Read Sangir YEHEZKIEL 20 Bible Online

YEHEZKIEL 20 - Sangir bible

YEHEZKIEL 20

¹Su tanggalẹ̌ mapul᷊o wul᷊ang kal᷊imane, su ral᷊ungu taung kapitune tempong pěmamembang i kami e, pirang katau wọu pangahạ u tau Israel diměnta su anuku waugu mẹ̌dorong tatumbal᷊ung bọu MAWU. Sarangke i sire e nahungkaiangke su těngoku,

²iạ e nakaringihẹ̌ MAWU e nẹ̌bera si siạ,

³”Ei taumata kụ bal᷊inewe kakalẹ̌ e, pẹ̌bisarạ e su manga těmbonange ene e, ringangu pẹ̌berako, u Iạ e MAWU Kụ Limembong Karangetange něhengetang kirini, ’Bahani kahěngang i kamene e nẹ̌dorong tatumbal᷊ung bọu Iạ e! Su areng-Ku Ruata kụ biahẹ̌ e, Iạ e mạdiri pẹ̌dorongang tatumbal᷊ung bọu anunu! Iạ e kai MAWU Kụ Limembong Karangetange kụ seng nẹ̌bisara.’

⁴Ei taumata kụ bal᷊inewe kakalẹ̌, seng sadia i kau e měhukung si sire? Ho, pẹ̌koạ e! Paul᷊ịko si sire e kal᷊awọu katatingkaị nạung seng nịkakoạu manga i upung i sire e.

⁵ Habarẹ̌ko apan Takụ niwera ini e. Iạ e seng němile Israel dingangu něhengkẹ u pẹ̌sasalu waugi sire e. Su Misirẹ̌, Iạ e nělahẹ u watangeng si sire ringangu nẹ̌bera u, ’Iạ e MAWU Ruatanu.’

⁶Su tempo ene Iạ e nẹ̌salu sarung mẹ̌bawa si sire apasěbang bọu Misirẹ̌ mẹ̌timona wanua kụ nipile-Ku waugi sire e. Banua ene e kalạ dingangu mahuntawa, ěntanạne kapiaěnge su wowon dunia.

⁷Takụ nioro i sire pẹ̌děnděmmẹ u manga tul᷊ada makạdarěntinge i kẹ̌kapulun sire ene, ringangu Takụ i sẹ̌ding i sire e mapakal᷊amuhụ u watangeng i sire e ual᷊ingu měnẹ̌nal᷊e manga mahan duata wọu Misirẹ̌, u kai Iạ e MAWU Ruatan sire.

⁸Arawe i sire e rimokạ si Siạ dingangu tawe mapulu rumaringihẹ̌ si Siạ. I sire tawe mapulu měnděmmẹ u manga tul᷊ada kụ makạdarěnting ene e, ringangu lai tawe mapulu měngědo měnal᷊e manga mahan duataʼm Misirẹ̌ e. Su tempong i sire e wẹ̌dang paị sene, Iạ e seng sadia měngukahu ral᷊angehẹ̌-Ku e si sire.

⁹Kaiso Iạ e tawe napakariading ene e, tadeạu areng-Ku e kumbahangbe hinakanengu manga wansa su tampạ kụ piạ i sire e. U su těngong manga wansa ene e, Iạ seng něhabarẹ̌ u tau Israelẹ̌ e Takụ i apasẹ̌bang bọu Misirẹ̌.

¹⁰Bọu ene i sire Takụ i pasẹ̌bang bọu Misirẹ̌ pẹ̌timona sarang banua mahughěnne.

¹¹ Paị sene, Takụ pěngonggotangu kal᷊awọu tita-Ku e ringangu Takụ těntiroěngu manga toratẹ̌-Ku e kụ harusẹ̌ daringihang i sire e, batụu taumata kụ dumaringihẹ̌ e sarung be tatapẹ̌ biahẹ̌.

¹² I sire Takụ i oro pěngadatẹ̌be ěllon Sabatẹ̌ nakoạ kere tatialang pẹ̌dariandi-Ku e ringang i sire, waugu mapẹ̌tahěndung i sire e u Iạ e kai MAWU, kụ seng napěhaen sire e waugu Iạ.

¹³Kaiso su wanua mahughěnne ene i sire mal᷊aing dụdokạ si Siạ. I sire e lụlampa kal᷊awọu manga tita-Ku e, ringangu mạnuhudu kal᷊awọu manga toratẹ̌-Ku e kụ měnal᷊udẹ̌ u taumata kụ dumaringihẹ̌ e těbewe kạtatanạ biahẹ̌. I sire e tumanịu nakakědo ěllon Sabatẹ̌. Ual᷊ingu ene su wanua mahughěnne ene Iạ e sen sadia mapasěbangu libutun dal᷊angehẹ̌-Ku e waugi sire ringangu mapakawinasan sire.

¹⁴Arawe Iạ e tawe mẹ̌koạ ene waugu kapiang areng-Ku, tadeạu areng-Ku e kumbahangbe hinakaneng i sire manga wansa kụ nakasilo si Siạ napasěbangu tau Israel bọu Misirẹ̌.

¹⁵ Su wanua mahughěnne ene e lai Iạ němatakụ tau Israelẹ̌ e tawe sarung Takụ i apasuẹ̌ su ěntana kụ seng niriahi waugi sire, ěntanạ e nạung kalạ, matawa ringangu kapiaěnge su kasěllahu dunia.

¹⁶Papatakụ ene e Takụ nịbawera ual᷊ingu i sire e tawẹ pandungange su manga tita-Ku, limampa manga toratẹ̌-Ku ringangu nakal᷊amuhụ ěllon Sabatẹ̌. I sire e limembong puluang měnal᷊e manga mahan duatan sire.

¹⁷Arawe wọu ene Iạ e timal᷊ěntụ i sire, hakịu i sire e tawe nisěhụ Takụ pateěng su wanua mahughěnne ene.

¹⁸Sumbal᷊iau apang mangangudạ su tal᷊oaran sire e, Takụ sasaěng kirini, ’Kumbahang tumol᷊e kal᷊awọu tiaha kinoạu manga i upungu. Kumbahangbe mẹ̌těnno lulun sire e dingangu kumbahangbe lamuhukang batangengu e hala, ual᷊ingu pěnanal᷊e manga mahan duatan sire.

¹⁹Iạ e kai MAWU Ruatanu. Daringiheko manga toratẹ̌ dingangu manga tita-Ku.

²⁰Pěngadatẹ̌ko ěllon Sabatẹ̌ tadeạu makoạ tatialaʼm pẹ̌dariandi su tal᷊oarang Iạ dingang i kamene, mẹ̌deạu mapẹ̌tahěndung i kamene u kai Iạ e MAWU Ruatanu.’

²¹Arawe wihingu mangangudạ ene e mal᷊aing mẹ̌tẹ̌tungkětị su těngo-Ku. I sire e lụl᷊ampa manga toratẹ̌-Ku ringangu tawe mẹ̌sasěmpị manga tita-Ku, kụ měngẹ̌ngantibẹ̌ u taumata apang matuhụ si sie e tatapẹ̌be wiahẹ̌. I sire e kai nakakědo ěllon Sabatẹ̌. Ual᷊ingu ene Iạ e seng sadia mapasěbangu libutun dal᷊angehẹ̌-Ku waugi sire su wanua mahughěnne ene, ringangu měmate si sire kěbị.

²²Arawe Iạ e tawe mẹ̌koạ ene, tadeạu areng-Ku e kumbahang hinakanengu manga wansa kụ nakasilo si Siạ e naněbangu tau Israel bọu Misirẹ̌.

²³ Su wanua mahughěnne ene lai Iạ e nẹ̌salu, u Iạ e sarung mapẹ̌sal᷊iawuhi sire e su kasěllahu dunia,

²⁴ual᷊ingu i sire e seng tawẹ agise su manga tita-Ku, limampa manga toratẹ̌-Ku, nakal᷊amuhụ ěllon Sabatẹ̌, dingangu tatapẹ̌ měmpěnẹ̌nal᷊e manga mahan duata kụ dẹ̌daloěngu manga i upung i sire e.

²⁵Bọu ene i sire e Takụ nionggotangu manga toratẹ̌ daral᷊akisẹ̌ dingangu manga tita kụ tawe makaonggọu pẹ̌bawiahẹ̌.

²⁶Takụ i wala i sire e mapakal᷊amuhụ u watangeng dingangu manga sasěmban sire hala e, ore lai manga anạ i sire esẹ laiakange pinakawalan sire e. Ual᷊ingu kakakoạ kerene tangu Iạ měhukung i sire e tadeạu i sire e masingkạ u kai Iạ e MAWU.

²⁷Ho, taumata e wal᷊inewe kakalẹ̌, paul᷊ịko su tau Israel, apa nạung nipěhengetang-Ku, MAWU Kụ Limembong Karangetange si sire: Ini e kai sansahẹ̌ bal᷊ine kụ mạnodẹ u kereapa manga i upung i kamene mapakahinang Iạ e ringangu tawẹ satiane si Siạ e.

²⁸Iạ e nẹ̌bawa si sire sarang ěntana kụ seng Takụ nikědo si sire. Piạ i sire nakasilo manga wukide mararangẹ dingangu kakaluange mal᷊ahěbung, i sire e měmpạněmbang gaghěllị su manga tampạ ene. I sire e napakariading Iạ e limangehẹ̌ ual᷊ingu manga sasěmba tẹ̌tutungang dingangu manga anggorẹ̌ sasěmban sire e.

²⁹Iạ e nakiwal᷊o si sire, ’Tampạ mararangẹ apa tẹ̌tiwoěng i kamene e?’ Tangu nanětạ bọu ene kal᷊awọu tampạ ene e nisěbạ ’Tampạ mararangẹ’.[37]

³⁰Kụ pěhabarẹ̌ko su tau Israel apa nạung Iạ MAWU Kụ Limembong Karangetange kụ Takụ piněhengetang si sire. ’Unụ e i kamene nẹ̌koạ manga rosa kere nạung nikoạu manga i upung i kamene? Kere nạung i sire, i kamene mal᷊aing timol᷊e manga mahan duata kụ makạdarěnting ene.

³¹Sarang lai sěhěllo ini e i kamene mal᷊aing napakal᷊amuhụu watangeng ual᷊ingu nẹ̌bawa sasěmba ringangu něnutung manga anạ i kamene e kere sasal᷊e su manga mahan duata. Wọu ene wědang lai wahani i kamene e mẹ̌dorong sasal᷊ěntihọ bọu Iạ e ho? Su areng-Ku, Duata kụ biahẹ̌, MAWU Kụ Limembong Karangetange, i kamene e tawe Takụ i pakawala mẹ̌dorong sasal᷊ěntihọ bọu Iạ e.

³²I kamene mapulu mẹ̌těngkasul᷊ungu manga wansa wal᷊ine ringangu manga tumanạ u manga wanua wal᷊ine mẹ̌suba manga kalu ringangu watu. Kaiso kapulunu ene e sarung tawe mariadi.’ ”

³³”Su areng-Ku e, Duata kụ biahẹ̌, MAWU Kụ Limembong Karangetange, i kamene Takụ paul᷊ikang batụu ual᷊ingu ral᷊angehẹ̌-Ku, i kamene sarung Takụ parentaěngu lahẹ̌gisẹ̌ kụ pakauntumang hakịu i kamene e makapěndang kawasa-Ku. I kamene sarung Takụ tampungang dingangu wawaěng kạpia wọu kal᷊awọu wanua tampạ i kamene seng nipẹ̌kal᷊iaesẹ̌ e.

³⁴

³⁵Bọu ene i kamene sarung Takụ i wawa sarang ’Banua l᷊inggiʼm Manga wansa’.[38] Paị sene i kamene sarung Takụ i hukung i pẹ̌těngong gati,

³⁶kerẹewe nạung sen Takụ kinoạ su manga i upung i kamene e su Wul᷊udu Sinai. Iạ e MAWU Kụ Limembong Karangetange seng nẹ̌bisara.

³⁷I kamene sarung Takụ diagateng pakasěgadẹ̌ tadeạu i kamene tumuhụ tita-Ku.

³⁸Apang maral᷊awang dingangu apang i ral᷊akisẹ̌ e Takụ i wembang bọu tal᷊oarang kamene. I sire e Takụ i wawa apasẹ̌bang bọu kal᷊awọu wanua tampạ i sire orasẹ̌ ini mạtanạ dingangu tawe Takụ i wala kạpia sarang ěntanang Israel. Kụ nasingkạ e i kamene u kai Iạ e MAWU.”

³⁹MAWU Kụ Limembong Karangetange něhengetang, ”Ei taumatang Israel, orasẹ̌ ini e walạewe i kamene. Saunengke pěmpẹ̌koạ dosa ringangu pěmpẹ̌tahamawu mahan duatang kamene! Kaiso pěmpẹ̌tahěndung bue, u wọu ene i kamene harusẹ̌be raringihẹ̌ si Siạ dingangu semben tawe mapakateloru areng-Ku susi e ringangu mẹ̌bawa sasěmba su manga mahan duatanu ene.

⁴⁰U su ěntanang Israel, su wongkong bul᷊udẹ̌-Ku susi e,[39] i kamene kěbị tau Israel sarung měněmba si Siạ. Paị sene Iạ e sarung lụl᷊ahimpulu si kamene ringangu mal᷊uasẹ̌ měnarimạ u manga ghaghěllị i kamene, mangạewe sasěmba kal᷊ěnggihange ringangu manga paporoseěng i kamene tani e.

⁴¹Sarětạeng i kamene e Takụ niwawa niapasẹ̌bang bọu manga wanua tampạ i kamene nipẹ̌kal᷊iaesẹ̌ e, Iạ e sarung měnampung i kamene ringangu měnarimạ u kal᷊awọu sasěmba tẹ̌tutungang i kamene. Tangu nasingkạe kěbị bansa u Iạ ini kai Ruata Kụ Limembong Kasusiange.

⁴²Kereu i kamene Takụ i wawa kapia sarang ěntanang Israel, ěntanạ e Takụ niriandi su manga i upung i kamene, tangu nasingkạ e i kamene u kai Iạ e MAWU.

⁴³Paị sene i kamene sarung makatahěndung u kal᷊awọu kakanoạ makạdarěnting kụ seng nakal᷊amuhụ batangengu. Tangu i kamene sarung i tahamuta makatahěndung apan nariadi e.

⁴⁴Kereu i kamene e seng kinoạ-Ku kerene waugu makoạ laadatẹ̌ areng-Ku e, ringangu wal᷊inewe i pẹ̌beweʼn lulunu mal᷊amuhụ dingangu kakanoạu ral᷊akisẹ̌ e, ute nasingkạ e i kamene tau Israel u Iạ e kai MAWU. Iạ e MAWU Kụ Limembong Karangetange seng nẹ̌bisara.”

⁴⁵MAWU e něhengetang si siạ, kirini,

⁴⁶”Ei taumata kụ bal᷊inewe kakalẹ̌, kakěllako sarang sěmběkan timuhẹ̌. Těgueko ěntanan sěmbekan timuhẹ̌, dingangu tengkoiko ral᷊one paị sene.

⁴⁷Oroiko kěhu ene apararingihẹ̌ apang i pěhengetang-Ku MAWU Kụ Limembong Karangetange si sie, ’Daringihẹ̌ko! Iạ e sarung mapakarěllị u putung kụ pěnutung pakasue apang kalu kụ piạ si kamene, baewe mahěgu, arau lai melong. Darěllị u putung ene e mamben tawe kasěbuang. I sie mělewa wọu sěmběkan timuhẹ̌, sarang sěmběkan sawěnahẹ̌, kụ kěbị taumata e sarung makapěndang tětị e.

⁴⁸I sire sarung makahěngang u Iạ e, MAWU kụ seng naparěllị u putung ene e ringangu tawẹu sarang sěngkatau e wotonge makasěbu.’ ”

⁴⁹Arawe iạ e i Yehezkiel nělahẹ u kakahiorọku e ringangu nẹ̌bera, ”MAWU Kụ Limembong Karangetange, abe pěngoro si siạ pẹ̌bera kerene! Kěbị taumata e seng mẹ̌kẹ̌kasiangu iạ mapulu mẹ̌bisara ringangu sasahara hakịu makětị i kaěnna.”