Read Sangir YEHEZKIEL 2 Bible Online

YEHEZKIEL 2 - Sangir bible

YEHEZKIEL 2

¹nẹ̌bera u, ”Ei taumata wal᷊ine kakalẹ̌ e, darisịko. Iạ e kai mapulu mẹ̌bisara ringangu.”

²Piạ e tingihẹ̌ ene kinaringihẹ̌ e, nasuẹ̌ e Rohkẹ̌u Mawu e su watangengku e, kụ nipakateine iạ. Wọu ene kinaringihẹ̌ lai tingihẹ̌ e nẹ̌bera u,

³”Ei taumata wal᷊ine kakalẹ̌ e, i kau e Takụ i rolohẹ̌ sarang anun tau Israel kụ němpẹ̌buntirisang dumokạ si Siạ. I sire e kai tahaghohaeng nakaul᷊ị su manga i upung i sire e.

⁴Těmbọ i sire e makakětị dingangu tawe měngangadatẹ̌ si Siạ. I kau e Takụ irolohẹ̌ su anun sire e tadeạu pěhabaru Iạ e MAWU Kụ Limembong Karangẹ e, apan Takụ i pěhengetang si sire e,

⁵měnsang i sire e mapulu rumaringihẹ̌ arau tala; kahumotongange, i sire harusẹ̌ masingkạ u kai piạ nabi su tal᷊oaran sire e.

⁶Arawe i kau, ei taumata wal᷊ine kakalẹ̌, kumbahang matakụ u tahapěnggohaeng ene, arau su manga apạ e niweran sire e. I sire sarung dumokạ dingangu měhinakang si kau, hakịu al᷊ingkai i kau e mẹ̌bẹ̌biahẹ̌ su tal᷊oarang i něngen lipang. Maningbe kerene e, kai kumbahang matakụ.

⁷Habarẹ̌ko kěbị tatanata-Ku e si sire, měnsang i sire mapulu rumaringihẹ̌ arau tala. Pẹ̌tahěndungko i sire e kai kal᷊awọu tahapěnggohaeng.

⁸Ei taumata kụ bal᷊inewe kakalẹ̌ e, daringihẹ̌ko apan Takụ niwera si kamene. Abe lai tol᷊e pěnggohaeng. Ngangako mohongu e ringangu kaěngko apan kụ Takụ i onggọ si kau e.”

⁹ Bọu ene iạ e nakasilo lima naul᷊uhẹ̌ sarang těngoku. Su ral᷊ungu lima ene e piạ bukẹ̌ mạdarul᷊ung,

¹⁰kụ niwohẹ su sěndihange ruam běka. Bọu e nịbawingkahe bukẹ̌ mạdarul᷊ung ene e kụ sene e mạbawohẹ dal᷊umpasiang, susa naung dingangu kiaratagẹ̌.