Read Sangir YEHEZKIEL 24 Bible Online

YEHEZKIEL 24 - Sangir bible

YEHEZKIEL 24

¹Su tanggalẹ̌ mapul᷊o wul᷊ang kapul᷊one, su taung kasione, wọu tempong pěmamembang i kami e, MAWU e nẹ̌bera si siạ,

² ”Ei taumata wal᷊ine kakalẹ̌ e, bohẹko tanggalu sahěllo ini e, u sěhello ene e ratuʼm Babelẹ̌ e nanětạ něnekẹ Yerusalem.

³Iạ e MAWU, něnaghuang sěmbaụ laumpama mẹ̌deạu i habarẹ̌ su manga umatẹ̌-Ku kụ puluang měmpěngghohaeng: Běmbingko akẹ su ral᷊ungu pantisẹ̌ kụ bọu ene lěngkangko su wowoʼm putung.

⁴Tahoingkong gẹ̌si su ral᷊unge ghẹ̌si kal᷊ěnggihange kakakoạ e; gẹ̌siʼm běmbange, ringangu ghẹ̌siʼm palange, ore lai manga ruhine kụ lohong manga mumuse.

⁵Pakẹko ghẹ̌sing domba kụ matawa e ringangu kawuhuang kụ pěnambako l᷊ai kalu[50] rarikọ e. Balạekere sasahokane ringangu pẹ̌kakal᷊itotane akene, kụ tuěngko ghẹ̌si ene ringangu manga ruhine.”

⁶MAWU Kụ Limembong Karangetange něhengetang, ”Kạěngkěhang soa kụ napenẹ u tahapate ene! Soa ene mẹ̌sul᷊ungu kuring kụ nẹ̌tai kụ tawe kakẹ̌kisang. Gẹ̌si kụ su ral᷊unge e niaung sěmpotọ-sěmpotọ, sarangkewe tawẹ apa sarang sěmbaụ kụ dem bědang natěntang.

⁷Su soa ene nariadi pẹ̌papapate, arawe rahane tawe nelehẹ̌ sarang ěntana, kaiso kawe nelehẹ̌ su wowoʼm batu makětị e, hakịu tawe kinaambung.

⁸Daha ene Takụ niwala sene hakịu kinasilo ringangu měnuntụ bawal᷊ise.”

⁹MAWU Kụ Limembong Karangetange nẹ̌bera, ”Nasilakạ soa kụ napenẹ u tahapate ene! Iạ sẹ̌saku kụ sarung měngěndụ u kalu kụ waugu měndikọ.

¹⁰Tambaiko kalune! Kalabẹ̌ko putunge! Tuěngko ghẹ̌sine! Kụ bosoko sawone.[51] Tutungko manga ruhine!

¹¹Ini e tangu pěmellọkong kuring bitụ kụ tạ l᷊ohone ene e su wowom putung kụ balako sarang pakahamụ kahěngang. Bọuteng taine matutung kụ mal᷊ěkabẹ̌ ute kuring ene e sarung mawurẹ̌si kapia tuhụewe atorangu agama.

¹²Kai wal᷊inewe kěbị taine sarung mailang ěllukangu putunge.[52]

¹³Ei Yerusalem, kal᷊awọu kakanoạu ral᷊akisẹ̌ e seng nakal᷊amuhụ batangengu. Iạ e seng něnal᷊ukạ němurẹ̌si si kau, kaiso tawẹ apa gunane, watụ u i kau e mang těbe mal᷊amuhụ. I kau e tawe sarung mawurěsi kapia sarang Takụ i pakasue sasẹ̌bange ral᷊angehẹ̌-Ku e si kau.

¹⁴Iạ e MAWU Kụ Limembong Karangetange seng nẹ̌bisara. Seng narěnta tempone waugu Iạ e mẹ̌karạdiahang. Iạ e tawe miwul᷊en dosanu ringangu tawe lai mangampung arau kuměndagi kau. I kau e sarung Takụ i hukung tuhụewe kěbị kakanoạu e. Iạ e MAWU Kụ Limembong Karangetange seng nẹ̌bisara.”

¹⁵MAWU e něhengetang si siạ,

¹⁶”Ei taumata wal᷊ine kakalẹ̌ e, dingangu sěngkělěndịe sarung Takụ al᷊akeng taumata kụ limembong i kẹ̌kěndagẹ̌ku e. Katewe i kau e tawe wotonge masusa ringangu sumangị, arau mapakawalang akẹ u matanu e tumul᷊aehẹ̌.

¹⁷Kumbahang sarang sasindukungu e i karingihẹ̌. Abe ral᷊eng tawẹ tatimbuhunge těmbọ dingangu tawẹ laěmpahe laedẹ̌ e, kụ al᷊ingkai taumata kụ mělẹ̌lutu. Abe lai takạ gatinu e, ringangu abe kaěng borotẹ̌ u pěhampugang.”

¹⁸Deng mal᷊uka-l᷊ukadẹ̌ e iạ mẹ̌bisara su wansa ene ringangu nahěbi e kawingku nate. Sěngkarịěllone iạ nẹ̌koạ apang kụ nioro si siạ e.

¹⁹Kawanua e nakiwal᷊o, ”Unụ e i Amang nẹ̌koạ kirini? Apa mangal᷊ene waugi kami e?”

²⁰Bọu e pẹ̌berako si sire, ”MAWU e něngoro si siạ

²¹pělẹ̌habaru tatanata ini e si kamene: I kamene e lụl᷊esạu katoghasu Wal᷊eʼm MAWU e. I kamene e puluang měmanda ringangu i kamene e puluang makoạ sarang ene, kaiso MAWU e sarung mapakal᷊amuhụ u Wal᷊e-Ne. Ringangu mangạewe anạu sěngkataune apang mangangudạ e, kụ nal᷊ěmbe su Yerusalem, sarung pateěng su ral᷊ungu pẹ̌seketang.

²²Bọu e i kamene sarung mẹ̌koạ kere apan takụ nịkakoạ orasẹ̌ ini. I kamene tawe sarung měnakạ gatinu arau kumaěng borotẹ̌ u pěhampugang.

²³I kamene sarung dumal᷊eng těmbọ tawẹ tatakạ e arau tawẹ laěmpahe laedu e, tawe masusa arau sumangị. I kamene sarung mangkeng lụhumpinausang, ual᷊ingu kal᷊awọu rosanu e; i kamene e sarung makiontol᷊ẹ̌ sěmbaụ su wal᷊ine.

²⁴Tangu iạ, i Yehezkiel sarung makoạ sansahẹ̌ si kamene; i kamene e sarung mẹ̌koạ kere nạung takụ nịkakoạ orasẹ̌ ini e. MAWU e něhengetang u kamagengu hal᷊ẹ̌ ene mariadi, i kamene e sarung masingkạ u kai i Sie e MAWU Kụ Limembong Karangetange.”

²⁵MAWU e něhengetang si siạ, ”Ho, taumata wal᷊ine kakalẹ̌ e, sarung Takụ al᷊akeng bọi sire e Wal᷊e-Ku matoghasẹ̌ ene e, kụ seng nakoạ tiwạ dingangu ral᷊uasi sire e, dingangu pẹ̌pandaěng i sire e ringangu rẹ̌děntaěng i sire sěntiniạ dingangu ral᷊uasẹ̌. Bọu e sarung lai Takụ al᷊akeng manga anạ i sire e.

²⁶Su ěllo kụ Iạ e mẹ̌koạ hal᷊ẹ̌ ene e, sěngkatau kụ nakal᷊ěsọ bọu kawawinasa ene sarung sumongo, ringangu maul᷊ị u habarẹ̌ ene si kau e.

²⁷Su sěhěllo ene e lai i kau e sarung makawisara kạpia kụ seng tawe lai měmou. Wọu e i kau sarung mẹ̌bisara ringangu tau ene. Kerene i kau e sarung makoạ tatiala waugi sire e; tangu nasingkạ e u kai Iạ e MAWU.”