Read Sangir YEHEZKIEL 4 Bible Online

YEHEZKIEL 4 - Sangir bible

YEHEZKIEL 4

¹Mawu Ruata e něhengetang, ”Ei taumata kụ bal᷊inewe kakalẹ̌ e, pěngal᷊ạ e tela sěmbaụ e, pěllọ su těngonu e, kụ kěhịko su wowone karẹ̌ u soang Yerusalem.

²Bọu ene pěnggambarẹ̌ko kereapa ral᷊engu měliwung soa ene, ringangu manga songe, niěndukangu manga ěntana, manga pẹ̌darasengang, dingangu manga apal᷊iwụ tatěnehẹ̌ meselẹ̌ mạngělikụ e.

³Pengal᷊ạko pantisẹ̌ uase kụ koạe ene e darěndung uase sěmbaụ; pěllọko pantisẹ̌ ene e su tal᷊oarang kau ringangu soang Yerusalem. Bọu ene tatěngọ e sarang soa ene tạbidạu i kau e něliwung. Ene e makoạ tatiala waugu tau Israel.

⁴Tangu rimal᷊okạ e kụ sụsasěndihang sarang kaihi, ringangu Iạ e[7] sarung mapakaěnsạu pẹ̌sasal᷊an tau Israel si kamene. Karěngụu 390 su ěllone i kau e sarung dumal᷊oka kerene dingangu mẹ̌tatahang u sunsara ual᷊ingu pẹ̌sasal᷊an sire. Sěhěllo i kau rumal᷊oka kerene tatialạeng sěntaung hukumang baugu tau Israel.

⁶Bọu ene, rimal᷊okạ e sụsasěndihang sarang koaneng dingangu pěndangeko hukumang baugu pẹ̌sasal᷊an Yehuda e ěpạ u pul᷊o su ěllone karěngụ e, sěhěllo e mělẹ̌lahẹ u sěntaung hukumang i sire e.

⁷Tatinganeko pěndal᷊iwung Yerusalem. Běteko kěngkungu e su soa ene ringangu habarẹ̌ko tatanata-Ku e mạanung hukumang baugi sire e.

⁸I kau e Takụ hapusang kụ tawe makawal᷊ị u wadangu e wọu kaihi sarang koaneng kerene lai wọu koaneng sarang kaihi sarangkewe pěndal᷊iwunge masue.

⁹Ini e, al᷊ạ e gandung, lělle, tumbuẹ mahamụ, kacang kẹ̌kol᷊aěng, gětung, gandung al᷊usẹ̌. Laụko ene kěbị e kụ pẹ̌koạko borotẹ̌. Ene kai kaěngu e karěngụu 390 su ěllone i kau e ral᷊oka sụsasěndihang sarang kaihi ene.

¹⁰Borotẹ̌ ene e harusẹ̌be pahiạu kerene hakịu ěllo-ěllo e i kau kụkaěng tumbạu 230 su haraěnge. Něngalembo wọu ene e tawe wotonge.

¹¹Akẹu inumangu e mal᷊aing piạ kětakenge, kụ kai ruang lainumang sěhěllo e.

¹²Pẹ̌hunụko putung dingangu kalune kotoru taumata e. Tapako borotẹ̌ ene e su wowoʼm putung ene e kụ kaěngko borotẹ̌ ene e su těngong kěbị taumata e.”

¹³MAWU e něhengetang, ”Kerene kakakoạ e tau Israel sarung kumaěng kaěng i sẹ̌sěding[8] u torati Musa e, su tempong i sire Takụ i rěmmẹ sarang banuan tau l᷊iwụ e.”

¹⁴Arawe iạ e sumimbang, ”Oh MAWU Kụ Limembong Karangetange! Den dokeng kạdodọ sarang orasẹ̌ ini e, tawẹ běke kụ iạ e nělamuhụ batangengku e ringangu kakinạ kasuangu binatang, arau lěmbeng kinaěngu manga binatang dul᷊u. Tawe kimẹ̌kaěng iạ e kaěng kụ lẹ̌ěnnaěng i pẹ̌tẹ̌tělling.”

¹⁵Tangu Ruata e něhengetang, ”Mapiawe kere laaweng kotoru taumata e, i kau e wotonge mẹ̌pakẹ u kotoru sapi e i pẹ̌tongkạ borotẹ̌ i kamene e.”

¹⁶Wọu ene i Sie nẹ̌bera kapia, ”Ei taumata kụ bal᷊inewe kakalẹ̌ e, Iạ e sarung mapakaupung diahing kaěng su Yerusalem. Dingangu kal᷊inso ore lai ghụgěnggangu taumata e sarung měmatasu kaěng kụ kẹ̌kanengang i sire e ringangu inumang kụ lẹ̌inungang u i sire e.

¹⁷I sire e sarung měngkapěndụu kasueěngu borotẹ̌ dingangu akẹ e, kụ pěngěnsueěnge i sire e mate ual᷊ingu kal᷊awọu rosan sire e.”