Read Sangir YEHEZKIEL 28 Bible Online

YEHEZKIEL 28 - Sangir bible

YEHEZKIEL 28

¹MAWU e něhengetang si siạ,

²”Ei taumata kụ bal᷊ine kakalẹ̌, paul᷊ịko su ratun Tirusẹ̌ e, apang kụ Iạ MAWU Kụ Limembong Karangetange mẹ̌berang manga apa si sie, ’Dingangu kararangẹ u naungu i kau e makịtikạ u watangengu e al᷊ingkai ruata kụ mạiang su tal᷊oarang laudẹ̌ e. Botongewe lai i kau e makịtikạ u al᷊ingkai ruata, kaiso pẹ̌tahěndung bue u i kau e kai kětạeng taumata wiasa.

³Su naungu e i kau něngalembong kapandene wọi Danel,[61] hakịu tawẹ apa rahasia kụ kạdal᷊irung si kau e.

⁴Nipakẹu e kapelesa ringangu katatahuěnnanu waugu měngomol᷊u arětạ, bul᷊aeng, dingangu sal᷊aka.

⁵Mamben těngadẹ̌, i kau e pande mẹ̌dagang, dingangu orasẹ̌ ini e seng nakalạ-kalạ, dingangu kakakalạ u ene e nakakaobotẹ̌ si kau e!’ ”

⁶MAWU Kụ Limembong Karangetange něhengetang, ”Ei Tirus, ual᷊ingu i kau e mạngěnna u watangengu e kai mẹ̌sul᷊ungu Mawu Ruata, Iạ e sarung měndingọ u sordadoʼn tau raghị kụ tumanịu mahasa mẹ̌deạu pěnekẹ si kau. I sire sarung mapakagholọu kěbị kawawantugẹ̌ nạung seng kinaẹ̌bakengu e, al᷊amatu kapelesa ringangu katatahuěnnanu e.

⁸I kau e sarung pateěng dingangu lẹ̌bingang su ral᷊ungu laudẹ̌.

⁹Kụ, kamagengu marěnta tempone ene e, bědang botonge i kau e mẹ̌bera u i kau e Ruata? Su těngong manga měmamatenu e, nal᷊ahẹ u i kau e kětạeng taumata samatang.

¹⁰I kau e sarung mate kere taumata tạ arěgane ual᷊ingu pateěngu taumata raghị kụ běgang Mawu Ruata. Iạ e MAWU Kụ Limembong Karangetange seng něhengetang.”

¹¹MAWU e něhengetang kạpia si siạ, angkuěngʼE,

¹²”Ei taumata wal᷊ine kakalẹ̌ e, pěmpahunsangịkon datu i Tirus. Paul᷊ịkong apa nạung Takụ piněhengetang si sie wọu Iạ e MAWU Kụ Limembong Karangetange, ’I kau e wọu nakoạ awẹu tialang kasasukụ; kal᷊imona e, i kau e mambeng pelesa ringangu mal᷊epatẹ̌!

¹³Tampạu katatanakengu e su Eden, binal᷊aengu Ruata. Pakeangu e nilẹ̌gahengu haghing paramata: watun dělima, ringangu intang, topas (watung paramata awạe nẹ̌kahaghiang), batuʼm pirus (watum paramata awạe mahumbirụ, arau mạngido), watung yakut, ratna (intang), sampakang, watung nilam (paramata wirụ), zamrud (paramata ido), ringangu watung alkali mahamụ. Dal᷊egahu wul᷊aeng e mal᷊aing mal᷊awọ. Apal᷊iwụ ene e nikoạ baugi kau e[62] su ěllong kau e pinakariadi.

¹⁴Malạekatẹ̌ makạtatakụ Takụ nipěllọ sene baugu pěndiagạ si kau.[63] I kau katanạ su wowong bul᷊udẹ̌-Ku kụ susi ringangu ral᷊engko su tal᷊oarang batu paramata kụ mạhungkerong.

¹⁵Lulunu e tawẹ turạ e rongkeng i kau e nipakariadi sarang i kau e nanětạ někoạ dal᷊akisẹ̌.

¹⁶I kau e mẹ̌tẹ̌tasibung pal᷊ahumbal᷊ụ dingangu pẹ̌bawawělli e ringangu seng ene e nakawawa si kau su kal᷊ahasa ringangu rosa e. Tangu Takụ tokol᷊ang i kau e wọu wul᷊udẹ̌-Ku susi e, ringangu malạekatẹ̌ lukadu e měnagha si kau wọu tal᷊oarang manga paramata měmpạhungkerong ene e.

¹⁷Gahị u mapaelẹ̌ e nakakaobotẹ̌ si kau ringangu tatelengu e nakakawodokẹ̌ karadiahangu e. Ual᷊ingu ene i kau e Takụ i pakawatang sarang ěntana, ringangu Takụ koateng tatahěndung baugu manga ratu wal᷊ine e.’ ”

¹⁸MAWU e něhengetang, ”Ei Tirus, i kau e nakal᷊amuhụ kal᷊awọu tampạ u pẹ̌kakal᷊iomanengangu e ual᷊ingu kal᷊awọu pẹ̌sasal᷊anu ringangu pělalěllung su tempong pal᷊ahumbal᷊ụ dingangu pẹ̌bawawělli e. Ual᷊ingu ene Takụ tutungang i kau e sarang pakatene ringangu ěntana. Patikụ taumata makasilo si kau e tumbạeng kere němanda awul᷊ẹ̌.

¹⁹I kau e seng nailang sarang kạděngụ e. Patikụ bansa kụ masingkạ i kau e něngkawintogẹ̌ ual᷊ingu takụ e sarung makahombang pal᷊edu wiahe kerene.”

²⁰ MAWU e něhengetang si siạ,

²¹”Ei taumata wal᷊ine kakalẹ̌ e, aneiko soang Sidon.

²²Habarẹ̌ko su tumanạ e u Iạ e kai MAWU Kụ Limembong Karangetange nẹ̌bera si sire, ’Iạ ini e rokạu, ei Sidon. Taumata e sarung mẹ̌dalo si Siạ ual᷊ingu kakanoạ-Ku e si kau. Su tempong Iạ e měhukungu kawanuanu, i sire e sarung masingkạ u kai Iạ e MAWU Kụ susi e.

²³Iạ e sarung mapakarěntan sahindạ, dingangu mapakawalan dahanu apaelehẹ̌ su apan daral᷊engangu e. I kau e sarung seketangu rokạu e wọu patikụ tampạ, dingangu tumanạ u e sarung pateěng. Tangú nasingkạ e i kau u kai Iạ e MAWU.’ ”

²⁴MAWU e něhengetang, ”Patikụ banua masasandigẹ̌ e kụ nạung bọu něhinakang Israel, tawe lai nakoạ sungkal᷊ene arau tune kụ nakakatědụ Israel. I sire sarung makahěngang u kai Iạ e MAWU Kụ Limembong Karangetange.”

²⁵MAWU Kụ Limembong Karangetange něhengetang, ”Iạ e sarung měnampungu taumatang Israel bọu apaʼm banua mararau su tampạ i sire kụ seng Takụ pinẹ̌kal᷊iaesẹ̌, dingangu kěbị bansa e sarung masingkạ u Iạ e kai susi. Tau Israel sarung lai matanạ su ěntanan sire hala, ěntana kụ sen Takụ nionggọ su ěllang-Ku i Yakub.

²⁶I sire sarung mẹ̌biahẹ̌ tạ konsange apa sene ringangu měmangung manga wal᷊e ore lai mẹ̌koạ manga wawaelangu anggorẹ̌. Iạ e sarung měhukungu kěbị lampung i sire kụ seng něhinakang si sire, hakịu Israelẹ̌ e nakoạ mal᷊enehẹ̌. Tangu nasingkạ i sire u kai Iạ e MAWU Ruatan sire.”