Read Sangir YEHEZKIEL 1 Bible Online

YEHEZKIEL 1 - Sangir bible

YEHEZKIEL 1

¹ Su tanggalẹ̌ l᷊ima wul᷊ang kaěpạ e su taung katěllum pul᷊one,[1] su ral᷊ungu taung kal᷊imane dokeng Datu i Yoyakhin nihengkẹ sarang pěmamembangeng, iạ e Imang i Yehezkiel anạ i Busi, ene su wiwihu Sal᷊ụ u Kebar su Babel, dingangu apan tau Yahudi wal᷊ine e niwembang. Sěngkělěndịu langị e natope ringangu iạ e nakahombang papasilo mạanung MAWU e. Iạ e nakaringihẹ̌ MAWU e nẹ̌bisara si siạ dingangu iạ e nakapěndang katoghasu kawasa-Ne.

⁴Iạ e rimal᷊ingara kụ nakasilo rěllang maihạ e timiụ su sěmběkan sawěnahẹ̌. Děllụ e mẹ̌tẹ̌tatiwal᷊esẹ̌ bọu winawa sěmpětong kụ masaria-saria, ringangu langị mạngělikụ e apạ e matuala-tualagẹ̌. Su ral᷊ungu kilạ měmpạměsị ene e kẹ̌kasilo piạ apa kụkerong kere kal᷊aukangu tambaga ringangu timběha.

⁵ Su tal᷊oarang binawa ene e, takụ kinasilo kerub[2] ěpạ, kụ kai riadikang biahẹ̌ kụ mạngawẹ taumata,

⁶kaiso sěngkatau-sěngkatau e piạ gahị e ěpạ dingangu piạ papanide ruam parẹ̌.

⁷Laede matul᷊idẹ̌ dingangu kụkerong kere kal᷊aukangu tambaga ringangu timběha kụ kisoěng. Tal᷊imědon laede piạ kanukune kere kanukung banteng.

⁸Sul᷊iung gahị e ěpạ dingangu papanide ruamběka e, i sire e piạ liman taumata e wawa su al᷊ungu apaʼm papanide.

⁹Papanide sěmparẹ̌ bọu apan diadikang ene e nawingkahẹ̌ dingangu apaʼng kotọ e mẹ̌sẹ̌sasenggehu papanidu riadikang bal᷊ine e, hakịu riadikang ěpạ ene e něliwung kere nẹ̌buku ěpạ. Magengu kumanoạ ute i sire sěmbaụ-sěmbaụ e rụdal᷊eng sarang těngone tawe mẹ̌bawawal᷊ịu wadange.

¹⁰ Apan diadikang ene e piạ ěpạ gahị e mẹ̌tẹ̌tatěntang; gahị u taumata su těngone, gahị u singa su těngone koaneng, gahị u banteng su sěmbẹ̌kane kaihi, ringangu ghahị u kasiahe e su sěmběka sarang likude.

¹¹Papanide pẹ̌sěmparẹ̌ bọu apan diadikang ene e, niwingkahẹ̌ taraị hakịu nakasenggehẹ̌ pondol᷊u manga papanidu riadikang su sěmběkane, ringangu papanide sěmparẹ̌ e[3] mal᷊aing kạdal᷊ěku něnakạ badange.

¹²Diadikang ene sěmbaụ-sěmbaụ e mẹ̌tẹ̌timona těngone ěpạ sěngkahindọ kụ i sire e wotonge makoạ balạewe sarang apa i kapulun sire e tawahal᷊uasu mẹ̌bawawihuʼm badang i sire e.

¹³ Su tal᷊oarang[4] manga riadikang ene e piạ apa kụ kẹ̌kasilo e kere tětuhu putung arau oborẹ̌ dụděllị kụ mẹ̌kẹ̌kakanoạ tawẹ ědone. Putung ene e nẹ̌pịdarẹ̌ dingangu měmẹ̌měsị i pẹ̌kẹ̌kilạ e mẹ̌dẹ̌darěllụ.

¹⁴Apan diadikang ene hala e mẹ̌kẹ̌kakanoạ tamai ramahi kasahawụ e kere kilạ.

¹⁵ Piạ iạ e kapẹ̌nẹ̌naunge kěbị ene e, kinasiloku e piạ doda ěpạ u waụ su wowong ěntana, doda sěmbaụ su sěndihangu apan diadikang ene e.[5]

¹⁶Doda ěpạ ene e mẹ̌sul᷊ung dingangu kụkerong kere watuʼm paramata, ringangu sěmbaụ-sěmbaụ e piạ dodane sěmbaụ bal᷊ine kụ nawal᷊ehẹ̌ su tal᷊oarane.

¹⁷Hakịu ene kal᷊awọu doda ene botonge mẹ̌timona těngone ěpạ e.

¹⁸ Kal᷊awọu lingkahengu doda ene e napenẹ u mata.[6]

¹⁹Kal᷊awọu riadikang ene e waẹbe sarang apa i sire e puluang, dingangu kal᷊awọu doda ene e hanesẹ̌ tụtol᷊e, ual᷊ingu su kawasang manga riadikang ene e. Walạewe kakanoạu manga riadikang ene e taraị sarang langị arau měngirul᷊e e, kal᷊awọu doda ene e hanesẹ̌ tụtol᷊e ringangi sire e.

²² Su wowong těmbọu manga riadikang ene e kạbawatedẹ̌ apa kere tudung bọu kal᷊imbauge kụ kụkerong.

²³Su al᷊ungu ral᷊ingkubẹ̌ ene apan diadikang ene e němpěmingkahu papanide ruam běka e sarang těngon diadikang kụ su sěmběkane, arawe papanide sěmparẹ̌ bal᷊ine e něnukusẹ̌ badange.

²⁴ Kamagengu i sire e tuměllạ, iạ e makaringihẹ̌ tingihu kal᷊ipěpahu papanide; tingihe mẹ̌sul᷊ungu ghal᷊ědụu akẹ u tědunang, kere hěteng dal᷊empangu wuntuangu sordado masaria e, kere tingihu Ruata Kụ Limembong Kawasa e. Kereu i sire e měngirul᷊e tuměllạ e, i sire e měmpěměkuhẹ̌ kěbị papanide,

²⁵kaiso rasị bọu wowong dal᷊ingkubẹ̌ kụ su wowon těmbọ i sire e, wědang kẹ̌karingihẹ̌ sal᷊induhungu tingihẹ̌ e.

²⁶ Su wowong dal᷊ingkubẹ̌ ene e piạ apa kụ mạngawẹ kal᷊aianeng bọu watu wirụ matilang, kụ su wowone kụkaiang apạ e kụ al᷊ingkai mạngawẹ taumata e.

²⁷ Bowone rasị e kakěllaěng sụsarang kere kal᷊aukangu tambaga ringangu timběha su tal᷊oaran děllị u putung. Batuhu wawa e sụsěnnang matuala-tualagẹ̌,

²⁸dingangu piạ awạ e nẹ̌kananginang kere awạ u rěndipahẹ̌. Kụ seng ene e tualagẹ̌ kụ kụkerong kụ mělẹ̌lahẹ u rarěntang MAWU e. Nakasilo ene, iạ e nanawo nakararěmmạ su ěntana. Mase piạ tingihẹ̌ kinaringihẹ̌ku e