Read Sangir YEHEZKIEL 25 Bible Online

YEHEZKIEL 25 - Sangir bible

YEHEZKIEL 25

¹ MAWU e něhengetang si siạ,

²”Ei taumata wal᷊ine kakalẹ̌, aneiko wanuang Amon.

³Oroiko wansa ene apararingihẹ̌ apan Takụ i wera wọu Iạ e MAWU Kụ Limembong Karangetange si sire, ’I kamene mal᷊uasẹ̌ makasilo Wal᷊e-Ku e i pakal᷊amuhụ dingangu ěntanang Israel i pakagholang mase tau Yahudi e hengketang sarang pěmamembangeng.

⁴Ual᷊ingu ene i kamene Takụ i wala i kawatạu manga wansa wal᷊ine wọu wanua l᷊inggi su sěmběkan Daki e. I sire e sarung mapararisị u manga pẹ̌darasengang su wanuanu e kụ bọu ene měnatapẹ̌ sene. I sire sarung měmpẹ̌kaěng manga wua-buang kalung kamene e ringangu měmpěnginung manga susung binatang i kamene.

⁵Soang Raba e sarung Takụ bal᷊uiang makoạ pěngangahakeng onta, dingangu kěbị banuang Amon makoạ tampạ u pěngangahakeng domba. Tangu nasingkạ e i kamene u Iạ e kai MAWU.’ ”

⁶MAWU Kụ Limembong Karangetange e něhengetang, ”I kamene mẹ̌tẹ̌tal᷊okạ kạpẹ̌sẹ̌sal᷊ainen dal᷊uasẹ̌. I kamene e tawe měngangarěgang ěntanang Israel.

⁷Ual᷊ingu ene i kamene e sarung Takụ i sarakang su wansa mal᷊awọ kụ sarung i pěmul᷊aho ringangu i pěhampasẹ̌ kal᷊awọu tataghuanengu. I kamene e sarung Takụ i pakawinasa kerene, hakịu selain tawe marekeng sěmbaụ bansa ringangu semben tawẹ banuane hala. Tangú nasingkạ e i kamene u Iạ e kai MAWU.”

⁸ MAWU Kụ Limembong Karangetange něhengetang, ”Moab[53] nẹ̌bera u Yehuda ene e mẹ̌sul᷊ungu kere manga wansa wal᷊ine.

⁹Ual᷊ingu ene manga soa kụ mẹ̌tẹ̌tahutěndạ u manga pẹ̌saraěngu wanuang Moab sarung Takụ i wala pakisekete su rokạ narekeng lai manga soa kụ kal᷊ěnggihange, kere: Bet-Yesimot, Baal-Meon dingangu Kiryataim.

¹⁰Iạ e sarung mapakawalang manga ghal᷊ipohong bansa wọu wanua l᷊inggi su sěmběkan daki apěmatạ Moab[54] dingangu wanuang Amon, hakịu Moab, tawe lai nakoạ kere wansa sěmbaụ.

¹¹Iạ e sarung měhukung u Moab, kụ nasingkạ e i sire u Iạ e kai MAWU.”

¹² MAWU Kụ Limembong Karangetange něhengetang, ”Tau Edom seng nẹ̌koạ pẹ̌sasal᷊a ghẹ̌guwạ ual᷊ingu kai tumanịu mahasa miěbạ tau Yehuda, i pạmal᷊isẹ̌ unen sire.

¹³Ual᷊ingu ene Iạ e měmohangu Iạ sarung měhukung u Edom dingangu měmate apan taumata ringangu apaʼm binatang paị sene. Kasěllahu wanua ene, wọu soang Téman sarang soan Dedan, Takụ i pakariadi tawẹ lohone; kawanuane sarung masue mate su ral᷊ungu pẹ̌seketang.

¹⁴Bansa-Ku Israelẹ̌ e sarung Takụ paketang baugu i pěmal᷊isẹ̌ une su Edom, dingangu Edom e sarung koateng tuhụ kasariaʼn dal᷊angehẹ̌-Ku. Edom sarung masingkạ u kereapa pěndange makoạ sasumạu ral᷊angehẹ̌-Ku. Iạ e kai MAWU Kụ Limembong Karangetange kụ seng nẹ̌bisara.”

¹⁵ MAWU Kụ Limembong Karangetange něhengetang, ”Tau Pilistin e seng němal᷊isẹ̌ une piạ mahẹ̌gisẹ̌ waugu rokạ i sire mẹ̌dẹ̌dal᷊ahěnto e ringangu mapakawinasan sire napenẹ u kawawěnsing.

¹⁶Ual᷊ingu ene Iạ e měmohang u Iạ sarung dumokạ tau Pilistin dingangu mapakawinasan sire e. Apan taumata kụ bědang nal᷊ěmbe su sěleěngu wanuang Pilistin e sarung Takụ pateěng.

¹⁷Iạ sarung měhukung i sire pakatědụ dingangu mapakasongkangu une-Ku sarang mawul᷊ugẹ̌. Kereu i sire e makapěndang dal᷊angehẹ̌-Ku e, nasingkạ e i sire e u Iạ e kai MAWU.”