Read Sangir YEHEZKIEL 31 Bible Online

YEHEZKIEL 31 - Sangir bible

YEHEZKIEL 31

¹Su tanggalẹ̌ humotong bul᷊ang katěllune su ral᷊ungu taung kapul᷊oěsane su pamamembang i kami e, MAWU e něhengetang si siạ,

²”Ei taumata kụ bal᷊inewe kakalẹ̌, ul᷊ịko tatanata-Ku ini e, su ratuʼm Misirẹ̌ dingangu kal᷊awọu kawanuane: Apạ e makạdal᷊inaụ kasěllahu e! Tawẹu sarang sěmbaụ makaal᷊ung si kau!

³I kau e mẹ̌sul᷊ungu cěmara su Libanon kụ mapia tatuwone lelange masuhampạ dingangu maholẹ. Kalune matul᷊idẹ̌ dingangu piạ kananintạ e pusunge nịdatingu winawa.

⁴I sie matuwo watụ u akene e mạhěmpal᷊iu. Sal᷊ụ su al᷊ungu ěntana e mẹ̌gẹ̌gěllị u kaěnge, měnẹ̌nẹ̌bohẹ̌ kal᷊awọu hamụ e, ringangu melẹ̌holo manga kakaluang bal᷊ine e.

⁵Ual᷊ingu akene e tawẹ intal᷊e, tangu tatuwone e mapia, lelange ghaghuwạ dingangu manandụ. Bọu kal᷊awọu kalu su manga kěhu e, seng i sie e karangetange ringangu timiol᷊ẹ̌ e.

⁶Haghing manụ u winalangenge mẹ̌sẹ̌sal᷊ehẹ̌ su lelange. Binatang dul᷊u e měmpělẹ̌hanạ su al᷊ungu kalu ene. Patikụ bansa ghaghuwạ su kasěllahu dunia e, mạiang měmpẹ̌tẹ̌těngkaěllung su al᷊unge.

⁷Kalu ene makạbirahi pěmandaěng; kalune matul᷊idẹ̌, lelange manandụ. Hamụ e timětelẹ̌ maral᷊ung tanaẹ nịdatingu matang akẹ su ral᷊ungu ěntana.

⁸ Manga kalun cěmara su Eden, binal᷊aengu Ruata e tawe i kasul᷊ung dingang e. Tawẹ cěmara kụ makaal᷊ung si sie, tawẹ apa kalu kereng kanandụ e lelange. Mamben těngadẹ̌, su winal᷊aengu Ruata e tawẹ apa kalu kụ kaholẹ e kere i sie.

⁹Seng Iạ e napakariadin sie mawantugẹ̌ dingangu manga lelange e mananandụ dingangu mal᷊ahěbung. Kal᷊awọu kalu su winal᷊aengu Ruata e tawẹ naunge loahẹ̌ su kalu ene.

¹⁰Ual᷊ingu ene Iạ e MAWU Kụ Limembong Karangetange, měhabarẹ̌ si kamene apa sarung mariadi su kalu kụ kotọ e nịdatingu winawa ene. U mangkeng kakạdangẹ e, mangkeng kakạobote i sie e.

¹¹Tangu Iạ e sen tawe něnarimạ i sie e ringangu sarung měnarakang i sie su kawasan tau raghị, kụ sarung i pěmal᷊isẹ̌ si sie tuhụewe kakanoạ e ral᷊akisẹ̌ e.

¹²Buntuangu pẹ̌seketangu tau raghị kụ běgaweng ampunge sarung měmpěnuwang masene měmalan sie kerene. Lelange apan napědi e sarung měngkaondol᷊ẹ̌ su apaʼm bawul᷊urange ringangu wal᷊ane su wanua ene. Kal᷊awọu wansa kụ apang mẹ̌tẹ̌těngkaěllung su al᷊unge sarung měmpahundal᷊eng maněntang i sie.

¹³Manga manụ u winalangeng e sarung duměnta ringangu mahundorọ su kalu kụ seng nahaka ene, ringangu manga binatang dul᷊u e sarung měmpẹ̌tahida manga lelange.

¹⁴Kěbị ene e nariadi tadeạu manětạ bọu tempo ini, semben tawẹ apa saụ kalu tumuwo kerene karangẹ e; tawẹ apa lai kotọu kalu kụ makaratingu winawa, manilaing makahombang akẹ natimu. Kěbị e harusẹ̌ mate kerẹewe taumata kụ bal᷊ine kakalẹ̌ e, dingangu mẹ̌tampung dingangu apan taumata kụ seng natanaẹ sarang tampạu taumata nate e.”

¹⁵Kere ini hengetangu MAWU Kụ Limembong Karangetange, ”Kereu kalu ene maul᷊uhẹ̌ sarang katatanakengu taumata nate e, Iạ e měngoro akẹ su al᷊ungu ěntana takadeạu i pěhěmbung kere tatialang mělẹ̌lutu. Iạ e hědong měngampang elehu sal᷊ụ dingangu měněnsing kal᷊awọu simbul᷊u matan songe. Ual᷊ingu kalu ene kawe seng nate, Iạ e sarung maparěntang kararěndung baugu manga wul᷊udu Libanon dingangu mapakalolangu kěbị kakaluang su kěhu.

¹⁶Su tempong kalu ene e Takụ niul᷊uhẹ̌ sarang dunian tau nate e, tingihu kananawone e sarung makakatakụ kal᷊awọu wansa. Kal᷊awọu kalu su Eden, dingangu manga kakaluang pinile su Libanon, apang makạhombang akẹ natimu, ringangu apang kụ seng diměllusẹ̌ sarang dunia su al᷊unge kawawaěnge sarung měmpahul᷊uasẹ̌ ual᷊ingu kananawong kalu ene.

¹⁷I sire e sarung měmpěngěntudẹ̌ sarang dunian tau nate e dingangu měmpẹ̌komol᷊ẹ̌ dingangi sire e kụ nạung seng něngkanawo kal᷊imona e. Dingangu kěbịe nạung kal᷊imona e, mạiang bawa su al᷊ungu kalu ene e sarung i pẹ̌kakeke su tal᷊oarang kal᷊awọu manga wansa e.[67]

¹⁸Kalu ene měnẹ̌nialang datuʼm Misirẹ̌ e ringangu kawanuane. Tawẹ apa kalu su Eden kụ kerene karangẹ e ringangu kawantuge. Arawe orasẹ̌ ini e, mẹ̌sul᷊ungu manga kakaluang su Eden lai, kalu ene mal᷊aing sarung duměllusẹ̌ sarang dunian tau nate ringangu mẹ̌komol᷊ẹ̌ dingangi sire kụ bẹ̌gaweng Mawu Ruata e ore lai ringang i sire apang kụ nawihua su ral᷊ungu pẹ̌seketang. Iạ e MAWU Kụ Limembong Karangetange seng nẹ̌bisara.”