Read Sangir YEHEZKIEL 11 Bible Online

YEHEZKIEL 11 - Sangir bible

YEHEZKIEL 11

¹Bọu ene iạ nihengkẹ u Rohkẹ̌ Mawu Ruata e kụ niwawa sarang tukadu pasěllangeng su sěmběkan Daki su Wal᷊eʼm MAWU. Sene takụ kinasilo 25 su kataune, su tal᷊oarane piạ pangahạ u wansa rarua kụ i Yaazanya anạ i Azur dingangu i Pelaca anạ i Benaya.

²Mawu Ruata e něhengetang si siạ, ”Ei taumata kụ bal᷊inewe kakalẹ̌ e, seng ini e apan taumata kụ mělẹ̌hingidu karal᷊akisẹ̌ e su soa ini ringangu mẹ̌gẹ̌gěllịu sasasa kụ makạpal᷊idẹ̌ e.

³Ual᷊ingu ene habarẹ̌ko tatanata-Ku e mạanung hukumang baugi sire e, ei taumata kụ bal᷊inewe kakalẹ̌. Ual᷊ingu i sire e nẹ̌bera, ’Tạ kararěnane lai wal᷊e tamai ini e pětikang i kitẹ e kapia.[20] Soa ini e kai kuring dingangu kai i kitẹ e ghěsine kụ su ral᷊unge. I kitẹ e sarung mal᷊ěmpị bọu pẹ̌tatondaisu putung, ual᷊ingu lẹ̌lěmpingangu kuring ene.’ ”

⁵Bọu ene Rohkẹ̌ u MAWU e nẹ̌papinunụ si siạ, kụ iạ e nioroʼm MAWU pinẹ̌bera su kawanuang Israel, ”Ei tau Israel, Iạ e masingkạ u apang niwerang kamene e ringangu apang ipẹ̌kẹ̌karaking kamene e.

⁶Kai apạ e kal᷊awọ taumata kụ seng nipateng kamene, hakịu kal᷊awọu ral᷊eng su soa e napenẹ u kasuang.

⁷Ual᷊ingu ene, Iạ e MAWU Kụ Limembong Karangetange, měhengetang si kamene: Kahěngang, soa ini e ute kai kuring, kaiso ghẹ̌si su ral᷊unge wal᷊inewe i kamene, kaiso kawe maietu apan taumata kụ seng nipateng kamene! Arawe i kamene e sarung Takụ i tokol᷊ẹ̌ pasẹ̌bang bọu soa ini!

⁸Matakụ u peda i kamene tangu? Takụ aparěnta taumata kụ pẹ̌bawa peda mẹ̌deạ u i pěndokạ si kamene.

⁹I kamene sarung Takụ i apasěbang bọu soa ringangu Takụ i sarakang su taumata raghị. Iạ e seng něnawong hukumangu papate si kamene e.

¹⁰I kamene e sarung mate su ral᷊ungu pẹ̌seketang su wanuang kamene hala e, tangu nasingkạ e i kamene e u kai Iạ e MAWU.

¹¹Kụ, i kamene e tawe mal᷊enehẹ̌ su ral᷊ungu soa ini, bal᷊inewe kere manga ghẹ̌sing kinạ su ral᷊ungu kuring sěmbaụ. Iạ e sarung měnahusu ringangu měhukung si kamene baewe i kamene suapa su Israelẹ̌ ini e.

¹²Tangu nasingkạ e i kamene u kai Iạ e MAWU ringangu i kamene e Takụ i hukung ual᷊ingu seng limampa kal᷊awọu tiaha-Ku e ringangu tawẹ sěmpị e su kal᷊awọu tita-Ku ual᷊ingu tatatol᷊e kal᷊awọu toratu apaʼm bansa mạngělikụ si kamene e.”

¹³Těntal᷊ang iạ e mẹ̌berang bawera ene e, měngkate sěngkělěndịu i Pelaca e nanawo kụ nate. Tangu iạ e měngkai nẹ̌tumpěkuhẹ̌ dingangu kimahiorọ u, ”Irọ e MAWU Kụ Limembong Karangetange! Apa ngae kal᷊awọu lěmbeng Israelẹ̌ ini e sarung pateěngu?”

¹⁴MAWU e něhengetang si siạ kapia,

¹⁵”Ei taumata kụ bal᷊inewe kakalẹ̌ e, i kau ringangu manga hapị u su ral᷊ungu pinamembangeng e i pẹ̌pahumbisaran tumanạ u Yerusalem. Angkuěng i sire e, ’Taumataʼm pinamembangeng ene e tumanịu marau wọu Yerusalem baugu mẹ̌kal᷊iomaneng su MAWU. Ěntanang Israelẹ̌ e seng nionggọu MAWU si kitẹ e.’

¹⁶Ual᷊ingu ene, habarẹ̌ko tatanata-Ku ini su manga hapị u su ral᷊ungu pinamembangeng, u Iạ e nẹ̌bawa si sire pinakarau-rau su tal᷊oarang manga wansa ringangu nẹ̌kakeken sire su apam banua ene. Katewe těntal᷊ang i sire e ene paị sene, Iạ e sarung tumaking si sire.

¹⁷Iạ e MAWU Kụ Limembong Karangetange, mělahẹ u Iạ e sarung měnampung i sire e wọu apam banua su tampạ i sire e nakeke, bọu ene měnul᷊eng ěntanang Israel si sire e.

¹⁸Mạengu i sire e mapul᷊ẹ, i sire sarung měnděmmẹ u kěbị mahan duatang katatingkaị dingangu makạdarěnting kụ kinaẹ̌bakeng i sire e.

¹⁹ I sire e sarung Takụ gěllirangu naung buhu ringangu wudine wuhu. Naung i sire e makětị kere watu sarung Takụ al᷊akeng dingangu Takụ awengangu naung mararingihẹ̌ si Siạ.

²⁰Tangu i sire e sarung matuhụ su manga tiaha-Ku ringangu satia tumuhụ kal᷊awọu tita-Ku. I sire sarung makoạ umatẹ̌-Ku ringangu Iạ e makoạ Duatan sire.

²¹Arawe taumata kụ mapulu měněmba manga mahan duatang katatingkaị dingangu makạdarěntinge sarung Takụ i hukung ual᷊ingu lulun sire ral᷊akisẹ̌ ene e.” Kerene angkuěngu MAWU Kụ Limembong Karangetange.

²² Kerub ene e nanětạ e timěllạ dingangu manga roda e, mal᷊ain timol᷊e. Tualagẹ̌ kimerong kụ něnialan darěntan Duatang Israelẹ̌ e ene su wowon sire.

²³Bọu ene tualagẹ̌ kimerong ene e naněntangu Yerusalem, kụ něngal᷊ing sarang bul᷊ude, su sěmběkan daki wọu soa ene.

²⁴Su ral᷊ungu papasilo ene, Rohkẹ̌ u Mawu Ruata e, něhengkẹ si siạ e ringangu měmal᷊ịu iạ e su taumata nawembang su Babel. Bọu ene nailangke papasilo ene.

²⁵Bọu ene iạ nẹ̌běke su taumata apang nawembang e kal᷊awọu apang niapasiloʼm MAWU e si siạ.