Read Sangir YEHEZKIEL 10 Bible Online

YEHEZKIEL 10 - Sangir bible

YEHEZKIEL 10

¹ Mase iạ e rimal᷊ingara sarang lingkaheng kụ dasị su wowon těmbọu manga kerub[18] ene, kụ takụ kinasilo apa mẹ̌sul᷊ungu kal᷊aianengu mararatu e wọu watuʼm paramata wirụ.

² Bọu ene Ruata e nẹ̌hengetang su tau piạ pakeange leneng ene e, ”Suẹ̌ko su tal᷊oarang manga roda kụ ene su al᷊ungu manga kerub ene e, ringangu pěngal᷊ạko tětuhẹ̌ sěhěngkung. Kụ bọu ene kaesẹ̌ko tětuhẹ̌ ene su wowon soa.” I sie timuhụ, kụ iạ e kumakakěllane.

³Piạ i sie simuẹ̌, manga kerub ene e kạpahundarisị e su sěmběkan timuhẹ̌ bọu Wal᷊eʼm MAWU. Binawa sěnggaul᷊ẹ̌ e namenẹ dělahẹ̌ batuhu ral᷊unge dingangu kasěllahu Wal᷊eʼm MAWU.

⁴Tualagẹ̌ kimeronge kai měnẹ̌nialan darěntaʼm MAWU němesị bọu kerub ene e dingangu něngal᷊ing sarang tukadẹ̌ sumuẹ̌ su Wal᷊eʼm MAWU, hakịu rělahe natuala-tualagẹ̌.

⁵Tingihu kal᷊ipěpahu papanidu kerub ene e kinaringihẹ̌ sarang dělahẹ̌ batuhu l᷊ikude, mẹ̌sul᷊ungu tingihu Ruata Kụ Limembong Kawasa.

⁶Sarětạeng MAWU e něndolohu taumata kụ piạ pakeange leneng ene e piněngal᷊ạ tětuhẹ̌ sěhěngkung wọu tal᷊oarang manga roda e su al᷊ungu manga kerub ene e, tau ene simuẹ̌ dingangu rimarisị su sěndihangu manga roda ene sěmbaụ e.

⁷Mase sěmbaụ bọu tal᷊oarang manga kerub ene e něnuẹ̌ u limane su ral᷊ungu putung kụ ene su tal᷊oaran sire e, němurụ manga tětuhẹ̌ piraʼm pědi, dingangu něngonggọu ene su taumata kụ piạ pakeange leneng e. Tau ene něnarimạ u ene, kụ bọu ene rimal᷊eng.

⁸Iạ e nakasilo u su al᷊ungu papanidu apang kerub ene piạ apa kere liman taumata.

⁹ Iạ nakasilo l᷊ai manga kerub ene e sěngkatau-sěngkatau e piạ dodane pẹ̌sěmbaụ su sěndihange. Doda ene ěpạ e mẹ̌sul᷊ung, dingangu kụkerong kere paramata mal᷊ěnggihẹ̌. Sěngkatau-sěngkatau e piạ dodane pẹ̌sěmbaụ bal᷊ine e kụ mạbawal᷊ehẹ̌ su tal᷊oarane.

¹¹Ual᷊ingu kawe kerene tangu kerub ene e makapẹ̌timonawe sarang těngone ěpạ. I sire wotongewe makakoạ sarang tampạ sude tuhụ kapulun sire e kụ tawahal᷊uasu měmihu wadange.

¹² Kasěllahu wadang i sire e, tal᷊ětuge, limane, papanide, ringangu apan doda e mal᷊aing napenẹ u mata.

¹³Iạ e nakaringihẹ̌ u manga roda ene e, nisěbạ ”horoʼm bal᷊iung”.

¹⁴ Apang kerub e piạ gahị e ěpạ mẹ̌tẹ̌tatěntang. Gahị e humotonge ute kai ghahị u banteng, karuane ghahị u taumata, katěllune ghahị u singa, ringangu kaěpạ e ghahị u kalěmba.

¹⁵Kerub ene e nạung kal᷊imona takụ kinasilo su wiwihu Sal᷊ụ u Kebar. Walạewe su l᷊oahu kerub ene e kumanoạ arau měmingkahu papanide, mahengkẹ sarang kinoaěng kụ tuměllạ sarang těngone arau měngirul᷊e, manga roda ene e hanesẹ̌ tụtol᷊e, ual᷊ingu pinẹ̌kawasaěngu manga kerub ene e.

¹⁸Bọu e tualagẹ̌ kụ kimerong měnẹ̌nialang darěntaʼm MAWU, naněntangu tukadẹ̌ sumuẹ̌ sarang Bal᷊eʼm MAWU ringangu měngal᷊ing sarang bowong manga kerub ene e.

¹⁹Iạ e nakasilo manga kerub ene e, němingkahu papanide ringangu tụměllạ maněntangu ěntana e kụ taraị maawị, kụ manga roda e tumol᷊e. Bọu e i sire maědung su tukadu pasěllangengu Wal᷊eʼm MAWU watuhu sěmběkan daki, kụ tualagẹ̌ kụkerong e tatapẹ̌ su wowon sire e.

²⁰Iạ e nakatahěndung u kai ene kerub nạung kal᷊imona kinasiloku e su al᷊ungu Ruatang Israel, su wiwihu Sal᷊ụ u Kebar.

²¹Kerub ene sěngkatau-sěngkatau e piạ gahị e ěpạ, papanide ruam parẹ̌, dingangu l᷊ai piạ apa kụ mẹ̌sul᷊ungu l᷊iman taumata su al᷊ungu manga papanide ene e.

²²Gahị[19] i sire e mẹ̌sul᷊ungu lai ghahị u kerub kụ takụ kinasilo su wiwihu Sal᷊ụ u Kebar. Sěngkatau-sěngkatau e rụdal᷊eng matul᷊idẹ̌ sarang těngone.