Read Sangir YEHEZKIEL 22 Bible Online

YEHEZKIEL 22 - Sangir bible

YEHEZKIEL 22

¹MAWU e nẹ̌bisara si siạ, angkuěngʼE,

²”Ei taumata wal᷊ine kakalẹ̌, seng sadia i kau e měhukungu soa kụ napenẹ u tahapate ene. Lahẹko si sie kal᷊awọu kakanoạ e makạdarěnting.”

³MAWU Kụ Limembong Karangetange něngoro si siạ pělẹ̌habaru tatanata ini su Yerusalem, ”I kau e nẹ̌sal᷊a ual᷊ingu seng němate mal᷊awọ bọu tumanạu e hala, ringangu seng napakal᷊amuhụ u watangengu e hala, ual᷊ingu měnẹ̌němba manga mahan duata koạ i kamene hala e. Ual᷊ingu ene tempoʼm pělahukungu e seng marani ringangu tiwạ u e seng mạpaghohẹ̌. I kau e Takụ i wala makoạ laheghesang dingangu pal᷊ahul᷊ẹ̌ge waugu manga wansa ringangu patikụ banua.

⁵I kau e lẹ̌heghesangu manga wanua kụ mararau ringangu mararani ual᷊ingu i kau e sěntiniạ lụl᷊ampa toratẹ̌ dingangu atorange.

⁶Kěbị pangahạ u Israel měmpạngumbala katoghasi sire hala ringangu mẹ̌kẹ̌koạ pěmamate.

⁷ Tawẹ u sarang sěngkatau wọu tumanạ u e měmpěngadatẹ̌ manga ghaghurange. I kau e měngẹ̌ngakal᷊ẹ̌ taumata raghị dingangu měngẹ̌ngal᷊ạ untunge wọu kasasigěsạu manga wal᷊u ringangu manga anạ kasisi ěndusẹ̌.

⁸ Tampạ u manga pẹ̌kakal᷊iomanengang si Siạ pinakal᷊amuhụ u ringangu ěllon Sabatẹ̌ e tawe laindakanengu.

⁹Su tal᷊oarang kawanuanu e piạ manga tahapěnahowongu puluang měhinakang taumata wal᷊ine tadeạu i hukungu papate. Piạ be laing puluang kuminạ gěsi kụ seng bọu nisěmba su mahan duata. Piạ be laing puluang mẹ̌koạ pẹ̌sasundal᷊ẹ̌.

¹⁰ Piạ u měnẹ̌nal᷊ukạ dingangu mẹ̌sěngkapẹ̌tikị dingang i ninange něnguatạ, bawine rẹ̌dal᷊engangu raha,

¹¹kawingu taumata wal᷊ine arau miraratinge, arau tuarine wọi ninange wal᷊ine.

¹² Piạeng lai makoạ měmamate wẹ̌baehang, měnaněsụ dahang bal᷊ine, ringangu měmẹ̌měhạewe taumata sěngkawanuaěnge. I sire kěbị e seng niwul᷊eng Iạ. Iạ e MAWU Kụ Limembong Karangetange seng nẹ̌bisara.

¹³Arawe orasẹ̌ ini e Iạ sarung měmal᷊isẹ̌ apan tahapěhampasẹ̌ dingangu tahapěmate si kamene.

¹⁴Bědang bahani arau wẹ̌dang matoghasẹ̌ i kau e měnẹ̌den takiahu e bọuteng Iạ e měhukung si kau e? Iạ e MAWU Kụ Limembong Karangetange seng nẹ̌bisara ringangu Iạ e sarung mẹ̌koạ apan seng niwera-Ku.

¹⁵Iạ e sarung mapẹ̌kal᷊iaesu kawanuanu sarang patikụ banua ringangu wansa, ringangu Iạ e sarung mapěngẹ̌dong kakakoạu ral᷊akisẹ̌ e.

¹⁶I kau sarung hinakanengu manga wansa wal᷊ine, tangu nasingkạ e i kau u kai Iạ e MAWU.”

¹⁷MAWU e něhengetang si siạ,

¹⁸”Ei taumata wal᷊ine kakalẹ̌, tau Israelẹ̌ ene e tawẹ gunane si Siạ. I sire al᷊ingkai onasu uada kal᷊aukang, kere tambaga, timběha, uase, ringangu timběha mitung kụ nal᷊ěmbe sarětạeng sal᷊aka e pinakawurẹ̌si su ral᷊ungu rapuhang.

¹⁹Tangu orasẹ̌ ini e, Iạ MAWU Kụ Limembong Karangetange, nẹ̌bera si sire u i sire e mẹ̌sul᷊ungu kere uada kụ tawẹ gunane ene. Kerẹewe wakịu sal᷊aka, witụ, uase, timběha mitung, dingangu timběha mawira i wunsal᷊ẹ̌ su ral᷊ungu rapuhang, mẹ̌deạu sahikang, kerene lai i sire e sarung Takụ tampungang dingangu Takụ i wawa sarang Yerusalem. Dal᷊angehẹ̌-Ku e masaria, sarung Takụ i pěnuno si sire kere putung i pěnuno manga wakịu uada.

²¹Ore, Iạ e sarung měnampung i sire e su Yerusalem, měndikọ putungu ral᷊angehẹ̌-Ku e su al᷊ung i sire e, kụ i sire e masue měngkatuno.

²²Mẹ̌sul᷊ungu sal᷊aka nituno su ral᷊ungu rapuhang, kerene lai i sire e sarung i pakatuno su Yerusalem. Tangu nasingkạ e i sire u Iạ e MAWU seng napasongkahu ral᷊angehẹ̌-Ku e si sire.”

²³MAWU e něhengetang kapia si siạ, angkuěngʼE,

²⁴”Ei taumata kụ bal᷊inewe kakalẹ̌ e, pẹ̌berako su tau Israel u ěntanan sire e kai mal᷊amuhụ, dingangu ual᷊ingu ene, Iạ e lumangehẹ̌, dingangu měhukung i sie.

²⁵Manga pangahạ e[47] mẹ̌sul᷊ungu singa kụ lụhuang sarangke wọu něněmbo kinaěnge. I sire němpěmate kawanua, němul᷊aho kal᷊awọu arětạ dingangu kakalạ kụ kinaěbakeng i sire e ringangu nakakariadi manga wawine lawọ nawal᷊u.

²⁶ Manga imangu Israelẹ̌ e limampa manga toratẹ̌-Ku ringangu mapakạteloru kěbị apal᷊iwụ kụ pakịtani waugu Iạ. I sire tawe mapẹ̌dal᷊ahaen sude wotonge ringangu sude i pẹ̌tẹ̌tělling. Kerene lai i sire e tawe měnaněntiro su kawanua apẹ̌dal᷊ahaedu sude wurẹ̌si ringangu sude mal᷊amuhụ tuhụ atorangu agama. I sire mẹ̌sẹ̌sumbal᷊iangu ěllon Sabatẹ̌. Ual᷊ingu kerene Iạ e lẹ̌hinakanengu tau Israel.

²⁷Patikụ mapapangkatu kawanua e mẹ̌sul᷊ungu ral᷊ugẹ̌ e kụ mẹ̌gěnggaghonaị kinaěnge. I sire e měmpěmẹ̌mate e samatang baugu mẹ̌dẹ̌deạ kal᷊auntu.

²⁸Manga nabi e měmpěmẹ̌muning manga rosa ene; i sire e mẹ̌sul᷊ungu taumata kụ měmpělẹ̌laburu apụ su meselẹ̌ kotorẹ̌ e. Kal᷊awọu papasilon sire e konti, kerene lai kal᷊awọu tatěbal᷊i sire e. I sire měngaku u tatanata kụ i humpạ i sire e kai apạeweng tẹ̌tarimakeng i sire e wọu MAWU Kụ Limembong Karangetange, sumbal᷊iau Iạ e mamben tawe nẹ̌bisara ringangi sire e.

²⁹Taumata kalạ e němpěngakal᷊ẹ̌ dingangu němpěhampasẹ̌. I sire e měmpạnịgěsạ taumata kasiange tuhụ kapulu ringangu měngal᷊ạ untune wọu taumata raghị.

³⁰Su tal᷊oaran taumatang Israelẹ̌ ene e, Iạ mẹ̌dẹ̌deạ taumata kụ mapararisị u meselẹ̌, arau rumarisị su apan tampạ kụ manga mesele nal᷊aopehẹ̌ baugu mẹ̌tahutěndạ u wanua ene kereu Iạ e mapakagholọu ene su ral᷊ungu pěmẹ̌seěngu ral᷊angehẹ̌-Ku; kaiso tawẹ u sarang sěngkatau relain Takụ i pẹ̌sombang.

³¹Ual᷊ingu ene orasẹ̌ ini Takụ iapasongkang dal᷊angehẹ̌-Ku e si sire, kụ mẹ̌sul᷊ungu putung Iạ e sarung mapakawinasan sire e ual᷊ingu kal᷊awọu kakanoạ i sire e. Iạ e MAWU Kụ Limembong Karangetange seng nẹ̌bisara.”