Read Sangir YEHEZKIEL 33 Bible Online

YEHEZKIEL 33 - Sangir bible

YEHEZKIEL 33

¹MAWU e něhengetang kapia si siạ e, angkuěngʼE

²”Ei taumata wal᷊ine kakalẹ̌, pẹ̌berako su wansanu u kereu Iạ e mapakarěntaʼm pẹ̌sasekẹ baugu wanua sěmbaụ e, ute kai ini e sarung mariadi. Tumanạu wanua ene sarung měmile wọu tal᷊oaran sire e sěngkatau lukadẹ̌.

³Kereu lukadẹ̌ ene makasilo rokạ duměnta, i sie e mapahěten tatialang piạ hombang tadeạu kěbị taumata e makaingatẹ̌.

⁴I sai-saing nakaringihẹ̌ tatialang hombang ene e kaiso tawẹ pandungange, kụ dokạ e seng narěnta kụ měmpěmate, tangu i sie e nate ual᷊ingu sal᷊ane hala. Manga andene i sie nakaingatẹ̌ su tatialang hombang ene e, nal᷊ahẹu i sie mambeng nasal᷊amatẹ̌.

⁶Kaiso kamagengu lukadẹ̌ ene e makasilo rokạ duměnta kụ i sie tawe mapahěten tatialang hombang, kụ bọu e rokạ e měmpěmate taumata warạdosa ene, ute sasimbange waugu papaten sire e sarung Takụ tuntukang bọi sie e.

⁷Ei taumata wal᷊ine kakalẹ̌ e, i kau Takụ hengketang pakakoạ lukadu tau Israel. Kụ paul᷊ịko si sire e laingatẹ̌ ini e:

⁸Kamagengu Iạ maul᷊ị u sěngkatau ral᷊akisẹ̌ e sarung mate, kaiso i kau e tawe mẹ̌gěllịu ingate si sie tadeạu i sie měmal᷊ui lulune, hakịu i sie e masal᷊amatẹ̌, tangu i sie sarung mate wẹ̌dang kere sěngkatau taumata warạdosa. Kaiso sasimbangu waugu papatene sarung Takụ tuntukang bọu anunu.

⁹Kereu i kau e seng měngonggọu ingate su tau ral᷊akisẹ̌ ene, mase i sie mạdiri měngědo wọu pẹ̌kakoạ dal᷊akisẹ̌ e, i sie sarung mate kere sěngkatau warạdosa, arawe i kau hala e sarung masal᷊amatẹ̌.”

¹⁰MAWU e něhengetang si siạ, ”Ei taumata wal᷊ine kakalẹ̌, saụko habarẹ̌ su tau Israelẹ̌ e waweran sire ini, ’I kami e su kakěndusang ual᷊ingu wẹ̌běhakengu rosa ringangu karal᷊akisi kami e. Kai makapẹ̌biahẹ̌ kereapa i kami tangu?’

¹¹Paul᷊ịko si sire u Iạ e Ruata kụ biahẹ̌, MAWU Kụ Limembong Karangetange, Iạ tawe rumal᷊ahimpulu kamagengu taumata warạdosa e mate; arawe kapulu-Ku ute kai i sie pěněntangu kal᷊awọu rosane tadeạu i sie e těbewe wiahẹ̌. Ei tau Israel pěngědoko mẹ̌koạ dal᷊akisẹ̌! Unụ e i kamene e mapulu mate?

¹²Ene, taumata wal᷊ine kakalẹ̌ e, pẹ̌berako su tau Israelẹ̌ u kamagengu taumata mapia e mẹ̌barạdosa, tangu kapiane kal᷊imona e, tawe makatul᷊ung si sie. Kamagengu taumata ral᷊akisẹ̌ e měngědo wọu rosane, i sie tawe i hukung, dingangu kamagengu taumata mapia e mẹ̌barạdosa, i sie tawe i pakasal᷊amatẹ̌.

¹³Botonge mariadi Iạ e seng nẹ̌diandi sarung mapakasal᷊amatu taumata kụ mapia, kaiso kamagengu i sie měnětạ mẹ̌barạdosa e ringangu měngẹ̌ngantibẹ̌ u i sie sarung i pakasal᷊amatẹ̌ ual᷊ingu kapiane nạung kal᷊imona e, i sie e tawe nakahino. Iạ e sen tawe lai mẹ̌tahěndung kapiane nạung bọu kinoạ e ringangu i sie sarung lai mate ual᷊ingu kal᷊awọu rosane.

¹⁴Botonge mariadi Iạ e seng mẹ̌gěllịu ingate su taumata ral᷊akisẹ̌ u i sie e sarung mate. Kaiso kamagengu i sie měngědo wọu pẹ̌bawarạdosa e, mase měnětạ mẹ̌koạ apang mapia, ringangu matěngadẹ̌ e, andene i sie měnul᷊eng apal᷊iwụ nighadẹu taumata, arau barang kụ seng nitakone, ore lai tumuhụ kal᷊awọu manga toratẹ̌ kụ makaual᷊i pẹ̌bawiahẹ̌ e, tangu i sie e sarungbe tawe mate.

¹⁶Iạ e semben tawe lai mẹ̌tahěndung kal᷊awọu rosa kụ seng nịkakoạ e, ringangu i sie sarung mẹ̌biahẹ̌ ual᷊ingu mẹ̌kẹ̌koạ apang katěngadẹ̌ e ringangu mapia.

¹⁷Arawe wansa ene e, mẹ̌bera u kakanoạ-Ku e tawẹ kạadile! Sumbal᷊iau kawe kakanoạ i sire e tawẹ kạadile.

¹⁸Sěnsul᷊ẹko l᷊ai Takụ i paul᷊ị u kamagengu taumata mapia e, měnětạ mẹ̌koạ dal᷊akisẹ̌, i sie e sarung mate ual᷊ingu ene.

¹⁹Kamagengu taumata ral᷊akisẹ̌ e měngědo mẹ̌barạdosa, masene měnětạ mẹ̌koạ apang mapia ringangu matul᷊idẹ̌ e, i sie sarung mẹ̌biahẹ̌ ual᷊ingu ene.

²⁰Maning kerene taumatang Israelẹ̌ e mẹ̌bẹ̌bera u karạdiahang-Ku e tawẹ kạadile. Mamben těngadẹ̌, Iạ e sarung měhukung i sire e sěngkatau-sěngkatau tuhụ kakanoạ e.”

²¹ Su tanggalẹ̌ l᷊ima, wul᷊ang kapul᷊one, su ral᷊ungu taung kapul᷊o duane su tempoʼm pěmamembang i kami e, piạ sěngkatau kụ nakal᷊ěsọ kụ diměnta wọu Yerusalem, něhabarẹ̌ si siạ u soa ene seng nanawo.

²²Su Sěhěbi kal᷊imonang darěntane e, iạ seng nakapěndang kawasang MAWU. Kụ su tempong tau ene riměnta su anuku e, iạ seng botonge mẹ̌bisara ringangu semben tawe lai měmou.

²³MAWU něhengetang si siạ,

²⁴”Ei taumata wal᷊ine kakalẹ̌, taumata kụ mạtanạ su kinaghoghahengu manga soa su ěntanang Israelẹ̌ ene nẹ̌bera u, ’I Abraham nakaěbạ kěbị ěntana ini e, sumbal᷊iau i sie e tumbạewen sẹ̌sane. I kitẹ e mal᷊awọ dekenange, kụ ěntana ini e makoạ tataghuaneng i kitẹ.’ ”

²⁵Ual᷊ingu ene MAWU Kụ Limembong Karangetange něndolohu iạ apạul᷊ịu tatanata-Ne ini e si sire, ”I kamene e kụkinạ gẹ̌si kụ bědang piạ dahane; i kamene e mạněmba mahan duata ringangu tahapěmate. Bahani kahěngang i kamene e měngaku u ěntana ini e kai tataghuaneng i kamene.

²⁶I kamene e mạngumbala su warạ i kamene e. Kakanoạ i kamene e makạdarěnting. I kamene kěbị e seng němpẹ̌koạ kawawuang. Bẹ̌dangko l᷊ai wahani i kamene e makapẹ̌bera u ěntana ini e tataghuaneng i kamene?

²⁷Ual᷊ingu Iạ, Duata kụ biahẹ̌ e, MAWU Kụ Limembong Karangetange, taumata apang kụ mạtanạ su kinaghoghahengu soa ene e sarung masue mate. I sire kụ apang měmpẹ̌tẹ̌tanạ su manga wimbaenge sarung kinasengu manga binatang dul᷊u. I sire kụ apang měmpẹ̌kẹ̌kěmbuni su manga wul᷊ude, ringangu manga liange, sarung mate ual᷊ingu sahindạ.

²⁸Banua ene sarung Takụ i pakariadi wanua l᷊inggi kụ tawẹ taune, ringangu kawasa kụ i lẹ̌lesạ i sire e sarung masue. Manga wul᷊ude su Israelẹ̌ e sarung kumakuhau hakịu tawẹu sarang sěngkatau kụ bahani makal᷊iu wọu ene.

²⁹Su tempong Iạ měhukungu wansa ene, ual᷊ingu kal᷊awọu rosan sire e, kụ nakakariadin soa ene kụkakuhau e, tangu nasingkạ e i sire u Iạ e kai MAWU.”

³⁰MAWU e něhengetang, ”Ei taumata kụ bal᷊ine kakalẹ̌ e, i kau e seng nakoạ su wuaʼm biwihu taumatang kamene wansa sěmbaụ su tempong i sire e nahěnsombangeng su rěduhu manga meselu soa arau su těngoʼm manga tukadu wal᷊e. I sire nẹ̌bera sěmbaụ su wal᷊ine, ’Hotede, i kitẹ e rumaringihẹ̌ko apa tatanatang MAWU e sěhěllo ini.’

³¹I sire e riměnta mẹ̌gẹ̌gapaěng dingangu kerẹewe umatẹ̌-Ku e i sire e mạhungkaiang dụdaringihẹ̌ kal᷊awọu waweranu, kaiso apang kụ nioronu e tawe niraringihang i sire. Biwihi sire e mẹ̌bẹ̌berang bawerang pẹ̌kakakěndagẹ̌ e, kaiso naung i sire e tumbạeng mẹ̌tẹ̌tiněnnang kal᷊auntung.

³²I kau e nikoạ kere sěngkatau tahakantarị kakantarịu pẹ̌kakakěndagẹ̌ kụ tingihe mal᷊ěno ringangu pelesa měnalangu kěcapi. Kahěngangbe i sire rụdaringihẹ̌ manga waweranu e kaiso tawe tumatatuhụ.

³³Kěbị apan niweranu e sarung mariadi, ringangu kereu tempo ene e marěnta, i sire e sarung masingkạ u wọu nạung piạ nabi sěngkatau su tal᷊oaran sire e.”