Read Sangir YEHEZKIEL 13 Bible Online

YEHEZKIEL 13 - Sangir bible

YEHEZKIEL 13

¹MAWU e něhengetang si siạ,

²”Ei taumata kụ bal᷊inewe kakalẹ̌, tompol᷊eko apan nabing Israelẹ̌ kụ mẹ̌bẹ̌berang kutikane nilanginge hala e. Oroiko i sire e apararingihẹ̌ bawera-Ku.”

³MAWU Kụ Limembong Karangetange něhengetang, ”Kạěngkěhang manga nabi apaʼm bodo ene! Papasilone i kẹ̌kaěbạ e tuhụ dal᷊ungu naunge hala ringangu papasilo kerene e mang tạ katěngade samatang.

⁴Ei Israel, manga nabinu e, tawẹ gunane, mẹ̌sul᷊ungkeweng manga ral᷊ugẹ̌ kụ mẹ̌bẹ̌biahẹ̌ su puidu manga soa naghagholang.

⁵I sire tawe měndariagạ apan tampạ supiạ manga mesele nal᷊aopehẹ̌, dingangu tawe lai měngangul᷊ị saụ apang meselẹ̌ golang ene. Kụ Israelẹ̌ e tawe ikatahutěndạ kereu mạběse pẹ̌sasekẹ e su ěllọeng Iạ, MAWU kụ duměnta měhukunge.

⁶Kal᷊awọu papasilon sire e mang tawẹ katěngade, ringangu manga kutikan sire e kětạengbeng konti. I sire něngaku mẹ̌bawa tatanata-Ku, sěmbal᷊iau Iạ tawe nẹ̌děndolohi sire. Kereapa wue mariadi i sire mělẹ̌harapu kutikan sire ene sarung mariadi?

⁷Iạ e MAWU Kụ Limembong Karangetange nẹ̌bera si sire, ’Manga papasilonu e tawẹ katěngade, ringangu manga kutikanu e konti. I kamene měbẹ̌bera u kěbị ene e kai tatanata-Ku sumbal᷊iau Iạ e tawẹ běke reng nẹ̌bisara ringang dingangu! Ual᷊ingu ene Iạ e sarung makoạ dokạ u.

⁹Iạ e sarung měhukung i kamene, ei manga nabi kụ měmpạnẹ̌bal᷊u konti e ringangu mẹ̌kẹ̌kutikang kal᷊awọu papasilo tạ katěngade. I kamene tawe wotonge relain tumol᷊e měngonggọu putusang su ral᷊ungu manga sidangu manga umatẹ̌-Ku. Arengi kamene e sarung kěhikang bọu rol᷊ẹ̌ u walagu Israel, dingangu i kamene e sen tawe saụ mẹ̌sul᷊e kapia sarang banuang kamene e. Tangú nasingkạ e i kamene u kai Iạ e MAWU Kụ Limembong Karangetange.

¹⁰ Ei manga nabi mělle! I kamene e seng nakapal᷊idẹ̌ umatẹ̌-Ku ual᷊ingu nẹ̌bera u patikụ e mapia ringangu nauadipẹ̌. Sumbal᷊iau mamben tala wue! Umatẹ̌-Ku e seng něndarisị meselẹ̌ dingangu watun tela kụ diọ maghea tainge, bọu ene i kamene e riměnta kụ mělaburu apụ.

¹¹Ei, manga nabi mělle, meselu e sarung maopehẹ̌. Iạ e sarung maparasehu tahiti mahẹ̌bung. Meselẹ̌ ene sarungbe tanggaěngu rěllang maihạ dingangu kahondosangu tahiting eisẹ̌

¹²hakịu mahaka, kụ apan taumata e sarung makiwal᷊o kai apa gunane meselẹ̌ ene lạburangu apụ.’ ”

¹³MAWU Kụ Limembong Karangetange něhengetang, ”Su ral᷊ungu ral᷊angehẹ̌-Ku e, Iạ e sarung maparěntang děllang maihạ, tahiti mahẹ̌bung, dingangu kahondosangu tahiting eisẹ̌ i pěnggolang meselẹ̌ ene.

¹⁴Iạ e piạ karakiku mapakahakang meselẹ̌ nạung nilạburang u apụ kahiang kamene e, kụ mapakakusu sarang kate mal᷊ěmbe manga watu wawukune. Meselẹ̌ ene e sarung maěnsạ dingangu makapate si kamene kěbị. Tangú nasingkạ e i kamene u kai Iạ e MAWU.

¹⁵Meselẹ̌ ene ringangu i kamene kụ seng nělaburu apụ e sarung makapěndang kereapa huagatu ral᷊angehẹ̌-Ku e. Bọu ene sarung Takụ i pẹ̌bera si kamene u meselẹ̌ ene e seng nasue nailang, mẹ̌sul᷊ungkeweng kamene apang němpělaburu apụ e,

¹⁶ei manga nabi mělle! I kamene e měnẹ̌něbal᷊u Yerusalem e mal᷊enehẹ̌, dingangu seng nauadipẹ̌, sumbal᷊iau mamben tala wue!” Kerene angkuěngu MAWU Kụ Limembong Karangetange.

¹⁷MAWU e něhengetang, ”Ei taumata kụ bal᷊inewe kakalẹ̌, ini e kěnangko tatingane manga wawine apang makịtikạ u kai nabi su tal᷊oaraʼm bansanu e. Tompol᷊eko i sire e,

¹⁸ringangu paul᷊ịko apang kụ Takụ i wera si sire wọu Iạ e MAWU Kụ Limembong Karangetange: ’Kạěngkěhang i kamene! I kamene e seng němitụ manga ghal᷊ang piạ kakakoạe waugu kěbị taumata ringangu manga tatimbuhung kěramatẹ̌ tadeạu taumata apang mẹ̌pakẹ e makapẹ̌kawasa pẹ̌bawiahu taumata wal᷊ine e. I kamene e mẹ̌měnningu mẹ̌kawasa su pẹ̌bawiahẹ̌ arau su papateng umatẹ̌-Ku e, kụ kawasa ene e paketang i kamene e waugu kal᷊auntung i kamene hala e.

¹⁹I kamene seng něhinakang si Siạ su těngong umatẹ̌-Ku e kětạeng baugu makahombang temọ sěhěngkung dingangu borotẹ̌ manga pirang kela. Taumata apaʼn tạ sal᷊ane, pateěng i kamene, arawe taumata kụ hinong mate e i walang kamene wiahẹ̌. Bọu ene i kamene měmpẹ̌konti umatẹ̌-Ku kụ i sire e mangimang si kamene.’ ”

²⁰MAWU Kụ Limembong Karangetange e něhengetang su manga wawine kụ makịtikạ u nabi ene, ”Iạ e mạběnsing makasilo manga ghal᷊ang piạ kakakoạ e kụ pẹ̌paketang i kamene waugu mẹ̌kawasa pẹ̌bawiahẹ̌ dingangu kakateng umatẹ̌-Ku e. Manga ghal᷊ang ene e sarung Takụ hěngkaseng bọu pul᷊aengu, ringangu apan taumata kụ pinẹ̌kawasaěng i kamene e sarung Takụ i pakal᷊iwirẹ̌.[21]

²¹Manga tatimbuhung i kamene kěramatẹ̌ e hědon Takụ songaěng, dingangu umatẹ̌-Ku e Takụ i pẹ̌teghang bọu wawodaịu karal᷊akisi kamene e sarang marěngụ-děngụ. Tangu nasingkạ e i kamene e u Iạ e kai MAWU.

²²Taumata mapia e, kụ tawe mapulu Takụ kapuraneng e, niapakakohon naungi sire e kahiang kontinu e. Taumata ral᷊akisẹ̌ e niapakasaria naunge tadeạu tatapẹ̌be mẹ̌barạdosa ringangu tawe i pakasal᷊amatẹ̌.

²³Ini e, nasuẹ e kal᷊awọu papasilo mělle ringangu manga pěnaněbal᷊u kontinu e. Takụ i pakasal᷊amatẹ̌ umatẹ̌-Ku e wọu wawodaị u karal᷊akisu. Tangu nasingkạ e i kamene u Iạ e kai MAWU.”