Read Sangir YEHEZKIEL 14 Bible Online

YEHEZKIEL 14 - Sangir bible

YEHEZKIEL 14

¹Pirang katau wọu pangahạ u tau Israel diměnta su anuku waugu makiwal᷊ong kapuluʼm MAWU.

²Bọu e něhengetangke MAWU e si siạ,

³”Ei taumata kụ bal᷊inewe kakalẹ̌, i sire ini e seng něnarakangu watangenge su mahan duata hakịu i sire e seng nawunsal᷊ẹ̌ su ral᷊ungu rosa. Kụ unụ e wue Iạ e mapulu kiwal᷊oěng i sire?

⁴Ual᷊ingu ene, pẹ̌berako si sire u Iạ e MAWU Kụ Limembong Karangetange timanata kere ini, ’Apan tau Israel kụ seng něnarakangu watangenge su mahan duata e, ringangu napakawalaʼm batangenge nawunsal᷊ẹ̌ su ral᷊ungu rosa, bọu e riměnta mẹ̌dorong sasasa wọu sěngkatau nabi, hědon Takụ simbaheng hala ringangu sasimbahe su hinone waugu manga mahan duatane kụ mal᷊awọ ene e!

⁵Kal᷊awọu mahan duata ene e seng napakaraung umatẹ̌-Ku e wọu anu-Ku, kaiso karimạko ringangu sasimbahẹ̌-Ku ene e, umatẹ̌-Ku e sarungbe mẹ̌bal᷊ị su anu-Ku.’

⁶Pěhabarẹ̌ko lai su tau Israel u Iạ e MAWU Kụ Limembong Karangetange něhengetang si sire, ’Pěmpẹ̌tobate wọu kal᷊awọu rosanu e, ringangu těntangke kal᷊awọu mahan duatanu kụ makatahamuta ene.’

⁷Apan tau Israel arau taumata raghị e kụ mạtanạ su tal᷊oaran tau Israel, kụ mẹ̌tẹ̌těngkaraung Iạ e ringangu měnẹ̌narakangu watangenge su mahan duata, wọu ene mẹ̌dẹ̌dorong sasasa su sěngkatau nabi, kụ hědon Takụ simbaheng hala.

⁸Iạ e sarung dumokạ si sie, ringangu mapakariadin sie e sansahẹ̌ baugu wal᷊ine e. Iạ e sarung mapakagheang i sie e wọu komol᷊angu umatẹ̌-Ku, tangu nasingkạ e umatẹ̌-Ku u kai Iạ e MAWU.

⁹Kereu sěngkatau nabi e seng niakal᷊eng hakịu něngonggọu sasimbange nẹ̌sal᷊a, ute kai Iạ e něngakal᷊ẹ̌. Iạ MAWU Kụ Limembong Karangetange sarung mapakagheang i sie e wọu tal᷊oaran tau Israel.

¹⁰Baewe nabi ene arau lai i sire kụ mẹ̌dẹ̌dorong sasasane, hědoʼm makaěbạ hukumange mẹ̌sul᷊ung.

¹¹Kěbị ene Takụ kinoạ e tạdeạu tau Israel kumbahang delaing mapakaraung Iạ dingangu kumbahang lai mapakal᷊amuhụu watangeng dingangu rosa. Ual᷊ingu kerene tangu i sire sarung makoạ umatẹ̌-Ku, ringangu Iạ e makoạ Duatan sire.” Iạ e MAWU Kụ Limembong Karangetange seng nẹ̌bisara.

¹²MAWU e něhengetang si siạ, ”Ei taumata kụ bal᷊inewe kakalẹ̌,

¹³kereu wanua sěmbaụ e nẹ̌dosa ringangu tawẹ satiane si Siạ e, Iạ e sarung měhukungu wanua ene. Iạ e sarung mapakagholọu sạdiang kaěnge, ringangu maparěntang hombangu karal᷊unusẹ̌, dingangu měmate waẹbe taumata, arau lai binatang.

¹⁴Manilaing i Noakẹ̌, i Danel[22] dingangi Ayub, mạtanạ su tampạ ene, tangú kapian sire těllu e, kětạembeng makasal᷊amatẹ̌ niawan sire e hala. Iạ e kai MAWU Kụ Limembong Karangetange seng nẹ̌bisara.

¹⁵Botonge mariadi Iạ e naparěntang manga binatang dul᷊u e waugu i pěněmbo tumanạu wanua ene, hakịu wanua ene, nakoạ tumanịu makasilakạ dingangu tawẹu sarang sěngkatau e lai wahani lumiung ene e.

¹⁶Manilaing i Noakẹ̌, i Danel, dingangi Ayub, matanạ sene, tangu su ral᷊ungu areng-Ku, Ruata kụ biahẹ̌ e, MAWU Kụ Limembong Karangetange, i sire e tawe makasal᷊amati sai-sai, sarangkate lai anạ i sire hala e mal᷊ain tala. Kětạeng i sire hala e samatang masal᷊amatẹ̌, arawe wanua ene e sarung makoạ banua l᷊inggi.

¹⁷Botonge mariadi Iạ e maparěntan sekẹ su wanua ini, ringangu Takụ dingotangu manga aghidẹ̌ mapapia, i pěminasa waẹbe taumata arau waẹbe lai binatang.

¹⁸Dingangu manilaing i sire těllu kanini e matanạ sene, tangú waugu Iạ, Duata kụ biahẹ̌ e, MAWU Kụ Limembong Karangetange, i sire e tawe makasal᷊amatẹ̌ si sai-sai, saranglai manga anạ i sire hala e mal᷊ain tala. Kětạembeng i sire hala e masal᷊amatẹ̌.

¹⁹Botonge mariadi Iạ e maparěntan sahindạ su wanua ini, ringangu Takụ i apasongkang dal᷊angehẹ̌-Ku e waugi sie, hakịu waẹbe taumata arau lai binatang e sarung mawinasa.

²⁰Dingangu manilaing i Noakẹ̌, i Danel, dingangi Ayub matanạ sene, tangu waugu Iạ, Duata kụ biahẹ̌ e, MAWU Kụ Limembong Karangetange, i sire e tawe mapakasal᷊amati sai-sai, sarang lai anạ i sire hala e, mal᷊ain tala. Kětạembeng i sire hala samatang kụ masal᷊amatẹ̌ e ual᷊ingu kapian sire e.”

²¹ MAWU Kụ Limembong Karangetange něhengetang, ”Iạ e sarung mapakanawong hukumang-Ku ěpạ kawěhakenge su Yerusalem, mẹ̌deạu mapakaupung baewe taumata arau waẹbe lai binatang. Hukumang ene ute kai: pẹ̌sasekẹ, karal᷊unusẹ̌, binatang bawahani, ringangu sahindạ.

²²Manga andene piạ u makal᷊ěsọ dingangu mapakasal᷊amatu manga anạ e, ute tatinganeko i sire kereu i sire ruměnta su anunu. Kakělla kereapa karal᷊akisi sire, tangu i kamene sarung makahěngang u seng nihino tindakang-Ku baugu měhukung Yerusalem.

²³Masene i kamene mal᷊ain sarung makaěnna u kal᷊awọu kakanoạ-Ku e piạbe wanggile. Iạ e kai MAWU Kụ Limembong Karangetange kụ seng nẹ̌bisara.”