Read Sangir YEHEZKIEL 40 Bible Online

YEHEZKIEL 40 - Sangir bible

YEHEZKIEL 40

¹Tempo ene tanggalẹ̌ mapul᷊o wul᷊ang humotong su ral᷊ungu taung karuam pul᷊o l᷊imane tempong pěmamembang i kami, mapul᷊o ěpạ su taunge samuring Yerusalem kinawatạ, iạ e nakapěndang kawasang MAWU, kụ bọu ene iạ e niwawa-Ne rimal᷊eng.

² Su ral᷊ungu sěmbaụ papasilo, Duata e nẹ̌bawa si siạ sarang ěntanang Israel dingangu něměllọu iạ e su wul᷊ude kụ marangẹ. Su těngoku e takụ kinasilo komol᷊angu manga wal᷊e mạngawẹ soa sěmbaụ.

³ Iạ e niwawane sarang ene takụ kinasilo piạ sěngkatau esẹ kụ kụkerong kere witụ dụdarisị su rěduhu tukadu pasěllangeng. I sie mẹ̌ngumpaedẹ̌ tal᷊i kakěting bọu leneng dingangu kalu kakěting.

⁴I anu esẹ ene e nẹ̌bera si siạ, ”Ei taumata wal᷊ine kakalẹ̌, daringihẹ̌ko pakapia-pia ringangu kakěllaiko patikụ sạbarang kụ takụ niapatodẹ si kau, u kai waugu ene i kau e hakịu niwawa ramahi. Paul᷊ịko su tau Israel kal᷊awọu apang kinasilonu e.”

⁵ Bọu e iạ nakasilo Wal᷊eʼm MAWU kụ nilikutangu meselẹ̌. Tau esẹ ene e nanětạ e něnukạ meselẹ̌ ene ringangu kalu sasukạ e kụ nandune těllu meterẹ̌. Nal᷊ahẹ u meselẹ̌ ene dangẹ e těllu meterẹ̌ dingangu suwenehe mal᷊aing těllu meterẹ̌.

⁶Bọu ene i sie natamai sarang pasěllangeng e su sěmběkan daki. Iạ e naawị bọu tumbal᷊atunge mase nahumpạ e su wowone, i sie nanukạ tukadẹ̌ sasuěkang ene běnahe těllu meterẹ̌.

⁷Su l᷊ikudu pasěllangeng ene e piạ ko ral᷊eng sěmbua kụ suapạeweng sěndihange piạ kamare tatěllu waugu pělukareng. Kěbị kamarẹ̌ ene e mẹ̌sul᷊ung kaghaghuwạ e; kakakoạe něbuku ěpạ, dingangu nandune apan sěndihange těllu meterẹ̌. Apaʼm meselẹ̌ sasara apang kamarẹ̌ e mẹ̌sul᷊ung kasuwenehe, kụ pẹ̌tahạ dua meterẹ̌ sitenga. Dal᷊eng ene e tuhụ nandụ e těllu meterẹ̌ lai, kụ mẹ̌tẹ̌timona huange ghẹ̌guwạ kụ tụtatěngo Wal᷊eʼm MAWU. Tau esẹ ene e něnukạ huange ghẹ̌guwạ ene e kutẹu nal᷊ahẹ e nạung běnahe ěpạ u meterẹ̌; kạpapěllọ su pondol᷊u tukadu pasěllangeng, batuhu ral᷊unge, kụ karaniange ringangu Wal᷊eʼm MAWU. Manga meselẹ̌ ene e su wahageang kụ tụtatěngo Wal᷊eʼm MAWU e, suwenehe sěmeterẹ̌.

⁸

⁹

¹⁰

¹¹Bọu ene tau esẹ ene něnukạ běnahu ral᷊eng su sasuěkang; ěnnungu meterẹ̌ sitenga, dingangu l᷊ai wěnahu tukadu pasěllangeng ene e lima meterẹ̌.

¹²Su těngong manga kamaru lukadẹ̌ ukurange pẹ̌tahạ těllu meterẹ̌ ene, piạ mesele masanạ dangẹ e sitengaʼm meterẹ̌, dingangu wěnahe sitengaʼm meterẹ̌ lai.

¹³Bọu ene tau esẹ ene něnukạ karaung bọu meselu l᷊ikudu kamaru lukadẹ̌ sarang meselu l᷊ikude kamaru lukadẹ̌ su sěmběkane, kụ kai mapul᷊o dua su metere sitenga.

¹⁴I sie lai něnukạ huange ghẹ̌guwạ ene: nandụ e mapul᷊o su metere. Tukadu huange ene e mẹ̌tẹ̌timona rělahu Wal᷊eʼm MAWU e[79] su l᷊ikude.

¹⁵Karauʼm bọu tukadu pasěllangeng batuhu l᷊ikude sarang meselu huange ghẹ̌guwạ su wahageange tụtatěngo Wal᷊eʼm MAWU e kai 25 su metere.

¹⁶Su meselẹ̌ batuhu l᷊ikude ringangu meselẹ̌ sasara manga kamarẹ̌ ene e piạ manga janelane rararodọ. Apang meselẹ̌ bahageang su ral᷊unge kụ tụtatěngo sarang dal᷊eng u sasuěkang e, nilẹ̌gahengu manga haghing ketạ u kalum palěm.

¹⁷Bọu ene tau esẹ ene e nẹ̌bawa si siạ limiun tukadu pasěllangeng sarang dělahu Wal᷊eʼm MAWU e watuhu l᷊ikude. Su sěndihangu meselẹ̌ batuhu l᷊ikude mạngělikụ Bal᷊eʼm MAWU e nịkakoạ kamare 30 su waụ e. Su těngoʼm manga kamarẹ̌ ene e piạ ěnsal᷊ị e watu

¹⁸kụ mạngělikụ kasěllahu rělahẹ̌ ene. Dělahe watuhu l᷊ikude ene něngalembong kasanạ e wọu rělahe watuhu ral᷊unge.

¹⁹Sene piạ tukadu pasěllangeng bal᷊ine kụ pěllọ e něngalembong karangẹ e ringangu apang kụ mẹ̌tẹ̌timona rělahe watuhu ral᷊unge. Tau esẹ ene něnukạ karaung běllạu tukadu pasěllangeng darua ene e: limam pul᷊o su metere.[80]

²⁰Bọu ene tau esẹ ene e něnukạ pasěllangeng su sěmběkan sawěnahẹ̌ kụ mẹ̌tẹ̌timona sarang dělahe watuhu ral᷊unge.

²¹Su pasěllangeng ene, kamaru lukadẹ̌ tatěllu ene e su apan sěndihangu ral᷊enge, manga meselẹ̌ sasarane, ringangu huange ghẹ̌guwạ, kěbị e mẹ̌sul᷊ung ukurange ringangu apang ene su pasěllangenge su sěmběkan daki. Kěbị daral᷊engang su sasuěkang ene e nandune 25 su metere ringangu wěnahe 12,5 su metere.

²²Kerene lai huange ghẹ̌guwạ, manga janelane, ringangu kalum palěm bọu nịkakaketạ mẹ̌sul᷊ungu apan su pasěllangenge su sěmběkan daki. Tatahidaěngu tumbal᷊atung arěgaʼm pitu e mẹ̌tẹ̌timona sarang pasěllangeng ene e, ringangu su pondol᷊e piạ huange ghẹ̌guwạ kụ tụtatěngo sarang dělahu Wal᷊eʼm MAWU watuhu l᷊ikude.

²³Mẹ̌tẹ̌těngoʼm pasěllangenge su sěmběkan sawěnahẹ̌, piạ pasěllangenge lai wal᷊ine kụ mẹ̌tẹ̌timona sarang dělahe watuhu ral᷊unge, mẹ̌sul᷊ungu kere seng piạ su pasěllangenge su sěmběkan daki. Taumata ene něnukạ karauʼm běllạu pasěllangeng darua ene: limam pul᷊o su metere.

²⁴Mase tau esẹ ene nẹ̌bawa si siạ sarang pasěllangenge su sěmběkan timuhẹ̌ dingangu něngukurẹ̌. Kutẹu nạung pasěllangeng ene e mẹ̌sul᷊ung dingangu manga pasěllangeng bal᷊ine.

²⁵Apạewen janela su manga kamare mẹ̌sul᷊ung dingangu su manga pasěllangenge lai wal᷊ine. Kanandung dal᷊awesangu pasěllangeng ene e 25 su metere, ringangu wěnahe 12,5 su metere.

²⁶Tatahidaěngu tumbal᷊atung arěgaʼm pitu mẹ̌tẹ̌timona sarang pasěllangeng ene e ringangu huange ghẹ̌guwạ e mal᷊aing piạ su pondol᷊e, tụtatěngo rělahu Wal᷊eʼm MAWU watuhu l᷊ikude. Manga meselẹ̌ batuhu ral᷊unge tụtatěngo ral᷊awesange, nilẹ̌gahengu ukirangu kaluʼm palěm.

²⁷Sene piạko l᷊ai pasěllangenge kụ mẹ̌tẹ̌timona sarang dělahe watuhu ral᷊unge. Tau esẹ ene e něnukạ karauʼm běllạu pasěllangeng darua ene: 50 su metere.

²⁸Tuhụ e tau esẹ ene e nẹ̌bawa si siạ limiu wọu pasěllangeng sěmběkan timuhẹ̌ masuẹ̌ bọu rělahẹ̌ batuhu ral᷊unge. I sie něnukạ pasěllangeng sěmběkan timuhẹ̌ ene, ringangu ukurange mẹ̌sul᷊ung dingangu manga pasěllangeng su sěmběkane watuhu l᷊ikude.

²⁹Manga kamaru lukade, huange ghẹ̌guwạ, dingangu manga meselẹ̌ kụ dal᷊unge mẹ̌sul᷊ungu ringangu apam piạ su manga pasěllangenge wal᷊ine. Manga kamarẹ̌ su pasěllangeng ini e mal᷊aing piạ manga janelane. Dal᷊awesang u pasěllangeng ene 25 su metere nandune ringangu wěnahe 12,5 su metere.

³⁰

³¹Arawe huange ghẹ̌guwạ e tụtatěngo rělahẹ̌ batuhu l᷊ikude. Manga meselẹ̌ batuhu ral᷊unge kụ tụtatěngo ral᷊awesange, mal᷊aing nilẹ̌ggahengu ukirangu kaluʼm palěm. Tatahidaěngu tumbal᷊atung arěgang ual᷊u e mẹ̌tẹ̌timona pasěllangeng ene.

³²Bọu ene tau esẹ ene nẹ̌bawa si siạ limiu wọu pasěllangeng su sěmběkan daki nasuẹ̌ su rělahẹ̌ batuhu ral᷊unge. I sie e něngukurẹ̌ pasěllangeng ene ringangu ukurange mẹ̌sul᷊ungu kere su manga pasěllangeng bal᷊ine e.

³³Manga kamaru lukadẹ̌ e, manga meselu ral᷊unge ringangu huange ghẹ̌guwạ ukurange mẹ̌sul᷊ungu kere su manga pasěllangeng bal᷊ine e. Su manga kamarẹ̌ ene, ringangu su huange ghẹ̌guwạ piạ manga janela. Kanandụ u ral᷊awesangu pasěllangeng ene e 25 su metere, ringangu wěnahe 12,5 su metere.

³⁴Huange ghẹ̌guwạ e tụtatěngo sarang dělahẹ̌ batuhu l᷊ikude. Apaʼm meselẹ̌ batuhu ral᷊unge kụ tụtatěngo ral᷊awesang, nilẹ̌gahengu manga kaluʼm palěm nipẹ̌kaketạ. Ual᷊uʼm baụ tatahidaěngu tumbal᷊atung e mẹ̌tẹ̌timona pasěllangeng ene.

³⁵Pěngěnsueěnge tau esẹ ene nẹ̌bawa si siạ sarang pasěllangeng su sěmběkan sawěnahẹ̌. I sie něngukurẹ̌ pasěllangeng ene e ringangu ukurange mẹ̌sul᷊ung dingangu su manga pasěllangeng bal᷊ine.

³⁶Kerene lai apang kamaru lukade, manga meselu ral᷊unge ringangu huange ghẹ̌guwạ mẹ̌sul᷊ungu kere su manga pasěllangeng kewe wal᷊ine e. Su manga kamare ringangu su huange ghẹ̌guwạ e piạ manga janela. Kanandụ u ral᷊awesangu pasěllangeng ene e 25 su metere, ringangu wěnahe 12,5 su metere.

³⁷Huange su těngone[81] mal᷊ain tụtatěngo sarang dělahe watuhu l᷊ikude. Manga meselẹ̌ batuhu ral᷊unge kụ tụtatěngo sarang dal᷊awesang, nilẹ̌gahengu manga kalum palěm bọu nịkakaketạ. Ual᷊um baụ tatahidaěngu tumbal᷊atung e mẹ̌tẹ̌timona pasěllangeng ene.

³⁸Su rělahẹ̌ batuhu l᷊ikude piạ kamarẹ̌ sěmbaụ su pasěllangeng batuhu ral᷊unge su sěmběkan sawěnahẹ̌. Bọu kamarẹ̌ tinamba ene piạ tukadẹ̌ sěmbaụ mẹ̌tẹ̌timona huange ghẹ̌guwạ. Seng sene e manga binatang uhaseng baugu sasěmba tẹ̌tutungang.

³⁹Su huange ghẹ̌guwạ ene e, piạ meda ěpạ, pẹ̌tahạ duam baụ suapan sěndihange. Su wowong manga meda ene pěmotokang binatang kụ makoạ sasěmba tẹ̌tutungang, arau sasěmba i pěndẹ̌dasẹ̌ dosa, arau sasěmba laaweng dugi.

⁴⁰Su l᷊ikudu huange ghẹ̌guwạ ene e piạ lai meda ěpạ, pẹ̌tahạ dua suapan sěndihangu pasěllangeng su sěmběkan sawěnahẹ̌ ene.

⁴¹Kụ kěbị e ual᷊uʼm baụ meda tampạu pěmotokang sasěmba: ěpạ su ral᷊unge, dingangu ěpạ su l᷊ikudu rělahẹ̌.

⁴²Meda ěpạ su kamarẹ̌ nitamba e paketang baugu pěndiahiang sasěmba tẹ̌tutungang kụ nipakang bọu watu. Meda ene rangẹ e sitengaʼm meterẹ̌, arawe wowone rasị e nẹ̌buku ěpạ, nandụ e ringangu wěnahe sěmbaụ-sěmbaụ e těllung kapahiakeng ěpạ bọu sěmeterẹ̌. Su wowong manga meda ene e kạdarěpehẹ̌ manga aghidẹ̌ papotọ binatang sasěmba.

⁴³Biwihu manga meda ene, piạ bawiwihe ghěnnangu 75 su milimetere. Kěbị gẹ̌si kụ sarung i sěmba e i pěllọ su wowong manga meda ene.

⁴⁴Bọu ene tau esẹ ene nẹ̌bawa si siạ sarang dělahẹ̌ batuhu ral᷊unge. Sene e piạ panonggene rarua, kụ sěmbaụ e su sěndihangu pasěllangeng batuhu sawěnahẹ̌, tụtatěngo sarang sěmběkan timuhẹ̌, arawe sěmbaụ e wue ute su sěndihangu pasěllangeng batuhu timuhẹ̌[82] dingangu tụtatěngo sarang sěmběkan sawěnahẹ̌.

⁴⁵Tau esẹ ene nẹ̌bera si siạ u panonggene kụ tụtatěngo sěmběkan timuhẹ̌ ene nisạdia waugu manga imang kụ piạ hal᷊ẹ̌ e su Wal᷊eʼm MAWU,

⁴⁶arawe panonggene kụ tụtatěngo sěmběkan sawěnahẹ̌ e nịdariahi waugu manga imang kụ piạ hal᷊ẹ̌ e su pananěmbaěng. Kal᷊awọu manga imang ene harusẹ̌ bọu hiten Zadok. Batụu wọu ghal᷊ipohon Lewi kětạeng hiten Zadok kụ botonge mẹ̌těngong MAWU waugu mẹ̌tangkiang si Sie su ral᷊ungu pẹ̌kakal᷊iomaneng.

⁴⁷Tau esẹ ene něngukurẹ̌ dělahẹ̌ batuhu ral᷊unge. Kakakoạ e nẹ̌buku ěpạ: nandune ringangu wěnahe tahạ 50 su metere. Wal᷊eng MAWU ene kaěbakeng su sěmběkaʼm bahẹ, dingangu su těngone e piạ pananěmbaěng sěmbaụ.

⁴⁸Bọu ene i sie e nẹ̌bawa si siạ sarang huange těngoʼm Bal᷊eʼm MAWU ringangu maawị tukadu tumbal᷊atung ene manga piram baụ. I sie něngukurẹ̌ huange sasuěkang; kal᷊oahe pitu kaliangu rarua sitenga su metere, ringangu manga rarěndunge su wiwihe ruaʼm běka kasuwenehe sěmbaụ sitenga su metere.[83] Su kaihi ringangu su koanenge piạ dihine měpudẹ̌ pẹ̌sěmbua. Papanonggene ene hala e nandune mapul᷊o su metere, ringangu wěnahe arěgang ěnnungu meterẹ̌.