Read Sangir YEHEZKIEL 17 Bible Online

YEHEZKIEL 17 - Sangir bible

YEHEZKIEL 17

¹MAWU e něhengetang si siạ,

²”Ei taumata kụ bal᷊inewe kakalẹ̌, běkeko su apan tau Israel papapinintu,

³nạung Iạ e MAWU Kụ Limembong Karangetange mapulu měhabarẹ̌ si sire: Kai piạ kasiahe rokol᷊ẹ̌ kụ dukụ e mal᷊ěngihẹ̌ dingangu papanide mawěnahẹ̌ ore lai matoghasẹ̌. I sie timěllạ sarang bul᷊udu Libanon, němosọ kotọu kalun cěmara,

⁴bọu e nẹ̌bawa ringangu něměllọu ene su soa pẹ̌bawal᷊ukang kụ marame.

⁵Bọu ene něngal᷊ạ e sasuang sěmpuěng kụ bědang mangudạ bọu ěntanang Israel, dingangu nisuange su rahami mahuntawa kụ tawe kakawusangu akẹ.[30]

⁶Sasuang ene e nakoạ kalung anggorẹ̌ kụ timuwo masanạ kutẹu kai nělawe nakeke. Manga lelange nal᷊antehẹ̌ sarang těngong kasiahe ene, ringangu manga hamụ e timětelẹ̌ mapia su ral᷊ungu ěntana. Kalung anggorẹ̌ ene e masuhampạ kahěngang.

⁷Těntal᷊angkewe ene tangu piạko manụ kasiahe rokol᷊ẹ̌ bal᷊ine e; kụ papanide mawěnahẹ̌ dingangu rukụ e masuwenehẹ̌. Kụ bọu ene kalung anggorẹ̌ ene e napẹ̌timonang manga hamụ e ringangu manga lelange sarang lantehu manụ kasiahe wuhu ene, apidu mạngantibẹ̌ měnsang manụ ene rembeng makaghěllịu akẹ něngalembong kal᷊awọe wọu akẹ kụ sen tẹ̌be piạ su rahami ene.[31]

⁸Sumbal᷊iau kalung anggorẹ̌ ene e seng nasuang su ěntana matawa ringangu akẹ e mạhěmpal᷊iu, hakịu i sie makapẹ̌daukalu masuhampạ, mẹ̌bua mahěbung, dingangu makoạ kalung anggorẹ̌ mal᷊ěnggihẹ̌.

⁹Tangu, Iạ, MAWU Kụ Limembong Karangetange, makiwal᷊o: Botonge ngae kalung anggorẹ̌ ene e mẹ̌biahẹ̌ dingangu měbungang? Arau kai manụ kasiahe e kakal᷊imonaěnge měngebụ si sie ringangu manga hamụ e, měhěngkasẹ̌ buane, měmědi manga lelange dingangu mapakawalan sie mahěgu? Tawe mẹ̌gaghausẹ̌ taumata l᷊awọ arau bansa kụ pěrkasa waugu měngěbụ kalu ene sarang manga hamụ e.

¹⁰Kahěngang i sie seng nisuang matoghasẹ̌, katewe botonge ngae tumuwo turusẹ̌ ore mẹ̌bungang? Kai tawe malolang bue i sie kamageng tiukangu anging Daki tangu? Kai wal᷊inewe sarung mahěgu i sie su tampạu pinẹ̌suangenge?”

¹¹MAWU e něhengetang si siạ,

¹² ”Pakiwal᷊oko su manga měnggaghohaeng ene, měnsang i sire e nakaěnna mangal᷊eng papinintu ene. Paul᷊ịko si sire u ratuʼm Babel sen diměnta su Yerusalem, dingangu něhengkẹ datung Yehuda ringangu manga těmbonangu manga soa ene sarang Babel.

¹³Bọu e i sie němile sěngkatau walagu ratung Yehuda ene, nẹ̌koạ pẹ̌dariandi ringangi sie, ringangu něngoro si sie, pẹ̌salu pakasatia si sie. Ratuʼm Babel ene e něnaweng taumata mapapia,

¹⁴tadeạu kararatuangu Yehuda ene e tawe sarung mẹ̌pětị kapia, ringangu mẹ̌deạu i pěndiagạ batụu pẹ̌dariandi ene e mambeng hinong i pakasěhụ.

¹⁵Kaiso ratung Yehuda e nẹ̌pahuwungkadẹ̌ kụ něndingọu rarolohang sarang Misirẹ̌ mẹ̌deạu makaěbạ kawal᷊o ringangu sordado mal᷊awọ. Kụ makauntu wue i sie? Mal᷊iwirẹ̌ bue i sie ngae? Tamariadi i sie mělandang kire tawe kahinoěngu hukumang!

¹⁶Dingangu areng-Ku, Duata kụ biahẹ̌, MAWU Kụ Limembong Karangetange, datun Yehuda sarung mapohong su Babel, ual᷊ingu i sie seng nělandang kirene ringangu ratuʼm Babel kụ seng napakaiang i sie e su wowong kal᷊aianenge.

¹⁷Ore maning buntuangu sordadong Misirẹ̌ matatoghasẹ̌ ene e, tawe makaumal᷊ẹ̌ mẹ̌tul᷊ung i sie wọu pěnanekẹ u tau Babel, kụ měmpẹ̌kẹ̌koạ manga niambungangu ěntana ringangu měmpěmangka manga songe waugu pěmateěng taumata l᷊awọ.

¹⁸Ual᷊ingu i sie kawe sen tawe nẹ̌tahěndung salu ringangu riandine, i sie e tawe makakatal᷊angu watangenge.

¹⁹Dingangu areng-Ku, Duata kụ biahẹ̌, MAWU Kụ Limembong Karangetange, datung Yehuda, sarung Takụ i hukung ual᷊ingu seng limampa pẹ̌dariandine ringangu ratuʼm Babel, sumbal᷊iau i sie e seng nẹ̌salu su ral᷊ungu areng-Ku waugu mapakasěhụ u ene.

²⁰Iạ e sarung měneledẹ̌ dal᷊ombo waugu i pěnamẹ. I sie e Takụ i wawa sarang Babel kụ Takụ i hukung paịse, watụ u i sie e tawẹ satiane si Siạ e.

²¹Sordadone kụ kapiange sarung mawihua, su ral᷊ungu pẹ̌seketang, arawe apang nakatal᷊ang e sarung mẹ̌kal᷊iaesẹ̌ sarang patikụ lẹ̌batenge. Tangu nasingkạ e umatẹ̌-Ku e u Iạ e kai MAWU, kụ seng nẹ̌bisara.”

²²Seng ini e pinẹ̌berang MAWU Kụ Limembong Karangetange, ”Wọu kalun cěmara kụ marangẹ e, sarung Takụ pěmul᷊ihang pul᷊ane bọu ene Takụ pěmědiang lelange wuhu e sělelang; Takụ suangeng lelange ene su wul᷊ude kụ měnumbụ sarang binawa.

²³Su wul᷊ude marangẹ su Israelẹ̌ e, i sie Takụ tětelang. Paị sene i sie sarung mẹ̌tumbal᷊ẹ̌, dingangu mẹ̌bua, wọu ene makoạ kalun cěmara kụ tatuwone mapia. Kal᷊awọu haghing manụ u winalangeng e sarung mẹ̌sal᷊ehẹ̌ su ral᷊unge ringangu mẹ̌kěllung su al᷊unge.

²⁴Kěbị kalu su wanua e sarung makaěnna u kai Iạ MAWU e. Kalu mararangẹ e Takụ tuwangeng; kalu masasanạ e Takụ koateng patuwo apatol᷊ọ. Kalu kụ biahẹ̌ e Takụ i pakahěgu pakakaigẹ̌; dingangu kalu kụ mahěgu e Takụ i pẹ̌tumbal᷊ẹ̌ dingangu pẹ̌bungang. Iạ e kai MAWU, kụ seng nẹ̌bisara, kal᷊awọu wawera-Ku e sarungbe mariadi.”