Read Sangir YEHEZKIEL 18 Bible Online

YEHEZKIEL 18 - Sangir bible

YEHEZKIEL 18

¹MAWU e něhengetang si siạ,

² ”Unụ e papasihing ini e sěntiniạ mang i pẹ̌bẹ̌bera su wanuang Israelẹ̌ tangu? ’Taumata maghurange kụkaěng buang anggorẹ̌ kụ temange mahaesẹ̌, arawe manga rariọ kawe mạngirasẹ̌ isine e.’

³Su areng-Ku, Duata kụ biahẹ̌, MAWU Kụ Limembong Karangetange, papasihing ene e, tawe lai sarung i wera su Israel.

⁴Niawang apan taumata e kai tataghuaneng-Ku, baewe niawan taumata maghurang arau lai niawang anạ e. Taumata kụ nẹ̌dosa e, ute kai i sie sarung mate.

⁵Andene piạ taumata kụ mapia e, adilẹ̌ dingangu matul᷊idẹ̌.

⁶I sie tawe měnaněmba mahan duatan tau Israel arau mahungkinạ sasěmba su tampạu pěnanal᷊eěng manga mahan duata. I sie tawe něnẹ̌nal᷊ukạ kawingu taumata wal᷊ine arau nẹ̌tẹ̌tikị dingangu wawine kụ dẹ̌dal᷊engangu raha e.

⁷I sie tawe něngẹ̌ngakal᷊ẹ̌ arau nělẹ̌hampasẹ̌. Manga apal᷊iwụ tatupị taumata kụ piạ utange si sie e, hanesẹ̌ bẹ̌bal᷊ikange. Taumata kụ kẹ̌kal᷊unusang, lẹ̌onggotange kaěng dingangu taumata kụ tawẹ pakeange, lẹ̌onggotange pakeang.

⁸I sie tawe něngẹ̌ngonggọu ědang piạ rentene. I sie tawe mapulu mẹ̌koạ dal᷊akisẹ̌ e, dingangu suapang piạ pẹ̌bawul᷊o e i sie mạngonggọbeng putusange matul᷊idẹ̌.

⁹ I sie e tụtuhụbe tita-Ku ringangu rụdaringihẹ̌be manga toratẹ̌-Ku. Semben taumata kerene e matul᷊idẹ̌ dingangu tatapẹ̌be wiahẹ̌. Iạ e MAWU Kụ Limembong Karangetange seng nẹ̌bisara.

¹⁰Arawe andene taumata ene piạ anạ e kụ puluang měhampasẹ̌, měmate, ringangu mẹ̌koạ[32] kal᷊awọu karal᷊akisẹ̌ bal᷊ine e,

¹¹kụ tawe nịkẹ̌koạ i amange. I sie kimaěng sasěmba suapan tampạ u pěnanal᷊eěng mahan duata. I sie měnal᷊ukạ dingangu mẹ̌sěngkapẹ̌tikị dingangu kawingu taumata wal᷊ine.

¹²I sie puluang měngakal᷊ẹ̌ taumata kasiang, měhampasẹ̌, měmul᷊aho apal᷊iwụ bawalaru taumata waugu utange si sie. I sie mạkoạ sarang pěnanal᷊eěngu taumata kụ běgang MAWU e ringangu měnẹ̌nal᷊e mahan duata kụ makạdarěntinge.

¹³I sie měngẹ̌ngonggọu ědang piạ rentene. Mẹ̌biahẹ̌ bue taumata kerene ngae? Tala! I sie seng nẹ̌koạ kěbị kakanoạ kụ makạdarěnting ene, ringangu i sie e sarung mate! Papatene ute kai pul᷊isu kakanoạ e hala e.

¹⁴Andene taumata kụ mẹ̌kẹ̌koạ dal᷊akisẹ̌ ene e piạ anạ e, kụ anạ e ene e makasilo kal᷊awọu kakanoạ i amange, kaiso tawe mẹ̌těno ene.

¹⁵Anạ ene tawe mapulu měnal᷊e mahan duatan tau Israel, arau mahungkinạ sasěmba suapan tampạ u pěnanal᷊eěng mahan duata e. I sie tawe něnẹ̌nal᷊ukạ kawingu taumata wal᷊ine,

¹⁶arau manigěsạ kutẹu lai mělẹ̌hampasẹ̌ si sai-sai. Manga apal᷊iwụ dal᷊uaru taumata apaʼm piạ utange si sie, hanesẹ̌ sẹ̌sul᷊eěnge. Taumata kẹ̌kal᷊unusang lẹ̌onggotange kaěng, dingangu taumata kụ tawẹ pakeange lẹ̌onggotange pakeang.

¹⁷I sie tawe nẹ̌kẹ̌koạ dal᷊akisẹ̌[33] arau měngẹ̌ngonggọu ědang piạ rentene. I sie matuhụ su manga toratẹ̌-Ku e ringangu mararingihẹ̌ su manga tita-Ku e. Dariọ ene tawe mate ual᷊ingu kal᷊awọu rosang amange, kaiso tatapẹ̌be wiahẹ̌.

¹⁸Arawe, i amang kụ puluang měngakal᷊ẹ̌, měhampasẹ̌,[34] ringangu mẹ̌koạ lai karal᷊akisẹ̌ bal᷊ine e, sarung mate ual᷊ingu kal᷊awọu rosa nịkakoạ e hala.

¹⁹Kaiso aramanung piạ taumata kụ makịbal᷊o kawe unụ e rariọ ene e tawe timol᷊e něnanggung aị u pẹ̌sasal᷊ang amange. Sasimbange ute kai, ual᷊ingu rariọ ene e mapia ringangu matul᷊idẹ̌ e. I sie mararingihẹ̌ su manga toratẹ̌-Ku e ringangu mẹ̌kẹ̌koạ dingangu kasasatia, tangu i sie e tatapẹ̌be wiahẹ̌.

²⁰ Taumata kụ mẹ̌kẹ̌koạ dosa e, i sie e sarung mate. Anạ e tawe harusẹ̌ pěnal᷊udẹ̌ aịu pẹ̌sasal᷊ang amange; su sěmběkane, i amange e mal᷊ain tawe hinong měnal᷊udẹ̌ kal᷊awọu rosang anạ e. Taumata mapia e makahombang bawal᷊ise mapia ual᷊ingu kakanoạ e mapia e. Dingangu taumata ral᷊akisẹ̌ e sarung masigěsạ ual᷊ingu karal᷊akise.

²¹Kereu sěngkatau taumata ral᷊akisẹ̌ e tawe mẹ̌dosa kapia, dingangu manětạ dumaringihẹ̌ manga toratẹ̌-Ku e, ore mẹ̌koạ kakanoạ mapia ringangu nihino, i sie e tawe mate.

²²Kal᷊awọu rosane e sarung ampungang; kụ i sie e sarung mẹ̌biahẹ̌, ual᷊ingu mẹ̌kẹ̌koạ katul᷊idẹ̌ e.

²³Su naungu e Iạ MAWU Kụ Limembong Karangetange mal᷊uasẹ̌ kamagengu sěngkatau ral᷊akisẹ̌ e mate? Mambem bal᷊inewe kerene! Iạ e kai mẹ̌měnningu i sie e maněntangu kal᷊awọu rosane tadeạu i sie e tatapẹ̌be wiahẹ̌.

²⁴Katewe kamagengu sěngkatau taumata mapia e kawe sen tawe mẹ̌kakoạ mapia, sal᷊a anune kawe mạnětạ mẹ̌kẹ̌koạ dal᷊akisẹ̌ dingangu kal᷊awọu kakanoạ makạdarěnting kụ biasane kẹ̌koatengu taumata ral᷊akisẹ̌, ute lẹ̌ěnnaěng i sie e těbewe wiahẹ̌ ngae? Tala! Bọu kal᷊awọu kakanoạ e kụ mapia e, tawẹu sarang sěmbaụ kụ delaing katahěndungang. I sie sarung mate ual᷊ingu pẹ̌kakoạ e rosa, ringangu tawẹ satiane si Siạ e.

²⁵Aramanung, piạ u mẹ̌bẹ̌bera kirini, ’Kakanoạu MAWU e nẹ̌sal᷊a.’ Daringihẹ̌ko tau Israel! Nẹ̌sal᷊a ngae kakanoạ-Ku? Mambeng i kamene e nẹ̌sal᷊a.

²⁶Kereu taumata mapia kụ sen tawe saụ mẹ̌koạ mapia, kụ kawe mal᷊ạ manětạ mẹ̌koạ dal᷊akisẹ̌ e, i sie sarung mate, ual᷊ingu karal᷊akisẹ̌ kụ seng nịkakoạ e.

²⁷Arawe kamagengu taumata ral᷊akisẹ̌ e sen tawe saụ nẹ̌koạ dosa kaiso kawe nanětạ mẹ̌kẹ̌koạ munarang katul᷊idẹ̌ dingangu mapia e, niawane sarung masal᷊amatẹ̌.

²⁸I sie seng nakahěngang u kal᷊awọu kakanoạ e kụ bọu ene e něngědo nẹ̌koạ barạdosa. Ual᷊ingu kawe kerene ute, i sie tawe mate, kaiso kawe tatapẹ̌ biahẹ̌.

²⁹Dingangu i kamene, ei tau Israel, i kamene e nẹ̌bera uade karạdiahangu MAWU e kawe nẹ̌sal᷊a. Kai nẹ̌sal᷊a Iạ, ei Israel? Tala! Mang i kamene nẹ̌sal᷊a!”

³⁰MAWU Kụ Limembong Karangetange, něhengetang, ”Ei tau Israel, Iạ sarung měhukungu apan taumata tuhụewe su kakanoạ e. Pěmpẹ̌tobate bọu kal᷊awọu rosanu e. Abe pakawala rosanu e měnggagholọ batangengu e.

³¹Ědoko kal᷊awọu karal᷊akisẹ̌ nạung kẹ̌koateng i kamene e, ringangu walako naung dingangu tiněnnanu e pakatal᷊imbuhu. Unụe wue i kamene e harusẹ̌ mate?

³²Iạ e tawẹ karal᷊uase kereu pẹ̌sěngkatau e mate. Těntangko kal᷊awọu rosanu e tadeạu i kamene e tatapẹ̌be wiahẹ̌. Iạ e kai MAWU Kụ Limembong Karangetange seng nẹ̌bisara.”