Read Sangir YEHEZKIEL 12 Bible Online

YEHEZKIEL 12 - Sangir bible

YEHEZKIEL 12

¹MAWU e nẹ̌bisara kapia si siạ, angkuěngʼE,

² ”Ei taumata kụ bal᷊inewe kakalẹ̌ e, i kau e mạtanạ su tal᷊oarang ghal᷊ipohong měnggaghohaeng. I sire e piạ matan sire kaiso tawe makasilo, piạ tul᷊in sire, kaiso tawe makararingihẹ̌, batụu i sire e puluang měnggohaeng.

³Ual᷊ingu ene, ei taumata kụ bal᷊inewe kakalẹ̌, těntal᷊ang deʼm piạ ěllone e, diahiko apal᷊iwụu su ral᷊ungu pinikung sěmbaụ kere nạung biasane kẹ̌koatengu taumata nawembang e. Těntal᷊ang den ta nạhěbi e, těntangke wal᷊enu e pakasahẹ kere taumata kụ niwawa sarang pěmamembangeng. Pẹ̌koạko lohange su rarěndungu wal᷊eng kamene kụ sahidiangu ghal᷊ipohong měnggaghohaeng ene, ringangu wawako pinikung kụ lohong manga apal᷊iwụ u e, sarang likude wọu lohange ene. Pasaěngko pinikung ene su wowom pusigu. Pẹ̌buạ e su tempong hěbi maral᷊ung; takạko matanu e sarang i kau e tawe makasilo ral᷊eng liuangu e. Balako kasěllahu Israelẹ̌ e makasilo kěbị apang nịkakoạ u ene, tadeạu makoạ tatahěndung si sire e. Aramanung i sire e sarung makahěngang u i sire e kai měnggaghohaeng.”

⁷Bọu ene takụ koateng titaʼm MAWU e si siạ. Su ěllo ene lai, su tempon deng bědang ěllo e, takụ diahiang apal᷊iwụku su ral᷊ungu papeta, kere wiasane kẹ̌koatengu tumatal᷊ang. Ene wanua e nanětạ e kakạhěbine, iạ nẹ̌koạ e lohang dingangu l᷊imaku, su meselu wal᷊eku, bọu ene siměbang bọu lohange ene. Tẹ̌tatinganengu patikụ taumata e peta ene takụ nipasaěng su wěmbangku, kụ bọu ene iạ nẹ̌buạ.

⁸Sěngkarịěllone MAWU e nẹ̌bisara ringangku, angkuěngʼE,

⁹”Ěllon taumata kụ bal᷊inewe kakalẹ̌ e, tau Israel, kawanua kụ tahapěngghohaeng ene seng nakiwal᷊o si kau kai a kẹ̌koatengu ini e.

¹⁰Ual᷊ingu ene habarẹ̌ko si sire su apang kụ Iạ kawe MAWU Kụ Limembong Karangetange seng nẹ̌bera si sire. Tatanata-Ku ene i pẹ̌tẹ̌timona su ratu su Yerusalem, dingangkewen patikụ tumanạ u soa ene.

¹¹Tualageko tạdeakengu apang kụ kinoạ u e ute kai tatialang apang kụ sarung mariadi si sire, u: i sire sarung makoạ taumata nawembang dingangu tinaweng.

¹²Su tempong hěbi kararěndunge datung sire měmpạmasaěng petane su wowon pusigi sire bọu ene mẹ̌buạ. Taumata e sarung měmpěkoạ lohang meselẹ̌ e tadeạu i sire e makakasěbang. I sie sarung měnakạ matane mẹ̌deạu tawe makasilo ral᷊eng kụ liuange.

¹³ Arawe Iạ e sarung měneledu ral᷊ombo-Ku i pěnamẹ si sie. Bọu ene Takụ bawaěng i sie e sarang soang Babel, kụ paị sene i sie sarung mate kụ tawe nakạsilo soa ene.

¹⁴Patikụ apan tumanạ u istana e, nasowa l᷊ai apang měnanasa ringangu měndal᷊ukadu ratu e sarung Takụ i apẹ̌tal᷊ei sarang patikụ těngone. I sire e Takụbe sahusuang dingangu Takụbe pateěng.

¹⁵Su tempong i sire Takụ i pẹ̌tal᷊ei sarang tal᷊oarang manga wansa wal᷊ine e suapaʼm banuan tau raghị e, i sire sarungbe masingkạ u kawe Iạ e MAWU.

¹⁶Sěmbahageang kadodọ bọi sire e Takụ i apakasal᷊amatẹ̌ bọu pẹ̌sasekẹ, bọu karal᷊unusẹ̌, dingangu wọu sahindạ, tadeạu su tal᷊oarang manga kawanuan tau raghị ene e i sire sarungbe makahěngang u i sire kawe seng nẹ̌kakanoạ matěto-tětogẹ̌. Kụ i sire e sarungbe měngaku u Iạ e kawe MAWU.”

¹⁷MAWU e něhengetang si siạ,

¹⁸”Ei taumata kụ bal᷊inewe kakalẹ̌ e, gẹ̌guhẹ̌ko su tempong i kau e kumaěng, dingangu kakendẹen takụ su tempong i kau e mạnginung.

¹⁹Paul᷊ịko su kěbị bansa apan Takụ i wera su tumanạu Yerusalem kụ bědang mạtanạ su ěntanan sire, u Iạ e kai MAWU Kụ Limembong Karangetange. I sire e sarung guměguhẹ̌ su tempong kumaěng dingangu ghumẹ̌gilu takụ su tempong měnginung. Ěntanan sire e sarung mahusụ, u kěbị taumata kụ mạtanạ sene e měngkai sěntiniạ lụlampa toratẹ̌.

²⁰Apan soa kụ orasẹ̌ ini e napenẹu tumatanạ e sarung gagholokang, dingangu manga pẹ̌sasuangeng e sarung makoạ kěhu l᷊inggi. Tangu nasingkạ e i sire e u kai Iạ e MAWU.”

²¹MAWU e něhengetang si siạ,

²²”Ei taumata kụ bal᷊inewe kakalẹ̌, unụ e tau Israelẹ̌ e měngkai puluang mahumbisarang papasihing ini e: ’Tempo e mẹ̌gẹ̌gaghanti, arawe manga nubuetẹ̌ e tawẹ banạu mạdiadi’?

²³Ho, paul᷊ịko si sire, u Iạ e MAWU Kụ Limembong Karangetange, mẹ̌gěllịu sasimbange ini: Papasihing ene e sarung Takụ ěmukang, hakịu semben tawe i weran tau Israel kapia. Makoạ laawenge ute paul᷊ịko si sire u tempone seng nasahampị, kụ apang nubuetẹ̌ e sarung mariadi.

²⁴Su Israelẹ̌ e sarung tawẹ apa lai papasilo arau kutika mělle,

²⁵Iạ e, kai MAWU Kụ Limembong Karangetange sarung mahumbisaran tau Israel, dingangu kěbị apan Takụ i wera nal᷊ahẹ u sarung mariadi, kụ tawẹ apa relaing pananohọ. Daringihẹ̌ko, ei ghal᷊ipohon tahapěngghohaeng! Su tempong pẹ̌bawiahu e sarung Takụ koateng patikụ apan Takụ i paul᷊ị si kamene. Iạ e kai MAWU Kụ Limembong Karangetange seng nẹ̌bisara.”

²⁶Angkuěngu MAWU e si siạ,

²⁷”Ei taumata kụ bal᷊inewe kakalẹ̌, tau Israel mẹ̌bẹ̌bera u papasilo ringangu nubuetu ene e wuhụ e sarung mariadi marau su tempo ramahi.

²⁸Ual᷊ingu ene, paul᷊ịko si sire u Iạ e kai MAWU Kụ Limembong Karangetange, mẹ̌bera u: Patikụ apan Takụ i pěhengetange sarung mariadi, tawẹ apa relaing pěnanohọ. Iạ e kai MAWU Kụ Limembong Karangetange seng nẹ̌bisara!”