Read Sangir YEHEZKIEL 41 Bible Online

YEHEZKIEL 41 - Sangir bible

YEHEZKIEL 41

¹Esẹ ene e nẹ̌bawa si siạ sarang dal᷊ungu kamarẹ̌ tal᷊oara, kụ i sẹ̌sẹ̌bạ Tampạ Kụ Susi. I sie něngukurẹ̌ dal᷊eng kụ mẹ̌tẹ̌timona ene: nandune tělluʼm meterẹ̌,[84]

²dingangu wěnahe lima meterẹ̌. Darěndungu sěndihange ruaʼm běka e dua meterẹ̌ sitenga suwenehe. Bọu ene i sie něngukurẹ̌ Tampạ Kụ Susi ene: nandune 20 su metere, dingangu wěnahe 10 meterẹ̌.

³Bọu ene i sie simuẹ̌ su kamarẹ̌ su ral᷊unge. I sie něngukurẹ̌ dal᷊eng kụ mẹ̌tẹ̌timona ene: nandune sěmeterẹ̌, běnahe tělluʼm meterẹ̌, dingangu rarěndung su sěndihange ruam běka e suwenehe těllu meterẹ̌ sitenga.[85]

⁴Bọu ene i sie něngukurẹ̌ kamarẹ̌ ene lai: kakakoạ e pinẹ̌buku ěpạ, nandụ e ringangu wěnahe sěmbaụ e tahạ pul᷊o meterẹ̌. Bọu ene i sie nẹ̌berạ si siạ. ”Ini e kai Tampạ Limembong Kasusiange.”

⁵Bọu ene tau esẹ ene něngukurẹ̌ meselẹ̌ su ral᷊unge wọu Wal᷊eʼm MAWU: suwenehe těllu meterẹ̌. Su meselẹ̌ mạngělikụ Bal᷊eʼm MAWU ene piạ manga kamare kụ běnahe rua meterẹ̌.

⁶Kal᷊awọu kamarẹ̌ ene tahạ těllu haweng, kụ pẹ̌sěhaweng e kamare tahạ tělluʼm pul᷊o su waụ e. Meselu l᷊ikude kakạdangẹ e hawenge kakạnipị e wọu meselu sěhaweng bawa, hakịu kal᷊awọu kamarẹ̌ ene e wotongewe i susung kụ tawahal᷊uasu mělohang darěndungu Wal᷊eʼm MAWU e.

⁷Bọu l᷊ikude, meselu Wal᷊eʼm MAWU ene i kasilo mẹ̌sul᷊ung suwenehe wọu wawa sarang dasị. Su meselẹ̌ su l᷊ikudu Wal᷊em MAWU, su sěmběkang likudu manga kamarẹ̌ ene, piạ tumbal᷊atung gẹ̌guwạ darua hakịu taumata wotonge makaawị bọu hawenge masanạ sarang hawenge karuane ringangu hawenge katěllune.

⁸Meselu l᷊ikudu manga kamarẹ̌ ene suwenehe rua meterẹ̌ sitenga. Bal᷊e ene piạ tukade mẹ̌tẹ̌timona apang kamarẹ̌ su sěmběkan sawěnahẹ̌ bọu Wal᷊eng MAWU, ringangu tukadẹ̌ bal᷊ine kụ mẹ̌tẹ̌timona apang kamarẹ̌ su sěmběkan timuhẹ̌. Su sěnaung mangělikụ Bal᷊em MAWU piạ ěntanane lengehẹ̌ kụ běnahe rua meterẹ̌ sitenga karangẹ e těllu meterẹ̌ bọu tenene, ringangu nịkakoạ mẹ̌sul᷊ung karangẹ e ringangu manga kamarẹ̌ su meselu Wal᷊em MAWU. Su wěllạu ěntana lengehẹ̌ dingangu manga ghodoěng kụ nipakẹ u manga imang, piạ tanumbal᷊ene kụ běnahe mapul᷊o meterẹ̌ su kaihi ringangu koaneng Wal᷊eng MAWU.

¹²Su sěmběkan dělahe batuhu pungu wahẹ, piạ bal᷊e ghěguwạ kụ nandune ěpạ u pul᷊o l᷊ima su metere ringangu wěnahe těllum pul᷊o l᷊ima su metere, arawe suwenehu rarěndunge rua meterẹ̌ sitenga.

¹³Manga esẹ ene něngukurẹ̌ nandụ u Wal᷊em MAWU e: l᷊imam pul᷊o su metere. Wọu sěmběkang l᷊ikudu Wal᷊em MAWU e sarang meselu likudu wal᷊e ghẹ̌guwạ ene su sěmběkam bahẹ e karaune lai limam pul᷊o su metere.

¹⁴Bahageang těngone wọu Wal᷊eng MAWU kụ tụtatěngo sěmběkan daki wọu rělahẹ̌ su kaihi ringangu koanenge, wěnahe lai limam pul᷊o su metere.

¹⁵Manga esẹ ene lai něngukurẹ̌ bal᷊e ghẹ̌guwạ kụ tụtatěngo rělahe su sěmběkaʼm bahẹ: běnahe limam pul᷊o su metere, nasowa manga rarěndunge kaihi ringangu koanenge. Manga kamarẹ̌ su Wal᷊eʼm MAWU, kamarẹ̌ su těngone, Tampạ Kụ Susi, ringangu Tampạ Kasusiange,

¹⁶nilěgahengu wingke kalu, wọu ěnsal᷊ị e sarang manga těbane. Manga těba ene ikatakạbeng dal᷊anse.

¹⁷Kal᷊awọu rarěndung bahageange su ral᷊unge nilěgahengu manga kalu niketạ;

¹⁸kalum palěm dingangu kerub, kalum palěm sěmbaụ su wělạu kerub darua. Kerub ene piạ gatine rarua,

¹⁹sěmbaụ gatin taumata kụ tụtatěngo sarang kaluʼm palěm sěmběka kaihi, ringangu ghatin singa kụ tụtatěngo kaluʼm palěm su sěmběkang koaneng. Manga kalu niketạ ene e kaěbakeng su kasěllahu Wal᷊em MAWU,

²⁰nanětạ bọu ěnsal᷊ị e sarang bowon tukadẹ̌.

²¹Manga rihiʼn tukadẹ̌ e wọu Tampạ Kụ Susi kụ nẹ̌buku ěpạ. Su těngon Tampạ Kụ Kasusiange, piạ barang sěmbaụ kụ kakěllaěng al᷊ingkai pananěmbaěng bọu kalu.

²²Dangẹ e sěmeterẹ̌ sitenga ringangu wěnahe sěmeterẹ̌. Manga wukune, bal᷊ahuange[86] ringangu rarěndunge nikoạ bọu kalu. Manga esẹ ene nẹ̌bera si siạ, ”Seng ini e meda kụ ene su těngon darěntam MAWU.”

²³Su pondol᷊u ral᷊eng mẹ̌tẹ̌timona Tampạ Kụ Susi piạ tukadẹ̌ sěmbaụ, kerene lai supondal᷊u ral᷊eng kụ mẹ̌tẹ̌timona Tampạ Kụ Limembong Kasusiange.

²⁴Manga tukadẹ̌ ene, piạ duam běka pěpal᷊e natope su tal᷊oarane.

²⁵Manga tukadu Tampạ Kụ Susi e nilẹ̌gahengu manga kalum palěm niketạ dingangu manga kerub, kere su manga rarěndunge. Su těngong huange su horone watuhu likude, piạ dal᷊anse wọu kalu.

²⁶Su sěndihangu rarěndunge ruam běka wahageang sěndihange, piạ manga těbane, masene rarěndunge nilěgahengu kalum palěm niketạ.[87]