Read Sangir DAL᷊ĚMPASIANG 2 Bible Online

DAL᷊ĚMPASIANG 2 - Sangir bible

DAL᷊ĚMPASIANG 2

¹MAWU e nẹ̌karadiahang su ral᷊ungu ral᷊angehẹ̌, Sion e pinẹ̌papinunụʼE ringangu kararěndung. Kawawantugu Israel kụ kere karangẹ u langị e, seng niěnsạʼE su dunia. Su tempong MAWU e limangehẹ̌, bal᷊enʼE su Sion mal᷊aing tawe papandungangʼE.

²Apang bimbaeng u rěmpugẹ̌ su ěntanang Yehuda e, niapakarul᷊ẹʼE tạ pěndangu tatal᷊ěntụ e. Su ral᷊angʼE i Sie něněnehẹ̌ sarang naopehẹ̌ manga benteng tatěndạ ipạněndạ banua ene. Kararatuang ene e ringangkeweng manga těmbonange nipakanawonʼE sarang nakoạ dal᷊akisẹ̌.

³Su ral᷊ungu ral᷊angehʼE kụ apạ e rụděllị e, katoghasu Israelẹ̌ e nipědinʼE. Piạ i kitẹ lẹ̌aloěngu rokạ, i Sie maghoẹ̌ měngonggọu tul᷊umang. Mẹ̌sul᷊ungu putung nělewa napakawinasang kal᷊awọu sạbarang, kerene MAWU e limangehẹ̌ si kitẹ kěbị e.

⁴Mẹ̌sul᷊ungu sekẹ, i Sie něngěnạu papitịʼE kụ něnarangu horom papitịʼE si kitẹ. Kěbị taumata apang makạl᷊uasẹ̌ naung i kitẹ e, nasue nipate kahian Sie. I Sie napasongkahu ral᷊angehʼE kere putung sol᷊ong dal᷊ungu soang Yerusalem.

⁵MAWU e nakoạ kere sekẹ; i Sie naměbahẹ̌ Israel sarangkewe nahaka. I Sie napakakorọ u manga benteng dingangu mangạewe istana, kụ napahuntinambang susa naung su manga pamamanuang Yehuda e.

⁶I Sie napakagholọu wal᷊enʼE, tampạ u umatʼE nẹ̌tampung baugu maněmba si Sie. I Sie napẹ̌timbul᷊eng ěllon Sabatẹ̌ e dingangu manga ěllo ghaghuwạ e su taumata. Ual᷊ingu MAWU e tumanịe limangehẹ̌, tangú manga imang dingangu ratu e seng tawe nitarimạʼE.

⁷MAWU e seng tawe něnarimạ u pananěmbaěngʼE susi e, kụ naněntangu Wal᷊enʼE hala e; niwalanʼE sědụ e piněněnehẹ̌ manga mesele. Su tampạ i kitẹ nạung kal᷊imona e mẹ̌kal᷊iomaneng dingangu mẹ̌sal᷊imbange, sědụ e mẹ̌gẹ̌gio ual᷊ingu katatul᷊endẹ.

⁸MAWU e seng němutusẹ̌ u manga meselu Sion harusẹ̌ hakaěng. Manga meselẹ̌ ene seng niukurẹ̌ʼE, tadeạu kěbị e wotonge ipakagholọʼE. Manga meselẹ̌ dingangu kal᷊awọu měnara e, orasẹ̌ ini seng kate nalěmbe ěnạ e kěbị.

⁹Manga pasěllangenge nikaambungangu ěntana, kal᷊awọu manga papal᷊ene napapědi; datu ringangu manga mapapangkatu těmbonangu kawanua e kai su ral᷊ungu pěmamembangeng. Titam MAWU e semben tawe lai tatatěntiroěng; nabi e semben tawe lai manarimạ u pěndal᷊ahẹ bọu anum MAWU e.

¹⁰Apang maghaghurangu soa e mạhungkaiang piněmoune su ěntana; i sire měmpěnẹ̌nawuhu manga awulẹ̌ su wowon těmbọ, kụ měmpẹ̌pẹ̌pakẹu pakeang bọu karong tatialang mělẹ̌lutu. Manga mal᷊ahuala e mal᷊aing kụkakurungu těmbọ i sire sol᷊ong ěntana.

¹¹Mataku e simahěnụ ual᷊ingu kakakiạ tawe ědone, himukudẹ̌ku e tụturuhẹ̌ tạ umpade. Naungku e nagholang nakasilo kal᷊aopehu wansa; nakasilo e manga rariọ bědang mạpinsang su apan dal᷊engu soa.

¹²Apạ e naral᷊ome i sire mạhungkiạ u mẹ̌dẹ̌dorong kaěng dingangu inumang si ninang i sire. Mẹ̌sul᷊ungu taumata nal᷊esẹ, i sire něngkal᷊engge su manga ral᷊eng mase mate su hiwang ninang i sire.

¹³O Yerusalem, Soang Sion ikẹ̌kěndagẹ̌ ěnạu kal᷊aopehu e kawěnahe kere taghal᷊oang. Apạ e takụ ipẹ̌bera waugu makoạ lahiborẹ̌ e? Batụ u tawẹ běke reng piạ u masigěsạ kere i kau. Mamben tawẹ u makaul᷊ị kapia kakakoạu.

¹⁴Apang nihabaru manga nabi e si kau, tumbạeng laakalẹ̌ dingangu konti samatang. I sire tawẹ běke wọu namohang u rosanu e, hakị u ual᷊ingu ene i kau e tawe nẹ̌tobatẹ̌. Kaiso su sěmběkane i sire kětạeng mělẹ̌habarẹ̌ si kamene kal᷊awọu wawera konti ipạmitaugẹ̌ e.

¹⁵Kal᷊awọu taumata apang simahe, měmpělẹ̌heghesẹ̌ si kau, ual᷊ingu i kau e seng nagholọ marihutu. I sire mẹ̌kẹ̌kakiling těmbọ i sire e kạberane, ”Seng ene e soa kal᷊ěnggihange, soa ilẹ̌lesạu dunia?”

¹⁶Kal᷊awọu sědụu e mạmanda ghatinu kạsiluge, mase lai i sire mạhul᷊ěgeng kau měmpẹ̌bẹ̌baheau. I sire němpẹ̌bera, ”Soa ene seng nipakaupung kami. Pěngěnsueěnge nịdatingken tempone nạung seng marěngụ lẹ̌ampal᷊eng i kami!”

¹⁷MAWU e seng něndal᷊engu papatakụʼE nạung kal᷊imona nikarakinʼE ringangu ipẹ̌paul᷊ịʼE si kitẹ. I kitẹ e nigaghagholọʼE tawẹ kadiongeng kakěndagʼE, sědụ e nionggotangʼE kal᷊auntu. I Sie napakal᷊uasʼi sire nakasilo kananawong kitẹ.

¹⁸Ei manga meselu Yerusalem, pẹ̌kuiko MAWU! Apatědọko akẹ u mata kere sal᷊ụ lụelehẹ̌ ěllo hěbi. Měngkate kiạ, abe pěngirul᷊e sarang badangu marul᷊ěpe!

¹⁹Pakasauko mẹ̌bangung kanandung hěbi mědeạu kumahiorọ u mapatompẹ u ral᷊ungu naungu e su MAWU. Pẹ̌gause tadeạu i Sie piạ tatal᷊ěntụ e su manga anạu apang kẹ̌kal᷊unusang dingangu mapinsang suapang pẹ̌kontol᷊angu ral᷊eng.

²⁰MAWU, kakěllako ringangu tatinganeko i sire nipahangʼU e! Apa měnsang piạ u nikoạ u kerene? I ninange kụkinạ anạ e niědihe ikẹ̌kěndagẹ̌. Imang dingangu nabi e nipate su ral᷊ungu Wal᷊enʼU susi.

²¹Mangudạ maghurang nate naoha su ral᷊eng, manga umbaseng-mahuala e natem peda. Su ěllong dal᷊angehʼU e, nipotọ u e i sire tawẹ kadiongeng pěndang u tumal᷊ěntụ.

²²I Kau e nẹ̌gausẹ̌ manga sědụ apang ikẹ̌katakụ i kami waugu mamangung sal᷊iwang u tatingkaị mělẹ̌likụ si kami. I sire němpěmate apang tẹ̌tangkianeng dingangu ikẹ̌kěndagi kami. Su ěllong dal᷊angehʼU, tawẹ u sarang sěngkatau kụ makakatal᷊ang u watangenge.