Read Sangir DAL᷊ĚMPASIANG 1 Bible Online

DAL᷊ĚMPASIANG 1 - Sangir bible

DAL᷊ĚMPASIANG 1

¹Apạ e karěmase Yerusalem orasẹ̌ ini e, soa e nạung kal᷊imona e marame tawẹ sihinge. Nạung kal᷊imona e makědang su tal᷊oarang manga wansa e, ini ute nakoạ kere tau wal᷊u. Kal᷊imona e soa nạung něngalembon dẹ̌daloěng, arawe orasẹ̌ ini e seng nikoạ kere ěllang.

²Kanandung hěbi e i sie sụsangi u susa naung, akẹ u mata e tụtul᷊aehẹ̌ su pipị. Tawẹ u sarang sěngkatau wọu manga ikẹ̌kěndage kụ mapulu měhiborẹ̌ si sie. I sie niakal᷊engu manga hapị e kụ seng nẹ̌bal᷊ị nakoạ sědụ e.

³Tumanạ u Yehuda e naněntangu wanuane, ual᷊ingu ipẹ̌tẹ̌tahuěllang dingangu apạ e masunsara. Orasẹ̌ ini e i sire mạtanạ su tal᷊oarang manga wansa, tawẹ kadiongeng tampạ kụ makaonggọu karal᷊unsemahẹ̌. Sekẹ e mělẹ̌hěgạ si sire su tempong i sire e masunsara.

⁴Su tempong manga ěllo mawawantugẹ̌ tawẹu sarang sěngkatau e ruměnta sol᷊ong Bal᷊em Mawu. Manga mal᷊ahuala mẹ̌kakantarị paị sene e apạ e masunsara, kụ manga imang e měngkawe apa nasusa-susa naunge. Tawẹ apa taumata su manga tukadu pasěllangeng, Soang Sion nilakubangu susa naung.

⁵Manga sědụ e apạ e mal᷊uegha ual᷊ingu nakapẹ̌kawasa. MAWU e napakariadin sie makạpěndang mal᷊ikibẹ̌, ual᷊ingu rosane tumanịu mal᷊awọ. Pamanuane sen nitaweng, kụ nihengkẹ sol᷊ong pěmamembangeng.

⁶Karal᷊epatu soan Yerusalem kětạengbeng běkeng tempo nal᷊iu. Manga pangahạ e seng němpělome kere rusa nahěmpal᷊iung karal᷊unuse. I sire tawe makạpẹ̌kapura su manga sědụ kụ apang měmpẹ̌nahusu.

⁷Sarangke naopehẹ̌ dingangu nasunsara e, Yerusalem nakatahěndungke tempo tamai napaghohẹ̌ e, piạ i sie wědang lawọ darotonge; kereapa měmamanuane nakoạ su l᷊imang sekẹ, kụ tawẹu manga sarang sěngkatau riměnta naontol᷊ẹ̌. Manga rokạ e tumbạeng mạhul᷊ěge nakasilo kal᷊aopehẹ̌.

⁸Yerusalem nakal᷊amuhụ batangenge hala e, kụ měmpẹ̌kẹ̌koạ dosa makěpal᷊ẹ̌ matingkaị. Kěbị e nạung kal᷊imona e mạngadatẹ̌ si sie e, kutẹu orasẹ̌ ini e mělẹ̌hinakang ual᷊ingu makasilo katatěntol᷊ene. I sie lụl᷊ahunsusa, ual᷊ingu seng tawe kinapěngimangeng.

⁹Karal᷊amuhụ e seng limětạ mal᷊ahẹ kaiso i sie tawẹ pandungange su apang kụ mariadi su watangenge. Apạ e maněnggạ kananawone, kaiso tawẹ u sarang sěngkatau mal᷊aing makạhiborẹ̌ si sie. Tangú i sie kụkahiorọ tatal᷊ěntụ bọu anum MAWU, ual᷊ingu manga sekẹ e seng nakawatạ.

¹⁰Kal᷊awọu manga arětạ e seng kinapul᷊ahong manga sekẹ e. I sie sarang l᷊ai hinong makasilo si sire makakasuẹ̌ su Wanalan Duata, sěmbaụ kakanoạ tawe ipakawalang MAWU su taumata apang bal᷊ine umatʼE.

¹¹Ringangu lụl᷊ahunsusa pamanuane e mědẹ̌deạ asẹ̌kine; arětạ maral᷊ěgadẹ̌ sẹ̌sal᷊iuang i sire ringangu borotẹ̌, kětạeng tadeạu i sire tẹ̌be wiahẹ̌ dingangu kumbahang mate. Yerusalem kụkahiorọ u, ”O MAWU, kakěllaiko iạ, tatinganeko kal᷊awọu sigěsạku.”

¹²”Ei kal᷊awọu taumata apang mạhunsahe su ral᷊eng, kakěllako ringangu tatinganeko![1] Piạ ngae wěhạ kụ kasariane kere takụ kinapěndangeng orasẹ̌ ini, běhạ kụ niěnsạ u MAWU e si siạ, kahian dal᷊angehʼE kụ kereng kasariane ene?

¹³Bọu langị e niapal᷊intụʼE putung kụ makatutung sarang dal᷊ungu naungku. NịtataingʼE sedẹ su těngoku, kụ nakanawo si siạ. Mase nịbawalanʼE iạ sẹ̌saku nakapěndang likibe kanandung ěllo.

¹⁴Nial᷊ạʼE kal᷊awọu rosaku, mase nịlaikị e nakoạ sěmbaụ, ringangu nisangẹ e nikalong su lehẹku, hakị u wěhạ e nakapělome si siạ. MAWU e něnarakangu iạ su manga sekẹ; iạ e tawe nakapěkubibau rumokạ si sire ene.

¹⁵MAWU e mạngěnna u kai masanạ kal᷊awọu manga apang bawahaniku e maral᷊intoị. NiapasongkahʼE kal᷊awọu sordado e tadeạu kal᷊awọu manga taumataku mangangudạ e pakawinasa. I Sie něndal᷊inda apam bansaku e sarang nararul᷊ẹ, kere taumata kụ něměha wuang anggorẹ̌ e.

¹⁶Ual᷊ingu ene hakị u akẹ u mataku e měngkai apa tụtul᷊aehẹ̌, tawẹ u reng makawahansang dingangu makaonggọu lahiborẹ̌ e. Bansaku e seng kinailangengu kal᷊awọu patikụ, ual᷊ingu sekẹ e kawe limembong makawasa.

¹⁷Iạ e měhengkẹ u l᷊ima reng mẹ̌dorong tatongka, kaiso tawẹ u makaonggọ u lahiborẹ̌ e. Bọu sěmběka sude, MAWU e něndingọu sekẹ; kụ i sire riměnta měnekẹ si siạ. Iạ kinoạ e kere onasẹ̌, apa makạdarěnting su tal᷊oaran sire e.

¹⁸Kaiso seng MAWU e nạung mang kahěngang, batụ u laoronʼE e seng takụ nilewangeng. Daringihẹ̌ko si siạ manga wansa e, kakěllaiko iạ e su ral᷊ungu sigěsạ. Manga laumbaseng dingangu mal᷊ahuala nitaweng, kụ nihengkẹ sol᷊ong piněmembangeng.

¹⁹Iạ e kimui manga hapịku mapapia kaiso i sire kawe něndal᷊akisẹ̌ si siạ e. Manga imang dingangu manga těmbonangu kawanua e, kěbị-kěbị e seng nasue nate su manga ral᷊engu soa. Piạ e kạpẹ̌dẹ̌deạ kaěng baugu maněmpụ niawa.

²⁰O MAWU! Tatinganeko siạ, naungku e kal᷊inso ringangu tạ kal᷊oahenge, nakahěmpung kahiang duruhakaku nạung kal᷊imona. Suapan dal᷊eng piạ pěmamate, su ral᷊ungu wal᷊e piạ papate.

²¹O MAWU! Daringiheko kakindoạku, tawẹ apa reng makahiborẹ̌ si siạ. Manga sědụku e mạhul᷊uasẹ̌ ual᷊ingu i Kau e napakariading iạ e masilakạ. Děntạ e ěllo nạung niriandinʼU ene; koạ e i sire masunsara kere iạ.

²²Tatinganeko kal᷊awọu karal᷊akisi sire ene, kụ koạ e i sire kere i Kau miěbạ u iạ e, ual᷊ingu kal᷊awọu rosa kụ takụ nikoạ baugʼi Kau. Iạ e mẹ̌kẹ̌kiaratagẹ̌ su ral᷊ungu sigěsạ, naungku e masusa ringangu lụhumpinausang.”