Read Sangir YEHEZKIEL 42 Bible Online

YEHEZKIEL 42 - Sangir bible

YEHEZKIEL 42

¹Bọu ene manga esẹ ene němpẹ̌bawa si siạ sarang dělahẹ̌ su l᷊ikude ringangu něngahạ si siạ sarang bal᷊e wal᷊ine su sěmběkan sawěnahẹ̌ bọu Wal᷊em MAWU, tawẹ karaune wọu wal᷊e ghẹ̌guwạ su sěmběkaʼm bahẹ bọu Wal᷊em MAWU ene.

²Bal᷊e ene nandune limam pul᷊o su metere, ringangu wěnahe duam pul᷊o lima su metere.

³Sěndihange sěmbaụ bọu wal᷊e ene e tụtatěngo sarang tanumbal᷊ene kụ běnahe mapul᷊o su metere ene, arawe sěndihange wal᷊ine e tụtatěngo ěnsal᷊ị e watu su rělahẹ̌ batuhu l᷊ikude. Bal᷊e ene e těllu haweng: apang hawenge simuẹ̌ limembong karal᷊unge wọu hawenge kawawaěnge.

⁴Su těngong manga kamarẹ̌ ene, watuhu ral᷊unge piạ dal᷊enge kụ běnahe lima meterẹ̌ dingangu nandune limam pul᷊o su metere.[88] Manga těbane tụtatěngo sěmběkan sawěnahẹ̌.

⁵Manga kamarẹ̌ su wowone rasị limembong kahepọ e wọu manga kamarẹ̌ su apang hawenge wawa, watụ u manga ral᷊eng darodọ su těngong manga kamarẹ̌ su wowone ene e limembong kawěnahe wọu apang su al᷊unge.

⁶Manga kamarẹ̌ ene těllu haweng dingangu tawe nituilu manga rihi kere su manga ghodoěng su rělahẹ̌.

⁷Sěngkapahiakeng darua wọu hawenge wawa, kanandung duam pul᷊o l᷊ima su metere nakoạ kere meselẹ̌ samatang, arawe su wahageang lembone, mal᷊aing kanandung duam pul᷊o l᷊ima su metere, nipětị apang kamarẹ̌. Su wowone rasị karangetange piạ manga kamarẹ̌ kanandung godoěng ene.

⁹Su al᷊ungu manga kamarẹ̌ su pondol᷊e sěmběkan daki wọu wal᷊e ini, ringangu su pondol᷊u meselẹ̌, piạ tukadẹ̌ sěmbaụ kụ mẹ̌tẹ̌timona sarang dělahe su l᷊ikude. Su sěndihange sěmběkan timuhẹ̌[89] bọu Wal᷊em MAWU, piạ bal᷊e mẹ̌sul᷊ung, kụ pěllọ e tawẹ kararaune wọu wal᷊e su sěmběkam bahẹ.

¹¹Su těngom manga kamare piạ dal᷊eng darodọ sěmbaụ kụ mẹ̌sul᷊ungu kere ral᷊eng darodọ su sěmběkan sawěnahẹ̌. Ukurange, modelẹ̌ e mẹ̌sul᷊ung, dingangu manga tukadẹ̌ e mal᷊aing mẹ̌sul᷊ung.

¹²Su al᷊ungu manga kamarẹ̌ su sěndihange watuhu timuhẹ̌, kụ su pondol᷊e sěmběkan daki su wanggilu meselẹ̌ piạ lai tukadẹ̌ sěmbaụ.

¹³Manga esẹ ene nẹ̌bera si siạ, ”Bal᷊e rarua ene e susi. Sene, manga imang kụ botonge mẹ̌tẹ̌ngon darěntaʼm MAWU, mahungkaěng manga gaghěllị kasusiange. Sene lai harusẹ̌ ipěllọ i sire manga gaghěllị kụ kasusiange, kụ kai: ghaghěllị gandung dingangu gaghěllị darědasẹ̌ dosa arau gaghěllị laaweng dugi.

¹⁴Kereu manga imang nasue něhal᷊ẹ̌ su Wal᷊eʼm MAWU, ringangu mapulu makoạ sarang dělahẹ̌ su l᷊ikude, tangu pakeang tani kụ niluhen sire su tempong mẹ̌tangkiang pẹ̌kakal᷊iomaneng ute harusẹ̌be itěntang i sire su manga kamarẹ̌ ene. I sire harusẹ̌ pẹ̌pakẹ u pakeang bal᷊ine, wọu ene wuhụ e i sire wotonge makoạ sarang tampạ u kawanua mẹ̌tampung.”

¹⁵Sarětạeng nasueng ukure su tau esẹ ene kěbị pẹ̌bawal᷊eěng su Wal᷊eʼm MAWU sěmběka ral᷊unge i sie nẹ̌bawa si siạ sarang sasuěkang su sěmběkan daki mase něngukurẹ̌ kạguwạu Wal᷊em MAWU.

¹⁶Dingangu těking sasukạ e i sie něngukurẹ̌ sěndihange su sěmběkan daki: Dua hasụ limam pul᷊o su metere.

¹⁷Bọu ene i sie něngukurẹ̌ sěndihange sěmběkan sawěnahẹ̌, sěndihange sěmběkan timuhẹ̌, dingangu sěndihange sěmběkam bahẹ; apan sěndihange nandune mẹ̌sul᷊ung, kụ dua hasụ limam pul᷊o su metere.

²⁰Kụ kakaianengu Wal᷊em MAWU e su ěntana e nẹ̌buku ěpạ, tangu ukurange dua hasụ limam pul᷊o su metere kěbị sěndihange ěpạ. Ěntana sěmpalang ene e nilikutangu meselẹ̌ sěmbaụ baugu pěměta tampạ kụ nitani waugu MAWU wọu tampạ kụ baugu l᷊awọ.