Read Sangir YEHEZKIEL 37 Bible Online

YEHEZKIEL 37 - Sangir bible

YEHEZKIEL 37

¹Iạ e makạpěndang kawasang MAWU, dingangu Rohkẹ̌ʼE něngahạ si siạ diměsung saraʼm bědạ e kụ napenẹu ruhin taumata nate.

²Iạ e niahạ u MAWU nělikụ bědạ e ene, kụ kinasiloku e su kasěllahu wal᷊ane ene piạ e manga ruhi mal᷊awọ-l᷊awọ dingangu mamara-mara.

³MAWU e nakiwal᷊o si siạ, ”Ei taumata wal᷊ine kakalẹ̌ e, botonge manga ruhi tamai ini e mẹ̌biahẹ̌ kapia?” Iạ simimbahẹ̌, ”MAWU Limembong Karangetange, kětạeng i Kau hala masingkạ.”

⁴Bọu e MAWU něngoro si siạ pělẹ̌habaru tatanata-Ne su manga ruhi kụ seng něngkahupadẹ̌ ene,

⁵”Iạ e MAWU Kụ Limembong Karangetange něniụ u singongo sarang dal᷊ungu wadangu e tadeạu i kamene e mẹ̌biahẹ̌ kạpia.

⁶Takụ gělikangu ihạ dingangu ghẹ̌si e si kamene mase Takụ pikunangu pisị. I kamene hědon Takụ onggotangu singongo hakịu mẹ̌biahẹ̌. Tangu nasingkạ e i kamene u kai Iạ e MAWU.”

⁷Bọu e iạ i Yehezkiel nẹ̌bera su manga ruhi ene natuhụewe kere su titaʼm MAWU. Kụ těntal᷊angkewe iạ kạpẹ̌bẹ̌bisarane e piạ e tingihẹ̌ takụ kinaringihẹ̌ mẹ̌tẹ̌tatarangkal᷊ẹ̌, batụu manga ruhi ene e nanětạe nẹ̌dal᷊ahěmpụ sěmbaụ su wal᷊ine.

⁸Těntal᷊ang iạ e kapěnẹ̌nahimatane, manga ruhi ene nanětạe piạ ihạ e ringangu piạ gẹ̌sine, mase piạ e pisine, katewe manga wadang ene e bẹ̌dang tawẹ singongone.

⁹Duata e nẹ̌bera si siạ, ”Ei taumata wal᷊ine kakalẹ̌, pẹ̌berako su anging.[74] Pěberako u Iạ MAWU Limembong Karangetange mẹ̌parenta si sie tadeạu sumongo balạ e měnsang bọu lantehe sude, baugu pěniukang singongo sarang dal᷊ungu wahageangu wadang kụ seng nate ene hakịu i sire mẹ̌biahẹ̌ kapia.”

¹⁰ Tangú iạ e mẹ̌bisara matuhụewe kere su titaʼm MAWU ringangu anging e mal᷊aing měniụ u singongo sarang dal᷊ungu manga wadang ene e kụ bọu ene i sire e nẹ̌biahẹ̌ dingangu nakararisị. Dekenang i sire e mal᷊awọ kahěngang, botonge wue mẹ̌koạ kasasěmbaụ u apan sordado e kụ masěllahẹ̌.

¹¹Duata e něhengetang si siạ, ”Ei taumata wal᷊ine kakalẹ̌, manga ruhi ini e kai sěmbaụ sasihing baugu tau Israel. I sire e mẹ̌kẹ̌kasiangu i sire e kai seng něngkamara, tawẹ apa kapěharapeng dingangu tawẹ apa ěllo ramahi.

¹²Ual᷊ingu ene, pěněbal᷊ẹ̌ko su umatẹ̌-Ku Israelẹ̌ ene, u Iạ e kai MAWU Kụ Limembong Karangetange sarung měmuka tukadu lěbing i sire e. Iạ e sarung měněbang i sire e wọu ene, ringangu měnul᷊en sire e kạpia sarang ěntanang Israel.

¹³Sarětạeng Iạ e nẹ̌koạ kěbị ene e, umatẹ̌-Ku e sarung masingkạ u kai Iạ e MAWU.

¹⁴Iạ e sarung měniụ u singongo su ral᷊ungu wadang i sire waugu mapẹ̌biahi sire e, wọu e i sire Takụ ipakawotonge pẹ̌tanạ su wanuane tutune. Tangu nasingkạ e i sire u Iạ e kai MAWU. Iạ e MAWU kụ seng nẹ̌bisara ringangu nal᷊ahẹ u sarung mẹ̌koạ ene.”

¹⁵MAWU e něhengetang kapia si siạ,

¹⁶”Ei taumata wal᷊ine kakalẹ̌, pěngal᷊ạko těking sěmbua ringangu pěmohẹko manga wawera ini e, su wowone, ’Kararatuangu Yehuda’. Bọu ene pěngal᷊ạko těking bal᷊ine sěmbua, kụ pěmohẹko su wowone: ’Kararatuangu Israel’.

¹⁷Bọu ene umpaedẹ̌ko těking darua ene sěngapaʼm botonge hakịu pondol᷊e rarua e mẹ̌sěmạ kụ makoạ těking sěmbua.

¹⁸Kamagengu kawanuanu e makiwal᷊ong mangal᷊ene,

¹⁹paul᷊ị e si sire u Iạ e, MAWU Kụ Limembong Karangetange sarung měngal᷊ạ těking kụ panodekangu Israelẹ̌ e, ringangu mapakahěmpụ dingangu těking panodekangu Yehuda e. Těking darua ene e sarung Takụ i pakariadi sěmbaụ dingangu Takụ hěngkunang su ral᷊ungu pal᷊edu l᷊ima-Ku.

²⁰Umpaedẹ̌ko těking darua ene ringangu todẹko su wansa ene.

²¹Bọu ene pẹ̌berako si sire u Iạ e, MAWU Kụ Limembong Karangetange sarung měngal᷊ạ patikụ bansa-Ku wọu apaʼm banua suapan seng nitamaiang i sire e. I sire e sarung Takụ tampungang dingangu Takụ bawaěng kạpia sarang banuan sire tutune.

²²I sire e sarung Takụ i pakariadi wansa sěmbaụ su ěntana ene, su wawul᷊urangu Israel. I sire e sarung parentaěngu sěngkatau ratu, dingangu tawe lai sarung mapahiạ makoạ bansa rarua arau kararatuang darua.

²³I sire e tawe lai sarung mapakal᷊amuhụu watangeng i sire e ual᷊ingu pẹ̌kakoạ dosa ringangu pěnaněmba manga mahan duata e kụ makạdarěnting. Iạ e sarung mapakal᷊iwiri sire e wọu patikụ pẹ̌sasal᷊an sire e kụ makạkariadin sire e mẹ̌tul᷊ang Iạ e. Iạ e sarung mapakasusin sire e; kụ i sire e sarung makoạ umatẹ̌-Ku, ringangu Iạ e Ruatan sire.

²⁴ I sire e sarung i pakasěmbaụ su al᷊ungu sěngkatau ratu kere i Ratu Daud, kụ sarung mẹ̌parenta sarang marěngụ-děngụ. Dingangu kasasatia e i sire sarung tumuhụ kal᷊awọu toratẹ̌-Ku e. Dingangu waugu sarang marěngụ-děngụ i sire ringangu manga pal᷊ahěnton sire e sarung mẹ̌tanạ su ěntana ene e, ěntanạ e Takụ nionggọ si Yakub, kụ pinẹ̌tanakeng u manga i upung i sire e.

²⁶Iạ e hědong mẹ̌koạ pẹ̌dariandi ringang i sire e makakariadi karal᷊enehi sire e sarang kakalẹ̌. Iạ e sarung měngal᷊amatẹ̌ dingangu měnamba rekenang i sire e. Iạ e sarung měmangung Bal᷊e-Ku e tatapẹ̌ su ěntanan sire e paị sene sarang marěngụ-děngụ.

²⁷ Iạ e sarung mẹ̌tanạ dingang i sire, Iạ e sarung makoạ Duatan sire e ringangu i sire e makoạ umatẹ̌-Ku.

²⁸Kereu Wal᷊e-Ku e seng ene su tal᷊oaran sire e sarang marěngụ-děngụ, tangu nasingkạ e manga wansa wal᷊ine u Iạ e kai MAWU, kụ seng němile Israelẹ̌ e nakoạ umatẹ̌-Ku e hala.”