Read Sangir YEHEZKIEL 19 Bible Online

YEHEZKIEL 19 - Sangir bible

YEHEZKIEL 19

¹Duata e něngoro si siạ pẹ̌kẹ̌kantarị u ral᷊umpasiang ini e waugu ahusu ratung Israel duang katau:

²I ninangu e al᷊ingkai singa wawine mapia ringangu naněntani. I sie něhiking manga anạ e su tal᷊oarang manga singa mal᷊ahasa.

³Sěmbaụ bọu tal᷊oarang manga anạ e niwihinge ringangu nitěntiroěnge mẹ̌deạ kinaěnge. Tangu nakoạ e i sie singa maghurang měnaněmbo ringangu kumakinạ taumata.

⁴Manga wansa kụ makạdingihẹ̌ kakakoạ e, měmpẹ̌tẹ̌tampung mẹ̌deạu měmpěnamẹ si sie. I sie nihěgateng su ral᷊ungu lohange, kụ nitaweng, bọu ene nihiudẹ̌ sarang Misirẹ̌ dingangu kakaị e.

⁵Sia-sia iněngene měngampal᷊ẹ̌ anạ e; kụ bọu ene nailangke pěngangantibe. Tangu anạ e wal᷊ine e niwihinge nakoạ singa marangěngisẹ̌ dingangu mahasa.

⁶Anạu singa ene nakoạ maghurang dingangu nẹ̌dal᷊aụu manga singa wal᷊ine. I sie něngěndung mẹ̌deạ kinaěnge, ringangu nakoạ kumakinạ lai taumata.

⁷Manga těndạ e nitěnehe,[35] manga soa e nigholange. Kal᷊awọu tumanạ u wanua e něngkawintogẹ̌, nakaringihẹ̌ lahuange kụ apạ e ghụgal᷊ẹ̌gehẹ̌.

⁸Arawe kal᷊awọu wansa wọu wanua mạngělikụ e němpěhěgạ bọu apan tampạ. I sire němpěneledu ral᷊ombo waugu měmpěnamẹ, kụ i sie mal᷊aing nahempọ su ral᷊ungu sasamẹ i sire e.

⁹I sie nịsasuẹ̌ su ral᷊ungu kurumangu singa wọu ene niwawa sarang banuang Babel, nẹ̌těngon datu. I sie rẹ̌diagateng masěgadẹ̌ tadeạu lahuange kumbahang delaing i karingihẹ̌, su wowong manga wukidu Israel mararangẹ.

¹⁰I ninangu e al᷊ingkai kalung anggorẹ̌ maholẹ kụ timuwo su rahami maranin songe. I sie nahěbung dingangu nẹ̌bua, watụ u akẹ sene e mạhěmpal᷊iu.[36]

¹¹Lelange matoghasẹ̌, kụ tawẹ karal᷊owọe měmědi kụ botonge wue koateng těkingu kararatuang. Kotọ e timiol᷊ẹ̌ marangẹ, mạnumbụ manga winawa. I sie i kẹ̌kaherangu patikụ taumata watụ u i sie kai marangẹ dingangu raukalune mahẹ̌bung.

¹²Kaiso i sie e niěbụ u manga l᷊ima apaʼm pědu, mase nịpapahị e su ěntana. Angingu Raki timiụ, nakamara wuane apaʼm buhu e. Lelange napědi, nahěgu mase tutungang.

¹³Ini e i sie nisuang, su wanua mahughěnne, su ěntana mamara ringangu tawẹ akene.

¹⁴Kalung anggorẹ̌ e nilanụu putung nẹ̌darakị; lelange ringangu wuane nasue natutung. Lelange orasẹ̌ ini e tawẹ toghase; kụ tawe i kakoạ těkingu kararatuang. Kụ kai ene ral᷊umpasiang i pẹ̌kẹ̌kakuwal᷊ị kẹ̌kantarikangu manga umatẹ̌ e.