Read Sangir YEHEZKIEL 3 Bible Online

YEHEZKIEL 3 - Sangir bible

YEHEZKIEL 3

¹ Mawu Ruata e něhengetang, ”Ei taumata kụ bal᷊inewe kakalẹ̌, kaěngke bukẹ̌ dul᷊ung ene e, kụ bọu ene rakọ e kụ pẹ̌bisarako su tau Israel.”

²Bọu e hengetang mohongku e kụ Mawu Ruata e měngonggọu bukẹ̌ dul᷊ung ene e si siạ tadeạu takụ kanengang.

³AngkuěngʼE, ”Ei taumata kụ bal᷊inewe kakalẹ̌, kaěngke! Lohoiko tiangu e ringangu bukẹ̌ dul᷊ung ini.” Mase bukẹ̌ ene takụ nikaěng kụ temange marěngang kere madu.

⁴Duata e něhengetang kạpia, ”Ei taumata kụ tawe kakalẹ̌ e, dakọko sarang anun tau Israel kụ paul᷊ịko kal᷊awọu tatanata-Ku e si sire.

⁵Kai waugi sire e i kau Takụ nirolohẹ̌, dingangu wal᷊inewe waugu wansa kụ bawerane e makětị, tawe kinawiasaěng, dingangu tawe kaěnnaěngu. Manga andene i kau e Takụ i rolohẹ̌ su wansa kụ kerene e, tangu i sire e sarung makaringihẹ̌ kal᷊awọu waweranu e.

⁷Arawe tau Israelẹ̌ e mạdiri rumaringihẹ̌ si kau, sarang Iạ e mal᷊aing tawe papandungang i sire e. I sire kěbị e makakětị těmbọ i sire e ringangu papuluang dumokạ.

⁸Ini e i kau Takụ i pakakětị těmbọu ringangu makẹ̌dang kere i sire.

⁹I kau e sarung Takụ i pakatoghasẹ̌ kere watu hanibẹ̌ dingangu pakakětị kere intang. Abe katakụ su apan tahaghohaeng ene e.”

¹⁰Tuhụe Ruata e něhengetangu, ”Ei taumata kụ bal᷊inewe kakalẹ̌ e, nẹ̌naungeko pakapia ringangu tahěndungeko kal᷊awọu apan Takụ piněhengetang si kamene.

¹¹Dakọ e sarang anuʼm bansanu e kụ pai su ral᷊ungu pinamembangeng e, dingangu paul᷊ịko apan Takụ i pěhengetang si sire e wọu Iạ e kai MAWU Kụ Limembong Karangetange, měnsang i sire e mapulu rumaringihẹ̌ arau mạdiri.”

¹²Bọu e Rohkẹ̌ u Mawu Ruata e něhengkẹ u iạ e dingangu su l᷊ikudẹ̌ku e takụ i kẹ̌karingihẹ̌ tingihẹ̌ gụgal᷊ědụ e kụ mẹ̌bẹ̌bera u, ”Pẹ̌daloko kawawantugu MAWU e su sorga!”

¹³Kẹ̌karingihẹ̌ku e tingihu papanidu manga riadikang ene e, mẹ̌sẹ̌sasenggehẹ̌ e, ringangu tingihu kakahutabu manga roda ene e kere tingihu linuhẹ̌ e kaihạ e.

¹⁴Kawasaʼm MAWU e riměnta su anuku maihạ, dingangu su piạ iạ e nahengkẹ dingangu niwawang Rohkẹ̌ʼE, naungku e piạ temangu mapaị arau matětị.

¹⁵Tangu narěntạe iạ su tampạu pẹ̌tatanakengu apan nawembang su Tel-Abib su Sal᷊ụ u Kebar. Karěngụu pitu ěllo iạ e mạtanạ sene; iạ e měngkate tụtal᷊iahu kahiang kal᷊awọu apam buhụe takụ kinaringihẹ̌ dingangu takụ kinasilo ene.

¹⁶Samurim pitu ěllo e, MAWU něhengetang si siạ,

¹⁷”Ei taumata kụ bal᷊inewe kakalẹ̌ e, i kau e Takụ i hengkẹ makoạ měndal᷊ukadu tau Israel. Paul᷊ịko si sire e tatahěndung kụ Takụ i onggọ ini e.

¹⁸Kereu Iạ e maul᷊ị u sěngkatau taumata ral᷊akisẹ̌ e sarung mate, arawe i kau e tawe naul᷊ị si sie tadeạu i sie e měmal᷊ui lulune, hakịu i sie e masal᷊amatẹ̌, tangu i sie sarung mate wẹ̌dang kere sěngkatau warạdosa e, dingangu sasimbahu ual᷊ingu papatene e sarung tuntukang bọu anunu e.

¹⁹Magengu i kau e mapẹ̌tahěndungu taumata ral᷊akisẹ̌ ene e ringangu i sie e tawe měngědo mẹ̌koạ dal᷊akisẹ̌ e, i sie e sarung mate kere taumata warạdosa e, arawe i kau sẹ̌sanu e sarung masal᷊amatẹ̌.

²⁰Kereu sěngkatau kụ mapia e měnětạ e mẹ̌koạ dosa e, ringangu i sie e Takụ i pẹ̌těngong hombang, tangu i sie e sarung mate kereu i kau e tawe naul᷊ị u ene e. I sie e sarung mate ual᷊ingu kal᷊awọu rosane, ringangu kal᷊awọu manga kakanoạ e mapia e tawe katahěndungang-Ku e. Arawe sasimbang watangenge ual᷊ingu papatene ene e sarung Takụ tuntukang bọu anunu e.

²¹Kereu taumata kụ mapia ene e sal᷊ěntihokangu e tadeạu i sie e abe pẹ̌barạdosa, ringangu i sie e tumuhụ sasasanu e, tangu i sie e tawe Takụ i hukung dingangu i kau e sarungbe masal᷊amatẹ̌.”

²²Takụ kinapěndangeng katoghasu rarěntang MAWU e ringangu kinaringihẹ̌ku i Sie e nẹ̌bera si siạ, ”Pẹ̌bangungko ringangu rakọko kakoạ sarang bal᷊ane. Paị sene Iạ e reng mẹ̌bisara ringangu.”

²³Tangu tamaị e iạ e sarang bal᷊ane, kụ sene kinasiloku tualagẹ̌ e kimerong mạnodẹ u rarěntang MAWU, kerẹewe sen takụ kinasilo su wiwihu Sal᷊ụ u Kebar. Bọu e iạ nanawo nakararěmmạ su wowong ěntana,

²⁴arawe Rohkẹ̌ u Mawu Ruata e simuẹ̌ dingangu napakateing iạ e. MAWU e nẹ̌bera si siạ, ”Kapul᷊ẹe kụ pẹ̌těngkakunsị e su ral᷊ungu wal᷊e.

²⁵Ei taumata kụ bal᷊inewe kakalẹ̌ e, i kau sarung hapusangu tal᷊i hakịu tawe makakasěbang dingangu tawe makapẹ̌sombangu taumata.

²⁶Iạ e sarung mapakariading lilanu e nipatene, kụ i kau e tawe makapěnal᷊ěntihọ su taumata tahapěnggohaeng ini e.

²⁷Hědong kamagengu Iạ e saụ mẹ̌bisara si kau, ringangu měngul᷊ị kal᷊ahumpianu e mahumbisara, i kau e harusẹ̌ měhabaru apan Takụ i pahumbisara si sire e wọu Iạ e MAWU Kụ Limembong Karangetange. Sěmbahageang bọi sire e sarung makaringihẹ̌, arawe sěmbahageangke wue ute tala, watụ u i sire e mambeng taumata tahapěngghohaeng.”