Read Sangir DAL᷊ĚMPASIANG 4 Bible Online

DAL᷊ĚMPASIANG 4 - Sangir bible

DAL᷊ĚMPASIANG 4

¹Bul᷊aeng kụ kụkerong e seng nal᷊ěbuhẹ̌ manga watung Bal᷊em Mawu e seng nẹ̌sal᷊iawuhẹ̌ su ral᷊eng.

²Kal᷊imona e manga kal᷊endesang kawuhuangu Soang Sion mẹ̌sul᷊ungu wul᷊aeng maral᷊ěgadẹ̌, kai orasẹ̌ ini e ikẹ̌koạ kere kuring ěntana e samatang.

³Sědambe iněngen dal᷊ugẹ̌ e mapạsusung anạe, arawe umatẹ̌ku e apạe matingkaị tawẹ sihinge kere manụ onta su wimbaenge.

⁴Manga rariọ darodọ e tawe nipasusu, sarang něngkapaten dou. Manga rariọ mẹ̌dẹ̌dorong kaěng, kaiso tawẹu mẹ̌gaghěllị e.

⁵I sire kụ biasa makạteěng kaěng masasědapẹ̌ e, ringangu měbẹ̌biahẹ̌ su ral᷊ungu ěnning mạhěmpal᷊iu, orasẹ̌ ini e lụhomang mědẹ̌deạ kaěng su niěndukangu onasẹ̌, dingangu mateng lunusẹ̌ su manga ral᷊eng.

⁶ Umatẹ̌ku e seng nihukung něngalembong kawěhạ e wọu měmamanuang Sodom kụ su ral᷊ungu sěngkakondạ maghoghahẹ̌ kahiang liman Duata sul᷊ikudu tindakangu taumata.

⁷Kal᷊imona e manga těmbonang i kami e matilang kere kapesẹ̌ mawira wurěsi. I sire těbe matei ringangu matoghasẹ̌, mal᷊intoị dingangu mahuweka.

⁸Arawe orasẹ̌ ini e gahị i sire e limembong kaitunge wọu ghipun sol᷊o[3] kạl᷊aěmpahẹ̌ suapan dal᷊eng tawẹu makakiral᷊a si sire. Pisin sire nẹ̌kokohẹ̌ su manga ruhi, kere kalu mahěgụ kimaigẹ̌.

⁹I sire nasunsara kụ kadiọ-kadiọ mẹ̌tate, ual᷊ingu tawẹ sarang kadiongeng kaěng; apan nate su pinẹ̌seketang e, limembo mauntu wọu apan naten lunusẹ̌.

¹⁰ Apạe mahuagatẹ̌ hombang ene e kụ himombang su manga umatẹ̌ku hakị u manga marehokang kụ naung i sire masasikome e, němpẹ̌tuěng anạ i sire hala e waugu ipěloho tiang.

¹¹MAWU e mẹ̌bẹ̌buntiagu ral᷊angehʼE kụ měnutung Soan Sion sarang natene ringangu ěntana.

¹²Su tal᷊oarang manga ratu ringangu tumanạu runia e tawẹ u sarang sěngkatau kụ deng mangimang u manga pasěllangengu soan Yerusalem e wotonge kasuẹ̌kangu rokạ.

¹³Kaiso hal᷊ẹ̌ ene mariadi, ual᷊ingu rosang manga imang dingangu manga nabi. I sire seng napakatompẹ u raha, wọu taumata kụ tawẹ sal᷊ane.

¹⁴Mẹ̌sul᷊ungu tau wuta mẹ̌pẹ̌palilị suapan dal᷊eng kụ kerene manga těmbonangu soan Yerusalem. Pakeang i sire e kotorẹ̌ kahian daha hakị u tawẹu mapulu měnenggehẹ̌ si sire.

¹⁵Taumata e mẹ̌bẹ̌bera u, ”Pěmehọ e wọu ini! I kamene e mal᷊amuhụ, kụ abe pěnenggehẹ̌ si kami!” Tangú rimal᷊engke i sire e kụ nẹ̌palilị bọu wansa sol᷊ong wansa, kaiso tawe nipakawala niapẹ̌banua walạewe měnsang kahian sai.

¹⁶MAWU e selain tawe nẹ̌padul᷊i umatʼE; i Sie hala kụ napẹ̌kal᷊iaesi sire e kụ napakariading manga imang sen tawe lai niarẹ̌gaěng; manga pangahạ e sen tawẹ u kumakěndagẹ̌.

¹⁷Matang kami e narul᷊ěpe němanda, mạngampal᷊ẹ̌ laontol᷊ẹ̌ kụ tạ banạ u rarěntane. I kami e mělẹ̌harapẹ̌ ontol᷊u wansa sěmbaụ, kụ tumuhụ hinone tawe makaghěllị u apa-apa.

¹⁸I kami e tawe makakasěbang sol᷊ong dal᷊eng, suměbang měngkai hanesẹ̌ pẹ̌pahimangengu rokạ. Pěngěnsueěngu pẹ̌bawiahʼi kami e seng kakạsandige, ual᷊ingu manga ěllong kami e seng naghanapẹ̌.

¹⁹Apang měnanahusu si kami e masahawụ-sahawụ limembong kasahawụ e wọu manụ kamamaresẹ̌. I sire měnẹ̌nahusu si kami su wul᷊ude, ringangu mělẹ̌hẹ̌gạ si kami e su wanua l᷊inggi.

²⁰I sire měmpěnẹ̌namẹ datu pinilen MAWU, taumata e pạngumbalaěng i kami kere měngonggọu pẹ̌bawiahẹ̌, dingangu mangangěllung baugu sekẹ.

²¹Ei tau Edom dingangu Us, pahul᷊ẹ̌gẹ e, pěmpahul᷊uase, těntal᷊ang dem botonge! Hombange sarung lai ruměnta su anung kamene ringangu wukang i kau sarung maněntol᷊e watangengu.

²²Sion seng něnarimạ u hukumange baugu manga rosa nịkakoạ e; orasẹ̌ ini e i kami tawe iwalang MAWU kụ tawe iwawa lai kạpia sol᷊ong dal᷊ungu pinamembangeng. Arawe i kau e, ei Edom, sarung ihukungu MAWU. Manga rosanu e sarung ipakal᷊ětạ.