Read Sangir YEHEZKIEL 16 Bible Online

YEHEZKIEL 16 - Sangir bible

YEHEZKIEL 16

²”Ei taumata kụ bal᷊inewe kakalẹ̌, todẹko su Yerusalem, kal᷊awọu kakanoạ matětogẹ̌ kụ seng nịkakoạ e.”

³MAWU Kụ Limembong Karangetange něngoro si siạ apěhabaru tatanata ini su Yerusalem, ”Ei Yerusalem, i kau e siměpụ su ěntanang Kanaan. I Amangu e tau Amori, ringangu i ninangu e tau Het.[23]

⁴Su tempong i kau kinawantelẹ̌ e, tawẹ apa taumata němotọ puidu, arau něndenọ si kau, arau němuhang asing[24] si kau arau napěmul᷊awengu kahiwu.

⁵Tawẹ u sarang sěngkatau e reng nanawo timal᷊ěntụ i kamene kụ deng mapulu mẹ̌koạ kal᷊awọu hal᷊ẹ̌ tamai ene e si kamene. Su tempong i kau kinawantelẹ̌ e, tawẹ apa ren tumal᷊ěntụ i kamene, mundangu katewe i kau e nirěmmẹ su waelẹ̌.

⁶Bọu ene limiu e Iạ kụ nakasilo si kau e mẹ̌kẹ̌kuhěnạ su l᷊aehu rahanu, kaiso Iạ e ta mapakawalang kau e mate.

⁷Iạ e něngal᷊ạ akẹ kụ Takụ niuhasẹ̌ daha e wọu wadangu. Pisinu e Takụ niwuhaěngu l᷊anan zaitun. Takụ i pakasaria i kau e kere sasuang matendang. I kau e masahawụ timuwo, nahuweka, ringangu piạ kararangẹ e, ringangu nakoạ sěngkatau wawine mangudạ.[25] Susunu e mạnětạ kakạl᷊ohone, dingangu utạ u e manandụ, kaiso i kau e kawe těntol᷊e. Eneʼ Iạ simahẹ e kapia, Iạ nakasilọ e kai sen nịdatingu tempone waugu mẹ̌kakaghiang. Takụ takateng pakeang-Ku manandu e su wadangu těntol᷊e, dingangu Takụ i pẹ̌diandi tatal᷊ěntụ-Ku e si kau. Ore, Takụ ikitang pẹ̌dariandiʼm pẹ̌kakawing dingangu e, ringangu i kau e makoạ tataghuaneng-Ku. Iạ e kai MAWU Kụ Limembong Karangetange kụ seng nẹ̌bisara.

⁸

⁹

¹⁰Bọu ene i kau e Takụ luheěngu pakeang piạ sujị e, sapatune wọu pisiʼm binatang kụ kaal᷊usange, laikị těmbọ e wọu hekạ u leneng dingangu pakeang manandu wọu sutra.

¹¹Takụ lẹ̌gaheng i kau e ringangu paramata, kalong dingangu ghal᷊ang.

¹²Iạ mẹ̌gěllịu sinsingu irung, anti-anti, ringangu sakapetine mal᷊ěnggihẹ̌.

¹³Kerene i kau e piạ dal᷊ěgahu wul᷊aeng dingangu sal᷊aka; pakeangu e nikoạ bọu hekạ u leneng, dingangu sutra piạ sujị e. I kau wotonge kumaěng borotẹ̌ bọu tuhigu kal᷊ěnggihange, ringangu madu, ringangu lanan zaitun. Kasadadạ u e tawẹ sihinge ringangu i kau e makoạ boki.

¹⁴Patikụ bansa e rụdal᷊inaụu kasadadạ u e kụ nasukụ, dingangu kai Iạ e seng napakariading kau e masadadạ. Iạ kai MAWU Kụ Limembong Karangetange seng nẹ̌bisara.

¹⁵Kaiso i kau e nẹ̌sal᷊a pakẹ u kasadadạ u e ringangu kawěnging arengu. I kau e mẹ̌tẹ̌tikị dingangu manga esẹ apang kụ sumahe e.[26]

¹⁶Sěmbahageang bọu pakeangu e nipakẹ u waugu pělěgahẹ̌ tampạu pěnaněmbaěng mahan duatanu e. I kau e nakoạ tahapẹ̌sundal᷊ẹ̌, dingangu něngonggọu wadangu e suapang manga esẹ.[27]

¹⁷Bọu ral᷊ěgahẹ̌ bul᷊aeng dingangu sal᷊aka kụ Takụ nionggọ si kau e, nikoạu e manga tul᷊adan tau esẹ, bọu ene i kau e nawuang dingangu manga tul᷊ada ene.

¹⁸Karạu e manga tul᷊ada ene niluhengu pakeang piạ sujị e kụ sen Takụ nionggọ si kau. Karạ u e nisěmbanu lanan zaitun dingangu wuwụ kụ seng nikatarimạ u e wọu Iạ e.

¹⁹I kamene Takụ onggotangu kaěng bọu tuhigu kal᷊ěnggihange, madu, ringangu lanan zaitun limembong sahịe. Kaiso kěbị ene e nisěmbanu su manga mahan duata ene, mẹ̌deạu makal᷊uasẹ̌ naungi sire e. Iạ e kai MAWU Kụ Limembong Karangetange kụ seng nẹ̌bisara.

²⁰Bọu ene i sěmbanu e manga anạ i kitẹ e, manga esẹ dingangu manga wawine, makoạ sasěmba su manga mahan duata. Kai wědang tawe nạsukụ ho i kau tawẹ satianu e si Siạ?

²¹Kai relaing hinong al᷊akeng manga anạ-Ku ringangu i wala i sire makoạ sasal᷊iune su manga mahan duata e tangu?

²²Su ral᷊ungu pẹ̌bawiahu kụ makạdarěnting ene kere tahapẹ̌sundal᷊ẹ̌ e, manilaing kạdodọ i kau e tawe mẹ̌tahěndung tempong i kau e reng kạdodọ, piạ i kau e reng těntol᷊e, ringangu mẹ̌kẹ̌kuhěnạ su l᷊aehu rahanu e hala.”

²³MAWU Kụ Limembong Karangetange něhengetang, ”Kạěngkěhang i kau e! Mamben těngadẹ̌ silakạ! I kau e seng nẹ̌koạ kal᷊awọu karal᷊akisẹ̌ ene.

²⁴Kutẹu lai, su ěntana mal᷊oahẹ̌ su soa e ringangu su manga wiwihu apan dal᷊enge i kau e něndarisị u manga tampạ u pěnanal᷊eěng mahan duata e, ringangu mawuang.

²⁵I kau e nakal᷊amuhụ kasasadadạu e. Badangu e i sẹ̌soghelu suapang manga esẹ kụ masahe, ringangu tawẹ pontode i kau e mawuang.

²⁶Misirẹ̌ lampungu e ghẹ̌guwạ sahige ene e, seng pinẹ̌dinganengu e mẹ̌tikị. I kau e pinẹ̌tatudẹ nawuang e mẹ̌deạu Iạ e mẹ̌pědu.

²⁷Orasẹ̌ ini e Iạ mẹ̌kakanoạ baugu měhukung si kau, ringangu měngal᷊ạ al᷊amatẹ̌ kụ sen Takụ nionggọ si kamene. I kau e Takụ i sarakang su tau Pilistin kụ mạběnsing i kamene ringangu tẹ̌tahamuta makasilo lulunu mal᷊amuhụ ene.

²⁸Arawe i kau e wẹ̌dang tawe lai nakạpěndang nawul᷊ugẹ̌; kụ ual᷊ingu ene sẹ̌sahusuangu e tau Asyur. I kau e nakoạ tahakiwuang si sire e, kaiso tawe lai makawawatụ abul᷊inu e i sire.

²⁹Mase i kau e nakoạ tahakiwuangu tau Babel, taumatạe tahapẹ̌dagang ene. Kaiso i sire mal᷊ain tawe makawawatụ abul᷊inu.”

³⁰MAWU Kụ Limembong Karangetange e něhengetang, ”Kěbị ene seng nịkakoạ u e mẹ̌sul᷊ungu tahakiwuang kụ bẹ̌gawe mamea.[28]

³¹Su manga ěntana maral᷊oahẹ̌ su soa e, dingangu suapan dal᷊eng e nipẹ̌koatengu tampạu pěnaněmbaěng mahan duata e ringangu mawuang e. Katewe i kau e wal᷊inewe kere tahakiwuang biasa kụ mẹ̌gẹ̌gausẹ̌ doitẹ̌ e.

³²I kau e kai mẹ̌sul᷊ungu kawing kụ nẹ̌tul᷊ang kawinge, kụ nẹ̌koạ pẹ̌sasal᷊a ringangu esẹ bal᷊ine.

³³Sěngkatau tahakiwuang e hanesẹ̌ makạěbạ bawaehe, arawe ini e kawe nawal᷊ị kụ kawe i kau mẹ̌gẹ̌gěllị u poroseěng si sai-saing kẹ̌kapulunu e, saranglai lẹ̌ologangu e i sire ringangu roitẹ̌ tadeạu mahunděnta walạewe měnsang bọu a, mẹ̌deạu mẹ̌tikị dingangu.

³⁴I kau e tahakiwuang naněntani wọu tahakiwuang bal᷊ine e. Tawẹ u něnihasang kau e makoạ tahakiwuang. I kau e tawe wawaehang, kai mal᷊ạ i kau hala e měmaehẹ̌. Mamben těngadẹ̌ i kau e nanihing bọu tahakiwuang bal᷊ine e.”

³⁵Ei Yerusalem, tahakiwuang, daringihẹ̌ko apaʼm piněhengetangu MAWU e Kụ Limembong Karangetange, ”I kau e seng něluạ pakeangu, kụ kere sěngkatau tahakiwuang e i kau seng něnarakangu wadangu e suapang i kẹ̌kapulunu e ringangu su manga mahan duatanu makạdarěnting ene e. Manga anạ u e nịpapatenu ringangu nikoạ sasal᷊e waugu manga mahan duata ene.

³⁶

³⁷Ual᷊ingu ene, kěbị nạung i sai-saing kẹ̌kapulunu e Takụ tampungang, baewe apang i kẹ̌kapulunu arau apangkewe i kẹ̌kawěnsingu e. I sire e sarung dumarisị mělikụ si kau, ringangu sarung měluạ pakeangu kěbị e, hakịu i sire makasilo wadangu e kawe těntol᷊e.

³⁸I kau e sarung Takụ i hukung ual᷊ingu kawawuang dingangu pěmamate kụ seng kinoạ u ene. Su ral᷊ungu wawal᷊uang dingangu ral᷊angehẹ̌-Ku e i kau e sarung Takụ i hukungu papate.

³⁹I kau e Takụ i sarakang si sai-saing makạbirahi si kau e, ringangu i sire sarung mapakahakang kal᷊awọu tampạ u mawuang dingangu měnal᷊e mahan duata. Kal᷊awọu pakeang dingangu ral᷊ěgahu e sarung hampaseng i sire, hakịu i kau e matěntol᷊e.

⁴⁰I sire e sarung měndolohu taumata l᷊awọ apěmerengu watu e si kau ringangu apěmamotọ bạdangu e ringangu peda.

⁴¹I sire e sarung měnanutung manga wal᷊eng kamene ringangu měngoro manga wawine apẹ̌sahidi pělahukungu e. Kerene kakakoạ e Iạ mapěngědong kawawuangu e. I kau e tawe sarung mapẹ̌papahiạu poroseěng kạpia su manga tatuno naungu e.

⁴²Buhụ e wọu ene, wawal᷊uang-Ku e sarung mal᷊ěda, dingangu Iạ e mal᷊enehẹ̌ kạpia. Iạ e semben tawe saụ mẹ̌pědu ringangu mẹ̌tanudẹ̌.

⁴³Iạ e měhukung i kau, ual᷊ingu i kau e sen tawe nẹ̌tahěndung kereapa Iạ e mẹ̌tẹ̌tangkiang si kau su tempong i kau e rem bẹ̌dang mangudạ. I kau e nakakariading Iạ e nẹ̌bawal᷊uang dingangu kal᷊awọu kakanoạ u ral᷊akisẹ̌ ene e. Unụ e kal᷊awọu lulunu kụ makạdarěnting ene e wẹ̌dang tambaěngu l᷊ai kawawuang? Iạ e kai MAWU Kụ Limembong Karangetange kụ seng nẹ̌bisara.”

⁴⁴MAWU e něhengetang, ”Ei Yerusalem, taumata e sarung mapẹ̌tal᷊ahinong papasihingu wawera ini, si kamene, ’Mẹ̌sul᷊ungu i ninange, kerene lai sangiange.’

⁴⁵Mamben těngadẹ̌ i kau e kai anạ i ninangu e wawine. I sie mạběnsingu kawinge ringangu su manga anạ e sẹ̌sane. I kau e mẹ̌pẹ̌papangawẹ u manga anạ u sěngkataunu wawine e kụ mal᷊aing mạběnsingu kawinge ringangu manga anạ e. I kau ringangu manga anạu sěngkataunu, kụ kai manga soa e su manga rěduhu piạ i ninange tau Het dingangu i amange tau Amori.[29]

⁴⁶Tuhangu e ute kai Samaria su pungu sawěnahẹ̌ dingangu kal᷊awọu kamponge. Dingangu tuarinu e ute kai Sodom su pungu timuhẹ̌ dingangu kal᷊awọu kamponge.

⁴⁷Nawatụ bue kapulunu e tangu timol᷊e ěnạu l᷊aedi sire e ringangu mẹ̌těno kakanoạ i sire e kụ makạdarěnting ene? Tala wẹ̌dang! Ta nararěnnạ wọu ene tangu i kau e mal᷊ạ něngalembong karal᷊akise lai wọi sire e.

⁴⁸Baugu Iạ Duata kụ biahẹ̌, angkuěngu MAWU Kụ Limembong Karangetange, anạu sěngkataunu e Sodom dingangu manga kamponge tawe nạdal᷊akisẹ̌ kere karal᷊akisu e ringangu manga kampongu e.

⁴⁹Sodom dingangu manga kamponge maobotẹ̌ ual᷊ingu piạ kaěng sạdiane mal᷊awọ ore lai makapẹ̌biahẹ̌ mal᷊enehẹ̌ dingangu maghighilẹ̌. Arawe i sire e tawẹ pandungange su taumata kasiang dingangu taumata hina e.

⁵⁰I sire maobotẹ̌ dingangu makakětị těmbọe, ringangu mẹ̌kẹ̌koạ kal᷊awọu hal᷊ẹ̌ i kẹ̌kawěnsing-Ku. Ual᷊ingu ene i sire Takụ gagholokang kerẹewe kinasilonu e.

⁵¹Mamben dal᷊akisẹ̌ Samaria e, katewe rosane tawe makamal᷊oara wọu rosanu e. Lulunu e něngalembong karal᷊akise lai. Manga wawinenu e tạbidạu tawẹ sal᷊ane i wanding si kau e. I kau harusẹ̌be makapěndang mamea ringangu mahina!”

⁵²

⁵³MAWU e nẹ̌bera su Yerusalem, ”Sodom dingangu Samaria ringangu manga kampong i sire e sarung Takụ i pakasorogạ kapia. Bọu ene buhụ ewe i kau Takụ ipakasorogạ lai.

⁵⁴Ual᷊ingu kawe kerene tangu i kau sarung mamea su watangengu hala e, ringangu kal᷊ahinanue sarung mapakal᷊ahẹ su manga anạ u sěngkataunu e apạ e kapia kakakoạ u wiahi sire e.

⁵⁵I sire ringangu manga kampong i sire e sarung masorogạ kapia, kerene lai i kau ringangu manga kampongu e.

⁵⁶Bal᷊inewe i kau e wọu rụl᷊ẹ̌gen Sodom su tempong i kau e wědang maobotẹ̌ e,

⁵⁷ringangu karal᷊akisu e wědang tawe kinasingkatenge tangu? Ini e i kau měngkate mẹ̌sul᷊ung i sie; i kau e nakoạ tatahul᷊ẹ̌geěngu tau Edom, tau Pilistin, dingangu manga l᷊ampungu wal᷊ine e kụ mạběnsing i kau e.

⁵⁸I kau e harusẹ̌ mẹ̌tatahangu sunsara ual᷊ingu kakanoạu mal᷊amuhụ dingangu makạdarěnting ene. Iạ e kai MAWU kụ seng nẹ̌bisara.”

⁵⁹MAWU Kụ Limembong Karangetange něhengetang, ”I kau e sarung Takụ pahangeng tuhụewe kakanoạu, batụu i kau e kai seng limampa pẹ̌sasal᷊anu e ringangu seng nělandang pẹ̌kakire-Ku e ringangu.

⁶⁰Arawe Iạ e sarung mẹ̌tahěndung pẹ̌dariandi kụ seng Takụ kinoạ e ringangu su tempong kangangudạ u ringangu nẹ̌koạ pẹ̌dariandi e ringangu sarang marěngụ-děngụ.

⁶¹I kau sarung makatahěndung kal᷊awọu kakanoạ u ringangu makapěndang mamea su tempong manga anạu sěngkataunu e Takụ i sul᷊e su anunu. I sire e sarung Takụ koateng kere manga anạu, manilaing hal᷊ẹ̌ ene e tawe nasowa su ral᷊ungu riandi-Ku e ringangu.

⁶²Iạ e sarung mẹ̌koạ pẹ̌dariandi wuhu e ringangu. Tangu nasingkạ e i kau u kai Iạ e MAWU.

⁶³Iạ e sarung měndẹ̌dasẹ̌ kal᷊awọu pẹ̌sasal᷊anu, arawe i kau e tawe makakiwul᷊eng ene, ringangu i kau e sarung makapěndang mamea waugu mẹ̌berang manga apa. Iạ e MAWU Kụ Limembong Karangetange kụ seng nẹ̌bisara.”