Read Sangir YEHEZKIEL 21 Bible Online

YEHEZKIEL 21 - Sangir bible

YEHEZKIEL 21

¹MAWU e něhengetang si siạ, angkuěngʼE,

²”Ei taumata kụ bal᷊ine kakalẹ̌, pěnganeko Yerusalem. Pěnganeko apan tampạu pẹ̌kakal᷊iomanengang paị sene. Tumbal᷊ungeko ěntanang Israelẹ̌ e,

³batụu Iạ e MAWU, kai něhengetang kirini, ’Iạ ini e kai sědụ u. Iạ e sarung měnawụ peda-Ku ringangu měmate si kamene kěbị, apan dal᷊akisẹ̌ arau lai mapia.

⁴Ringangu peda-Ku e sarung Takụ dokateng kěbị taumata wọu sěmběkan sawěnahẹ̌ sarang sěmběkan timuhẹ̌.

⁵Tangu kěbị taumata e sarung masingkạ u Iạ e MAWU, měnawụ peda-Ku ringangu tawe saụ homaěng kapia.’

⁶Ei taumata kụ bal᷊ine kakalẹ̌ e, sal᷊indorọ e ringangu lahunsusako su těngon tau Israel, tạbidạu i kau e nanawo naungu e ringangu napěndụ.

⁷Kereu i sire e makiwal᷊o unụ e i kau e něngalakẹ̌, paul᷊ịko watụ u i kau e kai masusa naungu ual᷊ingu habarẹ̌ kụ sarung damahi e. Habarẹ̌ ene e sarung makakariadin naung i sire e sumal᷊ungkende, liman sire e měmpělome, dingangu lensorangu wukun sire e měmpẹ̌kende, i sire e sarung tawẹ manga igasi sire. Mamben těngadẹ̌ tempone e seng narěnta, ringangu kěbị ene e seng nariadi. Iạ e MAWU Kụ Limembong Karangetange seng nẹ̌bisara.”

⁸MAWU e něhengetang si siạ,

⁹”Ei taumata kụ bal᷊ine kakalẹ̌, pẹ̌kutikako! Pěhabarẹ̌ko su taumata u Iạ e MAWU něhengetang kirini, ’Piạ peda sěmbaụ, kụ niasa mẹ̌deạu i pakahoro.

¹⁰I sie pinakahoro tadeạu wotonge makapate, i pakal᷊ěno tadeạu kumerong. Baugu umatẹ̌-Ku e tawẹ apa relaing karal᷊uasẹ̌ batụu kal᷊awọu sasal᷊ěntihọ dingangu hukumang e sen tawe sasěmpikang i sire.[40]

¹¹Peda ene niasa tadeạu hanesẹ̌ sạdia paketang bọu ene i sarakang su sěngkatau tahapotọ.

¹²Ei taumata kụ bal᷊ine kakalẹ̌, lungkangko apidu kạpẹ̌berane! U peda e seng kạdariahi i pěndokạ umatẹ̌-Ku. Apam pangahạ u Israel dingangu patikụ bansa e sarung potokangu peda ene sarang pakawinasa. Tangu pěnengkelẹ̌ko sěbạu e ringangu kasasusa,

¹³batụu Iạ e kai kạpěmanikạ e umatẹ̌-Ku, kereu i sire mạdiri měmal᷊ui lulun sire e, kěbị e sarung matuhung si sire.’[41]

¹⁴Hotede taumata wal᷊ine kakalẹ̌, pěněbal᷊ẹ̌ko. Pẹ̌tal᷊okạko i kau e, tatialang pedanu e seng manětạ i pěmotọ. Peda ene makạtatakụ.[42]

¹⁵Peda ene nakailang kawawahaniʼm bansa-Ku e kụ němpělinsumagu nitangga. Iạ e němatakụ soan sire e ringangu peda[43] ene kụ kụkerong kere kilạ, mase sạdia waugu i pěmate.

¹⁶Ei peda mahoro liwara e sarang koaneng arau sarang kaihi, arau walạewe sarang a tuhụ kapulunu.[44]

¹⁷Iạ e mal᷊aing mẹ̌tal᷊okạ, kụ bọu e ral᷊angehẹ̌-Ku e sarung mal᷊ěda. Iạ e MAWU, kụ seng něhengetang.”

¹⁸MAWU e něhengetang si siạ, angkuěngʼE,

¹⁹”Ei taumata wal᷊ine kakalẹ̌, pěnggambarẹ̌ko ral᷊eng darua kụ dal᷊engangu ratuʼm Babel, kụ nẹ̌bawa pedane. Dal᷊eng darua ene pungene harusẹ̌ bọu soa sěmbaụ; dal᷊eng sěmbua mẹ̌timona sarang Raba, soang Amon; sěmbaụete wue ute sarang Yerusalem, soa piạ těndạ e su Yehuda. Sangẹko pěpal᷊ẹ̌ tatěbọ dal᷊eng su piạ dal᷊eng ene manětạ mělelang.[45]

²¹Datuʼm Babelẹ̌ e rimarisị su rěduhu pěpal᷊ẹ̌ tatěbọ dal᷊eng ene. Mẹ̌deạu makakasingkạ u ral᷊eng sude sarung liuange, i sie nẹ̌dorong sasal᷊ěntihọ bọu manga mahan duatane, něndiahiʼm papitị dingangu mạmarikěsa ateʼm binatang[46] kụ buhu wuhu papotọ e.

²²Sěngkakakěllane nạung kinaal᷊ạu limane koaneng e piạ tatialane Yerusalem! Ene mangal᷊ene datu e harusẹ̌ měndokạ soang Yerusalem, kapěmẹ̌mansageng bansagu pẹ̌seketang, dingangu měngoro sordadone apěndiahi kal᷊awọu aghidu i pěnggolang, i tarang sul᷊antehu manga tukadu pasěllangengu Yerusalem, měngambung ěntana makoạ tatěndạu pẹ̌seketang, dingangu měmangka manga songe.

²³Tumanạu Yerusalem e tawe mangimang u i sire e kawe niseketang, batụu i sire e kai seng nẹ̌koạ pẹ̌dariandi ringangu Babel. Kaiso tatěbal᷊ẹ̌ ini e sarung makoạ laingate si sire u i sire e sarung samekang ual᷊ingu kal᷊awọu rosan sire e.

²⁴Iạ e MAWU Kụ Limembong Karangetange něhengetang si sire, ’Kal᷊awọu rosanu e seng kinasingkateng dingangu kěbị taumata e masingkạ u i kamene e nẹ̌sal᷊a. Karal᷊akisu e mạtodẹ su ral᷊ungu apang kakanoạu e. Ini e seng narěnta tempone i kamene e i hukung, dingangu i kamene e sarung Takụ i sarakang su sědụ i kamene.’

²⁵Dingangu su ratung Israelẹ̌ e Iạ nẹ̌bera u, ’Ei ratu ral᷊akisẹ̌ dingangu duruhaka e! Tempone waugu hukumangu pěngěnsueěnge e kụ seng masandigẹ̌.

²⁶Iạ e, MAWU Kụ Limembong Karangetange seng něhengetang. Pěllọ e sakapetinu e ringangu lekese paporongu. Ini e kakakoạ e seng nẹ̌bal᷊ui. Hengkẹko kal᷊aianengu taumata kasiange kụ gěllirengko l᷊ai kawasa i sire e. Apal᷊intụko měngangawasa e wọu kal᷊aianengi sire e!

²⁷Soa ini e sarung Takụ i pakagholọ kahěngang, hakịu suapan tampạ mang piạ manga ěnạ e. Kaiso hal᷊ẹ̌ ene e wuhụewe nariadi kamagengu taumata kụ Takụ nipile waugu pěhukungu soa ini e seng narěnta. Kụ seng si sie e sarung Takụ pěnarakanengu soa ini.’ ”

²⁸ ”Ei taumata wal᷊ine kakalẹ̌, pěnẹ̌bal᷊ẹ̌! Paul᷊ịko su tau Amon kụ seng něhinakang Israel, u Iạ e MAWU Kụ Limembong Karangetange něhengetang, ’Peda sěmbua e seng sadia waugu i pěmate; peda ene seng niasa, pinakakerong kere kilạ, tadeạu, sadia waugu i pěmate.

²⁹Papasilo kụ nạung kinasilong kamene e kai mělle, ringangu pěnaněbal᷊ẹ̌ kụ i wẹ̌berang kamene e kai tawẹ katěngade ringangu konti. I kamene e ral᷊akisẹ̌ kutẹu lai duruhaka, ringangu tempo waugu hukumangu pěngensueěnge seng masandigẹ̌. Peda ene e sarung měmentehẹ̌ lehẹu.

³⁰Ei tau Amon, suhiko pedanu e su homane! I kamene sarung Takụ i hukung su tampạ i kamene kinoạ dingangu piněhěnding.

³¹Iạ e sarung měměseng dal᷊angehẹ̌-Ku e masaria si kamene. Dingangu i kamene e sarung Takụ i sarakang su taumata kụ marangěngisẹ̌ e kụ narapal᷊ẹ̌ su hal᷊ẹ̌ u mapakawinasa.

³²I kamene sarung masueng kinạ e su putung. Dahanu e sarung mạboso su wanuanu e hala, ringangu tawẹ apa taumata sarang sěngkatau e kụ bědang makatahěndung si kau. Iạ e MAWU kụ seng nẹ̌bisara.’ ”