Read Sangir YEHEZKIEL 29 Bible Online

YEHEZKIEL 29 - Sangir bible

YEHEZKIEL 29

¹ Su tanggalẹ̌ mapul᷊o dua wul᷊ang kapul᷊one, su ral᷊ungu taung kapul᷊one su tempom pinamembangeng i kami e, MAWU e něhengetang si siạ,

²”Ei taumata kụ bal᷊ine kakalẹ̌ e, sěngkul᷊eko ratuʼm Misirẹ̌ e. Pẹ̌berako si sie, u i sie ringangu kal᷊awọu kawanuang Misirẹ̌ e sarung i hukung.”

³MAWU Kụ Limembong Karangetange něngoro si siạ pělẹ̌habaru tatanata ini e su ratuʼm Misirẹ̌, ”Iạ ini e rokạu, ei wuala rokol᷊ẹ̌ e kụ dụdal᷊iwatang su tal᷊oarang sal᷊ụ. I kau e mambeng mạpasialang Sal᷊ụ u Nil e kai tataghuanengu ringangu i kau e nẹ̌koạ[64] sal᷊ụ ene.

⁴Iạ e sarung měngaịu pekenge su wěngahu dingangu maparěkạu manga haghing kinạ su onạu. Bọu e i kau Takụ bol᷊engang sarang likudu Sal᷊ụ u Nil dingangu kal᷊awọu kinạ ene dingangu apang kinạ nịparěka su onạu.

⁵Bọu e i kau ringangu haghing kinạ e Takụ irěmmẹ sarang banua l᷊inggi. Badangu e sarung mělimbatang su ěntana ringangu mal᷊iwatedẹ̌ sene. Tawẹ u sarang sěngkatau kụ sarung mělěbing i kau. Badangu e sarung Takụ i onggọ su manga manụ u winalangeng, dingangu manga binatang bal᷊ine mẹ̌deạu pakikinạ.

⁶ Tangu nasingkạ e kal᷊awọu kawanuang Misirẹ̌ e u kai Iạ e MAWU.” MAWU e něhengetang, ”Ei Tau Misirẹ̌! Tau Israel mělẹ̌harapẹ̌ laontol᷊u, katewe nal᷊ahẹ u i kau e kai kětạeng mẹ̌sul᷊ungu těking kụ lome samatang.

⁷Piạ i sire mạngunsarehẹ̌ si kau e, i kau e napědi ringangu něnusụ nggal᷊eạ i sire, hakịu likudi sire e nẹ̌gaghal᷊isa.[65]

⁸Ual᷊ingu ene Iạ e, MAWU Kụ Limembong Karangetange, mẹ̌bera si kamene, u Iạ e sarung měndingọ u těntara kụ sarung pěndokạ si kau e ringangu peda, ringangu měmate tumanạ e ringangu binatangu.

⁹Misirẹ̌ e sarung makoạ banua kụ marěmasẹ̌. Tangu nasingkạ e i kamene u kai Iạ e MAWU.” MAWU e něhengetang, ”Ei ratuʼm Misirẹ̌! Ual᷊ingu i kau e nẹ̌bera u Sal᷊ụ u Nil kai tataghuanengu ringangu kai i kau e nẹ̌koạ,

¹⁰tangu Iạ e nakoạ dokạ u, ringangu rokạu Sal᷊ụ u Nil e. Kasěllahu wanuang Misirẹ̌ e sarung Takụ i pakariadi wanua marěmasẹ̌ manětạ bọu soang Migdol su sěmběkan sawěnahẹ̌ sarang soang Aswan, su sěmběkan timuhẹ̌, mịdatingu pẹ̌saraěngu Sudan.

¹¹Tawẹ apa taumata arau binatang kụ deng mahunsahe. Karěngụu ěpạ u pul᷊o su taunge tawẹ apa taumata kụ deng měmpẹ̌tanạ sene.

¹²Iạ e sarung mapakarěmmasu Misirẹ̌ e, hakịu su tal᷊oarang manga wanua mararěmasẹ̌ bal᷊ine e, Misirẹ̌ e něngalembong karěmmasenge. Karěngụu ěpạ u pul᷊o su taunge manga soa su Misirẹ̌ e sarung makoạ kere manga ěnạe kụ něngalembong katědụ e wọu manga ěnạu soa wal᷊ine e lai. Tau Misirẹ̌ e sarung Takụ i pakariadi manga tumatal᷊ang. I sire e sarung mẹ̌sawuhẹ̌ su kal᷊awọu wanua ringangu mẹ̌tanạ su tal᷊oarang manga wansa wal᷊ine.”

¹³MAWU Kụ Limembong Karangetange něhengetang, ”Ei tau Misirẹ̌, mal᷊iung ěpạ u pul᷊o su taunge ene e, i kamene sarung Takụ i wawa kạpia wọu apaʼm banua su tampạ i kamene kụ seng nakeke.

¹⁴I kamene hědon Takụ i pakariadi kere sutětạ e ringangu Takụ i pẹ̌tanạ su Misirẹ̌ sěmběkan timuhẹ̌, su wanuanu tutune. Paị sene i kamene sarung mapararisị u kararatuang kụ tawe tumanịu matoghasẹ̌,

¹⁵kal᷊ongkotange su kạguwạ u dunia. Iạ e sarung mapakariading kamene kal᷊ongkotange hakịu i kamene sarung tawe makapẹ̌parenta manga wansa wal᷊ine, arau lai měmpěngobotu watangeng su těngon sire.

¹⁶Israelẹ̌ e tawe lai sarung mẹ̌dorong laontol᷊ẹ̌ si kamene. Pẹ̌bawiahi kamene ei tau Misirẹ̌ e, sarung mariadi tatahěndung su Israelẹ̌ u kai apạe tawe nakahino měngumbalang Misirẹ̌ e, kerẹewe nạung seng bọu kinoạ e. Tangu nasingkạ e Israelẹ̌ u kai Iạ e MAWU Kụ Limembong Karangetange.”

¹⁷Su tanggalẹ̌ humotong bul᷊ang humotong su taung karuam pul᷊o pitune su tempong pěmamembang i kami e, MAWU e něhengetang si siạ,

¹⁸”Ei taumata wal᷊ine kakalẹ̌, Datu i Nebukadnesar bọu Babel, naparal᷊engu sekẹ su wanuan Tirus. I sie něndolohu wuntuangu pẹ̌seketange piněmasaěng bawawaěng kereng kawěhạ e hakịu těmbọ i sire e něngkarol᷊ohẹ̌ dingangu wěmbang i sire e něngkawahosẹ̌, kaiso waẹbe ratu arau lai manga sordado e tawẹ ual᷊ine apa wọu saghedi sire e.

¹⁹Ual᷊ingu ene Iạ e MAWU Kụ Limembong Karangetange něhengetang: Ěntanang Misirẹ̌ e sarung Takụ i onggọ su Ratu i Nebukadnesar. I sie sarung měmul᷊aho ringangu měhampasẹ̌ ore lai měhuwo kal᷊awọu kakakalạ u Misirẹ̌ kere ral᷊uasẹ̌ baugu kal᷊awọu sordadone.

²⁰Ěntanang Misirẹ̌ e Takụ i onggọ si sie kere wawalarẹ̌ baugu kapiane, batụu sordadone e seng nẹ̌karạdiahang baugu Iạ. Iạ e MAWU Kụ Limembong Karangetange kụ seng něhengetang.

²¹Kereu hal᷊ẹ̌ ene mariadi e, Iạ e sarung mapakariading Israelẹ̌ e bansa kụ matoghasẹ̌, dingangu wotonge mariadi i kau e Yehezkiel makapẹ̌bisara ringangu tawẹ sungkal᷊ange hakịu kěbị taumata wotonge makaringihẹ̌ si kau. Tangu nasingkạ e i sire u kai Iạ e MAWU.”