Read Sangir YEHEZKIEL 32 Bible Online

YEHEZKIEL 32 - Sangir bible

YEHEZKIEL 32

¹Su tanggalẹ̌ humotong bul᷊ang kapul᷊o duane su taung kapul᷊o duane su tempong pěmamembang i kami e, tangú MAWU e něhengetang si siạ,

²”Ei taumata wal᷊ine kakalẹ̌ e, paul᷊ikeko pakaul᷊ị-ul᷊ị su ratuʼm Misirẹ̌. Habarẹ̌ko tatanata-Ku ini si sie, ’I kau e makịtikạ u singa kawuhuang su tal᷊oarang manga wansa, arawe i kau e kawe limembong mạngawẹ buala kụ mělẹ̌limbuagẹ̌ su ral᷊ungu akẹ. Laedu e i pělẹ̌lěbuhẹ̌ dingangu i pělẹ̌lamuhụ kal᷊awọu sal᷊ụ.

³Su tempong manga wansa e mẹ̌kẹ̌komol᷊ẹ̌, Iạ e sarung měnamẹ si kau ringangu ral᷊ombo-Ku, ringangu mapakawalang manga wansa ene měnuhudi kau e sarang dul᷊unge.

⁴I kau e sarung Takụ i pakapěpạ su ěntana ringangu kěbị manụ u winalangeng ore lai binatang bọu kasěllahu dunia e, sarung Takụ i oro apakinạ si kau.

⁵Bọu e manga wul᷊ude ringangu manga wal᷊ane sarung Takụ peneěngu kasuang i kamene kụ seng něngkawuhụ ene.

⁶Dahanu e sarung Takụ i pakawoso i pěnantạ manga wul᷊ude ringangu i pěmenẹ manga sal᷊ụ.

⁷ Su tempong Iạ e mapakawinasang kau, langị e sarung Takụ timbuhungang, dingangu manga wituinge sarung Takụ tawe i pakatualagẹ̌. Matangěllo e sarung Takụ buniang su sěmběkam binawa ringangu wul᷊ang e tawe sarung matualagẹ̌.

⁸Mamben těngadẹ̌, kal᷊awọu tualagẹ̌ su l᷊angị e sarung Takụ i pakaědusẹ̌, dingangu runia e sarung Takụ i pakarěndung-děndung. Iạ e MAWU Kụ Limembong Karangetange seng nẹ̌bisara.

⁹Su tempong Iạ e napẹ̌kakekeng habaru kaghagholọ u su apaʼm banua kụ bědang tawe kinạsingkatengu e, mal᷊awọ bansa e sarung měngkawintogẹ̌.

¹⁰Mamben těngadẹ̌, Iạ e sarung maměteʼm peda-Ku ringangu měmatạ si kau. Patikụ mararatu e ringangu apaʼm bansa sarung makasilo kakanoạ-Ku e si kau. Su tempo ene i sire e sarung mahungkenden takụ dingangu ghumẹ̌gilu matakụ u mate.’ ”

¹¹MAWU Kụ Limembong Karangetange něhengetang su ratuʼm Misirẹ̌, ”Peda u ratuʼm Babelẹ̌ e sarung i wěte sarang anunu.

¹²Manga wuntuangu sekẹ bọu apaʼm bansa kụ mal᷊ahasa e sarung Takụ i oro apěnawụ peda i sire pěngalo kal᷊awọu anạ u kawanuanu. Kawanuanu ringangu kal᷊awọu apang i lẹ̌lesạu e sarung měngkawinasa.

¹³Binatangu kụ sarung Takụ potokang su wiwihu manga sal᷊ụ tampạ u pěnganginungang i sire. Baewe taumata arau waẹbe lai manga binatang sarung tawe makakal᷊ẹ̌buhẹ̌ kapia akẹ u sal᷊ụ ene.

¹⁴Tangu kěbị sal᷊ụ su wanuanu sarung Takụ i pakatilang dingangu Takụ i apaelehẹ̌ kapia kere wiasa. Iạ e MAWU Kụ Limembong Karangetange seng něhengetang.

¹⁵Kereu Misirẹ̌ e Takụ i pakariadi wanua l᷊inggi tạ dal᷊ohone, ore lai Takụ i pakawinasa patikụ apang měmpẹ̌tẹ̌tanạ sene, i sire e sarung masingkạ u Iạ e kai MAWU.

¹⁶Laingatẹ̌ kere ini kasariane e sarung makoạ kakantarịu pěndal᷊utu. Manga wawine wọu wansa wal᷊ine e sarung měmpẹ̌kantarịu ene nakoạ kere tatialaʼm pěndal᷊utu waugu Misirẹ̌ e ringangu kal᷊awọu anạu kawanuane. Iạ e MAWU Kụ Limembong Karangetange něhengetang.”

¹⁷Su tanggalẹ̌ mapul᷊o l᷊ima wul᷊ang humotong[68] su ral᷊ungu taung kapul᷊o duane su tempong pěmamembangeng i kami e, MAWU e něhengetang kạpia si siạ e,

¹⁸”Ei taumata wal᷊ine kakalẹ̌ e, pěmpělutụ e waugu kawanua su Misirẹ̌. Dohọ e i sire sarang katatanakengu tau nate dingangkeweng manga wanua wal᷊ine matatoghasẹ̌ e.

¹⁹Paul᷊ịko si sire e, ’Su naung i kamene e mang kětạeng i kamene e kal᷊ěnggihange? I kamene sarung duměllusẹ̌ sarang tampạu taumata nate e, kụ i paral᷊oka su tal᷊oarang taumata kụ běgaweng MAWU Ruata e.’

²⁰Tau Misirẹ̌ e sarung mate ringangi sire apan nateʼm bihua su ral᷊ungu pẹ̌seketang. Peda sěmbua e seng sạdia i pěmate si sire kěbị e.

²¹Kal᷊awọu tahapẹ̌sekẹ kụ bawahani e ringangu taumata apang měmpẹ̌sẹ̌sekẹ bọu sěmběkaʼm Misirẹ̌ e naněnsomahẹ̌ dingangu mal᷊uasẹ̌ darěntan tau Misirẹ̌ e sarang tampạ u tau nate. I sire e mạhul᷊iagẹ̌ kirini, ’Taumata kụ bẹ̌gawen Duata e seng nate su pẹ̌seketang. Ini e i sire naramahi kụ měmpahundal᷊oka sini!’

²²Asyurẹ̌ rimal᷊oka paị sene, nal᷊ikụ u pěndal᷊ẹ̌bingang u apan tahapẹ̌sekẹ. I sire kěbị e seng nawihua su ral᷊ungu pẹ̌seketang. Lěbing i sire e wawa karal᷊ungange su tampạu taumata nate. Su tempon deng bẹ̌dang biahẹ̌ e, i sire e makạkaděntang katatakụ su dunia e.

²⁴Elam e ene paị sene ringangu lẹ̌bingu manga mẹ̌sasekẹ nangělikụ. Tawe nịsunatẹ̌ e, i sire kěbị e natem bihua, kụ natanaẹ sarang dunian tau nate. Su tempon biahẹ̌, i sire makạdiadi katatakụ, kai orasẹ̌ ini i sire seng nate kụ měnanggung mea ringangu apan seng něngkapate su ral᷊ungu pẹ̌seketang.

²⁶I Mesekh dẹ̌duan Tubalẹ̌ e sene nilikutangu lẹ̌bingu apan tahapẹ̌sekẹ i sire. Tawe nịsunatẹ̌, i sire kěbị e něngkawihua su ral᷊ungu pẹ̌seketang. Su tempoʼm biahẹ̌ e, i sire mapạděntang katatakụ su dunia.

²⁷I sire tawe nakahombang pěndal᷊ẹ̌bingang kụ su ral᷊enge mapia e, kerẹewe nạung manga apam bawahani e su tempong nạung kal᷊imona e[69] kụ natanaẹ sarang dunian tau nate piạ aghide nasukụ. Apaʼm bawahani ene nilẹ̌bing mạnguleleng su wowong aghidẹ̌, dingangu kěllung[70] su wowon sěbạ. Su tempoʼm bẹ̌daʼm biahẹ̌, apam bawahani e mamben těngadẹ̌ mal᷊ahasa hakịu makạkatakụ kěbị taumata.

²⁸Kerene tau Misirẹ̌ e sarung lẹ̌bingang dingangu i paral᷊oka su tal᷊oaran taumata kụ bẹ̌gawen Duata e, ringangu nawihua su ral᷊ungu pẹ̌seketang.

²⁹Edom e ene paị sene ringangu kal᷊awọu ratu ore lai měngangawasane. Kal᷊imona i sire e e kai tahapẹ̌sekẹ matatoghasẹ̌, arawe orasẹ̌ ini e i sire kai rụdal᷊oka su runian tau nate ringangu apan tau nate wal᷊ine e, kụ bẹ̌gawen Duata.

³⁰Kal᷊awọu apaʼm matatebone wọu sěmběkan sawěnahẹ̌ e ene paị sene, kerene lai tau Sidon. Kal᷊imona e kawasan sire e makạkaděntang katatakụ, arawe orasẹ̌ ini e i sire e pinakamea, ringangu tawe nịsẹ̌sunatẹ̌ e i sire natanaẹ sarang dunian tau nate ringangu kal᷊awọu taumata kụ nawihua su ral᷊ungu pẹ̌seketang. Paị sene i sire e rụdal᷊oka ringangu měnẹ̌nal᷊udẹ̌ dosa sěngkapěnal᷊udẹ̌ dingangu apan taumata kụ natanaẹ sarang dunian tau nate.

³¹Kereu ratuʼm Misirẹ̌ e ringangu patikụ taumataʼm pẹ̌seketange marěnta su runian tau nate ringangu makasilo patikụ taumata ene apan seng nawihua su ral᷊ungu pẹ̌seketang, i sire e sarung makapěndang mahiborẹ̌. Iạ e MAWU Kụ Limembong Karangetange seng nẹ̌bisara.

³²Kai Iạ e nakawodaị datuʼm Misirẹ̌ e makạkoạ katatakụ suapan taumata kụ biahẹ̌ e, kaiso i sie e ringangu sordadone e sarung mawihua, ringangu i paral᷊oka ringangu kěbị taumata kụ bẹ̌gaweng Duata ringangu mawihua su ral᷊ungu pẹ̌seketang. Iạ e MAWU Kụ Limembong Karangetange seng nẹ̌bisara.”