Read Sangir YEHEZKIEL 26 Bible Online

YEHEZKIEL 26 - Sangir bible

YEHEZKIEL 26

¹ Su tanggalẹ̌ humotong wul᷊ang tinantu[55] su taung kapul᷊oěsane bọu tempong pinamembangeng i kami, MAWU e nẹ̌bisara si siạ angkuěngʼE.

²”Ei taumata wal᷊ine kakalẹ̌, tumanạ u Tirus seng měmpạhul᷊uasẹ̌ apidu kapẹ̌bẹ̌berane, ’Yerusalem seng nagholang! Katoghase su hal᷊ẹ̌ u pal᷊ahumbal᷊ụ e seng nailang. I sie sen tawe makasěhedẹ̌ si kitẹ e saụ!’ ”

³MAWU Kụ Limembong Karangetange něhengetang, ”Iạ ini e rokạ u, ei Tirus! Iạ e sarung měmaringang bansa l᷊awọ baugu i pěndokạ si kau, kụ i sire e sarung duměnta kere luạ bọu l᷊audẹ̌.

⁴I sire sarung mapakagholọ u manga meselu ringangu mapakatěnehu manga měnaranu e. Kal᷊awọu ěntana paị sene sarung Takụ kaehang sarang mal᷊ěmbe kate watu l᷊inggi sěmbaụ su tal᷊oarang laudẹ̌.

⁵Apan samehẹ̌ e sarung měmpěmati ral᷊ombon sire e su wowoʼm batu ene. Iạ e MAWU Kụ Limembong Karangetange seng nẹ̌bisara. Tirus sarung makoạ kinaěngu wansa mal᷊awọ.

⁶I sire e sarung měmpěmul᷊aho ore lai měmpěmate tumanạu manga soa su ěntanan Tirus. Tangú nasingkạ e tau Tirusẹ̌ u kai Iạ e MAWU.”

⁷MAWU Kụ Limembong Karangetange něhengetang, ”Iạ e sarung maparěntaʼn Datu i Nebukadnesar bọu Babel baugu i pěndokạ si kau, ei Tirus. Datu kụ katoghasenge ene e sarung duměnta wọu sěmběkan sawěnahẹ̌ dingangu sordadone masaria, piạ kawal᷊one mal᷊awọ dingangu manga karetan sekẹ ore wuntuangu piạ kawal᷊one.

⁸Kěbị dal᷊ohon soa su rul᷊unge sarung pateěng su ral᷊ungu pẹ̌seketang ene. Dokạ e sarung měmpẹ̌koạ bangka pěmuěngang, měmpěngambung manga meselu pěngaloěng dingangu mapẹ̌dal᷊ěnsungu manga kěllung gaghuwạ kụ paketang i sire e kere těndạ i pěndokạ si kau.

⁹I sire e sarung měnggoghahẹ̌ manga meselu ringangu manga apal᷊iwụ gagholang dingangu mapakal᷊eing manga měnaranu ringangu manga pondol᷊u uase.

¹⁰Buntuangu kawal᷊on sire e enẹ e mal᷊awọ, hakịu tarěntungu laedi sire e makapẹ̌sẹ̌sal᷊iawuhu awul᷊u ěntana sarang makatimbuhung si kau. Tingihu ghal᷊ědụu wuntuangu piạ kawal᷊one kụ měmẹ̌mol᷊eng karetan sinasạ dingangu karetaʼm pẹ̌seketang sarung makakiọ manga meselu su tempong i sire e lumiu manga tukadu pasěllangeng dingangu mahunsuẹ̌ su manga soa kụ seng nakoạ manga lěmbeng kaghagholang ene.

¹¹Buntuangu sumasake kawal᷊o e sarung měmpěhěbagẹ̌ suapan dal᷊eng i kamene ringangu měmpěmate anạu kawanuanu ringangu pedaʼn sire. Patikụ palẹ̌ i kamene raluhẹ̌ kụ mahumpia ringangu matoghasẹ̌ e sarung i pakal᷊engge.

¹²Manga sědụ u ene sarung měhampasẹ̌ kal᷊awọu kakakalạ dingangu manga wal᷊ụu e. I sire sarung mapakatěnehu manga meselu ringangu měmpěhaka manga wal᷊eng kamene maral᷊ěnggihẹ̌ e. I sire lai měmpěngal᷊ạ manga watune, pěpal᷊ẹ̌ dingangu ěntanane, mase i hipen sire e su l᷊audẹ̌.

¹³ Iạ sarung mapakailangu kal᷊awọu kakantarị u ringangu musikẹ̌ u kěcapinu e.

¹⁴Takụ i lěmbe tumbạeng batu l᷊inggi sěmbaụ tudẹ, tampạ u apan samehẹ̌ kụ měmpěmati ral᷊ombon sire e. Soa ene tawe saụ pětikang kapia. Iạ MAWU Kụ Limembong Karangetange seng nẹ̌bisara.”

¹⁵MAWU Kụ Limembong Karangetange nẹ̌bera su soan Tirus, ”Tumanạ u wiwihu apenge sarung měmpahungkenden takụ kamagengu makaringihẹ̌ bansagu kawawatạu e, ringangu ihon taumata kụ pẹ̌pateng.

¹⁶ Mẹ̌panda pẹ̌bawiahu e, mararatu wọu apaʼm bansa si wiwihu l᷊audẹ̌ e sarung měmpẹ̌buạ bọu kararatuange, měmpěluạ pakeangu kawawantugẹ̌ e ringangu pakeang i sire piạ sujịe, mase nahungkaiang kạpahungkendene su ěntana e. I sire měngkate apa něngkatakụ tạ sihinge, hakịu tawẹ apa karal᷊enehẹ̌.

¹⁷Bọu ene i sire e sarung mẹ̌pẹ̌kantarịu lagung pělahampugang ini e si kamene: Seng nagholọ soa kụ i lẹ̌enninge! Kal᷊awọu kapal᷊e pinakaghěngging[56] bọu taghal᷊oang. Tumanạ e kal᷊imona e piạ kawasane su l᷊audẹ̌ e mapakạtakụ u taumatang apeng e.

¹⁸Orasẹ̌ ini e, su ěllong kau e kinawatạ, ral᷊ohong manga tahanusa e něngkawintogẹ̌. Himẹ̌kose i sire kěbị e nakasilo kaghagholọ u e ta i kahia.”

¹⁹MAWU Kụ Limembong Karangetange něhengetang, ”I kau e Takụ i pěhio kere soa tạ taumatane. Iạ e sarung měnakạ si kau ringangu akẹ bọu wal᷊ang taghal᷊oang.

²⁰Wọu ene i kau e Takụ i ringọ sarang dunian tau nate mẹ̌deạu i pẹ̌dal᷊aụ dingangu taumata wọu tempong nạung kal᷊imonane. Takụ i wala i kau e apěnatapẹ̌ su runian tau nate ene e, su tal᷊oarang manga kaghagholọ tutune, ringangu taumata nate. Tangu ěntananu e sen tawe lai pẹ̌tanakeng, dingangu i kau e tawe lai marekeng su tal᷊oarang[57] taumata wiahẹ̌ e.

²¹ I kau e Takụ i pakariadi sansahẹ̌ makạtatakụ, dingangu seng ene e pěngěnsueěngu wẹ̌kenu e. Taumata sarung mẹ̌deạ si kau e, kaiso i kau tawe i pẹ̌sombang. Iạ e MAWU Kụ Limembong Karangetange seng nẹ̌bisara.”