Read Sangir YEHEZKIEL 34 Bible Online

YEHEZKIEL 34 - Sangir bible

YEHEZKIEL 34

¹MAWU e něhengetang si siạ,

²”Ei taumata wal᷊ine kakalẹ̌, sěngkul᷊eko manga ratung Israel, dingangu paul᷊ịko apan Takụ i pěhengetang si sire e wọu Iạ e MAWU Kụ Limembong Karangetange, ’Kạěngkěhang i kamene, ei manga lukadu Israel. I kamene tumbạeng mẹ̌tẹ̌tiněnnang pandungang i kamene hala e, wal᷊inewe waugu pandungangu manga dombanu.

³Susune inungang i kamene, dukụ e koateng i kamene pakeang, ringangu domba kụ katawaěnge potokang dingangu kinaseng i kamene. I kamene e mamben tawẹ nẹ̌tẹ̌tangkuang manga dombang kamene.

⁴Apan domba kụ lome, tawe lahikinang i kamene, apam masakị e tawe laundangeng i kamene, apan nạl᷊esẹ e tawe wawẹ̌kisangu undange kahiang kamene, apang napal᷊idẹ̌ dingangu nailang tawe nireakeng i kamene kụ niwawa kapia. Mal᷊ạ katewe kěbị dombanu ene kẹ̌koateng i kamene ringangu matingkaị.

⁵ Ual᷊ingu tawẹ apa měndal᷊ukade, manga domba ene e, nẹ̌sal᷊iawuhẹ̌ dingangu nakoạ kinaěngu binatang dul᷊u.

⁶Tangu manga domba-Ku e mạngumpěpidẹ̌ su manga wukide mararangẹ dingangu su manga wawul᷊urange. I sire e nakeke su kasěllahu wowon dunia, kụ tawẹ u sarang sěngkatau e měnẹ̌naung arau mẹ̌deạ si sire e.

⁷Tangu, manga l᷊ukadẹ̌ e, raringihẹ̌ko apan Takụ i pěhengetang si kamene wọu Iạ e MAWU Kụ Limembong Karangetange:

⁸Ual᷊ingu Iạ, Duata kụ biahẹ̌ e, tatinganeko! Manga domba-Ku e, seng nitěmboěng dingangu nikinạ u binatang dul᷊u, ual᷊ingu tawẹu měngahạ si sire. I kamene e manga lukadẹ̌-Ku e tawe mẹ̌papandung manga domba ene. I kamene e tumbạeweng mẹ̌tẹ̌tiněnnaʼm batangengu hala e, wal᷊inewe waugu manga dombanu.

⁹Tangu pẹ̌daringihẹ̌ko e i kamene měndal᷊ukadẹ̌ e,

¹⁰Iạ, MAWU Kụ Limembong Karangetange nẹ̌bera si kamene, Iạ ini e kai rẹ̌dokatengu. Manga domba-Ku ene hědon Takụ al᷊akeng kapia wọu anunu ringangu sen tawe lai Takụ i umbala si kamene; i kamene selain tawe Takụ i pakawala mẹ̌tiněnnang pandungangu e hala. Manga domba-Ku e sarung Takụ i pakasal᷊amatẹ̌ bọi kamene hakịu i sire e sen tawe lai makoạ kinạ i kamene.’ ”

¹¹MAWU Kụ Limembong Karangetange něhengetang, ”Iạ sẹ̌saku e sarung mẹ̌deạ manga domba-Ku ringangu měhiking si sire,

¹²kere sěngkatau měndal᷊ukadẹ̌ mẹ̌dẹ̌deạ dingangu měnẹ̌nampungu manga dombane kụ němpẹ̌sal᷊iawuhẹ̌ e mase mẹ̌padul᷊i si sire. I sire hědon Takụ i apẹ̌sul᷊e kapia wọu apan tampạ suapang i sire e napal᷊idẹ̌ su tempong marěndung dingangu makạtatakụ ene.

¹³I sire e sarung Takụ i pasẹ̌bang bọu tal᷊oarang manga wansa ringangu manga wanuan tau raghị, bọu e Takụ tampungang dingangu Takụ i wawa sarang banuan sire hala e. I sire e sarung Takụ ahakeng sarang manga wul᷊ude ringangu manga wal᷊ang Israel, dingangu Takụ tataěng i sire e sarang manga wimbaengu rěmpugẹ̌ kụ mal᷊ahẹ̌bung e.

¹⁴Mamben těngadẹ̌, Iạ e sarung měnadia waugi sire e manga wimbaengu rěmpugẹ̌ kụ matatawa e su wawul᷊urange ringangu su manga wal᷊ang ěntanang Israel. Paị sene i sire e sarung měmpangirul᷊e dingangu měmpẹ̌kaěng děmpugẹ̌ dingangu tạ konsange apa.

¹⁵Iạ sẹ̌saku e sarung makoạ lukadu manga domba-Ku ringangu měndiahin tampạ u pěngangirul᷊eěng baugi sire e; Iạ e MAWU, Kụ Limembong Karangetange kụ seng nẹ̌bisara.

¹⁶Apaʼn nailang e Takụ deakeng, apan nawuhị e Takụ iapẹ̌sul᷊e kạpia, apaʼn nal᷊esẹ e Takụ běkisang, apaʼm masakị e Takụ undangeng; arawe apaʼm matatawa ringangu matatoghasẹ̌ e Takụ i pakawinasa, u Iạ e kai měndal᷊ukadẹ̌ kụ mẹ̌kẹ̌koạ apaʼm mapia e.

¹⁷Daringihẹ̌ko, ei manga domba-Ku e! Iạ e MAWU Kụ Limembong Karangetange seng něhengetang si kau u Iạ e sarung měhukung i kamene sěngkatau-sěngkatau e ringangu mapẹ̌dal᷊ahaeng apaʼm mapia e wọu apan dal᷊akisẹ̌, mapẹ̌dal᷊ahaen domba wọu manga kambing.

¹⁸Su tal᷊oarang kamene e piạu tawe masasaheng kětạeng mạngěnsue manga rěmpugẹ̌ kapapiaěnge, kaiso kawe lai měnẹ̌nahida manga rěmpugẹ̌ kụ tawe kakanengang i sire e! I sire e měngẹ̌nginung akẹ matilang, kụ bọu ene e mělẹ̌lěbuhẹ̌ akẹ kụ tawe lainungang i sire e.

¹⁹Manga domba-Ku wal᷊ine e harusẹ̌ kumaěng děmpugẹ̌ kụ seng bọu tẹ̌tatahidaěng i sire ringangu měnginung akẹ kụ bọu lělẹ̌buhang i sire e.

²⁰Ual᷊ingu ene, Iạ e MAWU Kụ Limembong Karangetange nẹ̌bera si kau, ei manga domba kụ matatawa e, watụ u Iạ e sarung duměnta makoạ mělahukung su tal᷊oarang domba matatoghasẹ̌ dingangu domba kụ lome.

²¹I kamene e měmpěnẹ̌nahěsẹ ore lai měmpěnẹ̌nunge domba kụ masakị hakịu i sire e nasekehẹ̌ bọu ghapaěngu domba.

²²Arawe Iạ sẹ̌saku e sarung měngambang manga domba-Ku e, tadeạu i sire e tawe lai koateng i sire e tuhụ abul᷊in sire e. Iạ e sarung měhukungu manga domba-Ku sěmbaụ-sěmbaụ e, ringangu mapẹ̌dal᷊ahaeng apaʼm mapia wọu apaʼn dal᷊akị e.

²³ Iạ e sarung měhengkẹ u sěngkatau ratu kụ mẹ̌sul᷊ungu ěllang-Ku i Daud, mẹ̌deạu makoạ měndal᷊ukadi sire mang sěmbaụ e, ringangu i sie e sarung mẹ̌padul᷊i si sire e.

²⁴ Iạ e, MAWU kụ sarung makoạ Duatan sire, dingangu ratu kụ mẹ̌sul᷊ungu ěllang-Ku e i Daud ene e, sarung makoạ měngangawasa si sire. Iạ e MAWU kụ seng nẹ̌bisara.

²⁵Iạ e sarung mẹ̌koạ pẹ̌dariandi ringang i sire, kụ makakariadi karal᷊enehẹ̌ su tal᷊oaran sire e. Iạ e sarung měliwuahẹ̌ kal᷊awọu binatang dul᷊u e wọu kal᷊awọu wanua, tadeạu manga domba-Ku e makakatanạbe tawẹ konsange apa su manga wimbaenge ringangu makapẹ̌tikị su manga kěhu.

²⁶Iạ e sarung měngal᷊amatẹ̌ si sire ringangu mapakawalan sire e matanạ su piạ bukidẹ̌-Ku susi e.[71] I sire e sarung Takụ aparasehu tahiti kereu i sire e mẹ̌gausẹ̌.

²⁷Manga kakaluang e sarung mẹ̌bua, apan dahami e sarung mẹ̌gěllịu ghẹ̌sine, ringangu kěbị taumata e sarung matanạ dingangu karal᷊enehẹ̌ su wanuane hala. Kereu hante laikị umatẹ̌-Ku e seng nịbawěsụ dingangu i sire e seng Takụ nipakal᷊iwirẹ̌ bọu apan taumata kụ měmpẹ̌tahuěllang i sire e, tangú nasingkạ e i sire u Iạ e kai MAWU.

²⁸I sire semben tawe lai hampasengu manga wansa kụ bẹ̌gaweng Iạ e, arau těmboěngu manga binatang dul᷊u e. I sire sarung mẹ̌biahẹ̌ mal᷊unsemahẹ̌, dingangu tawẹ apa sarang manga sěngkatau e sarung měmatakụ si sire e.

²⁹Iạ e sarung mapakatawang manga rahamin sire e hakịu semben tawẹ apa lai karal᷊unusẹ̌ e su wanua ene. I sire e semben tawe lai hinakanengu manga wansa wal᷊ine.

³⁰Tangu nasingkạ e patikụ taumata e u Israelẹ̌ e kai umatẹ̌-Ku ringangu Iạ e kawe mạněntanudẹ̌. Iạ e MAWU Kụ Limembong Karangetange seng nẹ̌bisara.

³¹Mamben těngadẹ̌, i kamene e kai ghapaěngu domba-Ku kụ Takụ gěllirangu kaěnge. I kamene e kai umatẹ̌-Ku, dingangu Iạ e kai Ruatanu. Iạ e MAWU Kụ Limembong Karangetange kụ seng nẹ̌bisara.”