Read Sangir YEHEZKIEL 30 Bible Online

YEHEZKIEL 30 - Sangir bible

YEHEZKIEL 30

¹MAWU e nẹ̌bisara kạpia, angkuěngʼE,

²”Ei taumata wal᷊ine kakalẹ̌, pěněbal᷊ẹ̌ko ringangu pěhabarẹ̌ko su tau Misirẹ̌ apa nạung Takụ piněhengetang-Ku e si sire MAWU Kụ Limembong Karangetange. Pěmpẹ̌kiạ e ringangu pěmpahunsangị e kere ini: Kạěngkěhang! Ěllon MAWU e seng masandigẹ̌! I sie sarung mal᷊ighạ mẹ̌kakanoạ. Ěllo ene e marěndung dingangu piạ binawane, su tempong manga wansa e němpěnarimạ hukumang.

⁴Hombang masaria e, sarung mihino su Sudan. Su Misirẹ̌ e sarung piạ pẹ̌sasekẹ. Lumaate e sarung mẹ̌tatal᷊ěbụ; kasěllahu wanua e hampaseng dingangu ghagholokang.

⁵Su pẹ̌seketang ene, sarung lai pateěng apang mẹ̌sasekẹ bẹ̌baehang bọu Sudan, Lidia, Libia, Arabẹ̌, Kub, dingangu sarang lai wansa-Ku e hala.”

⁶MAWU Kụ Limembong Karangetange něhengetang, ”Bọu Migdol su sěmběkan sawěnahẹ̌ sarang Aswan, su sěmběkan timuhẹ̌, patikụ apan sěndal᷊engu u Misirẹ̌ e sarung měngkairị su pẹ̌seketang. Dingangu sordadong Misirẹ̌ mal᷊aobotẹ̌ ene sarung měngkawinasa. Iạ e MAWU Kụ Limembong Karangetange seng něhengetang.

⁷Banua ene e sarung makoạ banua tạ taune su tal᷊oaraʼm manga wanua tạ taune wal᷊ine e, dingangu manga soane kụ sarung makoạ soa niwala.

⁸Kereu Iạ měnutung Misirẹ̌ e dingangu měmate kěbị sěhapikange, nasingkạ e i sire u Iạ e kai MAWU.

⁹Kereu tempone e seng marěnta, kụ Misirẹ̌ e seng nawinasa, Iạ e sarung měndolohu manga rarolohang dingangu manga kapal᷊ẹ̌ baugu i pěhěkosẹ̌ tau Sudan kụ tawẹ manga antibe apa ene e, tangu i sire e sarung měngkatakụ. Mamben těngadẹ̌ ěllo ene e sarung duměnta!”

¹⁰MAWU Kụ Limembong Karangetange e něhengetang, ”Iạ e sarung mẹ̌pakẹ u Ratu i Nebukadnesar bọu Babel, baugu i pěnggolọ patikụ kakakalạu Misirẹ̌ e.

¹¹I Nebukadnesar dingangu mẹ̌sasekẹ e kụ bẹ̌gang pirua e sarung duměnta kụ měnggolang banua ene. I sire e sarung dumokạ Misirẹ̌ e, ringangu peda, ringangu manga maiete sarung mẹ̌sal᷊iawuhẹ̌ su wanua ene.

¹²Iạ e sarung mapakal᷊ẹ̌sang Sal᷊ụ u Nil dingangu měnarakang u kạguwạu Misirẹ̌ e su taumata ral᷊akisẹ̌ e. Taumata raghị sarung Takụ i rolohẹ̌ i pěnggolang kěbị banua ene. Iạ e MAWU, kụ seng něhengetang.”

¹³MAWU Kụ Limembong Karangetange něhengetang, ”Iạ e sarung mapakagholọu manga awẹ dingangu manga mahan duata su Memfis. Sarung tawẹ apa lai ratu su Misirẹ̌. Kal᷊awọu tumanạ e sarung Takụ patakutang.

¹⁴Kasěllahu Misirẹ̌ bahageang timuhẹ̌ e sarung Takụ i pakariadi tạ taune ringangu soang Soan su sěmběkan sawěnahẹ̌ e sarung Takụ tutungang. Tebe kạguwakengu soane e hědon Takụ i hukung,

¹⁵dingangu kakakalạ e hědon Takụ i pakaghěngging. Iạ e sarung mapasěbangu ral᷊angehẹ̌-Ku su Pelusium, soa e kụ nakoạ těndạ u Misirẹ̌,

¹⁶dingangu soa ene, sarung masigěsạ tạ sihinge. Mamben těngadẹ̌, Iạ e sarung měnutung Misirẹ̌. Manga meselu soang Tebe sarung mahaka, ringangu soa ene, sarung dal᷊engangu lěba.[66]

¹⁷Manga esẹ mangangudạ u soang Heliopolis dingangu Bubastis e sarung měngkairị su ral᷊ungu pẹ̌seketang, manga wawine e sarung i taweng.

¹⁸Su tempong Iạ e mạngěnsue katataghupiang Misirẹ̌ e dingangu měngal᷊ạ kawasane kụ enẹ e i lẹ̌lesạ e, Tahpanhes sarung mal᷊iwungu kararěndung dingangu apang manga wawine e sarung i taweng.

¹⁹Kerene Iạ e sarung měhukungu Misirẹ̌, kụ nasingkạ e i sire u Iạ e kai MAWU.”

²⁰Su tanggalẹ̌ pitu wul᷊ang humotong su taung kapul᷊oěsane su tempong pinamembangeng i kami e, MAWU něhengetang si siạ,

²¹”Ei taumata wal᷊ine kakalẹ̌, Iạ e seng namědi takiahu ratuʼm Misirẹ̌, dingangu tawẹ apa kụ deng naměkisẹ̌ takiahe ene arau něngul᷊ugẹ̌ tadeạu mapia e, kụ matoghasẹ̌ i pěngumpaedẹ̌ aghidẹ̌ e kapia.

²²Iạ e MAWU Kụ Limembong Karangetange seng něhengetang: Iạ ini e sědụu ratuʼm Misirẹ̌, dingangu takiahe rarua e sarung Takụ pẹ̌diang, baewe wẹ̌dang matoghasẹ̌ arau lai kụ seng napědi e. Tangu peda ene, sarung manawo wọu l᷊imane.

²³Iạ e sarung mapẹ̌tal᷊ein tau Misirẹ̌ e su kasěllahu dunia.

²⁴Bọu ene sarung Takụ i pakatoghasẹ̌ takiahu ratuʼm Babel, dingangu Takụ i pěllọ peda-Ku e su ral᷊ungu l᷊imane. Arawe takiahu ratuʼm Misirẹ̌ e Takụ pẹ̌diang hakịu i sie e sarung mẹ̌gěnggihẹ̌ dingangu mate su těngon datuʼm Babelẹ̌ e sědụ e.

²⁵Mamben těngadẹ̌, datuʼm Misirẹ̌ e sarung Takụ i pělome, arawe ratuʼm Babelẹ̌ e sarung Takụ i pakatoghasẹ̌. Kereu peda-Ku e Takụ i onggọ si sie, kụ i sie měnědeʼm peda ene sarang lantehu Misirẹ̌ e, i sire e sarung masingkạ u Iạ e kai MAWU.

²⁶Iạ e sarung měnawuhu tau Misirẹ̌ e su kạguwạ u dunia. Tangu nasingkạ e i sire e u Iạ e kai MAWU.”