Read Sangir YEHEZKIEL 39 Bible Online

YEHEZKIEL 39 - Sangir bible

YEHEZKIEL 39

¹MAWU Kụ Limembong Karangetange něhengetang, ”Ei taumata wal᷊ine kakalẹ̌, patakuteko i Gog, datu mawantugẹ̌ bọu manga wanuang Mesekh dingangu Tubal, dingangu pẹ̌berako si sie u Iạ ini e kai sědụ e.

²Iạ e sarung měmal᷊engkọ si sie, ringangu měnebang i sie wọu wanua marau su sěmběkan sawěnahẹ̌, sarang bawul᷊urangu Israel.

³Sene sarung Takụ tangkul᷊ang naěnakengu papitị e sarang matontong bọu limane kaihi, ringangu Takụ i pakanawo manga horoʼm papitị e wọu limane koaneng.

⁴Su wowong manga wul᷊udu Israel, i Gog dingangu kal᷊awọu sordado ringangu manga tumatakide sarung měngkawihua, kụ kal᷊awọu kasuang i sire e sarung Takụ i onggọ su kal᷊awọu manga manụ u winalangeng dingangu manga binatang dul᷊u mẹ̌deạu pakikinạ.

⁵Tahapẹ̌sekẹ ene e sarung měngkanawo ringangu mate su manga wimbaenge. Iạ e MAWU Kụ Limembong Karangetange seng nẹ̌bisara.

⁶Iạ e sarung mapakariading katatutung su ěntanang Magog, dingangu su manga apeng, su apang manga tumanạ e mẹ̌bẹ̌biahẹ̌ dingangu tawẹ konsange. Tangu nasingkạ e i sire kěbị u kai Iạ e MAWU.

⁷Arawe su tal᷊oaran tau Israel, sarung Takụ ilahẹ areng-Ku susi e, ringangu areng-Ku ene e sen tawe lai i pakawuhụ. Tangu nasingkạ e manga wansa u kai Iạ e MAWU, Ruata kụ susi, wọu Israel.”

⁸MAWU Kụ Limembong Karangetange něhengetang, ”Mamben těngadẹ̌, ěllo kụ Takụ nisěbạ ene e sarung marěnta.

⁹Tumanạu manga soa su Israel mahunsěbang mẹ̌gẹ̌gapaěng baugu měmpěngomol᷊ẹ̌ patikụ aghidẹ̌ kụ nạung sen tiněntang, kụ kai kěllung dingangu peda, naěnakeng dingangu horoʼm papitị ore lai pal᷊o-pal᷊o. Kěbị ene e kinoạ i sire e kaluʼm putung, dingangu ene e wotonge wue gunang karěngụ u pitu taung.

¹⁰Kụ i sire e tawe wahal᷊uasu měnampungu kaluʼm putung su manga wimbaenge arau měnuwang kakaluang su kěhu, u kal᷊awọu aghidẹ̌ apan nitěntang e diọbe natimu waugu kaluʼm putung. I sire e sarung měmpěmul᷊aho ringangu měmpěhampasẹ̌ arětạu taumata apang němpěmul᷊aho ringangu němpěhampasẹ̌ arětạ i sire. Iạ e MAWU Kụ Limembong Karangetange seng nẹ̌bisara.”

¹¹MAWU e něhengetang, ”Kere kěbị ene e mariadi, Iạ e sarung měngonggọu ěntana si Gog ěntanaʼm pěndal᷊ẹ̌bingang su Israel, su Wal᷊ang Ral᷊iuang kụ su sěmběkan daki wọu L᷊audẹ̌ Nate. Sene i Gog dingangu kal᷊awọu sordadone sarung lẹ̌bingang, dingangu wal᷊ane ene e sarung i sěbạ ’Bědạu Wuntuang i Gog’.[77]

¹²Pitu wul᷊ang karěngụ e tau Israel sarung i sal᷊impotọu pěndal᷊ẹ̌bing kal᷊awọu kasuang tadeạu ěntana ene semben tawe lai mal᷊amuhụ.

¹³Kal᷊awọu tumanạu wanua e sarung měmpẹ̌sasumbala hal᷊ẹ̌ u pěndal᷊ẹ̌bing ene; ringangu waugu ene i sire e sarung makahombang bawal᷊ise su ěllong kal᷊auntu-Ku e. Iạ e MAWU Kụ Limembong Karangetange seng nẹ̌bisara.

¹⁴Samuriʼm pitu wul᷊ang ene nal᷊iu e, pirang katau e sarung i těbọ apělikụ banua ene pẹ̌deạ manga kasuang[78] kụ bědang lụl᷊imbatang su ěntana, kụ mạengu piạ ute, mělěbing, mẹ̌deạu mapakawurẹ̌sing banua e wọu karal᷊amuhụ.

¹⁵Su raral᷊eng ene e, balạewe i sire mẹ̌sombangu ruhin taumata e, ute i sire e mẹ̌gěllịu tatialane su sěndihange, tadeạu apang mẹ̌kakoạ lẹ̌bing e makasilo ene mase mělěbing duhi ene su Wal᷊ang Wuntuang i Gog.

¹⁶Ual᷊ingu pẹ̌kakoạ kerene ěntana ene niwurěsi wọu karal᷊amuhụ. (Su ěllo samuri, su wal᷊ane ene sarung piạ soa kụ arenge mẹ̌sul᷊ungu Wuntuang i Gog.)”

¹⁷ MAWU Kụ Limembong Karangetange něhengetang si siạ, ”Ei taumata wal᷊ine kakalẹ̌ e, kuieko kal᷊awọu manụ u winalangeng dingangu manga binatang bal᷊ine e, tadeạu ruměnta wọu apan tampạ mẹ̌deạu apakinạ sasěmba kụ sen Takụ nisadia waugi sire. Iạ e sarung mẹ̌koạ sal᷊iwang gẹ̌guwạ su manga wawul᷊udangu Israel, kụ paị sene i sire makakinạ gěsi ringangu měnginung daha.

¹⁸I sire e wotongewe makakinạ manga maietu apaʼm bawahani, ringangu měnginung manga rahang apang měngangawasa dunia. Mangạewe apaʼm bawahani ringangu měngangawasa ene e sarung pateěng kere manga kambing esẹ arau manga anạ u kambing, arau mangạewe banteng matatawa e.

¹⁹Samuring bọu Takụ pateěng taumata kere sasěmba, manga manụ u winalangeng, dingangu manga binatang bal᷊ine sarung kuminạ kěbị tawane sarang i tahamuta, ringangu měnginung daha sarang miwukang.

²⁰Su meda-Ku e i sire e wotonge mẹ̌těngkal᷊aedẹ̌ dingangu kěbị kawal᷊o sarang sumasakene ringangu apan tahapẹ̌sekẹ. Iạ e MAWU Kụ Limembong Karangetange seng nẹ̌bisara.”

²¹MAWU e něhengetang, ”Iạ e sarung tumatingang kawawantugẹ̌-Ku e waugu apaʼm bansa. I sire kěbị e sarung makasilo kereapa Iạ e mẹ̌pakẹ u kawasa-Ku waugu měndal᷊engu kal᷊awọu putusang kụ adilẹ̌ e.

²²Měnětạ bọu tempo ene tau Israelẹ̌ e sarung masingkạ u kai Iạ e MAWU Ruatan sire e.

²³Dingangu patikụ bansa e sarung makahěngang u tau Israelẹ̌ e niringọ sarang pinamembangeng ual᷊ingu rosan sire e si Siạ. I sire e sen Takụ tiněntang dingangu Takụ niwala, pinakawatạ su rokạ e ringangu nipate su pẹ̌seketang.

²⁴I sire e Takụ bantiang tuhụewe karal᷊amuhụ dingangu karal᷊akisi sire e, mase Takụ těntangeng i sire e.”

²⁵MAWU Kụ Limembong Karangetange něhengetang, ”Arawe orasẹ̌ ini e, Iạ e sarung kuměndagu tau Israel hěnton Yakub, dingangu mapakariadin sire e kapia mẹ̌biahẹ̌ tawẹ konsange. Ual᷊ingu ene Iạ e mẹ̌děndiagạ tadeạu areng-Ku e těbewe lẹ̌adateng.

²⁶Kereu i sire e saụ mẹ̌tanạ kapia su karal᷊enehẹ̌ su wanuan sire hala e, ringangu tawẹ u sarang sěngkatau kụ měmatakụ si sire, tangu i sire e sarung mẹ̌timbul᷊eng kereapa i sire seng niapakamea ual᷊ingu nẹ̌tul᷊ang Iạ.

²⁷Iạ e sarung měnul᷊eng sire kapia wọu manga wanuan sědụ i sire, dingangu kasusi-Ku e sarung mal᷊ahẹ su patikụ bansa ual᷊ingu kakanoạ-Ku ene.

²⁸Tangu nasingkạ e umatẹ̌-Ku e u Iạ e kai MAWU Ruatan sire. Batụu kai Iạ e něndingọ i sire sarang piněmembangeng, kaiso Iạ lai nẹ̌bawa si sire pinakapul᷊ẹ sarang banuan sire hala, tawe naněntangu sarang sěngkatau wọu i sire paị sene.

²⁹Iạ e sarung měměmbingu Rohkẹ̌-Ku e waugu tau Israel, dingangu sarung tawe měněntang i sire kapia. Iạ e MAWU Kụ Limembong Karangetange seng nẹ̌bisara.”