Moab, dingangu tumanạ u wanua l᷊inggi kụ měmpạmotọ utạ e pakạnimbụ.[5] I sire kěbị e nisunatẹ̌ mẹ̌sul᷊ungu kere tau Israel, kaiso waẹbe i sire arau waẹbe lai kawanuang Israel kụ mẹ̌tẹ̌těngkakoạ kere taumata apan tawe makisasunatẹ̌, ual᷊ingu i sire e tawe tumatuhụ diandi kụ nilahẹu pẹ̌sasunatẹ̌ ene e.”