Read Sangir YEHEZKIEL 23 Bible Online

YEHEZKIEL 23 - Sangir bible

YEHEZKIEL 23

²”Ei taumata wal᷊ine kakalẹ̌ e, piạ bawine ruang katau tahatuari.

³Su tempon nạung mangudạ e, i sire mạtanạ su Misirẹ̌. Paị sene i rẹ̌dua e kinailangengu kasasusin dẹ̌dua e, kụ bọu ene nakoạ tahakiwuang.

⁴I akang e nisěbạ si Ohola, tatialang awẹu Samaria. Tuarine nisěbạ si Oholiba tatialang awẹ u Yerusalem. Iạ nẹ̌kawing dingangi rẹ̌dua e, kụ nakaěbạ anạ kěbị bọi rẹ̌dua ene.

⁵Manilaing i Ohola e sen nakoạ kawing-Ku, kai i sie e man těbe mawuang, dingangu apạ e makěhagẹ̌ mẹ̌tangkiang manga i kẹ̌kěndage wọu Asyurẹ̌.

⁶I sire ene ute kai sordado piạ pakeangi sire mẹ̌sul᷊ung mahamụ kamumụ, apam mapapangkatẹ̌ dingangu piạ kal᷊aianenge mararangẹ e; kěbị apang mananěmbonangu wuntuang piạ kawal᷊one ghahịe maral᷊epatẹ̌.

⁷Dingangu apan těmbonange ene e i Ohola e nawuang. Kutẹu l᷊ai ual᷊ingu abul᷊ine tumanịu ghaghuwạ e, i sie nẹ̌těngkal᷊amuhụ u watangeng e kụ něněmba manga mahan duatan sire e.

⁸I sie e mang tatapẹ̌ mạbuang kere nạung kal᷊imona kẹ̌koatenge su Misirẹ̌, suapang i sie e kinailangengu kasusine. Den dokeng nạung i sie kạdodọ e, i sie seng pinẹ̌tikilang dingangu kinoạ kere tahakiwuang.

⁹Ual᷊ingu ene Takụ i sarakang si sie su manga i tatuno naunge, taumatang Asyurẹ̌ e kụ apạ e ilẹ̌lundangu naunge limembo ene.

¹⁰I sie nitěntol᷊en sire e ringangu mahasa, wọu ene nipateʼm peda, ringangu manga anạ e nihampasẹ̌. Su apan tampạ pẹ̌bawiahe nakoạ su wuam biwihu manga wawine.

¹¹I Oholiba e, tuarine nakasilo karariadi ene, kaiso i sie e limembong maạbul᷊i mẹ̌koạ pẹ̌sasundal᷊ẹ̌ e sul᷊ungu i Ohola.

¹²I Oholiba e mal᷊aing limembong lụěnningu tau Asyurẹ̌ e, kụ kai manga kal᷊endesang maral᷊intoị bọu wuntuangu piạ kawal᷊one, apam mapapangkatẹ̌, dingangu piạ kal᷊aianenge mararangẹ, ore lai manga sordado kụ piạ pakeange mẹ̌sul᷊ung mahamụ kamumụ ene.

¹³Iạ makạsilo u i Oholiba e mamben dal᷊akisẹ̌, kere tuhange.

¹⁴Kakạděngụ e mambeng kakạdal᷊akise i Oholiba e. I sie e mambeng kẹ̌kawinsanaěngu manga gambarẹ̌ kụ mạkaketạ su rarěndung, dingangu lělạburangu cetẹ̌ kahamụ e kere raha. Manga gambarẹ̌ ene e mělẹ̌lahẹ u manga pěrwiran tau Babel piạ papehẹ e maral᷊enggihẹ̌ dingangu paporonge piạ humbune.

¹⁵

¹⁶Eneʼ sarangke i Oholiba e nakasilọ e manga gambarẹ̌ ene, tangú tamahualane naawị e, kụ i sie němatuhung manga pěrwira ene su Babel.

¹⁷Tangú narěntạ e i sire kụ nẹ̌tikị dingange. I sire měngkatewe němpẹ̌koạ tuhụewe kapulun sire e si sie hakịu pěngěnsueěnge i sie nawěnsing i sire.

¹⁸Bọu ene i sie měngkatewe nẹ̌koạ tuhụ kapulune mawuang kụ makịpandang badange su těngon lawọ. Iạ e nawěnsing nakasilo si sie, kerẹewe Iạ nawěnsing u tuhange.

¹⁹Tangú kakạděngụ e mang kạpahuntinambane i sie mawuang, tawẹ pẹ̌tatěntangenge kere su tempong kangangudạ e piạ i sie nạung mạbuang su Misirẹ̌.

²⁰I sie mambeng piạ igal᷊e su manga esẹ kụ sụsahoka abul᷊in tamahualane, ringangu kal᷊itotan sahige kere kasariang abul᷊ing kawal᷊o esẹ. (

²¹Ei Oholiba, i kau mapulu mẹ̌batang kapia su hal᷊ẹ̌ u pẹ̌sasundal᷊ẹ̌ nạung kinoạ u e su tempong kangangudạ u, piạ e tau Misirẹ̌ měmpẹ̌papangimbu ringangu e.)”

²²MAWU Kụ Limembong Karangetange nẹ̌bera, ”Ei Oholiba, i kau e seng nasahẹ dingangu manga i kẹ̌kěndagu e, kaiso Iạ e sarung měnahowong si sire tadeạu i sire e mẹ̌bawal᷊uang si kau kụ sumekẹ si kau.

²³Iạ e sarung měnampung dingangu měmaringang kal᷊awọu manga sintịu wọu Babel, Pekod, Soa, Koa, Asyur, ringangu apan tau Kaldea. Takụ paringaneng apang mangangudạ maral᷊epatẹ̌ e kụ pangkate mararangẹ, mararatu, mapapangkatẹ̌ patebone, ringangu apaʼm pěrwiraʼm buntuangu piạ kawal᷊one.

²⁴I sire sarung sumekẹ si kau wọu sěmběkan sawěnahẹ̌,[48] dingangu sordadone masaria, ringangu manga karetaʼn sekẹ dingangu manga kareta pělurangeng u sinasạ. I sire sarung měnekẹ si kamene piạ dal᷊indunge kěllung dingangu manga sapeọe uada. Takụ i pakawala i sire e pěhukung si kau tuhụewe kere torati sire hala e.

²⁵Ual᷊ingu Iạ e limangehẹ̌ si kau, Takụ i wala i sire e pẹ̌tingkaị si kau. Irung dingangu tul᷊inu e sarung duruang i sire e, ringangu manga anạ u e sarung al᷊akeng i sire e kụ tongkateng i sire e wiahẹ̌.

²⁶I kau e sarung těntol᷊eěng dingangu manga ral᷊ẹ̌gahu e sarung hampaseng.

²⁷Kerene Iạ e sarung mapěngẹ̌dungu abul᷊in sahigu e, ringangu kal᷊awọu kawawuang kụ seng kinoạ u e ren dokeng i kau su Misirẹ̌. I kau e sen tawe lai měharapẹ̌ su manga mahan duata, lai sude arau relaing makatahěndung Misirẹ̌.”

²⁸MAWU Kụ Limembong Karangetange něhengetang, ”Iạ e sarung měnarakang i kau su taumata kụ makatahamuta, makạbawěnsing.

²⁹Ual᷊ingu i sire e mạběnsing i kau e, kal᷊awọu lětạu liaghan saghedu e sarung hampaseng i sire e. I kau e sarung i těntang i sire e těntol᷊e mal᷊iwaugẹ̌ kere tahakiwuang kụ nakoạ bawialaěngu taumata l᷊awọ. Abul᷊in sahigẹ̌ dingangu ěnningu ghẹ̌sinu e

³⁰nakakariading pal᷊edu wiahu ini e ral᷊akisẹ̌. I kau e nakoạ tahakiwuang, baugu manga wansa, ringangu nakal᷊amuhụ batangengu ringangu manga mahan duatan sire e.

³¹I kau e timol᷊e ěnnạu l᷊aedu tuhangu e, kụ ual᷊ingu ene tangu i kau e sarung Takụ i hukung dingangu hukumang mẹ̌sul᷊ung.”

³²MAWU Kụ Limembong Karangetange něhengetang, ”Lohong lainumangu tuhangu e harusẹ̌be ěllụ u. Lainumang ene e ghẹ̌guwạ dingangu maral᷊ung. Lohone napenẹ u laheghesẹ̌ dingangu sasamedẹ̌, kụ harusẹ̌ tal᷊udangu wọu apan taumata e.

³³Lainumangu tuhangu e Samaria, piạ lohone katatakụ dingangu kaghagholang. Bọuteng inungangu kěbị lohone e, i kau e sarung miwukang dingangu masigěsạ. Ringangu manga hoseng lainumang ene e i kau e sarung měnggaghonaị sěbạ u e. Iạ e MAWU Kụ Limembong Karangetange seng nẹ̌bisara.”

³⁴

³⁵MAWU Kụ Limembong Karangetange něhengetang, ”Ual᷊ingu i kau e seng niwul᷊eng Iạ dingangu timal᷊ikudẹ̌ si Siạ, i kau e sarung masigěsạ kahiang aị u abul᷊in sahigu e ringangu pẹ̌sasundal᷊u e.”

³⁶MAWU e něhengetang si siạ, ”Ei taumata kụ bal᷊ine kakalẹ̌ e, seng sadia i kau e měhukung i Ohola rẹ̌duang Oholiba e? Pẹ̌beraiko i sire suapang katatingkaị kụ seng nịkakoạ i sire.

³⁷I sire e seng nawuang dingangu němate: i sire něngkawuang dingangu manga mahan duatan sire ringangu němpěmate manga anạ-Ku kụ pinakawanteli sire. Manga rariọ ene e seng nisěmban sire e su manga mahan duatan sire.

³⁸Kụ bal᷊inewe lai ene samatang. I sire e mal᷊aing napakal᷊amuhụu Wal᷊e-Ku ringangu ěllon Sabatẹ̌ kụ sen Takụ tinantu ene.

³⁹Su ěllong i sire e němpěmate manga anạ-Ku e ringangu němpěnarakang nikoạ sasěmba su manga mahan duata, i rẹ̌dua tamahuari e riměnta su Wal᷊e-Ku kụ napakateloru kasusine!

⁴⁰I sire saranglai němatuhungu manga esẹ su apaʼm banua mararau, kụ i sire e němpẹ̌itụ papatuhung ene. Baugu pěněnsomahẹ̌ manga sake ene, i rẹ̌dua tamahuari ene e němpěndenọ, nẹ̌pakẹ u kakohise su mata, ringangu němpẹ̌pakẹ u manga ral᷊ẹ̌gahe.

⁴¹Bọu e i sire němpẹ̌kaiang su wowong katatikilang i sire kụ mal᷊ěnggihẹ̌ e. Su těngone piạ meda napenẹ u manga sasadia, buwụ, lanan zaitun kụ sen Takụ nionggọ si sire.

⁴²Bọu l᷊ikude kẹ̌karingihẹ̌ tingihu ghahẹ u taumata l᷊awọ měmpạhul᷊uasẹ̌. I sire ene e seng nipatuhungang niaparěnta wọu wanua l᷊inggi. I sire e němpěluheng gal᷊ang su pul᷊aengi rẹ̌dua tamahuari ene, ringangu něnangẹu manga makota maral᷊ěnggihẹ̌ e su těmbọ i rẹ̌dua e.

⁴³Mase, su tiněnna-Ku e, ’Bědang mapulu tangu i sire ene mẹ̌taghunalangu sintị dingangu manga tahakiwuang kụ seng něngkalolang ual᷊ingu pẹ̌sasundal᷊ẹ̌ e tangu?’[49]

⁴⁴Měmpẹ̌dẹ̌darol᷊osẹ̌ taumata e mahunděnta su anung Ohola ringangi Oholiba e, tahakiwuang kụ seng něngkal᷊amuhụ ene e.

⁴⁵Arawe taumata mal᷊aimang e sarung měhukung i rẹ̌dua tamahuari e i rasagẹ̌ su kawawuang dingangu pěmamate, u watụ u i sire e mamben nẹ̌sal᷊a.”

⁴⁶MAWU Kụ Limembong Karangetange něhengetang, ”Pẹ̌kuiko taumata sěngkamonaěng e waugu i panịgěsạ dingangu i pěhampasẹ̌ tahakiwuang darua ene.

⁴⁷Walạe kere i sire e pakiwahungem batu ringangu pakialoiʼm peda. Balạe kere manga anạ i sire e pakipate ringangu manga wal᷊en sire e pakitutung.

⁴⁸Su kạguwạu wanua e sarung Takụ pahangeng kakanoạ karal᷊akise kerene. Tindakang-Ku e sarung makoạ tatahěndung baugu apaʼm manga wawine tadeạu i sire e kumbahang mawuang kere i rẹ̌dua tamahuari ene.

⁴⁹Ei Ohola ringangu i Oholiba, Iạ e sarung měhukung i kamene ual᷊ingu i kamene e nawuang, dingangu naněmba mahan duata. Tangu nasingkạ e i kamene u kai Iạ e MAWU Kụ Limembong Karangetange.”